المعجم الكبير للطبراني

عروہ رحمہ اللہ کہتے ہیں: ”عقبہ میں شریک ہونے والے انصار میں سے، پھر بنی حارث بن خزرج میں سے، بشیر بن سعد تھے، اور وہ بدر میں بھی شریک تھے۔“

عروہ رحمہ اللہ کہتے ہیں: ”بدر میں شریک ہونے والے انصار میں سے، بنی زید بن مالک بن ثعلبہ بن کعب بن خزرج بن حارث بن خزرج میں سے، بشیر بن سعد بن ثعلبہ بن جِلاس تھے۔“

ابن شہاب زہری رحمہ اللہ کہتے ہیں: ”عقبہ میں شریک ہونے والے انصار میں سے، پھر بنی حارث بن خزرج میں سے، بشیر بن سعد ابوالنعمان تھے۔“

سیدنا بشیر بن سعد رضی اللہ عنہ، جو رسول اللہ ﷺ کے صحابی ہیں، کہتے ہیں کہ رسول اللہ ﷺ نے فرمایا: ”مومن کا مومن کے ساتھ درجہ سر کا جسم کے ساتھ درجہ ہے، جب جسم کو تکلیف ہوتی ہے تو سر کو بھی تکلیف محسوس ہوتی ہے، اور جب سر کو تکلیف ہوتی ہے تو باقی جسم کو بھی تکلیف محسوس ہوتی ہے۔“

سیدنا نعمان بن بشیر رضی اللہ عنہ اپنے والد سیدنا بشیر بن سعد رضی اللہ عنہ سے، اور وہ نبی کریم ﷺ سے روایت کرتے ہیں کہ آپ ﷺ نے فرمایا: ”اللہ اس بندے پر رحم فرمائے جس نے میری بات سنی اور اسے یاد رکھا، کیونکہ بسا اوقات فقہ کا حامل خود فقیہ نہیں ہوتا، اور بسا اوقات فقہ کا حامل اسے اپنے سے زیادہ فقیہ تک پہنچا دیتا ہے۔“
”تین چیزیں ایسی ہیں جن پر مومن کا دل کبھی کینہ نہیں رکھتا: اللہ کے لیے عمل کو خالص رکھنا، مسلمانوں کے حکمرانوں کی خیرخواہی کرنا، اور مسلمانوں کی جماعت کو لازم پکڑنا۔“