المعجم الكبير للطبراني

سیدنا سلمہ بن اکوع رضی اللہ عنہ بیان کرتے ہیں: میں جنگلی جانوروں کا شکار کرتا اور ان کا گوشت رسول اللہ ﷺ کی خدمت میں ہدیہ کرتا تھا، ایک بار رسول اللہ ﷺ نے مجھے نہ پایا تو پوچھا: ”سلمہ کہاں رہتا ہے؟“ میں نے عرض کیا: یا رسول اللہ! ہم شکار کی تلاش میں دور نکل جاتے ہیں، میں تو عقیق کے قریب گھر کی طرف سے شکار کرتا ہوں۔ آپ ﷺ نے فرمایا: ”اگر تم عقیق میں شکار کرتے تو جب تم جاتے تو میں تم سے آگے نکل جاتا، اور جب تم آتے تو میں تمہارا استقبال کرتا، کیونکہ مجھے عقیق پسند ہے۔“

سیدنا سلمہ بن اکوع رضی اللہ عنہ بیان کرتے ہیں: نبی کریم ﷺ کا ایک غلام تھا جسے یسار کہا جاتا تھا، آپ ﷺ نے اسے اچھی طرح نماز پڑھتے دیکھا تو اسے آزاد کر دیا، اور اسے حرہ کے علاقے میں اپنی دودھ دینے والی اونٹنیوں کے پاس بھیج دیا جہاں وہ رہتا تھا۔ اسی دوران عُرَینہ قبیلے کے کچھ لوگ جو یمن سے تھے، اسلام ظاہر کر کے آئے اور وہ بیمار اور نقاہت زدہ تھے، ان کے پیٹ بڑے ہو چکے تھے، تو نبی کریم ﷺ نے انہیں یسار کے پاس بھیج دیا، وہ اونٹوں کا دودھ پیتے رہے یہاں تک کہ ان کے پیٹ ٹھیک ہو گئے، پھر انہوں نے یسار پر حملہ کر کے اسے ذبح کر دیا، اور اس کی آنکھوں میں کانٹے چبھو دیے، پھر اونٹوں کو ہانک کر لے گئے۔ نبی کریم ﷺ نے مسلمانوں میں سے کچھ سوار ان کے تعاقب میں بھیجے جن کے سردار کُرز بن جابر الفہری تھے، انہوں نے ان کو جا لیا اور پکڑ کر لے آئے، پھر ان کے ہاتھ پاؤں کاٹ دیے گئے اور ان کی آنکھیں پھوڑ دی گئیں۔

سیدنا سلمہ بن اکوع رضی اللہ عنہ بیان کرتے ہیں: سیدنا طلحہ بن عبیداللہ رضی اللہ عنہ نے پہاڑ کی جانب ایک کنواں خریدا اور ایک اونٹ ذبح کر کے لوگوں کو کھانا کھلایا، تو رسول اللہ ﷺ نے فرمایا: ”اے طلحہ! تم بڑے سخی ہو۔“