المعجم الكبير للطبراني

سیدنا سہل بن سعد رضی اللہ عنہ سے روایت ہے کہ رسول اللہ ﷺ نے فرمایا: ”جنت کا ایک کوڑا دنیا اور اس کی ہر چیز سے بہتر ہے، اور اللہ کی راہ میں صبح کو نکلنا یا شام کو نکلنا دنیا اور اس کی ہر چیز سے بہتر ہے۔“

اسی سند سے سیدنا سہل بن سعد رضی اللہ عنہ سے مروی ہے: میں اس وقت نبی کریم ﷺ کے پاس موجود تھا جب آپ کے سامنے کے دانت (رباعیہ) توڑ دیے گئے، آپ کا چہرہ مبارک زخمی کر دیا گیا اور آپ کے سر پر خود توڑ دیا گیا۔ میں جانتا ہوں کہ آپ کے چہرے سے خون کون دھو رہا تھا، کون آپ پر پانی لا رہا تھا، اور آپ کے زخم پر کیا رکھا گیا یہاں تک کہ خون تھم گیا۔ رسول اللہ ﷺ کی صاحبزادی سیدہ فاطمہ رضی اللہ عنہا آپ کے چہرے سے خون دھو رہی تھیں اور سیدنا علی رضی اللہ عنہ ڈھال میں ان کے پاس پانی لا رہے تھے۔ جب انہوں نے اپنے والد کے چہرے سے خون دھو لیا تو ایک چٹائی جلائی، یہاں تک کہ جب وہ راکھ ہو گئی تو اس راکھ میں سے کچھ لے کر آپ کے چہرے پر رکھ دی یہاں تک کہ خون تھم گیا۔ پھر (سہل رضی اللہ عنہ نے) کہا: ”اس دن اللہ کا غضب اس قوم پر سخت ہو گیا جس نے رسول اللہ ﷺ کا چہرہ مبارک زخمی کیا تھا۔“ پھر آپ ﷺ کچھ دیر خاموش رہے، پھر فرمایا: ”اے اللہ! میری قوم کو بخش دے، کیونکہ وہ نہیں جانتے۔“