المعجم الكبير للطبراني

سیدنا عرباض بن ساریہ رضی اللہ عنہ کہتے ہیں: رسول اللہ ﷺ اگلی صف پر تین بار درود (دعا) بھیجتے اور اس کے بعد والی صف پر ایک بار۔

سیدنا عرباض بن ساریہ رضی اللہ عنہ کہتے ہیں: رسول اللہ ﷺ اگلی صف کے لیے تین بار استغفار فرماتے اور دوسری صف کے لیے ایک بار۔

سیدنا عرباض بن ساریہ رضی اللہ عنہ سے روایت ہے کہ نبی کریم ﷺ اگلی صف کے لیے تین بار استغفار فرماتے اور دوسری صف کے لیے ایک بار۔

سیدنا عرباض بن ساریہ رضی اللہ عنہ کہتے ہیں: رسول اللہ ﷺ نے اگلی صف پر تین بار دعا فرمائی اور دوسری صف پر ایک بار۔

سیدنا عرباض بن ساریہ رضی اللہ عنہ سے روایت ہے کہ رسول اللہ ﷺ نے فرمایا: ”ہر عمل انسان کے مرنے پر منقطع ہو جاتا ہے، سوائے اس شخص کے جو اللہ کی راہ میں سرحد کی پہرہ داری (رباط) کر رہا ہو، اس کا عمل بڑھتا رہتا ہے اور اسے قیامت تک اس کا رزق ملتا رہتا ہے۔“

سیدنا عرباض بن ساریہ رضی اللہ عنہ بیان کرتے ہیں کہ رسول اللہ ﷺ نے ایک دن ایک بلیغ وعظ فرمایا جس سے آنکھیں بہہ پڑیں اور دل خوفزدہ ہو گئے، تو مسلمانوں میں سے ایک شخص نے عرض کیا: یا رسول اللہ! گویا یہ الوداع کرنے والے کا وعظ ہے، سو آپ ہم سے کیا عہد لیتے ہیں؟ آپ ﷺ نے فرمایا: ”میں نے تمہیں ایسے سفید (روشن) راستے پر چھوڑا ہے کہ اس کی رات بھی اس کے دن جیسی ہے، میرے بعد تم میں سے صرف ہلاک ہونے والا ہی اس سے ہٹے گا، اور تم میں سے جو زندہ رہے گا وہ بہت اختلاف دیکھے گا، سو بدعتوں سے بچنا، اور میری سنت اور خلفائے راشدین کی سنت کو لازم پکڑنا، اسے دانتوں سے مضبوطی سے پکڑ لینا، اور سننے اور اطاعت کرنے کو لازم پکڑنا، اگرچہ وہ حبشی غلام ہی کیوں نہ ہو۔“