مجمع الزوائد ومنبع الفوائد

سیدنا جابر بن عبداللہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” موت کی تمنا نہ کرو ! کیونکہ مطلع کی ہولناکی شدید ہے ۔ “ اس کے بعد راوی نے پوری حدیث ذکر کی ہے جو اس سے پہلے کتاب توبہ میں ، عمر طویل ہونے سے متعلق باب میں گزر چکی ہے ۔
یہ روایت امام أحمد اور امام بزار نے نقل کی ہے اور ان دونوں کی سند عمدہ ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن لوگوں کو زندہ کیا جائے گا اور اس وقت آسمان اُن پر ہلکی بارش نازل کرے گا ۔ “
یہ روایت امام أحمد ، امام ابویعلیٰ نے نقل کی ہے اس کی سند میں ایک راوی عبدالرحمن بن ابوصہباء ہے جس کا ذکر ابن ابوحاتم نے کیا ہے انہوں نے اس کے بارے میں کوئی جرح ذکر نہیں کی ہے اس روایت کے بقیہ رجال ثقہ ہیں ۔

سیدنا ابوامامہ باہلی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن سورج ایک میل کے فاصلے جتنا قریب آ جائے گا اور اس کی تپش اتنی اتنی بڑھ جائے گی یہاں تک کہ کیڑے مکوڑے اس کی وجہ سے یوں کھول اٹھیں گے جیسے ہنڈیا کھولتی ہے اور لوگ اس صورتحال میں یوں عرق آلود ہوں گے کہ وہ پسینہ ان کے گناہوں کے حوالے سے ہو گا ، وہ ان میں سے کسی کے ٹخنے تک پہنچ رہا ہو گا ، کسی کی پنڈلیوں تک آ رہا ہو گا ، کسی کے وسط تک آ رہا ہو گا ، اور کسی کو پسینے کی لگام ڈالی گئی ہو گی ۔ “
یہ روایت امام أحمد اور امام طبرانی نے نقل کی ہے امام أحمد کے رجال صحیح کے رجال ہیں صرف قاسم بن عبدالرحمن کا معاملہ مختلف ہے اور ایک سے زیادہ افراد نے اسے ثقہ قرار دیا ہے ۔

سیدنا عقبہ بن عامر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ( قیامت کے دن ) سورج زمین کے اتنا قریب آ جائے گا کہ لوگوں کو پسینے آئیں گے ، کچھ ایسے لوگ ہوں گے جن کا پسینہ ان کی ایڑیوں تک آ رہا ہو گا ، کچھ کا پسینہ اُن کی نصف پنڈلی تک آ رہا ہو گا ، کچھ کا پسینہ ان کے گھٹنوں تک پہنچ رہا ہو گا ، کچھ کا پسینہ ان کے پیٹ کے نچلے حصے تک پہنچ رہا ہو گا ، کچھ کا پسینہ ان کے پہلو تک پہنچ رہا ہو گا ، کچھ کا پسینہ ان کے کندھوں تک پہنچ رہا ہو گا ، کچھ کا پسینہ ان کی گردن تک پہنچ رہا ہو گا ، اور کچھ ایسے ہوں گے کہ وہ اس پسینے میں ڈوبے ہوئے ہوں گے ، نبی اکرم صلی اللہ علیہ وسلم نے اپنے دست مبارک کے ذریعے اشارہ کر کے یہ بات بیان کی کہ اس کے منہ کو پسینے کی لگام ڈالی گئی ہو گی ، راوی بیان کرتے ہیں : میں نے نبی اکرم صلی اللہ علیہ وسلم کو اس طرح اشارہ کرتے ہوئے دیکھا کہ کچھ لوگوں کو ان کے پسینے نے ڈھانپ لیا ہو گا ، نبی اکرم صلی اللہ علیہ وسلم نے اپنے دست مبارک کے ذریعے اشارہ کر کے یہ بات ارشاد فرمائی تھی ۔
یہ روایت امام أحمد اور امام طبرانی نے نقل کی ہے اور امام طبرانی کی سند عمدہ ہے ۔

سعید بن عامر انصاری بیان کرتے ہیں : میں سیدنا عبداللہ بن عمر رضی اللہ عنہ اور سیدنا ابوسعید خدری رضی اللہ عنہ کے پاس بیٹھا ہوا تھا ، ان دونوں میں سے ایک نے دوسرے سے یہ کہا: میں نے نبی اکرم صلی اللہ علیہ وسلم کو یہ بات ذکر کرتے ہوئے سنا ہے کہ قیامت کے دن لوگوں کے پسینے کا کیا عالم ہو گا ؟ اُن دونوں میں سے ایک نے یہ بات ذکر کی کہ کسی شخص کا پسینہ اس کی کانوں کی لو تک ہو گا اور دوسرے صاحب نے یہ بات ذکر کی ، پسینے نے اسے لگام ڈالی ہوئی ہو گی ، سیدنا عبداللہ بن عمر رضی اللہ عنہما نے اشارہ کر کے بتایا کہ کانوں کی لو سے لے کر اس کے منہ تک ایسے ہو گا ، ابوعاصم نامی راوی نے اپنی دو انگلیوں کے ذریعے اشارہ کر کے یہ بتایا کہ ایسے ہو گا اور انہوں نے یہ کہا: میرے خیال میں یہ دونوں صورتیں برابر ہیں ۔ ( علامہ ہیثمی فرماتے ہیں : ) میں یہ کہتا ہوں : سیدنا عبداللہ بن عمر رضی اللہ عنہما کی نقل کردہ حدیث صحیح میں مذکور ہے ۔
یہ روایت امام أحمد اور امام ابویعلیٰ نے نقل کی ہے اور ان دونوں کے رجال صحیح کے رجال ہیں ، صرف سعید بن عمیر کا معاملہ مختلف ہے اور وہ ثقہ ہے ۔

سیدنا مقدام رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن سورج اتنا قریب آ جائے گا کہ وہ لوگوں سے ایک میل کے فاصلے جتنا رہ جائے گا اور اس کی گرمی زیادہ ہو جائے گی ، جو انہیں جلائے گی اور لوگ اس صورتحال میں اپنے اعمال کے حساب سے پسینے کی مختلف مقداروں میں ہوں گے ، کسی شخص کا پسینہ اس کے ٹخنوں تک آ رہا ہو گا ، کسی کا پسینہ اس کے گھٹنوں تک آ رہا ہو گا ، کسی کا پسینہ اس کے پیٹ کے نچلے حصے تک آ رہا ہو گا اور کسی کو پسینے کی لگام ڈالی گئی ہو گی ۔ راوی کہتے ہیں : میں نے نبی اکرم صلی اللہ علیہ وسلم کو دیکھا کہ آپ نے اپنے دست مبارک کے ذریعے اپنے منہ کی طرف اشارہ کیا ۔
یہ روایت امام طبرانی نے اپنے استاد ابراہیم بن محمد عرق حمصی کے حوالے سے نقل کی ہے اور میں اس سے واقف نہیں ہوں ، اس روایت کے بقیہ رجال کی نقل کردہ حدیث حسن ہوتی ہے ۔

محمد بن فرات بیان کرتے ہیں : محارب کے سامنے دو آدمیوں نے اپنا مقدمہ پیش کیا ، راوی کہتے ہیں : ان دونوں میں سے ایک کے خلاف ایک شخص نے گواہی دیدی ، تو جس شخص کے خلاف گواہی دی گئی تھی اُس نے کہا: اللہ کی قسم ! میرے علم کے مطابق یہ ایک سچا آدمی ہے اور اگر آپ اس کے بارے میں تفتیش کریں تو اس کی تعریف کی جائے گی اور اس کی نیکی کا تذکرہ ہو گا ، لیکن اس نے میرے خلاف جھوٹی گواہی دی ہے اور مجھے اندازہ نہیں ہو پایا کہ اسے کس بات نے اس کام کی جرأت دلائی ہے ؟ تو محارب بن دثار نے اس شخص سے کہا: اے شخص ! تم اللہ تعالیٰ سے ڈرو ! کیونکہ میں نے سیدنا عبداللہ بن عمر رضی اللہ عنہما کو یہ بیان کرتے ہوئے سنا ہے : وہ کہتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جھوٹی گواہی دینے والے شخص کے قدم اپنی جگہ سے ہلنے سے پہلے اُس کے لئے جہنم واجب ہو جاتی ہے اور قیامت کے دن پرندہ اپنے پر مارے گا اور جو کچھ اس کے پیٹ میں ہے اُسے نکال دے گا حالانکہ اسے اس کی کوئی حاجت نہیں ہو گی ۔ “ راوی بیان کرتے ہیں : نبی اکرم صلی اللہ علیہ وسلم اُس وقت کسی شخص کو وعظ و نصیحت کر رہے تھے ۔ ( علامہ ہیثمی فرماتے ہیں : ) میں یہ کہتا ہوں : جھوٹے گواہ والا واقعہ امام ابن ماجہ نے روایت کیا ہے ۔
یہ روایت امام ابویعلیٰ نے نقل کی ہے امام طبرانی نے اس صحابی کے حوالے سے اختصار کے ساتھ نقل کی ہے ، تاہم انہوں نے یہ الفاظ نقل کئے ہیں : ” پرندے اپنے پیٹوں میں موجود جو کچھ ہے اسے پھینک دیں گے ، حالانکہ انہوں نے کوئی زیادتی نہیں کی ہو گی “ ( آگے والے الفاظ شاید محارب بن دثار کے ہیں : ) تو تم اس ( جھوٹی گواہی ) سے بچ کے رہو ! اس کی سند میں ایک راوی محمد بن فرات ہے اور وہ کذاب ہے ۔

سیدنا عبداللہ بن مسعود رضی اللہ عنہ فرماتے ہیں : قیامت کے دن ساری کی ساری زمین آگ ہو گی اور جنت اس کے پرے ہو گی ، لوگ اس کی حوروں کو اور اس کے برتنوں کو دیکھیں گے ، اس ذات کی قسم ! جس کے دست قدرت میں عبداللہ کی جان ہے ، کوئی شخص اتنا پسینہ بہائے گا کہ زمین میں ان کا وجود پسینے میں ڈوبا ہو گا اور کسی کا پسینہ اس کی ناک تک پہنچ رہا ہو گا ، حالانکہ ابھی اس کا حساب نہیں ہوا ہو گا ۔ لوگوں نے دریافت کیا : اے ابوعبدالرحمن ! اس کی وجہ کیا ہو گی ؟ انہوں نے فرمایا : وہ صورتحال جس کا لوگ سامنا کریں گے ۔
یہ روایت امام طبرانی نے موقوف روایت کے طور پر نقل کی ہے اور اس کے رجال صحیح کے رجال ہیں ۔