مجمع الزوائد ومنبع الفوائد

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم اور آپ کے کچھ اصحاب کا گزر ہوا ، راستے میں ایک بچہ موجود تھا ، جب اس کی ماں نے ان لوگوں کو آتے ہوئے دیکھا تو اسے یہ اندیشہ ہوا کہ کہیں وہ بچہ پیروں تلے نہ آ جائے ، وہ دوڑتی ہوئی آئی ، وہ یہ کہہ رہی تھی : میرا بچہ ، میرا بچہ ، اُس نے دوڑ کے آ کے اس بچے کو پکڑ لیا ، لوگوں نے کہا: یا رسول اللہ ! یہ عورت اپنے بچے کو آگ میں نہیں ڈالے گی راوی کہتے ہیں : تو نبی اکرم صلی اللہ علیہ وسلم نے ان کی طرف دیکھا اور ارشاد فرمایا : اللہ تعالیٰ بھی اپنے محبوب بندوں کو آگ میں نہیں ڈالے گا ۔
یہ روایت امام أحمد نے نقل کی ہے اور امام بزار نے اس کی مانند نقل کی ہے اور امام ابویعلیٰ نے نقل کی ہے اور ان کے رجال صحیح کے رجال ہیں ۔

سیدنا عمر بن خطاب رضی اللہ عنہ بیان کرتے ہیں : کچھ قیدی نبی اکرم صلی اللہ علیہ وسلم کے پاس آئے ۔ ۔ ۔ ۔ ۔ ۔ ( علامہ ہیثمی فرماتے ہیں : ) میں یہ کہتا ہوں : اس کے بعد انہوں نے پوری حدیث ذکر کی ہے ، جس میں آگے چل کر یہ الفاظ ہیں : ” مجھے یہ بات پتہ چلی ہے کہ نبی اکرم صلی اللہ علیہ وسلم ایک غزوہ کے دوران سفر کر رہے تھے ، اسی دوران آپ کے اصحاب میں سے کسی نے کسی پرندے کے بچے کو پکڑ لیا ، اُس بچے کے ماں باپ میں سے کوئی ایک آیا اور اس کے ہاتھ پر بیٹھ گیا ، جس نے اس بچے کو پکڑا تھا ، نبی اکرم صلی اللہ علیہ وسلم نے ارشاد فرمایا : کیا تم اس پرندے پر حیران نہیں ہو رہے ہو ؟ اس کے بچے کو پکڑا گیا ، تو یہ آیا اور آ کر اس کے ہاتھ پر بیٹھ گیا ( جس نے اس کے بچے کو پکڑا تھا ) اللہ کی قسم ! اللہ تعالیٰ اپنی مخلوق کے بارے میں اس سے زیادہ رحم کرنے والا ہے ، جتنا یہ پرندہ اپنے بچے پر رحم کرنے والا ہے ۔ “
یہ روایت امام بزار نے دو حوالوں سے نقل کی ہے ان دونوں میں سے ایک کے رجال صحیح کے رجال ہیں ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : کچھ لوگ جہنم میں اُس وقت تک رہیں گے جب تک اللہ کو منظور ہو گا کہ وہ اس میں رہیں ، پھر اللہ تعالیٰ ان پر رحم فرمائے گا اور انہیں اُس ( جہنم ) میں سے نکال دے گا ، وہ لوگ جنت کے قریب آئیں گے اور ایک نہر میں غسل کریں گے ، جس کا نام ” حیوان “ ہو گا ( جنت میں ) اہل جنت انہیں ” جہنمی “ کا نام دیں گے ( اور ان کا عالم یہ ہو گا ، جو جہنم سے نکل کر جنت میں آئیں گے ) کہ اگر ان میں سے کوئی ایک شخص چاہے تو تمام اہل دنیا کو مہمان بنا لے ، انہیں بستر فراہم کرے ، انہیں کھانا کھلائے ، انہیں پلائے ، انہیں لحاف فراہم کرنے ( راوی کہتے ہیں : میرا خیال ہے روایت میں یہ الفاظ بھی ہیں ) اور اُن کی شادیاں کروا دے ، تو بھی اس ( جہنم سے جنت میں آ جانے والے فرد کو ، جنت میں ملنے والی نعمتوں ) میں کوئی کمی نہیں ہو گی ۔ “
یہ روایت امام أحمد اور امام ابویعلیٰ نے نقل کی ہے اور ان دونوں کے رجال صحیح کے رجال ہیں ، صرف عطاء بن سائب کا معاملہ مختلف ہے ، وہ ثقہ ہے لیکن وہ اختلاط کا شکار ہو گیا تھا ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن اللہ تعالیٰ ایسے لوگوں پر بھی مہربانی کرے گا ، جنہوں نے کبھی کوئی بھلائی نہیں کی ہو گی اور انہیں جہنم سے نکال دے گا ، اس کے بعد کہ وہ جل چکے ہوں گے ، اور ( اللہ تعالیٰ ) اپنی رحمت کے وسیلے سے شفاعت کرنے والوں کی شفاعت کے بعد انہیں جنت میں داخل کر دے گا ۔ “
یہ روایت امام أحمد نے نقل کی ہے اس کی سند میں ایک راوی صالح مولیٰ توامہ ہے اور وہ ضعیف ہے ۔

سیدنا مغیرہ بن شعبہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جہنم سے کچھ لوگ نکلیں گے اور جنت میں داخل ہو جائیں گے ، جنت میں انہیں ” جہنمی “ کا نام دیا جائے گا ، وہ اللہ تعالیٰ سے یہ دعا کریں گے کہ ان کا یہ نام تبدیل کر دیا جائے ، تو اللہ تعالیٰ ان کا یہ نام مٹا دے گا جب وہ جہنم سے نکل آئے ہوں گے ۔ “ راوی کہتے ہیں : اس کے بعد انہوں نے پوری حدیث ذکر کی ہے ۔
یہ روایت امام أحمد اور امام طبرانی نے نقل کی ہے اس کی سند میں ایک راوی عبدالرحمن بن اسحاق کوفی ہے اور وہ ضعیف ہے ۔

سیدنا فضالہ بن عبید رضی اللہ عنہ اور سیدنا عبادہ بن صامت رضی اللہ عنہ ، یہ دونوں حضرات بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جب قیامت کا دن ہو گا اور اللہ تعالیٰ مخلوق کا فیصلہ کر کے فارغ ہو جائے گا تو دو آدمی باقی رہ جائیں گے ، انہیں جہنم کی طرف لے جانے کا حکم ہو گا ، اُن دونوں میں سے ایک مڑ کے دیکھے گا ، تو پروردگار فرمائے گا : اسے واپس لاؤ ! فرشتے اُسے واپس لائیں گے ، پروردگار اس سے دریافت کرے گا : تم نے مڑ کے کیوں دیکھا تھا ؟ وہ کہے گا : مجھے یہ امید تھی کہ تو مجھے جنت میں داخل کر دے گا ، نبی اکرم صلی اللہ علیہ وسلم فرماتے ہیں : تو اس کو جنت میں لے جانے کا حکم ہو گا ( اور جنت میں اسے اتنی زیادہ نعمتیں نصیب ہوں گی ) وہ شخص کہے گا : اللہ تعالیٰ نے مجھے اتنا کچھ عطا کیا ہے کہ اگر میں تمام اہل جنت کو کھانا کھلا دوں تو جو کچھ میرے پاس ہے اُس میں کوئی کمی نہیں ہو گی ۔ “ راوی بیان کرتے ہیں : نبی اکرم صلی اللہ علیہ وسلم جب یہ حدیث ذکر کرتے تھے تو آپ صلی اللہ علیہ وسلم کے چہرے سے خوشی کا اظہار ہوتا تھا ۔
یہ روایت امام أحمد نے نقل کی ہے اور اس کے رجال کی توثیق کی گئی ہے اگرچہ ان میں سے بعض کو ضعیف قرار دیا گیا ہے ۔ ( علامہ ہیثمی فرماتے ہیں : ) میں یہ کہتا ہوں : آگے چل کر کچھ احادیث آئیں گی ، جو اس شخص کے بارے میں ہوں گی ، جو اہل جنت میں سب سے کم قدر و منزلت کا مالک ہو گا ۔

سیدنا ابوسعید خدری رضی اللہ عنہ اور سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جہنم سے نکلنے والوں میں سب سے آخر میں دو افراد ہوں گے ، اللہ تعالیٰ ان دونوں میں سے ایک سے فرمائے گا : اے ابن آدم ! تم نے اس دن کے لئے کیا تیاری کی تھی ؟ کیا تم نے کبھی کوئی بھلائی کی تھی ؟ کیا تم نے مجھ سے امید رکھی تھی ؟ وہ شخص جواب دے گا : جی نہیں ! اے میرے پروردگار ! اُسے جہنم کی طرف لے جانے کا حکم ہو گا اور وہ اہل جہنم میں سب سے زیادہ شدید حسرت کا شکار ہو گا ، وہ ( پروردگار ) دوسرے سے دریافت کرے گا : تم نے کبھی کوئی بھلائی کی تھی ؟ یا تم نے مجھ سے امید رکھی تھی ؟ تو وہ شخص کہے گا : جی ہاں ! اے میرے پروردگار ! مجھے یہ امید تھی کہ اگر تو نے مجھے ( جہنم سے ) نکال دیا ہے ، تو مجھے دوبارہ اس میں نہیں ڈالے گا ( راوی کہتے ہیں ) یعنی جنت میں داخل ہونے والا ، وہ آخری فرد ہو گا ۔
یہ روایت امام أحمد اور امام بزار نے نقل کی ہے ، انہوں نے یہ الفاظ زائد نقل کیے ہیں : ” کیا تم مجھ سے ڈرے تھے ؟ “ ۔ اس کے رجال صحیح کے رجال ہیں ، صرف علی بن زید کا معاملہ مختلف ہے اور وہ حسن الحدیث ہے ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ایک شخص جہنم میں ایک ہزار سال تک ” یا حنان یا منان “ پکارتا رہے گا ، اللہ تعالیٰ سیدنا جبرائیل علیہ السلام سے فرمائے گا : تم جاؤ اور میرے اس بندے کو میرے پاس لے کر آؤ ! سیدنا جبرائیل علیہ السلام جائیں گے ، وہ اہل جہنم کو پائیں گے ، وہ سر جھکا کر ( یا اوندھے ہو کر ) رو رہے ہوں گے ، وہ ( یعنی سیدنا جبرائیل علیہ السلام ) اپنے پروردگار کے پاس واپس آئیں گے اور اس کو یہ بات بتائیں گے ، تو پروردگار فرمائے گا : تم اُس ( بندے ) کو میرے پاس لے کر آؤ ! وہ فلاں فلاں مقام پر ہے ، سیدنا جبرائیل علیہ السلام اسے ساتھ لائیں گے اور اس کے پروردگار کی بارگاہ میں کھڑا کر دیں گے ، پروردگار دریافت کرے گا : اے میرے بندے ! تو نے اپنی جگہ اور ٹھکانے کو کیسا پایا ؟ وہ کہے گا : اے میرے پروردگار ! سب سے بری جگہ اور سب سے برا ٹھکانہ ، پروردگار فرمائے گا : میرے بندے کو واپس لے جاؤ ! وہ بندہ کہے گا : اے میرے پروردگار ! مجھے یہ امید نہیں تھی کہ اگر تو مجھے اس میں سے نکال دے گا ، تو مجھے واپس اس میں بھیج دے گا ، تو پروردگار فرمائے گا : میرے بندے کو چھوڑ دو !“ ۔
یہ روایت امام أحمد اور امام ابویعلیٰ نے نقل کی ہے اور ان دونوں کے رجال صحیح کے رجال ہیں ، صرف ابوظلال کا معاملہ مختلف ہے جمہور نے اسے ضعیف کہا: ہے اور ابن حبان نے اسے ثقہ قرار دیا ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر تم لوگ اللہ تعالیٰ کی رحمت کی مقدار ( یعنی اس کی عظمت اور وسعت کے بارے میں ) جان لو تو تم اُسی ( یعنی رحمت کی وسعت ) پر تکیہ کر لو ! ( یہاں ایک لفظ کے بارے میں راوی کو شک ہے ) ۔
یہ روایت امام بزار نے نقل کی ہے اور اس کی سند حسن ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے ایک سو رحمتیں پیدا کی ہیں ، اُن میں سے ایک رحمت ، اس نے مخلوق کے درمیان تقسیم کی ہے اور ننانوے رحمتیں قیامت کے دن کے لیے ہیں ۔ “
یہ روایت امام طبرانی نے اور امام بزار نے نقل کی ہے اور ان دونوں کی سند حسن ہے ۔ ( علامہ ہیثمی فرماتے ہیں : ) میں یہ کہتا ہوں : اللہ تعالیٰ کی رحمت کی وسعت کے بارے میں کچھ احادیث کتاب التوبہ میں گزر چکی ہیں ۔

حسن بصری بیان کرتے ہیں : مجھ تک
یہ روایت پہنچی ہے : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ کی ایک سو رحمتیں ہیں ، اس نے ایک رحمت اہل زمین کے درمیان تقسیم کی ہے اور وہ اُن کی زندگی بھر کے لیے کافی ہے اور اس نے ننانوے رحمتیں ، قیامت کے دن اپنے دوستوں کے لئے محفوظ کر لی ہیں ۔ “

سیدنا ابوہریرہ رضی اللہ عنہ نے نبی اکرم صلی اللہ علیہ وسلم کے حوالے سے اس کی مانند روایت نقل کی ہے ۔
یہ روایت اور اس سے پہلی روایت امام أحمد نے نقل کی ہے ، ان سب کے رجال صحیح کے رجال ہیں ۔

جلاس کے حوالے سے اس کی مانند روایت منقول ہے ۔

محمد بن سیرین کے حوالے سے اس کی مانند روایت منقول ہے اور اس کے رجال صحیح کے رجال ہیں ۔

سیدنا معاویہ بن حیده رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ نے ایک سو رحمتیں پیدا کی ہیں ( جن میں سے ) ایک رحمت اس کی مخلوق کے درمیان ہے ، جس کی وجہ سے وہ ایک دوسرے پر رحم کرتے ہیں ، اور ننانوے رحمتیں اُس نے اپنے اولیاء کے لیے محفوظ رکھی ہیں ۔ “
یہ روایت امام طبرانی نے نقل کی ہے اس کی سند میں ایک راوی مخیس بن تمیم ہے اور وہ مجہول ہے اس روایت کے بقیہ رجال ثقہ ہیں ۔

سیدنا عبادہ بن صامت رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہمارے پروردگار نے اپنی رحمت کو ایک سو اجزاء میں تقسیم کیا اور ان میں سے ایک جزء زمین میں نازل کر دیا ، اسی کی وجہ سے لوگ ، پرندے اور جانور ، ایک دوسرے پر رحم کرتے ہیں ، باقی ننانوے رحمتیں ( یعنی رحمت کے بقیہ ننانوے اجزاء ) پروردگار کے پاس ہیں ، جو قیامت کے دن اس کے بندوں کے لئے ہیں ۔ “
یہ روایت امام طبرانی نے نقل کی ہے اور اسحاق بن یحیی نامی راوی نے سیدنا عبادہ رضی اللہ عنہ کا زمانہ نہیں پایا ہے ، اس روایت کے بقیہ رجال صحیح کے رجال ہیں ، صرف اسحاق بن یحیی کا معاملہ مختلف ہے ۔