مجمع الزوائد ومنبع الفوائد

سیدنا معاذ بن جبل رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم سے سوال کیا : یا شاید انہوں نے نبی اکرم صلی اللہ علیہ وسلم کو یہ فرماتے ہوئے سنا : ” جب اہل جنت ، جنت میں داخل ہوں گے تو ان کے جسم پر کوئی بال نہیں ہو گا ، اُن کی آنکھیں سرمگیں ہوں گی اور وہ تیس سال کی عمر کے ہوں گے ۔ “

ایک روایت میں یہ الفاظ ہیں : ” قیامت کے دن جب اہل ایمان کو زندہ کیا جائے گا تو اُن کے جسم پر کوئی بال نہیں ہو گا ، ان کی آنکھیں سرمگیں ہوں گی اور وہ تیس سال کی عمر کے ہوں گے ۔ “ یہ تمام روایات امام أحمد نے نقل کی ہیں اور پہلی روایت کی سند حسن اور متصل ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب اہل جنت ، جنت میں داخل ہوں گے تو اُن کے جسم پر کوئی بال نہیں ہو گا اور ان کی آنکھیں سرمگیں ہوں گی ۔ “
یہ روایت امام أحمد نے معجم اوسط میں نقل کی ہے اور اس کی سند عمدہ ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اہل جنت ، جب جنت میں داخل ہوں گے تو ان کے جسم پر کوئی بال نہیں ہو گا ، وہ سفید رنگ کے ہوں گے ، ان کے بال گھنگریالے ہوں گے ، ان کی آنکھیں سرمگیں ہوں گی اور وہ تینتیس سال کی عمر کے ہوں گے اور ان کی جسامت سیدنا آدم علیہ السلام کی جسامت کی طرح ، لمبائی میں ساٹھ ذراع اور چوڑائی میں سات ذراع ہو گی ۔ “ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا کچھ حصہ مذکور ہے ۔
یہ روایت امام طبرانی نے معجم صغیر اور معجم اوسط میں نقل کی ہے ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کے حوالے سے یہ بات نقل کرتے ہیں : آپ صلی اللہ علیہ وسلم نے ارشاد فرمایا : ” اہل دنیا میں سے جو شخص کمسنی میں یا بڑی عمر میں مرے گا ، جنت میں اُس کی عمر ساٹھ سال کر دی جائے گی ، اُس کی عمر اس سے زیادہ کبھی نہیں ہو گی ، اور اہل جہنم کا معاملہ بھی اسی طرح ہو گا ۔ “
یہ روایت امام ابویعلیٰ نے صحیح سند کے ساتھ نقل کی ہے اس کی سند میں ایک راوی ابن لہیعہ ہے اور یہ روایت ثقہ راویوں کی نقل کردہ روایت کے برخلاف ہے ، باقی اللہ بہتر جانتا ہے ۔