المعجم الكبير للطبراني

سیدنا ابو امامہ رضی اللہ عنہ سے روایت ہے کہ ایک نوجوان رسول اللہ ﷺ کے پاس آیا اور عرض کیا: یا رسول اللہ! مجھے زنا کی اجازت دے دیجیے۔ لوگوں نے اسے ڈانٹا، تو آپ ﷺ نے فرمایا: ”رکو (اسے کچھ نہ کہو)۔“ پھر رسول اللہ ﷺ نے فرمایا: ”اسے قریب بٹھاؤ۔“ وہ قریب آ کر رسول اللہ ﷺ کے سامنے بیٹھ گیا، تو رسول اللہ ﷺ نے اس سے فرمایا: ”کیا تو یہ اپنی ماں کے لیے پسند کرتا ہے؟“ اس نے کہا: نہیں۔ فرمایا: ”اسی طرح لوگ بھی اسے اپنی ماؤں کے لیے پسند نہیں کرتے، کیا تو یہ اپنی بیٹی کے لیے پسند کرتا ہے؟“ اس نے کہا: نہیں۔ فرمایا: ”اسی طرح لوگ بھی اسے اپنی بیٹیوں کے لیے پسند نہیں کرتے، کیا تو یہ اپنی بہن کے لیے پسند کرتا ہے؟“ اس نے کہا: نہیں۔ فرمایا: ”اسی طرح لوگ بھی اسے اپنی بہنوں کے لیے پسند نہیں کرتے، کیا تو یہ اپنی پھوپھی کے لیے پسند کرتا ہے؟“ اس نے کہا: نہیں۔ فرمایا: ”اسی طرح لوگ بھی اسے اپنی پھوپھیوں کے لیے پسند نہیں کرتے، کیا تو یہ اپنی خالہ کے لیے پسند کرتا ہے؟“ اس نے کہا: نہیں۔ فرمایا: ”اسی طرح لوگ بھی اسے اپنی خالاؤں کے لیے پسند نہیں کرتے۔“ پھر رسول اللہ ﷺ نے اپنا دستِ مبارک اس کے سینے پر رکھا اور فرمایا: ”اے اللہ! اس کے گناہ کو بخش دے، اس کے دل کو پاک کر دے، اور اس کی شرمگاہ کو محفوظ رکھ۔“

سیدنا ابو امامہ رضی اللہ عنہ سے روایت ہے: ”رسول اللہ ﷺ کے گھر والوں کے پاس جو کے کھانے کے سوا کچھ بچا نہیں رہتا تھا۔“