المطالب العالية بزوائد المسانيد الثمانية

سیدنا سوید بن غفلہ رضی اللہ عنہ سے روایت ہے کہ سیدنا علی رضی اللہ عنہ کے پاس قومِ زط کے کچھ لوگ لائے گئے، راوی کا بیان ہے کہ میرا گمان ہے کہ آپ نے انہیں قتل کر دیا تھا۔ پھر آپ نے آسمان کی طرف دیکھا، پھر زمین کی طرف دیکھا اور فرمایا: «اللهُ أَكْبَرُ صَدَقَ اللهُ وَرَسُولُهُ» ”اللہ سب سے بڑا ہے، اللہ اور اس کے رسول نے سچ فرمایا“، اس جگہ گڑھا کھودو، نہیں بلکہ اس جگہ کھودو۔ پھر آپ نے دوبارہ آسمان اور پھر زمین کی طرف دیکھا اور فرمایا: «اللهُ أَكْبَرُ صَدَقَ اللهُ وَرَسُولُهُ» ”اللہ سب سے بڑا ہے، اللہ اور اس کے رسول نے سچ فرمایا“، اس مقام پر گڑھا کھودو۔ راوی کہتے ہیں کہ لوگوں نے گڑھا کھودا اور آپ نے انہیں اس میں ڈال دیا (دفن کر دیا)۔ پھر آپ تشریف لے گئے تو میں آپ کی خدمت میں حاضر ہوا اور عرض کی: آپ ابھی جو عمل فرما رہے تھے اس کے متعلق آپ کا کیا خیال ہے؟ کیا رسول اللہ ﷺ نے ان لوگوں کے بارے میں آپ سے کوئی عہد (پیش گوئی یا حکم) فرمایا تھا؟ آپ رضی اللہ عنہ نے فرمایا: ”یقیناً میرا آسمان سے زمین پر گر جانا مجھے اس بات سے زیادہ محبوب ہے کہ میں رسول اللہ ﷺ کے ذمے ایسی بات لگاؤں جو آپ نے نہیں فرمائی، دراصل میں تو صرف ایک جنگی چال چلنے والا ہوں، تمہارا کیا خیال ہے اگر میں یہ کہتا کہ «اللهُ أَكْبَرُ صَدَقَ اللهُ وَرَسُولُهُ» ”اللہ سب سے بڑا ہے، اللہ اور اس کے رسول نے سچ فرمایا“، اس جگہ گڑھا کھودو، تو (اس کا کیا نتیجہ ہوتا)؟“ یہ حدیث صحیح ہے۔

المسیب بن نجبہ سے روایت ہے کہ ہم سیدنا حسن بن علی رضی اللہ عنہما کی خدمت میں حاضر ہوئے تو آپ نے بیان کیا کہ رسول اللہ ﷺ نے ارشاد فرمایا ہے: ”جنگ ایک (جنگی) چال ہے“؛ اس روایت کی متابعت محمد بن سعید نے عبداللہ بن بکیر سے کی ہے اور اسے امام بزار نے بھی روایت کیا ہے۔

سیدنا عبداللہ بن سلام رضی اللہ عنہ سے روایت ہے کہ نبی کریم ﷺ نے ارشاد فرمایا: ”جنگ تو ایک (جنگی) چال کا نام ہے“۔