مجمع الزوائد ومنبع الفوائد

( علامہ ہیثمی فرماتے ہیں : ) میں یہ کہتا ہوں : اس سے پہلے سیدنا عبداللہ بن انیس رضی اللہ عنہ کی نقل کردہ حدیث گزر چکی ہے کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قیامت کے دن اللہ تعالیٰ بندوں کو ( راوی کو شک ہے ، یا شاید یہ الفاظ ہیں : ) لوگوں کو برہنہ جسم حالت میں ، ختنے کے بغیر ” بہم “ حالت میں زندہ کرے گا ، ہم نے دریافت کیا : ” بہم “ حالت سے مراد کیا ہے ؟ نبی اکرم صلی اللہ علیہ وسلم نے ارشاد فرمایا : یہ کہ ان کے پاس کوئی چیز نہیں ہو گی ، پھر ایک منادی ( یعنی پروردگار ) بلند آواز میں انہیں مخاطب کر کے کہے گا ، جس آواز کو دور کا فرد بھی اسی طرح سن سکے گا جس طرح نزدیک کا فرد سن سکے گا ( وہ فرمائے گا ) میں ” دیان “ ہوں ( یعنی فیصلہ کرنے والا یا بدلہ دینے والا ہوں ) میں بادشاہ ہوں ، اہل جہنم میں سے کسی کے لیے یہ مناسب نہیں ہے کہ وہ جہنم میں داخل ہو جائے ، جبکہ اس نے اہل جنت میں سے کسی ایک سے کوئی حق لینا ہو ، جب تک میں اسے بدلہ نہیں دلوا دیتا ، اہل جنت میں سے کسی کے لئے یہ مناسب نہیں ہے کہ وہ جنت میں داخل ہو جائے جبکہ اہل جہنم میں سے کسی کا حق اس کے پاس ہو ، جب تک میں اسے بدلہ نہیں دلوا لیتا ، یہاں تک کہ طمانچہ مارنے ( کا بدلہ بھی میں دلواؤں گا ) ۔ “ راوی کہتے ہیں : ہم نے عرض کی : جب ہم برہنہ جسم ہوں گے ، ختنے کے بغیر ہوں گے اور ہمارے پاس کوئی چیز بھی نہیں ہو گی ( تو بدلہ کیسے دیا جائے گا ؟ ) نبی اکرم صلی اللہ علیہ وسلم نے ارشاد فرمایا : نیکیوں اور برائیوں ( کے ذریعے بدلہ دیا جائے گا ) ۔ “
یہ روایت امام أحمد نے نقل کی ہے اور امام طبرانی نے معجم اوسط میں حسن سند کے ساتھ نقل کی ہے ۔

سیدہ عائشہ صدیقہ رضی اللہ عنہا اور ایک صحابی ، نبی اکرم صلی اللہ علیہ وسلم کے حوالے سے یہ بات نقل کرتے ہیں : ” نبی اکرم صلی اللہ علیہ وسلم کے اصحاب سے تعلق رکھنے والا ایک شخص نبی اکرم صلی اللہ علیہ وسلم کے سامنے بیٹھا ، اس نے عرض کی : یا رسول اللہ ! میرے کچھ غلام ہیں ، جو میرے ساتھ جھوٹ بولتے ہیں ، وہ میرے ساتھ خیانت کرتے ہیں ، وہ میری نافرمانی کرتے ہیں ، میں اُنہیں مارتا ہوں اور انہیں برا کہتا ہوں ، یا رسول اللہ ! تو اُن کے ساتھ میرا یہ رویہ کیسا شمار ہو گا ؟ نبی اکرم صلی اللہ علیہ وسلم نے اس سے فرمایا : وہ لوگ تمہارے ساتھ جو خیانت کرتے ہیں ، تمہاری جو نافرمانی کرتے ہیں ، تمہاری جو تکذیب کرتے ہیں ( ان کا ) یہ عمل اور تمہارا انہیں سزا دینا ( ان دونوں کا جائزہ لیا جائے گا ) اور اگر تمہاری اُنہیں دی ہوئی سزا اُن کے جرم سے کم ہوئی تو یہ چیز تمہارے لئے اضافی ہو گی اور اگر تمہاری اُنہیں دی ہوئی سزا اُن کے جرم کے مطابق ہو گی تو پھر معاملہ برابری کی بنیاد پر ہو گا ، نہ تمہارے حق میں کوئی چیز ہو گی نہ تمہارے ذمہ کوئی چیز لازم ہو گی ، اور اگر تمہارا انہیں سزا دینا ، ان کے جرم سے زیادہ ہو گا تو تمہاری طرف سے جو چیز اضافی ہو گی اس کے حوالے سے تم سے بدلہ دلوایا جائے گا ۔ “ راوی کہتے ہیں : تو وہ شخص نبی اکرم صلی اللہ علیہ وسلم کے سامنے بیٹھ کر رونے لگا ، نبی اکرم صلی اللہ علیہ وسلم نے فرمایا : تمہیں کیا ہوا ہے ؟ کیا تم نے اللہ کی کتاب میں یہ نہیں پڑھا ہے : ” اور ہم قیامت کے دن عدل کا ترازو رکھیں گے تو کسی پر کوئی ظلم نہیں کیا جائے گا ، اگر کوئی چیز رائی کے دانے کے وزن جتنی بھی ہو گی ، تو ہم اس کو لے آئیں گے اور حساب لینے کے لیے ہم کافی ہیں ۔ “ اُس شخص نے عرض کی : یا رسول اللہ ! مجھے کوئی ایسی صورت نہیں ملتی جو میرے حق میں اُن سے علیحدگی اختیار کرنے سے زیادہ بہتر ہو ، میں آپ کو گواہ بنا کر یہ کہتا ہوں کہ وہ سب آزاد ہیں ۔ “ ( علامہ ہیثمی فرماتے ہیں : ) میں یہ کہتا ہوں : سیدہ عائشہ رضی اللہ عنہا کی نقل کردہ حدیث کو امام ترمذی نے نقل کیا ہے ۔
یہ روایت امام أحمد نے نقل کی ہے اور اس کی سند میں صحابی کا نام بیان نہیں کیا گیا اس سند میں ایک اور ایسا راوی ہے ، جس کا نام بیان نہیں کیا گیا ، ان دونوں کے بقیہ رجال صحیح کے رجال ہیں ۔

سیدنا ابوذر غفاری رضی اللہ عنہ بیان کرتے ہیں : نبی اکرم صلی اللہ علیہ وسلم تشریف فرما تھے ، دو بکریاں چر رہی تھیں ، اُن دونوں میں سے ایک نے دوسری کو سینگ مار کر اسے پرے کر دیا تو نبی اکرم صلی اللہ علیہ وسلم ہنس پڑے ، عرض کی گئی : یا رسول اللہ ! آپ کیوں ہنستے ہیں ؟ نبی اکرم صلی اللہ علیہ وسلم نے فرمایا : مجھے اس پر حیرانی ہوئی ، اس ذات کی قسم ! جس کے دست قدرت میں میری جان ہے ، قیامت کے دن اُسے بدلہ دلوایا جائے گا ۔

ایک روایت میں یہ بات مذکور ہے : ” نبی اکرم صلی اللہ علیہ وسلم نے دو بکریوں کو دیکھا کہ وہ ایک دوسرے کو سینگ مار رہی تھیں ، آپ نے فرمایا : اے ابوذر ! کیا تم اس بارے میں جانتے ہو ؟ یہ جو ایک دوسرے کو سینگ مار رہی ہیں ، سیدنا ابوذر رضی اللہ عنہ نے عرض کی : جی نہیں ! نبی اکرم صلی اللہ علیہ وسلم نے فرمایا : لیکن اللہ تعالیٰ یہ بات جانتا ہے اور وہ عنقریب ان دونوں کے درمیان فیصلہ دے گا ۔ “ یہ تمام روایات امام أحمد نے نقل کی ہیں ، امام بزار نے پہلی روایت نقل کی ہے امام طبرانی نے اسی طرح کی روایت معجم اوسط میں نقل کی ہے ، اس کی سند میں ایک راوی لیث بن ابی سلیم ہے اور وہ مدلس ہے ، امام أحمد کے بقیہ رجال صحیح کے رجال ہیں ، صرف ان کے استاد ابن عائشہ کا معاملہ مختلف ہے اور وہ ثقہ ہے ۔ دوسری روایت کے رجال صحیح کے رجال ہیں اور اس کی سند میں ایسا راوی ہے ، جس کا نام بیان نہیں کیا گیا ہے ۔

سیدنا عثمان رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن سینگ کے بغیر والی بکری کو ، سینگ والی بکری سے بدلہ دلوایا جائے گا ۔ “
یہ روایت امام ابویعلیٰ نے کبیر میں نقل کی ہے اور امام بزار نے نقل کی ہے اور عبداللہ بن أحمد نقل کی ہے اس کی سند میں ایک راوی حجاج بن نصیر ہے جس کے ضعیف ہونے کے باوجود اس کی توثیق کی گئی ہے ، ہزار کے بقیہ رجال صحیح کے رجال ہیں ، صرف عوام بن مزاحم کا معاملہ مختلف ہے اور وہ ثقہ ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مخلوق کو ایک دوسرے سے بدلہ دلوایا جائے گا ، یہاں تک کہ سینگ کے بغیر والی بکری کو ، سینگ والی بکری سے ، اور ایک چیونٹی کو دوسری چیونٹی سے بدلہ دلوایا جائے گا ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : سیدنا صادق و مصدوق ، ابوالقاسم صلی اللہ علیہ وسلم نے مجھے یہ بات بیان کی ہے : ” بے شک پہلے دو فریق قیامت کے دن ، جن کے درمیان فیصلہ کیا جائے گا ، وہ دو بکریاں ہوں گی ، ایک سینگ والی ہو گی اور ایک سینگ کے بغیر ہو گی ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی جابر بن یزید جعفی ہے اور وہ ضعیف ہے ۔

سیدنا عبداللہ بن ابواوفیٰ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن اللہ تعالیٰ کا عدل یہاں تک جائے گا کہ بغیر سینگ والی بکری کو ، سینگ والی سے بدلہ دلوایا جائے گا ۔ “
یہ روایت امام طبرانی نے معجم اوسط میں نقل کی ہے اس کی سند میں ایسے راوی ہیں ، جن سے میں واقف نہیں ہوں اور ایک راوی عطا بن سائب ہے جو اختلاط کا شکار ہو گیا تھا ۔

نبی اکرم صلی اللہ علیہ وسلم کی زوجہ محترمہ سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم میرے گھر میں موجود تھے ، آپ کے دست مبارک میں مسواک تھی ، پھر نبی اکرم صلی اللہ علیہ وسلم نے اپنی کنیز کو ( راوی کو شک ہے ، یا شاید یہ الفاظ ہیں : ) سیدہ ام سلمہ رضی اللہ عنہا کی کنیز کو بلایا ( وہ نہیں آئی ) تو نبی اکرم صلی اللہ علیہ وسلم کے چہرہ مبارک پر غضب کے آثار نمایاں ہوئے ، سیدہ ام سلمہ رضی اللہ عنہا اُٹھ کر کمرے کے اندر گئیں ، تو انہوں نے اس کنیز کو پایا کہ وہ بکری کے بچے کے ساتھ کھیل رہی تھی ، تو سیدہ ام سلمہ رضی اللہ عنہا نے فرمایا : تم یہاں بکری کے بچے کے ساتھ کھیل رہی ہو اور نبی اکرم صلی اللہ علیہ وسلم تمہیں بلا رہے ہیں ، اس کنیز نے عرض کی : اس ذات کی قسم ! جس نے آپ کو حق کے ہمراہ مبعوث کیا ہے ، میں نے آپ کی آواز نہیں سنی تھی ، نبی اکرم صلی اللہ علیہ وسلم نے ارشاد فرمایا : اگر بدلہ دیے جانے کا اندیشہ نہ ہوتا تو میں نے تمہیں اس مسواک کے ذریعے مارنا تھا ۔ “

ایک روایت میں یہ الفاظ ہیں : ” اگر قصاص نہ ہوتا تو میں نے تمہیں اس مسواک کے ذریعے مارنا تھا ۔ “

ایک روایت میں یہ الفاظ ہیں : ” اگر قصاص کا خوف نہ ہوتا تو میں نے تمہیں اس لکڑی کے ذریعے تکلیف پہنچانی تھی ۔ “ یہ تمام روایات امام ابویعلیٰ نے نقل کی ہیں اور امام طبرانی نے اس کی مانند نقل کی ہیں ، تاہم انہوں نے یہ الفاظ نقل کئے ہیں : ” نبی اکرم صلی اللہ علیہ وسلم نے اپنی کنیز کو بلایا ۔ “ یہ الفاظ کسی شک کے بغیر ہیں اور انہوں نے یہ الفاظ نقل کئے ہیں : ” اگر قیامت کے دن بدلہ دیے جانے کا خوف نہ ہوتا ۔ “ امام ابویعلیٰ اور طبرانی کی نقل کردہ روایت کی سند عمدہ ہے ۔

سیدنا عمار بن یاسر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے غلام کو مارے گا کہ قیامت کے دن ، اس غلام کو اس سے بدلہ دلوایا جائے گا ۔ “
یہ روایت امام بزار نے نقل کی ہے اور اس کے رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص ظلم کے طور پر ایک چھڑی مارے گا کہ قیامت کے دن اس سے بدلہ دلوایا جائے گا ۔ “
یہ روایت امام بزار نے اور امام طبرانی نے معجم اوسط میں نقل کی ہے اور ان دونوں کی سند حسن ہے ۔

سیدنا ثوبان رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن جب ” جبار تبارک و تعالیٰ “ آئے گا اور پل پر اپنی ٹانگ موڑ لے گا اور یہ فرمائے گا ، میری عزت اور میرے جلال کی قسم ہے ، کسی ظالم کا ظلم میرے آگے سے نہیں گزر سکے گا ، پھر وہ مخلوق کے درمیان ان کے باہمی معاملات کے حوالے سے انصاف کرے گا ، یہاں تک کہ وہ بغیر سینگ والی بکری کو سینگ والی بکری سے بدلہ دلوائے گا ، جو سینگ اُس نے اسے مارا تھا ۔ “
یہ روایت امام طبرانی نے نقل کی ہے اس کی سند میں ایک راوی یزید بن ربیع ہے ، جسے ایک جماعت نے ضعیف قرار دیا ہے ، ابن عدی کہتے ہیں : مجھے یہ امید ہے کہ اس میں کوئی حرج نہیں ہو گا ، اس روایت کے بقیہ رجال ثقہ ہیں ۔

سیدنا سلمان فارسی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن ایک شخص اتنی نیکیاں لے کر آئے گا کہ وہ یہ گمان کرے گا کہ ان کی وجہ سے وہ نجات پا جائے گا ، لیکن پھر کوئی شخص آئے گا جس پر اس نے ظلم کیا ہو گا ، تو اس شخص کی نیکیاں لے کر مظلوم کو دے دی جائیں گی ، یہاں تک کہ اس شخص کی کوئی نیکی باقی نہیں رہے گی ، پھر کوئی اور شخص آئے گا جو اس سے مطالبہ کرے گا لیکن اس کی کوئی نیکی باقی نہیں رہی ہو گی تو مظلوم کی برائیاں لے کر اُس کی برائیوں میں شامل کر دی جائیں گی ۔ “
یہ روایت طبرانی اور امام بزار نے عبداللہ بن اسحاق عطار کے حوالے سے خالد بن حمزہ سے نقل کی ہے اور میں ان دونوں سے واقف نہیں ہوں ، اس روایت کے بقیہ رجال صحیح کے رجال ہیں ۔

سلیمان بن حبیب محاربی بیان کرتے ہیں : میں جنگ میں حصہ لینے کے لیے روانہ ہوا ، جب میرا گزر ” حمص “ سے ہوا تو میں بازار کی طرف گیا تاکہ وہاں سے وہ چیزیں لے لوں جو مسافر کے لیے ضروری ہوتی ہیں ، جب میں نے مسجد کے دروازے کی طرف دیکھا تو میں نے سوچا کہ اگر میں مسجد کے اندر جا کر دو رکعت ادا کر لوں ( تو یہ مناسب ہو گا ) جب میں مسجد کے اندر آیا تو میں نے دیکھا کہ وہاں ثابت بن معبد ، ابن زکریا اور مکحول ، اہل دمشق سے تعلق رکھنے والے کچھ افراد کے ہمراہ موجود تھے ، جب میں نے ان لوگوں کو دیکھا تو میں ان کے پاس آیا اور ان کے پاس بیٹھ گیا ، وہ لوگ کچھ دیر بات چیت کرتے رہے ، پھر انہوں نے کہا: ہم سیدنا ابوامامہ باہلی رضی اللہ عنہ کی طرف جانے کا ارادہ رکھتے ہیں ، وہ لوگ اُٹھے تو ان کے ساتھ میں بھی اُٹھ گیا ، ہم لوگ سیدنا ابوامامہ رضی اللہ عنہ کی خدمت میں حاضر ہوئے ، وہ ایک بوڑھے کمزور عمر رسیدہ فرد تھے ، لیکن ان کی ظاہری حالت کی بہ نسبت ان کی عقل اور ان کی گفتگو زیادہ فضیلت رکھتی تھی ، انہوں نے ہمیں جو بات ارشاد فرمائی ، اس میں سب سے پہلی بات یہ تھی ، تمہاری یہ نشست اللہ تعالیٰ کی طرف سے تمہارے لئے تبلیغ ہے اور تمہارے خلاف اللہ تعالیٰ کی حجت ہے ، نبی اکرم صلی اللہ علیہ وسلم کو جس چیز کے ہمراہ معبوث کیا گیا تھا ، آپ نے اس کی تبلیغ کر دی اور نبی اکرم صلی اللہ علیہ وسلم کے اصحاب نے جو کچھ سنا تھا ، اُس کی انہوں نے تبلیغ کر دی ، تو تم لوگ جو سنو گے ، تم بھی اس کی تبلیغ کر دینا ! ” تین لوگ ہیں ، جن کا اللہ تعالیٰ ضامن ہے ، ایک وہ شخص جو اللہ کی راہ میں نکلتا ہے تو اللہ تعالیٰ کے ذمہ یہ بات ہے ، اللہ تعالیٰ اسے جنت میں داخل کر دے ، یا پھر اسے اجر اور غنیمت کے ہمراہ واپس لے آئے ، اور ایک وہ شخص جو اپنے گھر میں سلامتی کے ہمراہ داخل ہوتا ہے ۔ “ پھر انہوں نے یہ بات بیان کی : جہنم پر پل ہو گا جس میں سات طبقے ہوں گے ، ان میں سے درمیان والے پر نافرمان لوگ ہوں گے ، کسی بندے کو لایا جائے گا ، یہاں تک کہ جب وہ درمیانی درجے پر پہنچے گا تو اس سے دریافت کیا جائے گا : تمہارے ذمہ کتنا قرض ہے ؟ پھر انہوں نے یہ آیت تلاوت کی : ” اور وہ اللہ تعالیٰ سے کوئی بات چھپا نہیں سکیں گے ۔ “ وہ شخص کہے گا : اے میرے پروردگار ! میرے ذمہ اتنا ، اتنا قرض ہے ، تو اُسے کہا: جائے گا : تم اپنا قرض ادا کرو ! وہ کہے گا : میرے پاس تو کوئی چیز نہیں ہے ، مجھے سمجھ نہیں آ رہی کہ میں کس چیز کے ذریعے ادائیگی کروں ؟ تو کہا: جائے گا : اس کی نیکیاں لے لو ! اس شخص سے نیکیاں لی جائیں گی ، یہاں تک کہ اس کی کوئی نیکی باقی نہیں رہے گی ، جب اس کی نیکیاں ختم ہو جائیں گی تو کہا: جائے گا : اس کی نیکیاں ختم ہو گئی ہیں ، تو یہ کہا: جائے گا : اس سے مطالبہ کرنے والے کے گناہ لو اور اس کے ذمہ ڈال دو ! ( راوی کہتے ہیں : ) مجھ تک
یہ روایت پہنچی ہے : کچھ لوگ پہاڑوں جتنی نیکیاں لے کر آئیں گے اور ان سے ( بدلہ ) طلب کرنے والے لوگوں کے لئے اُن کی نیکیاں لی جاتی رہیں گی ، یہاں تک کہ اس شخص کے پاس کوئی نیکی باقی نہیں رہے گی ۔
یہ روایت امام طبرانی نے نقل کی ہے اس کی سند میں ایک راوی کلثوم بن زیاد اور ایک راوی بکر بن سہل دمیاطی ہے اور ان دونوں کی توثیق کی گئی ہے اس میں ضعف پایا جاتا ہے ، اس روایت کے بقیہ رجال صحیح کے رجال ہیں ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن ظالم آئے گا ، یہاں تک کہ وہ جہنم کے پل کے پاس پہنچے گا ، جہاں تاریکی اور گھبراہٹ ہو گی ، تو مظلوم اس سے ملے گا ، وہ اسے پہچان لے گا ، اس نے جو ظلم اس پر کیا تھا اُسے بھی پہچان لے گا ، پھر ظلم کرنے والوں سے ، مظلوموں کو مسلسل بدلہ دلایا جاتا رہے گا ، یہاں تک کے ان ظالموں کے پاس جتنی نیکیاں ہوں گی وہ ان سے لے لی جائیں گی اور جب ان کی نیکیاں باقی نہیں رہیں گی ، تو مظلوموں کی برائیاں اُن پر ڈال دی جائیں گی ، یہاں تک کہ انہیں جہنم کے سب سے نیچے والے طبقے میں پہنچا دیا جائے گا ۔ “
یہ روایت امام طبرانی نے معجم اوسط میں نقل کی ہے اور اس کے رجال کی توثیق کی گئی ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن لوگوں کے پہاڑوں جیسے مظالم لائے جائیں گے جو انہوں نے ایک دوسرے پر کئے ہوں گے اور ان کے حقوق لائے جائیں گے اور پھر اللہ تعالیٰ مسلسل ان کے حوالے سے بدلہ دلواتا رہے گا ، یہاں تک کہ ان میں سے کوئی چیز باقی نہیں رہے گی ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی جابر بن یزید جعفی ہے اور وہ ضعیف ہے ۔

سیدنا ابوبردہ بن نیار رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ ایک غریم ( یعنی جس کے ذمہ کوئی ادائیگی ہو گی ، اس ) کو دوسرے کے لئے روک لے گا ، اتنی زیادہ سختی کے ساتھ جتنی سختی کی جا سکتی ہے ، وہ کہے گا : اے پروردگار ! میں اسے کیسے کچھ دوں ؟ جبکہ تو نے میرا حشر ایسی حالت میں کیا ہے کہ میں برہنہ ہوں اور برہنہ پاؤں ہوں ، تو ادائیگی کیسے ہو سکتی ہے ؟ اللہ تعالیٰ فرمائے گا : ہم ان لوگوں کو تمہاری نیکیاں دے دیتے ہیں ( نبی اکرم صلی اللہ علیہ وسلم فرماتے ہیں : ) پھر اس کی نیکیاں لوگوں کو دے دی جائیں گی ، اگر وہ کفایت کر جائیں گی تو ٹھیک ہے ورنہ لوگوں کے گناہ لے کر اُس کے گناہوں میں شامل کر دیے جائیں گے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی حماد بن شعیب ہے اور وہ انتہائی ضعیف ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کے حوالے سے سیدنا روح الامین علیہ السلام کے حوالے سے یہ بات نقل کرتے ہیں : پروردگار فرماتا ہے : ” بندے کی برائیاں اور نیکیاں لائی جائیں گی اور پھر بدلہ دلوایا جائے گا ( راوی کو شک ہے ، یا شاید یہ الفاظ ہیں : ) ادائیگیاں کی جائیں گی ، اگر اُس کی ایک بھی نیکی باقی رہ گئی تو وہ اس کے لئے جنت میں گنجائش کر دے گی ۔ “
یہ روایت امام بزار نے نقل کی ہے اور اس کے بعض راویوں میں موجود ضعف کے باوجود ان کی توثیق کی گئی ہے ۔

زاذان بیان کرتے ہیں : میں سیدنا عبداللہ بن مسعود رضی اللہ عنہ کی خدمت میں حاضر ہوا ، مجھ سے پہلے ریشم اور دیباج والے لوگ ان کے پاس آ چکے تھے ، میں نے کہا: آپ نے لوگوں کو قریب کر لیا ہے اور مجھے دور کر دیا ہے ، انہوں نے مجھ سے فرمایا : تم قریب آ جاؤ ! انہوں نے مجھے قریب کیا یہاں تک کہ انہوں نے مجھے اپنے بچھونے پر بٹھایا ، پھر انہوں نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” والدین کا اپنی اولاد کے ذمہ قرض ہو گا ( یعنی جو قرض والدین نے اپنی اولاد سے وصول کرنا ہو گا ) جب قیامت کا دن ہو گا تو والدین اپنے بچے کے ساتھ متعلق ہو جائیں گے ( یعنی اس سے اپنے قرض کی واپسی کا مطالبہ کریں گے ) وہ کہے گا : میں آپ کا بچہ ہوں ، لیکن ماں باپ کی یہ خواہش ہو گی کہ کاش اُنہوں نے اُس سے زیادہ وصولی کرنی ہوتی ۔ “ ( یہاں ایک لفظ کے بارے میں راوی کو شک ہے )
یہ روایت امام طبرانی نے عمرو بن مخلد کے حوالے سے ذکریا بن یحیی انصاری سے نقل کی ہے اور میں ان دونوں سے واقف نہیں ہوں اس روایت کے بقیہ رجال کی توثیق کی گئی ہے اگرچہ ان میں سے کچھ میں ضعف پایا جاتا ہے ۔

جہم بن اوس بیان کرتے ہیں : میں نے عبداللہ بن ابومریم کو سنا ، عبداللہ بن رستم اپنی سواری پر ان کے پاس سے گزرا اس نے ابن ابومریم سے کہا: میری یہ خواہش تھی کہ میں آپ کے پاس بیٹھتا اور آپ کے ساتھ بات چیت کرتا ، جب وہ چلا گیا تو ابن ابومریم نے کہا: میں نے سیدنا ابوہریرہ رضی اللہ عنہ کو یہ بیان کرتے ہوئے سنا ہے : نبی اکرم صلی اللہ علیہ وسلم نے ارشاد فرمایا ہے : ” تم لوگ کسی گناہ گار شخص کی نعمت کے حوالے سے رشک نہ کرو کیونکہ تم یہ نہیں جانتے کہ اس نے مرنے کے بعد کس صورتحال کا سامنا کرنا ہے ؟ اللہ تعالیٰ کے پاس اس کے لیے ایک ایسا قاتل ہو گا ( جو اسے قتل کرتا رہے گا ) اور اسے موت نہیں آئے گی ۔ “
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ اس بندے پر رحم کرے جس نے اپنے کسی بھائی کے ساتھ جان یا مال کے حوالے سے کوئی زیادتی کی ہو ، پھر وہ اپنے بھائی کے پاس جائے اور قیامت کے دن سے پہلے اسے معاف کروا لے کیونکہ قیامت کے دن تو کوئی دینار یا درہم نہیں ہو گا وہاں تو نیکیاں ہی ہوں گی ۔ “ عرض کی گئی : یا رسول اللہ ! اگر اس کے پاس نیکیاں نہ ہوئیں ؟ نبی اکرم صلی اللہ علیہ وسلم نے ارشاد فرمایا : تو دوسرے شخص کے گناہ لے کر اس کے گناہوں میں شامل کر دیے جائیں گے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی ہاشم بن عیسیٰ یزنی ہے اور میں اس سے واقف نہیں ہوں اس روایت کے بقیہ رجال کی توثیق کی گئی ہے اگرچہ ان میں سے کچھ میں ضعف پایا جاتا ہے ۔