مجمع الزوائد ومنبع الفوائد

سیدنا ابوسعید خدری رضی اللہ عنہ بیان کرتے ہیں : عرض کی گئی : یا رسول اللہ ! ( ارشاد باری تعالیٰ ہے : ) ” ایک ایسا دن جو پچاس ہزار سال کا ہو گا ۔ “ تو یہ دن کتنا زیادہ طویل ہو گا ؟ نبی اکرم صلی اللہ علیہ وسلم نے ارشاد فرمایا : ” اُس ذات کی قسم ! جس کے دست قدرت میں میری جان ہے ، وہ مومن شخص کے لئے اتنا ہلکا ہو گا ( کہ وہ اس کو اس سے زیادہ مختصر محسوس ہو گا ) جتنی دیر میں وہ دنیا میں فرض نماز ادا کرتا تھا ۔ “
یہ روایت امام أحمد اور امام ابویعلیٰ نے نقل کی ہے اور اس کے راوی میں پائے جانے والے ضعف کے باوجود اس کی سند حسن ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ( ارشاد باری تعالیٰ ہے : ) ” جس دن لوگ تمام جہانوں کے پروردگار کی بارگاہ میں کھڑے ہوں گے ۔ “ ( نبی اکرم صلی اللہ علیہ وسلم نے فرمایا : ) اُس دن کی نصف کی مقدار پچاس ہزار سال ہو گی اور وہ دن مومن کے لیے اتنا ہلکا ہو گا ( یعنی وہ مومن کو اتنا مختصر محسوس ہو گا ) جتنا سورج جب غروب ہونے کے قریب ہو اُس وقت سے لے کر غروب ہونے تک کا درمیانی وقت ہوتا ہے ۔ “
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں صرف اسماعیل بن عبداللہ بن خالد کا معاملہ مختلف ہے اور وہ ثقہ ہے ۔

سیدنا عبداللہ بن عمرو رضی اللہ عنہ بیان کرتے ہیں : وہ نبی اکرم صلی اللہ علیہ وسلم کی خدمت میں حاضر ہوئے ، انہوں نے عرض کی : میں آپ سے تین چیزوں کے بارے میں سوال کرنے والا ہوں ، نبی اکرم صلی اللہ علیہ وسلم نے فرمایا : تم جو چاہو سوال کرو ! انہوں نے عرض کی : قیامت کے دن تمام جہانوں کے پروردگار کے سامنے لوگ کتنا عرصہ کھڑے رہیں گے ؟ اور وہ کھڑا رہنا ، مومن کے لئے کتنا مشکل ہو گا ؟ اور کیا جنت اور جہنم کے درمیان کوئی اور منزل ہے ؟ نبی اکرم صلی اللہ علیہ وسلم نے ارشاد فرمایا : جہاں تک تمہارے اس سوال کا تعلق ہے کہ لوگ تمام جہانوں کے پروردگار کے آگے کتنا عرصہ کھڑے رہیں گے ؟ تو وہ 1000 سال ( کا عرصہ ) ہو گا ، انہیں اجازت نہیں دی جائے گی ۔ جہاں تک تمہارے اس سوال کا تعلق ہے کہ وہ کھڑا ہونا ، مومن کے لئے کتنا مشکل ہو گا ؟ تو مومنین کے دو گروہ ہوں گے ، جہاں تک سبقت لے جانے والے لوگوں کا تعلق ہے تو جس طرح دو آدمی سرگوشی میں بات کر رہے ہوں اور ان کی سرگوشی طویل ہو جائے اور پھر وہ دونوں واپس چلے جائیں ( بس اتنا وقت محسوس ہو گا اور انہیں جنت میں داخل کر دیا جائے گا ۔ میں نے کہا: یہ تو بہت آسان ہے ، نبی اکرم صلی اللہ علیہ وسلم نے ارشاد فرمایا : جہاں تک تمہارے اس سوال کا تعلق ہے کہ کیا جنت اور جہنم کے درمیان کوئی اور منزل بھی ہے ؟ تو ان دونوں کے درمیان میرا حوض ہے ، اس کا بالائی حصہ جنت سے لگتا ہے اور اس کے بالائی حصے کا ایک حصہ جہنم سے لگتا ہے ، اس کی لمبائی ایک ماہ کی مسافت جتنی ہے اور اس کی چوڑائی بھی ایک ماہ کی مسافت جتنی ہے ، اس کا پانی دودھ سے زیادہ سفید ہے اور شہد سے زیادہ میٹھا ہے اس میں چاندی کے پیالے اور شیشے کے برتن ہوں گے جو اس میں سے ایک گلاس پی لے گا اسے پیاس یا غم محسوس نہیں ہو گا ، جب تک لوگوں کے درمیان فیصلہ نہیں ہو جاتا ۔ “ ( علامہ ہیثمی فرماتے ہیں : ) میں یہ کہتا ہوں : ان صحابی کے حوالے سے حوض کے تذکرے کے بارے میں ایک روایت ” صحیح “ میں مذکور ہے ۔
یہ روایت امام طبرانی نے نقل کی ہے اس کی سند میں ایک راوی ہشام بن بلال ہے اور میں اس سے واقف نہیں ہوں ، اس روایت کے بقیہ رجال کی توثیق کی گئی ہے ۔

سیدنا عبدالله بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم لوگ قیامت کے دن اکٹھے ہو گے ، تو یہ کہا: جائے گا : اس امت کے فقراء اور مساکین کہاں ہیں ؟ تو وہ کھڑے ہو جائیں گے ، ان سے دریافت کیا جائے گا : تم نے کیا عمل کیا ؟ وہ جواب دیں گے : اے ہمارے پروردگار ! تو نے ہمیں آزمائش میں مبتلا کیا تو ہم نے صبر سے کام لیا ، تو نے امور اور حکومت کا نگران ہمارے علاوہ دوسروں کو بنایا ، تو اللہ تعالیٰ فرمائے گا : تم نے سچ کہا: ہے ، راوی کو شک ہے ، یا شاید اس کی مانند کوئی اور کلمہ ہے ، نبی اکرم صلی اللہ علیہ وسلم نے فرمایا : تو وہ لوگ دوسرے لوگوں سے ایک مخصوص عرصہ پہلے جنت میں داخل ہو جائیں گے اور حساب کی شدت ان لوگوں کے لیے باقی رہ جائے گی ( یعنی جو دنیا میں امور اور حکومت سے متعلق افراد تھے ) ۔ لوگوں نے دریافت کیا : اُس وقت مومنین کہاں ہوں گے ؟ نبی اکرم صلی اللہ علیہ وسلم نے فرمایا : اُن کے لیے نور سے بنے ہوئے منبر رکھے جائیں گے ، ان پر بادل سایہ کر دیں گے اور وہ ( یعنی قیامت کا ) دن مومنین کے لیے ( دنیا کے ) دن کے ایک پہر سے زیادہ مختصر ہو گا ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں صرف ابوکثیر زبیدی کا معاملہ مختلف ہے اور وہ ثقہ ہے ۔