مجمع الزوائد ومنبع الفوائد

حسن بیان کرتے ہیں : سیدنا ابوہریرہ رضی اللہ عنہ نے ہمیں حدیث بیان کی : جب وہ اور ہم مدینہ منورہ میں موجود تھے انہوں نے بتایا : نبی اکرم صلی اللہ علیہ وسلم نے ارشاد فرمایا ہے : ” قیامت کے دن اعمال آئیں گے ، نماز آئے گی اور عرض کرے گی : اے میرے پروردگار ! میں نماز ہوں ، تو پروردگار فرمائے گا : تم بھلائی پر ہو ، صدقہ آئے گا اور عرض کرے گا : اے میرے پروردگار ! میں صدقہ ہوں ، تو پروردگار فرمائے گا : تم بھلائی پر ہو ، پھر روزہ آئے گا اور عرض کرے گا : اے میرے پروردگار ! میں روزہ ہوں ، پروردگار فرمائے گا : تم بھلائی پر ہو ، اسی طرح مختلف اعمال آتے رہیں گے اور اللہ تعالیٰ فرماتا رہے گا : تم بھلائی پر ہو ، پھر اسلام آئے گا اور عرض کرے گا : اے پروردگار ! تو سلامتی عطا کرنے والا ہے اور میں اسلام ہوں ، اللہ تعالیٰ فرمائے گا : بے شک تم بھلائی پر ہو اور تمہاری وجہ سے آج میں گرفت کروں گا اور تمہاری وجہ سے آج میں عطا کروں گا ۔ “ اللہ تعالیٰ نے اپنی کتاب میں یہ ارشاد فرمایا ہے : جو شخص اسلام کے علاوہ کوئی اور دین تلاش کرے گا تو وہ اس کی طرف سے قبول نہیں کیا جائے گا اور وہ شخص آخرت میں خسارہ پانے والوں میں سے ہو گا ۔ “
یہ روایت امام أحمد اور امام ابویعلیٰ نے نقل کی ہے امام طبرانی نے معجم اوسط میں نقل کی ہے اور انہوں نے یہ الفاظ زائد نقل کیے ہیں : اللہ تعالیٰ فرماتا ہے : ” بیشک اللہ تعالیٰ کے نزدیک دین ، اسلام ہے ۔ “ ( ایک اور مقام پر اللہ تعالیٰ نے یہ ارشاد فرمایا ہے : ) ” اور جو شخص اسلام کے علاوہ کوئی اور دین تلاش کرے گا تو وہ اس کی طرف سے قبول نہیں ہو گا اور وہ شخص آخرت میں خسارہ پانے والوں میں سے ہو گا ۔ “ اس روایت کی سند میں ایک راوی عباد بن راشد ہے جسے ابوحاتم اور دیگر حضرات نے ثقہ قرار دیا ہے اور ایک جماعت نے اسے ضعیف کہا: ہے ، امام أحمد کے بقیہ رجال صحیح کے رجال ہیں ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں نے لوگوں کو دیکھا کہ انہیں حساب کے لیے جمع کیا گیا ہے ۔ “
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔

سیدنا جابر بن عبداللہ رضی اللہ عنہما بیان کرتے ہیں : مجھے ایک صاحب کے بارے میں پتہ چلا کہ انہوں نے نبی اکرم صلی اللہ علیہ وسلم سے ایک حدیث سنی ہوئی ہے تو میں نے ایک اونٹ خریدا ، اُس پر پالان باندھا اور پھر ایک ماہ کی مسافت کا فاصلہ طے کر کے ان صاحب کے پاس پہنچا ، یہاں تک کہ شام میں ، میں ان کے پاس آ گیا ، وہ سیدنا عبداللہ بن انیس رضی اللہ عنہ تھے ، میں نے دربان سے کہا: تم اُن سے کہو کہ دروازے پر جابر موجود ہے ، دربان نے دریافت کیا : وہ جو سیدنا عبداللہ رضی اللہ عنہ کے صاحبزادے ہیں ؟ میں نے جواب دیا : جی ہاں ! تو سیدنا عبداللہ بن انیس رضی اللہ عنہ اپنے کپڑے کو گھسیٹتے ہوئے باہر آئے اور انہوں نے مجھے گلے لگا لیا اور میں نے انہیں گلے لگا لیا ، میں نے کہا: مجھے ایک حدیث کے بارے میں یہ پتہ چلا تھا کہ آپ نے اسے نبی اکرم صلی اللہ علیہ وسلم کی زبانی سنا ہوا ہے اور وہ قصاص کے بارے میں ہے ، تو مجھے یہ اندیشہ ہوا کہ کہیں میرے اس حدیث کو سننے سے پہلے آپ کا انتقال نہ ہو جائے ، یا میرا انتقال نہ ہو جائے ، تو سیدنا عبداللہ بن انیس رضی اللہ عنہ نے بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قیامت کے دن اللہ تعالیٰ بندوں کو ( راوی کو شک ہے یا شاید یہ الفاظ ہیں : ) لوگوں کو برہنہ پاؤں برہنہ جسم ختنے کے بغیر ” بہم “ حالت میں زندہ کرے گا ، راوی کہتے ہیں : ہم نے عرض کی : ” بہم “ سے مراد کیا ہے ؟ نبی اکرم صلی اللہ علیہ وسلم نے فرمایا : ان کے پاس کوئی چیز نہیں ہو گی ، پھر انہیں ایک منادی پکار کر یہ کہے گا ، اس پکار کو دور کا آدمی بھی اسی طرح سن لے گا جس طرح قریب کا آدمی اسے سن سکے گا ، وہ یہ فرمائے گا : میں بادشاہ ہوں ، میں بادشاہ ہوں ، میں ” دیان “ ( یعنی فیصلہ کرنے والا ، یا اچھے برے کا بدلہ دینے والا ) ہوں ، اہل جہنم میں سے کسی کے لیے یہ مناسب نہیں ہے کہ وہ جہنم میں داخل ہو جائے جبکہ اس نے اہل جنت میں سے کسی سے کوئی حق وصول کرنا ہو ، تو جب تک میں اس کو اس کا حق نہیں دلوا دیتا ( یعنی اس وقت تک یہ مناسب نہیں ہے کہ وہ جہنم میں داخل ہو ) اور اہل جنت میں سے کسی کے لیے یہ مناسب نہیں ہے کہ وہ جنت میں داخل ہو جبکہ اس نے اہل جہنم میں سے کسی سے حق وصول کرنا ہو ، جب تک میں اس کا حق اس دوسرے سے اُسے نہیں دلوا دیتا ، یہاں تک کہ تھپڑ مارنے تک کا معاملہ بھی اس میں شامل ہو گا ، ہم نے عرض کی : یہ کیسے ہو گا ؟ جبکہ ہم برہنہ حالت میں ، ختنہ کے بغیر ، کسی چیز کے بغیر ہوں گے ؟ نبی اکرم صلی اللہ علیہ وسلم نے فرمایا : نیکیوں اور برائیوں ( کے حساب ) سے لین دین ہو گا ۔ “
یہ روایت امام أحمد نے نقل کی ہے اور اس کے رجال کی توثیق کی گئی ہے ،
یہ روایت امام طبرانی نے معجم اوسط میں اس کی مانند نقل کی ہے ، تاہم انہوں نے اس میں یہ الفاظ نقل کئے ہیں : ” مصر میں ۔ “ ( علامہ ہیثمی فرماتے ہیں : ) میں یہ کہتا ہوں : اس سے پہلے سیدنا مقدام بن معدیکرب رضی اللہ عنہ اور سیدنا مقداد بن اسود رضی اللہ عنہ کی نقل کردہ حدیث اس باب میں گزر چکی ہے جو دوبارہ زندہ کیے جانے سے متعلق روایات کا مجموعہ ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن بندے کے پاؤں اپنی جگہ سے اس وقت تک نہیں ہلیں گے جب تک اس سے چار چیزوں کے بارے میں حساب نہیں لے لیا جاتا ، اس کی عمر کے بارے میں کہ اس نے کس کام میں اسے بسر کیا ؟ اس کے جسم کے بارے میں کہ اس نے کس کام میں اسے بوسیدہ کیا ؟ اس کے مال کے بارے میں کہ اس نے کہاں اسے خرچ کیا اور کیسے اس کو کمایا ؟ اور اس کی ہمارے ساتھ ( یعنی اہل بیت کے ساتھ ) محبت کے بارے میں ( اس سے حساب لیا جائے گا ) ۔ “
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی حسین بن حسن اشقر ہے اور وہ انتہائی ضعیف ہے ابن حبان نے اسے ثقہ قرار دیا ہے اگرچہ وہ اسلاف کو برا کہتا ہے ۔

سیدنا ابوبرزہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ( قیامت کے دن ) بندے کے قدم اپنی جگہ سے اُس وقت تک نہیں ہلیں گے جب تک اس سے چار چیزوں کے بارے میں حساب نہیں لیا جاتا ، اُس کے جسم کے بارے میں کہ اس نے کس کام میں اسے بوسیدہ کیا ؟ اس کی عمر کے بارے میں کہ اس نے کس کام میں اسے فنا کیا ؟ اس کے مال کے بارے میں کہ اس نے کیسے اسے کمایا اور کہاں خرچ کیا ؟ اور ہم اہل بیت کے ساتھ محبت کے بارے میں ( اس سے حساب لیا جائے گا ) عرض کی گئی : یا رسول اللہ ! آپ لوگوں کے ساتھ محبت کی علامت کیا ہے ؟ تو نبی اکرم صلی اللہ علیہ وسلم نے اپنا دست مبارک سیدنا علی رضی اللہ عنہ کے کندھے پر لگایا ۔ “
یہ روایت امام طبرانی نے معجم اوسط میں نقل کی ہے یہ امام ترمذی نے بھی نقل کی ہے تاہم انہوں نے یہ الفاظ اور اس کے بعد والا حصہ نقل نہیں کئے ہیں : ” ہم اہل بیت کے ساتھ محبت کے بارے میں ۔ “ انہوں نے چوتھی چیز نقل کی ہے : ” اُس سے علم کے بارے میں حساب لیا جائے گا کہ اس نے اس پر کتنا عمل کیا ۔ “ طبرانی کی سند میں ایک راوی حارث بن محمد کوفی ہے جسے معکوف کہا: جاتا ہے ” میزان“ کے مصنف نے یہ کہا: ہے : یہ جھوٹی روایت نقل کرتا ہے اس روایت کے باقی رجال ثقہ ہیں ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن آدمی کے قدم اپنی جگہ سے اس وقت تک نہیں ہلیں گے جب تک اس سے چار چیزوں کے بارے میں حساب نہیں لے لیا جاتا ، اُس کی جوانی کے بارے میں کہ اس نے کس کام میں اسے بوسیدہ کیا ؟ اس کی عمر کے بارے میں کہ اس نے کس کام میں اسے فنا کیا ؟ اس کے مال کے بارے میں کہ اس نے کہاں سے کمایا اور کس کام میں خرچ کیا ؟ “ ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی ابوبکر داہری ہے اور وہ انتہائی ضعیف ہے ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن بندے کے قدم اپنی جگہ سے اُس وقت تک نہیں ہلیں گے جب تک اس سے چار چیزوں کے بارے میں حساب نہیں لے لیا جاتا ، اس کی عمر کے بارے میں کہ اس نے کس کام میں اسے فنا کیا ، اس کی جوانی کے بارے میں کہ اس نے کس کام میں اسے بوسیدہ کیا ، اس کے مال کے بارے میں کہ اس نے کہاں سے اس کو کمایا اور کہاں خرچ کیا اور اس کے علم کے بارے میں کہ اس نے کہاں تک اس پر عمل کیا ۔ “
یہ روایت امام طبرانی نے نقل کی ہے اور امام بزار نے اس کی مانند نقل کی ہے ، امام طبرانی کے رجال صحیح کے رجال ہیں ، صرف صامت بن معاذ اور عدی بن عدی کندی کا معاملہ مختلف ہے اور یہ دونوں ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جب قیامت کا دن ہو گا تو اللہ تعالیٰ ایک بندے کو بلائے گا اسے اپنے سامنے کھڑا کرے گا اور اس سے اس کے جاہ و منصب کے بارے میں حساب لے گا ، جس طرح وہ اس سے اس کے مال کے بارے میں حساب لے گا ۔ “
یہ روایت امام طبرانی نے معجم صغیر میں نقل کی ہے اس کی سند میں ایک راوی یوسف بن یونس ہے جو ابومسلم افطس کا بھائی ہے اور وہ انتہائی ضعیف ہے ۔

سیدنا بریدہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم میں سے ہر ایک کے ساتھ عنقریب اللہ تعالیٰ یوں کلام کرے گا کہ اللہ تعالیٰ اور اُس شخص کے درمیان کوئی حجاب یا کوئی ترجمان نہیں ہو گا ۔ “
یہ روایت امام بزار نے نقل کی ہے اس کی سند میں ایک راوی عبدالعزیز بن ابان ہے اور وہ متروک ہے ۔

عبداللہ بن عکیم بیان کرتے ہیں میں نے سیدنا عبداللہ بن مسعود رضی اللہ عنہ کو اس مسجد میں یہ بیان کرتے ہوئے سنا ہے : انہوں نے گفتگو سے پہلے قسم کے ذریعے اپنے کلام کا آغاز کیا اور پھر یہ فرمایا : ” تم میں سے ہر ایک کے ساتھ اس کا پروردگار انفرادی طور پر یوں کلام کرے گا جس طرح چودھویں رات میں ، تم میں سے کسی ایک کے سامنے چودھویں کا چاند اکیلا ہوتا ہے ، پروردگار فرمائے گا : اے ابن آدم ! میری ذات کے بارے میں کس چیز نے تمہیں غلط فہمی کا شکار کیا ؟ اے ابن آدم ! میری ذات کے بارے میں کس چیز نے تمہیں غلط فہمی کا شکار کیا ؟ اے ابن آدم ! تم نے مرسلین کی دعوت کا کیا جواب دیا ؟ اے ابن آدم ! تم نے مرسلین کی دعوت کا کیا جواب دیا ؟ اے ابن آدم ! تم نے کیا عمل کیا ؟ اے ابن آدم ! تم نے کیا عمل کیا ؟ اے ابن آدم ! تمہیں جو علم تھا اس کے حوالے سے تم نے کیا عمل کیا ؟ اے ابن آدم ! تمہیں جو علم تھا اس کے حوالے سے تم نے کیا عمل کیا ؟ “ ۔
یہ روایت امام طبرانی نے معجم کبیر میں موقوف روایت کے طور پر نقل کی ہے انہوں نے اس کا کچھ حصہ مرفوع روایت کے طور پر معجم اوسط میں نقل کیا ہے ( جس کے الفاظ یہ ہیں : ) ” اے میرے بندے ! کس چیز نے تمہیں میری ذات کے بارے میں غلط فہمی کا شکار کیا ؟ تم نے مرسلین کی دعوت کا کیا جواب دیا ؟ “ ۔ معجم کبیر کے رجال صحیح کے رجال ، صحیح کے رجال ہیں ، صرف شریک بن عبداللہ کا معاملہ مختلف ہے وہ ثقہ ہے اور اس میں ضعف پایا جاتا ہے معجم اوسط کے رجال میں بھی شریک نامی راوی ہے اس کے علاوہ اسحاق بن عبداللہ تمیمی ہے جسے ابن حبان نے ثقہ قرار دیا ہے اس روایت کے بقیہ رجال صحیح کے رجال ہیں ۔

سیدنا ثوبان رضی اللہ عنہ بیان کرتے ہیں : نبی اکرم صلی اللہ علیہ وسلم نے سوال ( یعنی حساب ) کے مسئلے کی عظمت کا اظہار کرتے ہوئے یہ فرمایا : ” جب قیامت کا دن ہو گا تو زمانہ جاہلیت سے تعلق رکھنے والے لوگ آئیں گے انہوں نے اپنے بتوں کو اپنی پشتوں پر اٹھایا ہوا ہو گا ، ان کا پروردگار ان سے سوال کرے گا تو وہ جواب دیں گے : اے ہمارے پروردگار ! تو نے ہمارے لیے کسی رسول کو مبعوث نہیں کیا اور ہمارے پاس تیرا کوئی حکم نہیں آیا ، اگر تو ہماری طرف رسول کو مبعوث کر دیتا تو ہم تیرے سب سے زیادہ فرمانبردار بندے بن جاتے ، تو پروردگار اُن سے فرمائے گا : اس بارے میں تمہارا کیا خیال ہے ؟ کہ اگر میں تمہیں کوئی حکم دوں تو تم میری اطاعت کرو گے ؟ پھر پروردگار اس حوالے سے ان لوگوں سے پختہ عہد لے گا ، پھر وہ فرمائے گا : تم لوگ اس ( یعنی جہنم ) کی طرف جاؤ ! اور اس میں داخل ہو جاؤ ، وہ لوگ روانہ ہوں گے ، یہاں تک کہ جب وہ اسے دیکھیں گے تو اس سے ڈر جائیں گے اور واپس آ جائیں گے اور کہیں گے : ہم اُس سے ڈر گئے ہیں ، ہم اس میں داخل ہونے کی استطاعت نہیں رکھتے ہیں ، پروردگار فرمائے گا : تم لوگ ذلیل ہو کر اس میں داخل ہو جاؤ ۔ “ نبی اکرم صلی اللہ علیہ وسلم نے ارشاد فرمایا : اگر وہ لوگ پہلی مرتبہ میں ، اُس میں داخل ہو جاتے تو وہ اُن کے لیے ٹھنڈک والی اور سلامتی والی ہو جاتی ۔ “
یہ روایت امام بزار نے دو ضعیف اسناد کے ساتھ نقل کی ہے ۔ اس سے پہلے کتاب القدر میں وہ احادیث گزر چکی ہیں ، جو ان لوگوں کے بارے میں ہیں ، جو زمانہ فترت میں فوت ہو گئے تھے ۔

حسن بیان کرتے ہیں : سیدنا ابوہریرہ رضی اللہ عنہ نے ہمیں ، نبی اکرم صلی اللہ علیہ وسلم کے منبر پر خطبہ دیتے ہوئے یہ ارشاد فرمایا : میں نے نبی اکرم صلی اللہ علیہ وسلم کو یہ فرماتے ہوئے سنا ہے : ” قیامت کے دن اللہ تعالیٰ سیدنا آدم علیہ السلام کے سامنے تین امور کے حوالے سے وجہ بیان کرے گا ، اللہ تعالیٰ فرمائے گا : اے آدم ! اگر ایسا نہ ہوتا کہ میں نے جھوٹ بولنے والوں پر لعنت کی ہے اور میں جھوٹ اور وعدہ خلافی کو ناپسند کرتا ہوں اور میں نے اس حوالے سے وعید بیان کی ہے تو آج کے دن میں نے تمہاری ساری اولاد پر رحم کر دینا تھا ، اس عذاب کی شدت کی وجہ سے جو میں نے اُن کے لئے تیار کیا ہے ، لیکن میری طرف سے یہ بات حق ہے کہ اگر میرے رسولوں کی تکذیب کی گئی اور میرے حکم کی نافرمانی کی گئی تو میں جہنم کو جنات اور انسانوں دونوں سے بھر دوں گا ۔ اللہ تعالیٰ فرمائے گا : اے آدم ! تم یہ بات جان لو ! کہ میں تمہاری اولاد میں سے جہنم میں کسی فرد کو داخل نہیں کروں گا اور ان میں سے کسی فرد کو آگ کا عذاب نہیں دوں گا ، البتہ اس شخص کا معاملہ مختلف ہے جس کے بارے میں مجھے یہ علم ہو کہ اگر میں نے اسے دنیا کی طرف لوٹا دیا تو وہ پہلے سے زیادہ بدتر عمل کرے گا ، وہ رجوع نہیں کرے گا اور ٹھیک نہیں ہو گا ۔ اللہ تعالیٰ فرمائے گا : اے آدم ! میں تمہیں اپنے اور تمہاری ذریت کے درمیان ثالث مقرر کرتا ہوں ، تم میزان کے پاس کھڑے ہو جاؤ اور اس بات کا جائزہ لو کہ ان کے اعمال میں سے کیا تمہارے سامنے پیش کیا جاتا ہے ؟ جس شخص کی بھلائی اس کے شر سے ذرے کے وزن جتنی زیادہ ہوئی تو اسے جنت مل جائے گی تاکہ تمہیں یہ بات پتہ چل جائے کہ میں اُن میں سے جہنم میں صرف ظالموں کو داخل کروں گا ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی فضل بن عیسیٰ رقاشی ہے اور وہ کذاب ہے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ظلم تین قسم کا ہوتا ہے ، ایک ظلم وہ ہے جس کی اللہ تعالیٰ مغفرت نہیں کرے گا ایک ظلم وہ ہے جس کی وہ مغفرت کر دے گا اور ایک ظلم وہ ہے جسے اللہ تعالیٰ چھوڑے گا نہیں ، جہاں تک اس ظلم کا تعلق ہے ، جس کی اللہ تعالیٰ مغفرت نہیں کرے گا تو وہ شرک ہے ، اللہ تعالیٰ نے ارشاد فرمایا ہے : ” بے شک شرک بڑا ظلم ہے ۔ “ جہاں تک اس ظلم کا تعلق ہے جس کی اللہ تعالیٰ مغفرت کر دے گا تو یہ بندوں کا وہ ظلم ہے جو انہوں نے اپنے اوپر کیا ہو گا جو ان کے اور ان کے پروردگار کے مابین معاملات کے حوالے سے ہو گا ۔ جہاں تک اس ظلم کا تعلق ہے جس کو اللہ تعالیٰ چھوڑے گا نہیں ، تو وہ بندوں کا ایک دوسرے پر کیا ہوا ظلم ہے ( اللہ تعالیٰ اسے نہیں چھوڑے گا ) جب تک وہ بندوں کو ایک دوسرے سے بدلہ نہیں دلوا دیتا ۔ “
یہ روایت امام بزار نے اپنے استاد أحمد بن مالک قشیری کے حوالے سے نقل کی ہے اور میں اس سے واقف نہیں ہوں اس ، روایت کے بقیہ رجال کی توثیق کی گئی ہے اگرچہ ان میں ضعف پایا جاتا ہے ۔

سیدنا سلمان فارسی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایک گناہ وہ ہے جس کی مغفرت نہیں ہو گی ، ایک گناہ وہ ہے جسے چھوڑا نہیں جائے گا اور ایک گناہ وہ ہے ، جس کی مغفرت ہو جائے گی ، جہاں تک اس گناہ کا تعلق ہے جس کی مغفرت نہیں ہو گی تو وہ اللہ تعالیٰ کے ساتھ شرک کرنا ہے ، جہاں تک اس گناہ کا تعلق ہے جس کی مغفرت ہو جائے گی تو وہ بندے کا وہ گناہ ہے جو اس کے اور اللہ تعالیٰ کے مابین معاملے کے حوالے سے ہو ، جہاں تک اس گناہ کا تعلق ہے جسے چھوڑا نہیں جائے گا تو وہ بندوں کا ایک دوسرے کے ساتھ ( ظلم و زیانی کے طور پر ) کیا ہوا گناہ ہے ۔ “
یہ روایت امام طبرانی نے معجم کبیر اور معجم صغیر میں نقل کی ہے ، اس کی سند میں ایک راوی یزید بن سفیان بن عبداللہ بن رواحہ ہے اور وہ ضعیف ہے ، ابن حبان نے اس کے بارے میں کلام کیا ہے اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایک گناہ وہ ہے جس کی مغفرت ہو جائے گی ، ایک گناہ وہ ہے جس کی مغفرت نہیں ہو گی ، ایک گناہ وہ ہے جس کا بدلہ دلوایا جائے گا ، جہاں تک اس گناہ کا تعلق ہے جس کی مغفرت نہیں ہو گی ، تو وہ کسی کو اللہ کا شریک ٹھہرانا ہے ، جہاں تک اس گناہ کا تعلق ہے جس کی مغفرت ہو جائے گی تو وہ تمہارا وہ عمل ہے جس کا تعلق تمہارے اور تمہارے پروردگار کے مابین معاملے سے ہو ، جہاں تک اس گناہ کا تعلق ہے ، جس کا بدلہ دلوایا جائے گا تو وہ تمہارا اپنے بھائی پر ظلم کرنا ہے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی طلحہ بن عمرو ہے اور وہ متروک ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” دواوین ( یعنی اعمال نامے ) اللہ تعالیٰ کے پاس تین قسم کے ہوں گے ، ایک دیوان وہ ہو گا جس کے حوالے سے اللہ تعالیٰ کوئی پرواہ نہیں کرے گا ، ایک دیوان وہ ہو گا جس میں سے اللہ تعالیٰ کوئی چیز نہیں چھوڑے گا اور ایک دیوان وہ ہو گا جس کی اللہ تعالیٰ مغفرت نہیں کرے گا ۔ جہاں تک اس دیوان کا تعلق ہے جس کی اللہ تعالیٰ مغفرت نہیں کرے گا تو وہ ( کسی کو ) اللہ تعالیٰ کے ساتھ شریک ٹھہرانا ہے ، اللہ تعالیٰ نے ارشاد فرمایا ہے : ” جو شخص اللہ تعالیٰ کے ساتھ شرک کرے گا تو اللہ تعالیٰ اس پر جنت حرام کر دے گا ۔ “ جہاں تک اس دیوان کا تعلق ہے جس کے بارے میں اللہ تعالیٰ کوئی پرواہ نہیں کرے گا ، تو وہ بندے کا اپنے اوپر وہ ظلم کرنا ہے جو اس کے اور اس کے پروردگار کے درمیان معاملات کے حوالے سے ہو ، جیسے اس نے کسی دن کا روزہ ترک کر دیا ہو یا نماز ترک کر دی ہو تو اللہ تعالیٰ اس کی مغفرت کر دے گا اور درگزر کرے گا ، اگر وہ چاہے گا ۔ جہاں تک اس دیوان کا تعلق ہے ، جس میں سے اللہ تعالیٰ کوئی بھی چیز نہیں چھوڑے گا تو وہ بندوں کا ایک دوسرے پر ظلم کرنا ہے اس کا لازمی طور پر قصاص ( یعنی بدلہ ) ہو گا ۔ “
یہ روایت امام أحمد نے نقل کی ہے اس کی سند میں ایک راوی صدقہ بن موسیٰ ہے ، جسے جمہور نے ضعیف قرار دیا ہے ، مسلم بن ابراہیم کہتے ہیں : صدقہ بن موسیٰ نے ہمیں حدیث بیان کی اور وہ صدوق تھے ، اس روایت کے بقیہ رجال ثقہ ہیں ۔

سیدنا حذیفہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مملوکوں کے حوالے سے مالکان کے لیے بربادی ہے اور مالکان کے حوالے سے مملوکوں کے لئے بربادی ہے ۔ “
یہ روایت امام بزار نے نقل کی ہے اس کی سند میں ایسے راوی ہیں ، جن سے میں واقف نہیں ہوں ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مملوک کے حوالے سے مالک کے لئے بربادی ہے اور مالک کے حوالے سے مملوک کے لئے بربادی ہے ، غریب کے حوالے سے امیر کے لئے بربادی ہے اور امیر کے حوالے سے غریب کے لئے بربادی ہے ، کمزور کے حوالے سے طاقتور کے لئے بربادی ہے اور طاقتور کے حوالے سے کمزور کے لئے بربادی ہے ۔ “
یہ روایت امام بزار نے اپنے استاد محمد بن لیث کے حوالے سے نقل کی ہے امام ابن حبان رحمہ اللہ نے اس راوی کا تذکرہ کتاب الثقات میں کیا ہے اور یہ کہا: ہے : یہ غلطی کر جاتا ہے اور دوسروں کے برخلاف نقل کرتا ہے ۔ ( علامہ ہیثمی فرماتے ہیں : ) میں نے ” میزان الاعتدال “ میں اس کا تذکرہ نہیں پایا ہے ، اس روایت کے بقیہ رجال صحیح کے رجال ہیں ، البتہ اعمش نامی راوی نے سیدنا انس بن مالک رضی اللہ عنہ سے سماع نہیں کیا ہے ،
یہ روایت امام ابویعلیٰ نے بھی نقل کی ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” خبردار ! اس ذات کی قسم ! جس کے دست قدرت میں میری جان ہے ، قیامت کے دن ہر چیز اپنا مقدمہ پیش کرے گی ، یہاں تک کہ وہ دو بکریاں بھی جنہوں نے ایک دوسرے کو سینگ مارے ہوں گے ( وہ بھی اس بارے میں اپنا مقدمہ پیش کریں گی ) ۔ “
یہ روایت امام أحمد نے نقل کی ہے اور اس کی سند حسن ہے ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اس ذات کی قسم ! جس کے دست قدرت میں میری جان ہے ، قیامت کے دن ( ہر کوئی اپنا ) مقدمہ پیش کرے گا ، یہاں تک کہ دو بکریوں نے ایک دوسرے کو جو سینگ مارے ہوں گے ، اُس بارے میں ( وہ بھی اپنا مقدمہ پیش کریں گی ) ۔ “
یہ روایت امام ابویعلیٰ نے نقل کی ہے اور امام أحمد نے اس کی مانند نقل کی ہے اور اس کی سند حسن ہے ۔

سیدنا عقبہ بن عامر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن ایک دوسرے کے پہلے مقابل فریق ، دو پڑوسی ہوں گے ۔ “
یہ روایت امام أحمد نے حسن سند کے ساتھ نقل کی ہے ۔

سیدنا ابوایوب انصاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن مقدمہ پیش کرنے والے پہلے افراد ، آدمی اور اس کی بیوی ہوں گے ، اللہ کی قسم ! عورت کی زبان کلام نہیں کرے گی بلکہ اس کے ہاتھ اور اس کے پاؤں کلام کریں گے اور عورت کے خلاف گواہی دیں گے کہ وہ شوہر کی غیر موجودگی میں کیا کرتی تھی ؟ اور آدمی کے دونوں ہاتھ اور اس کے دونوں پاؤں گواہی دیں گے جس کا وہ ارتکاب کرتا تھا ، پھر آدمی کو اور اس کے خدمت گاروں کو بلایا جائے گا ، ان کے ساتھ بھی اسی طرح ہو گا ، پھر بازار والوں کو بلایا جائے گا اور وہاں جو سکے اور قیراط ہوتے تھے ( انہیں بھی بلایا جائے گا ) اس ( یعنی ظالم ) کی نیکیاں اُس کو دے دی جائیں گی جو مظلوم ہو گا اور مظلوم کی برائیاں اس ظالم کے ذمے ڈال دی جائیں گی ، پھر ظالموں ( یا متکبرین ) کو لوہے کے بنے ہوئے طوقوں میں لایا جائے گا اور یہ کہا: جائے گا : انہیں جہنم پر وارد کرو ! تو اللہ کی قسم ! مجھے نہیں معلوم کہ وہ اس میں داخل ہوں گے یا ویسا ہو گا ، جس طرح اللہ تعالیٰ نے ارشاد فرمایا ہے : ” تم میں سے ہر ایک اس ( جہنم ) پر وارد ہو گا ، یہ تمہارے پروردگار کے ذمہ حتمی و طے شدہ بات ہے ، پھر ہم پرہیزگاری اختیار کرنے والوں کو نجات دیدیں گے اور ظالموں کو اس ( جہنم میں ) گھٹنوں کے بل ( جھکا ہوا ) چھوڑ دیں گے ۔ “
یہ روایت امام طبرانی نے نقل کی ہے اس کی سند میں ایک راوی عبداللہ بن عبدالعزیز لیثی ہے اور وہ ضعیف ہے ، سعید بن منصور نے اسے ثقہ قرار دیا ہے وہ کہتے ہیں : امام مالک اس سے راضی تھے ، اس روایت کے بقیہ رجال صحیح کے رجال ہیں ۔

سیدنا واثلہ بن اسقع رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن اللہ تعالیٰ ایک ایسے بندے کو زندہ کرے گا ، جس کا کوئی گناہ نہیں ہو گا اللہ تعالیٰ فرمائے گا : دو میں سے کون سا معاملہ تمہارے نزدیک زیادہ پسندیدہ ہے ؟ یہ کہ میں تمہیں تمہارے عمل کی جزا دے دوں ؟ یا جو نعمتیں میں نے تمہیں عطا کی تھیں ( اُن کا حساب لے لوں ؟ ) بندہ کہے گا : اے میرے پروردگار ! تو یہ بات جانتا ہے کہ میں نے تیری کوئی نافرمانی نہیں کی ، پروردگار فرمائے گا : میری نعمتوں میں سے ایک نعمت کے حساب کے حوالے سے میرے بندے کو پکڑ لو ( یا اس کا حساب لو ) تو وہ ایک نعمت ہی اس کی ساری نیکیوں کو ختم کر دے گی ، بندہ کہے گا : اے میرے پروردگار ! تیری نعمت اور تیری رحمت ( کا میں محتاج اور طلبگار ہوں ) تو پروردگار فرمائے گا : میری نعمت اور میری رحمت ( کی بدولت میں تمہیں نجات ملے گی ) پھر ایک بندے کو لایا جائے گا جو یہ سمجھتا ہو گا کہ وہ اچھائی کرنے والا ہے ، اس کا کوئی گناہ نہیں ہو گا ، پروردگار اس سے دریافت کرے گا : کیا تم میرے دوستوں کے ساتھ محبت رکھتے تھے ؟ وہ جواب دے گا : میں لوگوں کے حوالے سے سلامتی میں رہا ( یعنی میں اُن سے لاتعلق رہا ) پروردگار دریافت کرے گا : کیا تم میرے دشمنوں کے ساتھ دشمنی رکھتے تھے ؟ وہ بندہ جواب دے گا : اے میرے پروردگار ! میرے اور کسی شخص کے درمیان کوئی ( دشمنی نہیں تھی ، تو پروردگار فرمائے گا : میری رحمت ایسے شخص کو نصیب نہیں ہو گی جو میرے دوستوں کے ساتھ محبت نہ رکھتا ہو اور میرے دشمنوں کے ساتھ دشمنی نہ رکھتا ہو ۔ “
یہ روایت امام طبرانی نے نقل کی ہے اس کی سند میں ایک راوی بشر بن عون ہے اور اس پر روایات ایجاد کرنے کا الزام ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” ( قیامت کے دن ) مالک اور مملوک ، شوہر اور بیوی کو لایا جائے گا ، مالک اور مملوک سے ، شوہر اور بیوی سے حساب لیا جائے گا یہاں تک کہ آدمی سے یہ کہا: جائے گا : تم نے فلاں فلاں دن لذت کی خاطر مشروب پیا تھا اور شوہر سے یہ کہا: جائے گا : تم نے دیگر لوگوں کے ہمراہ فلاں عورت کو شادی کا پیغام دیا تھا تو میں نے تمہاری شادی اس عورت سے کروا دی اور دوسرے لوگوں کو چھوڑ دیا ۔ “
یہ روایت امام بزار نے سعید بن مسلمہ اموی کی لیث بن ابوسلیم سے نقل کردہ روایت کے طور پر نقل کی ہے اور یہ دونوں ضعیف ہیں ، ویسے ان دونوں کی توثیق کی گئی ہے اس روایت کے بقیہ رجال صحیح کے رجال ہیں ۔

سیدنا عبداللہ بن زبیر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص سے حساب میں تفتیش کی جائے گی وہ ہلاک ہو جائے گا ۔ “
یہ روایت امام بزار نے امام طبرانی نے معجم کبیر اور معجم اوسط میں نقل کی ہے امام بزار کے رجال اور معجم کبیر کے رجال صحیح کے رجال ہیں ، معجم اوسط کے رجال بھی اسی طرح ہیں ، صرف عمرو بن ابوعاصم نبیل کا معاملہ مختلف ہے اور وہ ثقہ ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” قیامت کے دن کسی سے حساب لے کر اس کی مغفرت نہیں ہو گی ، مسلمان اپنی قبر میں ہی اپنا عمل دیکھ لے گا ، اللہ تعالیٰ نے ارشاد فرمایا ہے : ” اس دن انسان یا جن سے اس کے گناہ کے بارے میں سوال نہیں کیا جائے گا ۔ “ ” مجرم لوگ اپنی نشانی کے حوالے سے پہچانے جائیں گے ۔ “
یہ روایت امام أحمد نے نقل کی ہے اس کی سند میں ایک راوی ابن لہیعہ ہے اور وہ ضعیف ہے ، ویسے اس کی توثیق کی گئی ہے ، اس روایت کے بقیہ رجال صحیح کے رجال ہیں ۔

سیدنا جابر بن عبداللہ رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن اللہ تعالیٰ کی بارگاہ میں کھڑے ہونے کے دوران ابن آدم کو اتنی عار اور شرمندگی محسوس ہو گی کہ بندہ یہ آرزو کرے گا : کہ اُسے جہنم میں لے جانے کا حکم دے دیا جائے ۔ “
یہ روایت امام ابویعلیٰ نے نقل کی ہے اس روایت کی سند میں ایک راوی فضل بن عیسیٰ رقاشی ہے اور اس کے ضعیف ہونے پر اتفاق ہے ۔ ( علامہ ہیثمی فرماتے ہیں : ) میں یہ کہتا ہوں : قیامت کے دن کی شدت کے بارے میں سیدنا عبداللہ بن مسعود رضی اللہ عنہ کی نقل کردہ روایت میں یہ بات گزر چکی ہے کہ ایسا کافر کے حق میں ہو گا ۔

سیدنا انس رضی اللہ عنہ مرفوع حدیث کے طور پر یہ بات نقل کرتے ہیں ( نبی اکرم صلی اللہ علیہ وسلم نے ارشاد فرمایا ہے : ) ” ایک فرشتے کو میزان کے پاس مقرر کیا گیا ہے ، ابن آدم کو لا کر میزان کے دونوں پلڑوں کے درمیان کھڑا کر دیا جائے گا ، اگر اس کا میزان بھاری ہو گا تو فرشتہ ایسی آواز میں پکار کر کہے گا جو ساری مخلوق سن سکے گی ، فلاں شخص ایسا سعادتمند ہوا کہ وہ اس کے بعد کبھی بدنصیب نہیں ہو گا ، اور اگر اس کا میزان ہلکا ہوا تو فرشتہ اتنی بلند آواز میں پکار کر کہے گا ، جس کو ساری مخلوق سن سکے گی : فلاں شخص ایسا بدنصیب ہوا کہ اب وہ اس کے بعد کبھی بھی سعادت مند نہیں ہو سکے گا ۔ “
یہ روایت امام بزار نے نقل کی ہے اس کی سند میں ایک راوی صالح مری ہے اور اس کے ضعیف ہونے پر اتفاق ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن مہر لگے ہوئے صحیفوں کو لایا جائے گا اور انہیں اللہ تعالیٰ کے سامنے رکھ دیا جائے گا تو اللہ تعالیٰ فرمائے گا : اس کو ایک طرف کر دو اور اس کو قبول کر لو ، فرشتے عرض کریں گے : تیری عزت اور تیرے جلال کی قسم ہے ( جس صحیفے کو تو نے ایک طرف کرنے کا حکم دیا ہے ) اس میں ہمیں صرف بھلائی دکھائی دے رہی ہے تو اللہ تعالیٰ فرمائے گا : یہ ( یعنی اس صحیفے میں درج عمل ) میری ذات کے علاوہ کسی اور کے لئے تھا اور آج میں صرف اس کو قبول کروں گا ، جس کے ذریعے میری ذات ( کی رضامندی ) مراد لی گئی تھی ۔ “

ایک روایت میں یہ الفاظ ہیں : ” فرشتے کہیں گے : تیری عزت کی قسم ہے ہم نے صرف وہ چیز نوٹ کی جو اس نے عمل کیا تھا ، تو پروردگار فرمائے گا : تم نے سچ کہا: ہے ، اس کا عمل میرے علاوہ کسی اور کے لئے تھا ۔ “
یہ روایت امام طبرانی نے معجم اوسط میں دو اسناد کے ساتھ نقل کی ہے ان دونوں میں سے ایک رجال صحیح کے رجال ہیں ،
یہ روایت امام بزار نے بھی نقل کی ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب آخری زمانہ آئے گا تو میری امت تین حصوں میں تقسیم ہو جائے گی ، ایک گروہ خالص طور پر اللہ تعالیٰ کی عبادت کرے گا ، ایک گروہ ریاکاری کے طور پر اللہ تعالیٰ کی عبادت کرے گا ، ایک گروہ اللہ تعالیٰ کی عبادت اس لیے کرے گا تاکہ لوگوں سے مالی فائدہ حاصل کرے ، قیامت کے دن جب اللہ تعالیٰ انہیں جمع کرے گا تو اللہ تعالیٰ اس شخص سے یہ فرمائے گا جو اس عبادت کے ذریعے لوگوں سے مالی فائدہ حاصل کرتا تھا ( اللہ تعالیٰ اس سے دریافت کرے گا : ) میری عزت اور میرے جلال کی قسم ! تم نے کس مقصد کے تحت میری عبادت کی ؟ وہ بندہ جواب دے گا : تیری عزت اور تیرے جلال کی قسم ! میں اس کے ذریعے لوگوں سے مالی فائدہ حاصل کرنا چاہتا تھا ، تو پروردگار فرمائے گا : تم نے جو کچھ بھی اکٹھا کیا ، وہ تمہیں یہ فائدہ نہیں دے گا کہ اب تم اس کی پناہ لے سکو ( پھر فرشتوں کو حکم ہو گا ) اس کو جہنم کی طرف لے جاؤ ! ۔ پھر اللہ تعالیٰ ریاکاری کے طور پر عبادت کرنے والے سے فرمائے گا : میری عزت اور میرے جلال کی قسم ! تم نے میری عبادت کے ذریعے کیا مراد لیا ؟ ( یعنی میری عبادت کے حوالے سے تمہارا مقصد کیا تھا ؟ ) تو وہ شخص عرض کرے گا : تیری عزت اور تیرے جلال کی قسم ، لوگوں کے لئے دکھاوا ( میرا مقصد تھا ) پروردگار فرمائے گا : اس میں سے کوئی بھی عمل مجھ تک نہیں پہنچا ( پھر فرشتوں کو حکم ہو گا ) اس کو جہنم کی طرف لے جاؤ ! ۔ پھر اللہ تعالیٰ اس شخص سے فرمائے گا جو خالص طور پر اس کی عبادت کرتا تھا ، میری عزت اور میرے جلال کی قسم ! تم میری عبادت کے ذریعے کیا مراد لیتے تھے ؟ وہ عرض کرے گا : تیری عزت اور تیرے جلال کی قسم ! تو اس بارے میں مجھ سے بہتر جانتا ہے ، میں نے اس کے ذریعے تجھے یاد کرنا اور تیری رضامندی مراد لیا تھا ، اللہ تعالیٰ فرمائے گا : میرے بندے نے سچ کہا: ہے ( پھر فرشتوں کو حکم ہو گا : ) اسے جنت کی طرف لے جاؤ ! ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عبید بن اسحاق عطار ہے جس کو جمہور نے ضعیف قرار دیا ہے اور ابوحاتم رازی اس سے راضی تھے ، ابن حبان نے اسے ثقہ کہا: ہے اس روایت کے بقیہ رجال ثقہ ہیں ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب قیامت کا دن ہو گا ، تو کافر کو اس کے عمل کی شناخت کروائی جائے گی ، وہ انکار کرے گا اور جھگڑا کرے گا تو اس سے کہا: جائے گا : یہ تمہارے پڑوسی ہیں ، جو تمہارے خلاف گواہی دے رہے ہیں ، وہ کہے گا : یہ جھوٹ بول رہے ہیں ، پروردگار فرمائے گا : ( یا فرشتہ کہے گا : ) یہ تمہارے اہل خانہ اور تمہارے خاندان کے لوگ ( یہ تمہارے خلاف گواہی دے رہے ہیں ) وہ کہے گا : یہ بھی جھوٹ بول رہے ہیں ، وہ ( یعنی پروردگار یا فرشتہ ) فرمائے گا : تم لوگ حلف اٹھاؤ ! وہ لوگ حلف اٹھا لیں گے ، پھر اللہ تعالیٰ انہیں خاموش کروائے گا اور پھر اُن ( کافر ) لوگوں کی ( اپنی ) زبانیں ( ان کے خلاف ) گواہی دیں گی اور پھر اللہ تعالیٰ انہیں جہنم میں داخل کر دے گا ۔ “
یہ روایت امام ابویعلیٰ نے حسن سند کے ساتھ نقل کی ہے جس میں ضعف پایا جاتا ہے ۔

سیدنا عقبہ بن عامر رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جس دن منہ پر مہر لگا دی جائے گی اس دن انسان کی جو ہڈی سب سے پہلے کلام کرے گی وہ بائیں ٹانگ کا زانو ہے ۔ “
یہ روایت امام أحمد اور امام طبرانی نے نقل کی ہے اور ان دونوں کی سند عمدہ ہے ۔

سیدنا معاویہ بن حیده رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، آپ صلی اللہ علیہ وسلم نے ارشاد فرمایا : ” کیا وجہ ہے کہ میں تمہیں پہلو سے پکڑ کر جہنم میں جانے سے روکتا ہوں ، خبردار ! میرے پروردگار نے مجھے بلانا ہے اور مجھ سے دریافت کرنا ہے : کیا تم نے میرے بندوں تک تبلیغ کر دی تھی ؟ اور میں یہ کہوں گا : اے میرے پروردگار ! میں نے ان کو تبلیغ کر دی تھی ( پھر نبی اکرم صلی اللہ علیہ وسلم نے حاضرین سے فرمایا : ) تم میں سے موجود افراد ، غیر موجود لوگوں تک تبلیغ کر دیں ، پھر تمہیں ( قیامت کے دن ) بلایا جائے گا اور تمہارے منہ بند کر دیے جائیں گے اور تم میں سے کسی ایک کی طرف سے جو چیز پہلے بیان کرے گی وہ اس کا زانو اور اس کی ہتھیلی ہو گی ۔ “
راوی کہتے ہیں : میں نے عرض کی : یا رسول اللہ ! یہ ہمارا دین ہے ، نبی اکرم صلی اللہ علیہ وسلم نے فرمایا : تمہارا دین ہے ، تم جہاں بھی اچھائی کرو گے وہ تمہارے لیے کفایت کرے گی ( یا یہ دین تمہارے لیے کفایت کرے گا ) ۔ “
یہ روایت امام أحمد نے ایک طویل حدیث میں نقل کی ہے اور اس کے رجال ثقہ ہیں ۔