مجمع الزوائد ومنبع الفوائد

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن موت کو لایا جائے گا اور وہ کجلے دنبے کی مانند ہو گی ، اُسے جنت اور جہنم کے درمیان ٹھہرایا جائے گا ، پھر ایک منادی یہ اعلان کرے گا : اے اہل جنت ! وہ کہیں گے : اے ہمارے پروردگار ! ہم حاضر ہیں ، تو دریافت کیا جائے گا : کیا تم اسے پہچانتے ہو ؟ وہ جواب دیں گے : جی ہاں ! اے ہمارے پروردگار ! یہ موت ہے ، تو اُسے ذبح کر دیا جائے گا ، جیسے بکری کو ذبح کیا جاتا ہے ، تو یہ لوگ ( یعنی اہل جنت ) محفوظ ہو جائیں گے اور وہ لوگ ( یعنی اہل جہنم ) ان کی امید منقطع ہو جائے گی ۔ “
یہ روایت امام ابویعلیٰ نے نقل کی ہے اور امام طبرانی نے معجم اوسط میں اس کی مانند نقل کی ہے اور امام بزار نے اسے نقل کیا ہے اور ان کے رجال صحیح کے رجال ہیں ، صرف نافع بن خالد طاحی کا معاملہ مختلف ہے اور وہ ثقہ ہے ۔

سیدنا معاذ بن جبل رضی اللہ عنہ بیان کرتے ہیں : نبی اکرم صلی اللہ علیہ وسلم نے انہیں یمن کی طرف بھیجا ، جب وہ ان لوگوں کے پاس آئے تو انہوں نے فرمایا : اے لوگو ! میں تم لوگوں کی طرف اللہ کے رسول صلی اللہ علیہ وسلم کا نمائندہ ہوں ، اور اللہ کے رسول صلی اللہ علیہ وسلم نے تمہیں یہ بات بتائی ہے : ” لوٹ کے اللہ کی طرف جانا ہے ، جنت کی طرف ، یا جہنم کی طرف ( جانا ہے ) ہمیشہ رہنے والی ایسی زندگی ، جو موت کے بغیر ہو گی ، اور ایسا رہنا جس میں روانگی نہیں ہو گی ۔ “
یہ روایت امام طبرانی نے معجم کبیر میں نقل کی ہے اور معجم اوسط میں اس کی مانند نقل کی ہے انہوں نے اس میں یہ الفاظ زائد نقل کیے ہیں : ” ایسے جسم ہوں گے ، جنہیں موت نہیں آئے گی ۔ “ معجم کبیر کی سند عمدہ ہے ، البتہ ابن ثابت نامی راوی نے سیدنا معاذ بن جبل رضی اللہ عنہ کا زمانہ نہیں پایا ہے ( علامہ ہیثمی فرماتے ہیں : ) میں یہ کہتا ہوں : ان دونوں کے درمیان عمرو بن میمون اودی نامی راوی ساقط ہے جیسا کہ امام حاکم رحمہ اللہ نے ” مستدرک “ میں ، کتاب الایمان کے آخر میں اسے روایت کیا ہے ، ان کے طریق میں ایک راوی مسلم بن خالد زنگی ہے ، عقبہ کہتے ہیں : یہ حدیث سند کے اعتبار سے صحیح ہے ، اس کے راوی اہل مکہ ہیں اور مسلم بن خالد زنگی ، اہل مکہ کا امام اور ان کا مفتی ہے ، تاہم شیخین ( یعنی امام بخاری رحمہ اللہ اور امام مسلم ) اس بات کے قائل ہیں کہ یہ شخص علم حدیث کا عالم نہیں ہے ، باقی اللہ بہتر جانتا ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر اہل جہنم سے یہ کہا: جائے : تم جہنم میں اتنا عرصہ رہو گے ، جتنی دنیا میں کنکریاں ہوتی تھیں ، تو وہ اس پر بھی خوش ہو جائیں گے ، اور اگر اہل جنت سے یہ کہا: جائے : تم جنت میں اتنا عرصہ رہو گے جتنی دنیا میں کنکریاں ہوتی تھیں ، تو وہ اس پر بھی غمگین ہو جائیں گے ، لیکن ( یعنی اللہ تعالیٰ نے ) ان کے لیے ہمیشہ رہنا طے کر دیا ہے ۔ “
یہ روایت امام طبرانی نے نقل کی ہے اس کی سند میں ایک راوی حکم بن ظہیر ہے اور اس کے ضعیف ہونے پر اتفاق ہے ۔

سیدنا عبداللہ بن عمرو رضی اللہ عنہ فرماتے ہیں : ” اہل جہنم ( جہنم کے داروغہ ) ” مالک “ کو پکاریں گے ، وہ چالیس سال تک انہیں جواب نہیں دے گا ، پھر وہ کہے گا : ” تم اس میں رہو گے “ پھر وہ ( یعنی اہل جہنم ) اپنے پروردگار کو پکاریں گے اور یہ کہیں گے : اے ہمارے پروردگار ! تو ہمیں اس سے نکال دے ، اگر ہم نے دوبارہ ایسا کیا تو ہم ظالم ہوں گے ۔ “ تو پروردگار انہیں جواب نہیں دے گا ، پھر وہ فرمائے گا : ” تم اس میں رسوا ہو کر رہو ، اور تم میرے ساتھ کلام نہ کرو ۔ “ پھر وہ لوگ مایوس ہو جائیں گے اور پھر صرف چیخ و پکار کے آغاز والی ، اور انتہائی ناپسندیدہ آواز ہو گی اور ان کی آواز گدھے کی آواز کے ساتھ مشابہت رکھتی ہو گی ، جس کا ابتدائی حصہ گھٹا گھٹا ہوتا ہے اور اختتامی حصہ انتہائی ناپسندیدہ ہوتا ہے ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ۔