مجمع الزوائد ومنبع الفوائد

سیدنا ابوسعید خدری رضی اللہ عنہ اور سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” آخری دو آدمی جو جہنم سے نکلیں گے ، اللہ تعالیٰ اُن دونوں میں سے ایک سے فرمائے گا : اے ابن آدم ! تم نے اس دن کے لیے کیا تیاری کی ؟ کیا تم نے کبھی کوئی بھلائی کی ؟ کیا تم نے مجھ سے کوئی امید رکھی ؟ وہ جواب دے گا : جی نہیں ! اے میرے پروردگار ! تو اسے جہنم کی طرف لے جانے کا حکم ہو گا اور اہل جہنم میں وہ سب سے زیادہ شدید حسرت کا شکار ہو گا ، اللہ تعالیٰ دوسرے شخص سے دریافت کرے گا : اے ابن آدم ! تم نے اس دن کے لیے کیا تیاری کی ؟ کیا تم نے کبھی کوئی بھلائی کا کام کیا ؟ کیا تم نے مجھ سے کوئی امید رکھی ؟ وہ جواب دے گا : جی نہیں اے میرے پروردگار ! ( میں نے کبھی کوئی بھلائی نہیں کی ) تاہم میں تجھ سے امید رکھتا تھا ۔ نبی اکرم صلی اللہ علیہ وسلم نے ارشاد فرمایا : اُس شخص کے سامنے ایک درخت آئے گا ، وہ کہے گا : اے میرے پروردگار ! تو مجھے اس درخت کے نیچے ٹھہرا دے تاکہ میں اس کے سائے میں آ جاؤں اور اس کے پھل کو کھاؤں اور اس کے پانی کو پی لوں ، وہ اللہ تعالیٰ کے ساتھ یہ عہد کرتا رہے گا کہ وہ اس کے علاوہ کچھ نہیں مانگے گا ، اللہ تعالیٰ اسے اس درخت کے نیچے ٹھہرا دے گا ، پھر اس کے سامنے ایک اور درخت آئے گا ، جو پہلے والے درخت سے زیادہ خوبصورت ہو گا اور اس کا پانی زیادہ میٹھا ہو گا ، تو وہ کہے گا : اے میرے پروردگار ! تو مجھے اس ( دوسرے والے ) درخت کے نیچے ٹھہرا دے ، میں تجھ سے اس کے علاوہ اور کچھ نہیں مانگوں گا ، میں اس کے سائے میں آ جاؤں گا اور اس کے پھل کو کھاؤں گا اور اس کے پانی کو پی لوں گا ، تو اللہ تعالیٰ فرمائے گا : اے ابن آدم ! کیا تم نے میرے ساتھ یہ عہد نہیں کیا تھا کہ تم مجھ سے اس کے علاوہ کچھ نہیں مانگو گے ، وہ شخص کہے گا : اے میرے پروردگار ! میں اب اس کے علاوہ تجھ سے اور کچھ نہیں مانگوں گا تو اللہ تعالیٰ اس شخص کو اس کے نیچے ٹھہرا دے گا ، اور اس سے یہ عہد لے گا کہ وہ اس کے علاوہ کچھ اور نہیں مانگے گا ، پھر اس شخص کے سامنے جنت کے دروازے کے قریب ایک درخت آئے گا ، جو پہلے والے دونوں درختوں سے زیادہ خوبصورت ہو گا اور اس کا پانی زیادہ میٹھا ہو گا ، وہ شخص کہے گا : اے میرے پروردگار ! میں تجھ سے اس کے علاوہ نہیں مانگوں گا ، تو مجھے اس کے نیچے ٹھہرا دے ، تاکہ میں اس کے سائے میں آ جاؤں اور اس کے پھل کو کھاؤں اور اس کے پانی کو پیوں ، تو پروردگار فرمائے گا : اے ابن آدم ! کیا تم نے مجھ سے یہ عہد نہیں کیا تھا کہ تم مجھ سے اس کے علاوہ کچھ نہیں مانگو گے ، تو وہ شخص کہے گا : اے میرے پروردگار ! اس کے علاوہ میں تجھ سے کچھ نہیں مانگوں گا ، تو اللہ تعالیٰ اس شخص کو اس درخت کے نیچے کر دے گا اور اس سے یہ عہد لے گا کہ وہ اللہ تعالیٰ سے اس کے علاوہ اور کچھ نہیں مانگے گا ، وہ شخص اہل جنت کی آوازیں سنے گا ، تو اسے خود پر ق ابونہیں رہے گا اور وہ یہ کہے گا : اے میرے پروردگار ! تو مجھے جنت میں داخل کر دے ! ( جب وہ شخص جنت میں داخل ہو جائے گا تو پروردگار فرمائے گا تم مانگو ! اور تمنا کرو ! وہ شخص دنیا کے دنوں کے حساب سے تین دن تک مانگتا رہے گا اور تمنا کرتا رہے گا ، اللہ تعالیٰ اسے ان چیزوں کے بارے میں بھی تلقین کرے گا ، جن کے بارے میں اسے علم بھی نہیں تھا ، وہ مانگے گا اور تمنا کرے گا ، جب وہ فارغ ہو جائے گا ، تو اللہ تعالیٰ فرمائے گا : اے ابن آدم ! تم نے جو مانگا وہ تمہیں ملا ! سیدنا ابوسعید خدری رضی اللہ عنہ نے یہاں یہ الفاظ نقل کئے ہیں : ” اور اس کے ہمراہ اس کی مانند مزید ملا ۔ “ جبکہ سیدنا ابوہریرہ رضی اللہ عنہ نے یہ الفاظ نقل کیے ہیں : ” اور اس کے ہمراہ اس کی مانند مزید دس گنا ملا ۔ “ ان دونوں میں سے ایک صاحب نے دوسرے سے کہا: آپ وہ بیان کریں جو آپ نے سنا ہے اور میں وہ بیان کروں گا ، جو میں نے سنا ہے ۔
یہ روایت امام أحمد نے نقل کی ہے اور امام بزار نے اس کی مانند نقل کی ہے ، تاہم انہوں نے سیدنا ابوسعید خدری رضی اللہ عنہ کے حوالے سے یہ الفاظ نقل کیے ہیں : ” اس کی مانند دس گنا ۔ “ انہوں نے سیدنا ابوہریرہ رضی اللہ عنہ کے حوالے سے بھی اس کی مانند الفاظ نقل کیے ہیں ۔ ان دونوں روایات کے رجال صحیح کے رجال ہیں ، صرف علی بن زید کا معاملہ مختلف ہے اور اس میں موجود ضعف کے باوجود اس کی توثیق کی گئی ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اہل جنت میں قدر و منزلت کے اعتبار سے سب سے کم مقام کا مالک وہ شخص ہو گا ، جس کے سات درجات ہوں گے اور وہ چھٹے درجے پر ہو گا ، ساتواں درجہ اس کے اوپر ہو گا ، اس کے تین سو خادم ہوں گے ، اس کے پاس صبح و شام تین سو پیالے لائے جائیں گے ( راوی کہتے ہیں : میرا خیال ہے روایت میں یہ الفاظ ہیں : ) سونے کے بنے ہوئے پیالے لائے جائیں گے ، اور ہر پیالے میں دوسرے پیالے سے مختلف کھانا ہو گا ، اور وہ پہلے سے بھی اسی طرح لذت محسوس کرے گا ، جس طرح آخری سے لذت محسوس کرے گا اور وہ یہ کہے گا : اے میرے پروردگار ! اگر تو مجھے اجازت دے تو میں تمام اہل جنت کو کھانا کھلاؤں اور انہیں مشروب پلاؤں ، تو بھی میرے پاس جو کچھ موجود ہے ، اس میں کمی نہیں آئے گی اور اس شخص کو حورعین میں سے بہتر بیویاں ملیں گی جو اس کی دنیاوی بیویوں کے علاوہ ہوں گی ، اور ان میں سے ایک کے بیٹھنے کی جگہ زمین کے ایک میل جتنی ہو گی ۔ “
یہ روایت امام أحمد نے نقل کی ہے اور اس کے رجال ثقہ ہیں اگرچہ ان میں سے بعض میں ضعف پایا جاتا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” حصے کے اعتبار سے ( یہاں ایک لفظ کے بارے میں راوی کو شک ہے ، تاہم اس کا مفہوم یہی ہے ) اہل جنت میں سب سے کم مرتبہ کا مالک وہ ہو گا کہ کچھ لوگوں کو اللہ تعالیٰ جہنم سے نکالے گا ، اللہ تعالیٰ ان پر یہ مہربانی اس لیے کرے گا کیونکہ وہ کسی کو اللہ کا شریک قرار نہیں دیتے ہوں گے ، پھر وہ یوں اُگیں گے جیسے سبزی اُگتی ہے یہاں تک کہ جب ارواح ان کے جسموں میں داخل ہو جائیں گی ، تو وہ کہیں گے : اے ہمارے پروردگار ! جس طرح تو نے ہمیں جہنم سے نکال دیا ہے اور ارواح کو ہمارے جسموں کی طرف لوٹا دیا ہے ، تو تُو ہمیں جہنم کی طرف سے پھیر دے ، نبی اکرم صلی اللہ علیہ وسلم فرماتے ہیں : تو اللہ تعالی ان کے چہرے جہنم سے پھیر دے گا ۔ “
یہ روایت امام بزار نے نقل کی ہے اور اس کے رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر اہل جنت کے سب سے کم تر فرد کے زیور کا تمام اہل دنیا کے زیورات کے ساتھ موازنہ کیا جائے تو اللہ تعالیٰ آخرت میں اس شخص کو جو زیور عطا کرے گا وہ تمام اہل دنیا کے زیورات سے زیادہ فضیلت رکھتا ہو گا ۔ “
یہ روایت امام طبرانی نے معجم اوسط میں اپنے استاد مقدام بن داؤد کے حوالے سے نقل کی ہے اور وہ ضعیف ہے ویسے اس کی توثیق کی گئی ہے اس روایت کے بقیہ رجال ثقہ ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اہل جنت میں قدر و منزلت کے اعتبار سے سب سے کمتر شخص جو ہو گا وہ اپنی ملکیت میں دو ہزار سال ( کی مسافت ) تک نظر کر سکے گا اور وہ دور کے حصے کو بھی یوں دیکھ لے گا جس طرح نزدیکی حصے کو دیکھ سکے گا اور وہ اپنی بیویوں اور خدمت گاروں کو بھی دیکھ سکے گا ۔ “
یہ روایت امام أحمد اور امام ابویعلیٰ اور امام طبرانی نے نقل کی ہے ان کی اسانید میں ایک راوی ثویر بن ابوفاختہ ہے اور اس کے ضعیف ہونے پر اتفاق ہے ۔

سیدنا انس بن مالک رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اہل جنت میں جو سب سے کم مرتبہ کا شخص ہو گا اس کے سرہانے بھی دس ہزار ملازمین موجود ہوں گے جن میں سے ہر ایک کے ہاتھوں میں دو دو برتن ہوں گے ، ان میں سے ایک سونے کا ہو گا اور دوسرا چاندی کا ہو گا اور ان میں سے ہر ایک میں مختلف قسم کا کھانا ہو گا وہ شخص آخری برتن میں سے بھی اسی طرح کھائے گا ، جس طرح پہلے میں سے کھائے گا اور اسے آخری برتن میں سے بھی اسی طرح کی خوشبو اور لذت محسوس ہو گی جس طرح کی پہلے برتن میں سے محسوس ہوئی تھی ( یعنی زیادہ کھانے کی وجہ سے اس کی خوشبو یا لذت میں کمی نہیں ہو گی ) اور پھر وہ سب کھانا مشک اذفر کی طرح کی خوشبو میں تبدیل ہو جائے گا ، اہل جنت کو پیشاب یا پاخانہ کی حاجت نہیں ہو گی اور نہ انہیں بلغم تھوکنے کی ضرورت ہو گی ، وہ بھائی بھائی ہوں گے اور پلنگوں پر ایک دوسرے کے مدمقابل بیٹھے ہوں گے ۔ “
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدنا عوف بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مجھے اُس شخص کے بارے میں پتا ہے جو جنت میں سب سے آخر میں داخل ہو گا ، وہ ایک ایسا شخص ہو گا جو یہ کہے گا : اے میرے پروردگار ! مجھے جہنم سے دور کر دے ، وہ یہ نہیں کہے گا : تو مجھے جنت میں داخل کر دے ، جب اہل جنت ، جنت میں داخل ہو جائیں گے اور اہل جہنم ، جہنم میں داخل ہو جائیں گے اور صرف وہ شخص باقی رہ جائے گا ، تو وہ کہے گا : اے میرے پروردگار ! کیا وجہ ہے کہ میں یہاں ہوں ؟ پروردگار فرمائے گا : اے ابن آدم ! یہ وہ چیز ہے جو تم نے مجھ سے مانگی تھی ، وہ کہے گا : اے میرے پروردگار ! تو مجھے جنت کے قریب کر دے ، پروردگار فرمائے گا : اے ابن آدم ! تم نے تو مجھ سے مانگنا نہیں تھا ، نبی اکرم صلی اللہ علیہ وسلم فرماتے ہیں : پھر اللہ تعالیٰ جنت کے دروازے کے پاس اس کے لیے ایک درخت پیدا کرے گا ، وہ شخص یہ کہے گا : اے میرے پروردگار ! مجھے اس درخت کے قریب کر دے تاکہ میں اس کا پھل کھاؤں اور اس کے سائے میں رہوں ، تو پروردگار فرمائے گا : اے ابن آدم ! تم نے تو صرف مجھ سے یہ سوال کیا تھا کہ میں تمہیں جہنم سے دور کر دوں ، وہ شخص مسلسل مانگتا رہے گا ، یہاں تک کہ اس سے کہا: جائے گا : تم جاؤ ! تمہیں وہ سب ملتا ہے ، جہاں تک کہ تمہارے قدم پہنچیں گے اور جہاں تک تمہاری آنکھیں دیکھیں گی ۔ “
یہ روایت امام طبرانی نے اس کی مانند نقل کی ہے ، تاہم انہوں نے یہ الفاظ نقل کیے ہیں : ” پروردگار فرمائے گا : اے ابن آدم ! یہ وہ چیز ہے جو تم مجھ سے مانگ رہے تھے ، اسی دوران اس کے سامنے جنت کے دروازے کے پاس ایک درخت نظر آئے گا ، جو جنت کے اندرونی حصے میں ہو گا ، وہ کہے گا : اے میرے پروردگار ! تو مجھے اس درخت کے قریب کر دے تاکہ میں اس کا پھل کھاؤں اور اس کے سائے میں آ جاؤں ، پروردگار فرمائے گا : اے ابن آدم ! تم نے تو مجھ سے ( مزید کچھ ) مانگنا نہیں تھا ، وہ شخص کہے گا : اے میرے پروردگار ! تیری مثال کہاں ہے ، تو وہ شخص مسلسل یہی کرتا رہے گا کہ جب زیادہ بہتر چیز دیکھے گا تو وہ مانگنا شروع کر دے گا ، یہاں تک کہ اس سے یہ کہا: جائے گا : تم جاؤ ! تمہیں وہ سب کچھ ملتا ہے ، جہاں تک تمہارے قدم جائیں اور جو تمہاری آنکھیں دیکھیں ، تو وہ دوڑے گا ، یہاں تک کہ وہ تھک جائے گا ، اور وہ اپنے ہاتھ کے ذریعے اشارہ کر کے کہے گا : یہ اور یہ ، تو اُسے کہا: جائے گا : یہ تمہیں ملتا ہے اور اس کی مانند مزید ملتا ہے ، تو وہ راضی ہو جائے گا ، یہاں تک کہ وہ یہ سمجھے گا کہ اللہ تعالیٰ نے جو کچھ اسے عطا کیا ہے ، وہ اہل جنت میں سے کسی کو عطا نہیں کیا ، وہ کہے گا : اگر مجھے اجازت دی جائے تو اللہ تعالیٰ نے جو کچھ مجھے دیا ہے ، میں اُس میں سے اہل جنت کو کھانا ، مشروب اور لباس فراہم کروں ، پھر بھی جو کچھ میرے پاس ہے ، اس میں کوئی کمی نہیں ہو گی ۔ “ ان دونوں روایات کی سند میں ایک راوی موسیٰ بن عبیدہ ربذی ہے اور وہ ضعیف ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جنت میں داخل ہونے والا آخری شخص وہ ہو گا جو پل صراط پر یوں لوٹ رہا ہو گا ، جیسے کسی لڑکے کی اس کا باپ پٹائی کرے اور وہ لڑکا اس سے بھاگنا چاہتا ہو ، اس شخص کا عمل اسے اس قابل نہیں رہنے دے گا کہ وہ دوڑ سکے ، وہ کہے گا : اے میرے پروردگار ! تو مجھے جنت تک پہنچا دے اور مجھے جہنم سے نجات دیدے ، تو اللہ تعالیٰ اس کی طرف یہ وحی کرے گا : اے میرے بندے ! اگر میں نے تجھے جہنم سے نجات دیدی اور میں نے تجھے جنت میں داخل کر دیا ، تو کیا تو میرے سامنے اپنے گناہوں اور خطاؤں کا اعتراف کر لے گا ؟ بندہ جواب دے گا : جی ہاں ! اے میرے پروردگار ! تیری عزت اور تیرے جلال کی قسم ہے ! اگر تو نے مجھے جہنم سے نجات عطا کر دی تو میں تیرے سامنے اپنے گناہوں اور خطاؤں کا اعتراف کر لوں گا ، وہ پل صراط کو پار کر لے گا ، پھر وہ شخص یہ سوچے گا اگر میں نے اپنے گناہوں اور خطاؤں کا اعتراف کر لیا ، تو اللہ تعالیٰ مجھے جہنم کی طرف واپس بھیج دے گا ، اللہ تعالیٰ اس بندے کی طرف یہ وحی کرے گا : اے میرے بندے ! تو میرے سامنے اپنے گناہوں اور خطاؤں کا اعتراف کر لے تاکہ میں تیری مغفرت کر دوں اور تجھے جنت میں داخل کر دوں ، تو بندہ کہے گا : جی نہیں ! تیری عزت کی قسم ! میں نے کبھی کسی گناہ کا ارتکاب نہیں کیا اور میں نے کبھی کوئی خطا نہیں کی ، تو اللہ تعالیٰ اس کی طرف یہ وحی کرے گا : اے میرے بندے ! تمہارے خلاف میرے پاس ایک ثبوت ہے ، وہ بندہ اپنے دائیں بائیں دیکھے گا ، اُسے کوئی نظر نہیں آئے گا ، تو وہ کہے گا : اے میرے پروردگار ! تو اپنا ثبوت مجھے دکھا ، تو اللہ تعالیٰ اس کی جلد کو گویائی عطا کرے گا ، تو وہ حقیر سمجھے جانے والے گناہوں کا اعتراف کرے گی ، جب بندہ یہ صورتحال دیکھے گا تو وہ یہ کہے گا : اے میرے پروردگار ! تیری عزت کی قسم میرے کچھ ایسے گناہ بھی ہیں ، جو پوشیدہ ہیں ، تو پروردگار اس کی طرف یہ وحی کرے گا : اے میرے بندے ! میں ان کے بارے میں تم سے زیادہ بہتر جانتا ہوں ، تم میرے سامنے ان کے حوالے سے اعتراف کر لو ، میں ان کے حوالے سے تمہاری مغفرت کر دوں گا اور تمہیں جنت میں داخل کر دوں گا ، تو بندہ اپنے گناہوں کا اعتراف کر لے گا اور اللہ تعالیٰ اسے جنت میں داخل کر دے گا ۔ “ راوی بیان کرتے ہیں : پھر نبی اکرم صلی اللہ علیہ وسلم ہنس پڑے ، یہاں تک کہ آپ کے اطراف کے دانت نظر آنے لگے ، آپ صلی اللہ علیہ وسلم نے ارشاد فرمایا : ” یہ اس شخص کا حال ہے جو اہل جنت میں سب سے کم تر مرتبہ کا ہو گا ، تو اس کا کیا حال ہو گا ؟ جو اس سے اوپر ہو گا ۔ “
یہ روایت امام طبرانی نے نقل کی ہے اس کی سند میں ایسے راوی ہیں ، جن سے میں واقف نہیں ہوں اور ان میں ضعیف راوی ہیں جن کی کمزور توثیق کی گئی ہے ۔

سیدنا عبداللہ بن مسعود رضی اللہ عنہ فرماتے ہیں : ” جنت میں داخل ہونے والا آخری فرد وہ ہو گا جس کے پاس سے اس کا پروردگار گزرے گا اور اس سے فرمائے گا : تم اُٹھو اور جنت میں داخل ہو جاؤ ، تو وہ ماتھے پر بل ڈال کر اس کی طرف متوجہ ہو گا اور کہے گا : کیا تو نے میرے لیے کوئی چیز باقی رہنے دی ہے ؟ پروردگار فرمائے گا : جی ہاں ! تمہیں اس کی مانند ملتا ہے ، جس پر سورج طلوع یا غروب ہوتا تھا ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف ہبیرہ بن یریم کا معاملہ مختلف ہے اور وہ ثقہ ہے ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے ایک ” صحیح “ طویل حدیث گزر چکی ہے جسے سیدنا عبداللہ بن مسعود رضی اللہ عنہ نے روایت کیا ہے ، میں نے اُسے باب : دوبارہ زندہ کیے جانے ( سے متعلق روایات ) کا مجموعہ میں ذکر کیا ہے اور وہ ان روایات سے زیادہ واضح ہے ۔