المعجم الكبير للطبراني

سیدنا عوف بن مالک اشجعی رضی اللہ عنہ کہتے ہیں: ہم رسول اللہ ﷺ کے ساتھ آپ کے بعض غزوات میں تھے، ایک رات میری آنکھ کھلی تو میں نے رسول اللہ ﷺ کو ان کی جگہ پر نہ پایا، اور آپ ﷺ کے صحابہ ایسے (بےسدھ) تھے گویا ان کے سروں پر پتھر رکھے ہوں، اور اونٹ اپنی گردنیں (زمین پر) رکھے ہوئے تھے۔ اچانک مجھے ایک سایہ نظر آیا جو میری طرف بڑھا اور میں اس کی طرف بڑھا، تو دیکھا کہ وہ معاذ بن جبل رضی اللہ عنہ ہیں۔ میں نے پوچھا: رسول اللہ ﷺ کہاں ہیں؟ انہوں نے کہا: میرے پیچھے۔ پھر مجھے ایک اور سایہ نظر آیا جو میری طرف بڑھا اور میں اس کی طرف بڑھا، تو دیکھا کہ وہ ابوموسیٰ اشعری رضی اللہ عنہ ہیں۔ (راوی کہتے ہیں:) پھر مجھے حمید بن ہلال نے ابوبردہ بن ابی موسیٰ کے واسطے سے سیدنا عوف بن مالک اشجعی رضی اللہ عنہ سے بیان کیا، وہ کہتے ہیں: میں نے ابوموسیٰ کے پیچھے چکی کی گڑگڑاہٹ جیسی آواز سنی، میں نے پوچھا: نبی کریم ﷺ کہاں ہیں؟ انہوں نے کہا: میرے پیچھے، وہ آ رہے ہیں، تو دیکھا رسول اللہ ﷺ وہاں موجود ہیں، میں نے عرض کیا: یا رسول اللہ، نبی جب دشمن کی سرزمین میں ہو تو اس کے پاس پہرہ دار ہوتے ہیں۔ نبی کریم ﷺ نے فرمایا: ”میرے رب عزوجل کی طرف سے ایک آنے والا میرے پاس آیا اور مجھے اختیار دیا کہ میری آدھی امت جنت میں داخل ہو یا شفاعت مل جائے، تو میں نے شفاعت کو چنا۔“ معاذ رضی اللہ عنہ نے عرض کیا: میرے ماں باپ آپ پر قربان ہوں، آپ میری قرابت اور منزلت جانتے ہیں، مجھے بھی انہی میں سے بنا دیں۔ آپ ﷺ نے فرمایا: ”تم انہی میں سے ہو۔“ تو عوف اور ابوموسیٰ رضی اللہ عنہما نے عرض کیا: یا رسول اللہ، آپ جانتے ہیں کہ ہم نے اللہ اور اس کے رسول کو ترجیح دیتے ہوئے اپنے گھر والوں کو چھوڑا، ہمیں بھی انہی میں سے بنا دیں۔ آپ ﷺ نے فرمایا: ”یہ ہر مسلمان کے لیے ہے، تم دونوں بھی انہی میں سے ہو۔“ پھر ہم لوگوں کے پاس پہنچے جب وہ پکار رہے تھے، تو نبی کریم ﷺ نے فرمایا: ”بیٹھ جاؤ۔“ وہ بیٹھ گئے گویا کوئی کھڑا ہی نہیں ہوا تھا، تو نبی کریم ﷺ نے فرمایا: ”میرے رب کی طرف سے ایک آنے والا میرے پاس آیا اور مجھے اختیار دیا کہ میری آدھی امت جنت میں داخل ہو یا شفاعت مل جائے، تو میں نے شفاعت کو چنا۔“ تو لوگوں نے کہا: یا رسول اللہ، ہمیں بھی انہی میں سے بنا دیں۔ رسول اللہ ﷺ نے فرمایا: ”خاموش ہو جاؤ۔“ وہ خاموش ہو گئے گویا کسی نے کوئی بات ہی نہیں کی تھی، تو رسول اللہ ﷺ نے فرمایا: ”میری شفاعت اس کے لیے ہے جو اس حال میں مرے کہ وہ اللہ کے ساتھ کسی کو شریک نہ ٹھہراتا ہو۔“

سیدنا عوف بن مالک اشجعی رضی اللہ عنہ کہتے ہیں: ایک رات رسول اللہ ﷺ نے ہمارے ساتھ (رات کے آخری حصے میں) پڑاؤ ڈالا، ہم میں سے ہر ایک نے اپنی سواری کے بازو کو بچھونا بنا لیا۔ رات کے کسی حصے میں میری آنکھ کھلی تو دیکھا کہ نبی کریم ﷺ کی اونٹنی ہے اور اس کے آگے کوئی نہیں، میں رسول اللہ ﷺ کو تلاش کرنے نکلا تو دیکھا کہ معاذ بن جبل اور عبداللہ بن قیس رضی اللہ عنہما کھڑے ہیں، میں نے پوچھا: رسول اللہ ﷺ کہاں ہیں؟ ان دونوں نے کہا: ہمیں معلوم نہیں، سوائے اس کے کہ ہم نے وادی کی بلندی سے چکی کی آواز جیسی ایک آواز سنی تھی، تھوڑی ہی دیر میں نبی کریم ﷺ ہمارے پاس تشریف لے آئے اور فرمایا: ”میرے رب کی طرف سے ایک آنے والا میرے پاس آیا اور مجھے اختیار دیا کہ میری آدھی امت جنت میں داخل ہو یا شفاعت مل جائے، تو میں نے شفاعت کو چنا۔“ ہم نے عرض کیا: یا رسول اللہ، ہم آپ کو اللہ اور اپنی صحبت کا واسطہ دیتے ہیں کہ ہمیں شفاعت والوں میں سے بنا دیں۔ آپ ﷺ نے فرمایا: ”تم میری شفاعت کے اہل میں سے ہو۔“ پھر ہم سب ایک دوسرے سے آگے بڑھتے ہوئے لوگوں کی طرف روانہ ہوئے تو دیکھا لوگ گھبرائے ہوئے ہیں اور انہوں نے اپنے نبی کو موجود نہ پایا تھا، تو آپ ﷺ نے فرمایا: ”میرے رب کی طرف سے ایک آنے والا میرے پاس آیا اور مجھے اختیار دیا کہ میری آدھی امت جنت میں داخل ہو، اور شفاعت، تو میں نے شفاعت کو چنا۔“ انہوں نے عرض کیا: یا رسول اللہ، ہم آپ کو اللہ اور اپنی صحبت کا واسطہ دیتے ہیں کہ ہمیں اپنی شفاعت والوں میں سے بنا دیں، جب وہ اصرار کرنے لگے تو آپ ﷺ نے فرمایا: ”میں تمہیں گواہ بناتا ہوں کہ میری شفاعت میری امت میں سے اس کے لیے ہے جو اس حال میں مرے کہ اللہ کے ساتھ کسی کو شریک نہ ٹھہراتا ہو۔“