مجمع الزوائد ومنبع الفوائد

سیدنا جابر رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مجھے یہ امید ہے کہ میری امت میں سے جو لوگ میری پیروی کریں گے ، قیامت کے دن وہ اہل جنت کا چوتھائی حصہ ہوں گے ، راوی کہتے ہیں : تو ہم نے تکبیر کہی ، پھر نبی اکرم صلی اللہ علیہ وسلم نے ارشاد فرمایا : مجھے یہ امید ہے کہ وہ لوگوں کا ( یعنی اہل جنت کا ) ایک تہائی حصہ ہوں گے ، راوی کہتے ہیں : تو ہم نے تکبیر کہی ، پھر نبی اکرم صلی اللہ علیہ وسلم نے ارشاد فرمایا : مجھے یہ امید ہے کہ وہ ( یعنی میری امت کے افراد ، اہل جنت کا ) نصف ہوں گے ۔ “
یہ روایت امام أحمد نے ، امام بزار نے اور امام طبرانی نے معجم اوسط میں نقل کی ہے ہزار کے رجال صحیح کے رجال ہیں اور أحمد کی دو اسناد میں سے ایک کے رجال اسی طرح ہیں ۔

سیدنا ابوموسیٰ اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اہل جنت کی ایک سو بیس صفیں ہوں گی اور اُن میں سے میری امت کی اسّی صفیں ہوں گی اور باقی تمام امتوں کی چالیس صفیں ہوں گی ۔ “
یہ روایت امام طبرانی نے معجم اوسط اور معجم کبیر میں نقل کی ہے اس کی سند میں ایک راوی سوید بن عبدالعزیز ہے اور وہ انتہائی ضعیف ہے ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم نے ہم سے فرمایا : ” اہل جنت کا چوتھا حصہ ہونے پر تمہارا کیا عالم ہو گا ؟ تمہیں اس کا ایک چوتھائی مل جائے ، اور باقی سب لوگوں کو اس کا تین چوتھائی ملے ، ہم نے عرض کی : اللہ اور اس کا رسول بہتر جانتے ہیں ، نبی اکرم صلی اللہ علیہ وسلم نے فرمایا : اس کا ایک تہائی ہونے پر تمہارا کیا عالم ہو گا ؟ لوگوں نے عرض کی : یہ تو بہت زیادہ ہے ، نبی اکرم صلی اللہ علیہ وسلم نے فرمایا : نصف ہونے پر تمہارا کیا عالم ہو گا ؟ لوگوں نے عرض کی : یہ تو بہت زیادہ ہے ، نبی اکرم صلی اللہ علیہ وسلم نے فرمایا : قیامت کے دن اہل جنت کی ایک سو بیس صفیں ہوں گی اور ان میں سے تمہاری اسّی صفیں ہوں گی ۔ “ ( علامہ ہیثمی فرماتے ہیں : ) میں یہ کہتا ہوں : یہ روایت ” صحیح“ میں اختصار کے ساتھ مذکور ہے ۔
یہ روایت امام أحمد نے ، امام ابویعلیٰ نے ، امام بزار نے امام طبرانی نے تینوں کتابوں میں نقل کی ہے اور ان کے رجال صحیح کے رجال ہیں صرف حارث بن حصیرہ کا معاملہ مختلف ہے اور اس کی توثیق کی گئی ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” اہل جنت کی ایک سو بیس صفیں ہوں گی ، جن میں سے اسّی میری امت کی ہوں گی ۔ “
یہ روایت امام طبرانی نے نقل کی ہے اس کی سند میں ایک راوی خالد بن یزید دمشقی ہے اور وہ ضعیف ہے ، ویسے اس کی توثیق کی گئی ہے ۔

سیدنا معاویہ بن حیدہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اہل جنت کی ایک سو بیس صفیں ہوں گی ( جن میں سے ) تمہاری اسّی صفیں ہوں گی اور باقی صفیں دیگر تمام لوگوں کی ہوں گی ۔ “
یہ روایت امام طبرانی نے نقل کی ہے اس کی سند میں ایک راوی حماد بن عیسیٰ جہنی ہے اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم اہل جنت کا ایک تہائی ، یا اہل جنت کا نصف ہو گے ۔ “
یہ روایت امام طبرانی نے نقل کی ہے اور اس کی سند عمدہ ہے ۔

علی بن خالد بیان کرتے ہیں : سیدنا ابوامامہ رضی اللہ عنہ کا گزر خالد بن یزید بن معاویہ کے پاس سے ہوا ، خالد نے ان سے اس سب سے زیادہ نرم بات کے بارے میں دریافت کیا جو انہوں نے نبی اکرم صلی اللہ علیہ وسلم کی زبانی سنی ہو ، تو سیدنا ابوامامہ رضی اللہ عنہ نے بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : خبردار ! تم سب جنت میں داخل ہو گے ، البتہ اس شخص کا معاملہ مختلف ہے جو اللہ تعالیٰ کے سامنے یوں سرکشی کرے جیسے اونٹ اپنے مالکان کے سامنے سرکشی کرتا ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ، صرف علی بن خالد دؤلی کا معاملہ مختلف ہے اور وہ ثقہ ہے ۔

سیدنا ابوامامہ رضی اللہ عنہ فرماتے ہیں : اس امت میں سے کوئی باقی نہیں رہے گا ، مگر یہ کہ وہ جنت میں داخل ہو جائے گا ( یعنی اس امت کا ہر فرد جنت میں داخل ہو جائے گا ) البتہ اس شخص کا معاملہ مختلف ہے جو اللہ تعالیٰ کے سامنے یوں سرکشی کرے جس طرح اونٹ اپنے مالکان کے سامنے سرکشی کرتا ہے ، جو شخص میری بات کی تصدیق نہیں کرتا ، تو اللہ تعالیٰ نے ارشاد فرمایا ہے : ” اس میں صرف انتہائی بدنصیب ہی جائے گا ۔ “ یعنی وہ شخص اس چیز کی تکذیب کرے جو سیدنا محمد صلی اللہ علیہ وسلم لے کر آئے تھے اور اس سے منہ پھیر لے ۔
یہ روایت امام طبرانی نے موقوف روایت کے طور پر نقل کی ہے اور اس کے رجال کی توثیق کی گئی ہے اگرچہ ان میں سے کچھ میں ضعف پایا جاتا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم سب کے سب جنت میں داخل ہو جاؤ گے ، البتہ اس شخص کا معاملہ مختلف ہے ، جو اللہ تعالیٰ کے سامنے یوں سرکشی کرے ، جیسے اونٹ سرکشی کرتا ہے ۔ “
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ، اگرچہ ان میں سے کچھ میں ، معمولی سا ضعف پایا جاتا ہے ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے اس نوعیت کی کچھ احادیث کتاب المناقب میں ، اس امت کی فضیلت سے متعلق باب میں گزر چکی ہیں ۔

سیدنا ابوہریرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم سے سوال کیا : شفاعت کے بارے میں آپ کا پروردگار آپ کو کیا جواب دے گا ؟ نبی اکرم صلی اللہ علیہ وسلم نے فرمایا : اس ذات کی قسم ! جس کے دست قدرت میں میری جان ہے ، مجھے یہ اندازہ تھا کہ میری امت میں سے ، تم سب سے پہلے مجھ سے اس بارے میں سوال کرو گے ، کیونکہ میں نے دیکھا ہے کہ تمہیں علم کے حصول کی شدید خواہش ہے ۔ اس ذات کی قسم ! جس کے دست قدرت میں محمد صلی اللہ علیہ وسلم کی جان ہے ، ان کا جنت کے دروازوں پر ہجوم میرے نزدیک میری شفاعت سے زیادہ اہم نہیں ہے اور میری شفاعت ہر اس شخص کے لیے ہو گی ، جو اخلاص کے ساتھ اس بات کی گواہی دے کہ اللہ تعالیٰ کے علاوہ اور کوئی معبود نہیں ہے اور اس کا دل ، اس کی زبان کی تصدیق کرے اور اس کی زبان ، اس کے دل کی تصدیق کرے ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں صرف معاویہ بن معتب کا معاملہ مختلف ہے اور وہ ثقہ ہے ۔

سیدنا ابومالک اشعری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اس ذات کی قسم ! جس کے دست قدرت میں میری جان ہے ، قیامت کے دن اللہ تعالیٰ تم میں سے کچھ لوگوں کو جنت کی طرف یوں بھیجے گا کہ وہ گروہ کی شکل میں ، تاریک رات کی مانند ہوں گے ، تم لوگ زمین کو بھر دو گے اور فرشتے کہیں گے : سیدنا محمد صلی اللہ علیہ وسلم کے ساتھ جتنے لوگ آئے ہیں وہ اُن سے زیادہ ہیں ، جتنے لوگ دیگر تمام انبیاء کے ساتھ آئے ہیں ۔ “
یہ روایت امام طبرانی نے نقل کی ہے اس کی سند میں ایک راوی محمد بن اسماعیل بن عیاش ہے اور وہ ضعیف ہے ۔