المعجم الكبير للطبراني

سیدنا ابن عمر رضی اللہ عنہما سے روایت ہے کہ رسول اللہ ﷺ نے منبر پر یہ آیت پڑھی: ”اور انہوں نے اللہ کی قدر نہیں کی جیسی اس کی قدر کرنی چاہیے تھی“ [سورۃ الانعام: 91] آخر آیت تک، تو منبر اس طرح اور اس طرح ہلنے لگا - یعنی منبر جھوم اٹھا۔

سیدنا ابن عمر رضی اللہ عنہما فرماتے ہیں کہ نبی کریم ﷺ نے فرمایا: ”جو کسی نابینا کو چالیس قدم چلائے، اس کے لیے جنت واجب ہو گئی۔“

محمد بن منکدر رحمہ اللہ کہتے ہیں: ایک ملاقاتی نے سیدنا ابن عمر رضی اللہ عنہما سے ملاقات کی، اس وقت وہ ایک ایسی بوڑھی اونٹنی پر سوار تھے جو دس درہم کی بھی نہ ہو۔ اس نے ان سے کہا: اے ابو عبدالرحمٰن! کیا آپ اسی پر حج کریں گے؟ انہوں نے فرمایا: ہاں، میں نے رسول اللہ ﷺ کو یہ فرماتے سنا ہے: ”حج مت چھوڑو، خواہ ایسی اونٹنی پر ہی کیوں نہ ہو جو دس درہم کی ہو۔“ اللہ کی قسم! میرے پاس اس کے سوا کوئی سواری موجود نہیں تھی، اور میں حج چھوڑنے والا نہ تھا۔

سیدنا عبداللہ بن عمر رضی اللہ عنہما فرماتے ہیں: رسول اللہ ﷺ جب نماز شروع کرتے تو فرماتے: ”میں نے یکسو اور فرمانبردار ہو کر اپنا رخ اس ذات کی طرف کیا جس نے آسمانوں اور زمین کو پیدا کیا، اور میں مشرکوں میں سے نہیں ہوں۔ پاک ہے تو اے اللہ! تیری ہی تعریف کے ساتھ، تیرا نام بابرکت ہے، تیری شان بلند ہے، اور تیرے سوا کوئی معبود نہیں۔ بےشک میری نماز، میری قربانی، میرا جینا اور میرا مرنا اللہ ہی کے لیے ہے جو تمام جہانوں کا رب ہے، اس کا کوئی شریک نہیں، اور مجھے اسی کا حکم دیا گیا ہے، اور میں مسلمانوں میں سے ہوں۔“