مجمع الزوائد ومنبع الفوائد

سیدنا ابوموسیٰ اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جنات فردوس ، چار ہیں ۔ “ ( علامہ ہیثمی فرماتے ہیں : ) میں یہ کہتا ہوں : اس کے بعد انہوں نے پوری حدیث ذکر کی ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا سمرہ بن جندب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” فردوس جنت کا بلند سطح والا اور اس کا بالائی اور اس کا درمیانی حصہ ہے اور اسی میں سے جنت کی نہریں پھوٹتی ہیں ۔ “
یہ روایت امام طبرانی نے اور امام بزار نے اختصار کے ساتھ نقل کی ہے اور انہوں نے اس میں یہ الفاظ زائد نقل کیے ہیں : ” جب تم اللہ تعالیٰ سے مانگو تو اُس سے ( جنت ) الفردوس مانگو ! “ ۔ طبرانی کی اسانید میں سے ، ایک کے رجال کی توثیق کی گئی ہے اور ان میں سے بعض میں ضعف پایا جاتا ہے ۔

سیدنا عرباض بن ساریہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر تم نے اللہ تعالیٰ سے مانگنا ہو تو اُس سے فردوس مانگو ! کیونکہ وہ جنت کا بالائی حصہ ہے ۔ “
یہ روایت امام بزار نے نقل کی ہے اور اس کے رجال ثقہ ہیں ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم ہم سے یہ فرماتے تھے : ” فردوس جنت کا بلند سطح والا درمیانی حصہ ہے ، جو سب سے بلند اور سب سے زیادہ خوبصورت ہے ۔ “
یہ روایت امام بزار نے نقل کی ہے اس کی سند میں یوسف بن خالد سمتی ہے اور وہ ضعیف ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اللہ تعالیٰ سے فردوس مانگو ! کیونکہ وہ جنت کا درمیانی حصہ ہے اور اہل فردوس ، عرش کی آواز سنیں گے ۔ “
یہ روایت امام طبرانی نے نقل کی ہے اس کی سند میں ایک راوی جعفر بن زبیر ہے اور وہ متروک ہے ۔