مجمع الزوائد ومنبع الفوائد

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن کافر کے لیے پچاس ہزار سال کی مقدار نصب کی جائے گی ، یوں جیسے اس نے دنیا میں کوئی بھی عمل نہیں کیا اور کافر چالیس سال کی مسافت کے فاصلے سے جہنم کو دیکھے گا اور یہ گمان کرے گا کہ وہ اس میں گر جائے گا ۔ “
یہ روایت امام أحمد اور امام ابویعلیٰ نے نقل کی ہے اور اس کی سند حسن ہے اگرچہ اس کے راویوں میں ضعف پایا جاتا ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن ایک شخص کو آگ کی لگام ڈالی جائے گی تو وہ کہے گا : اے میرے پروردگار ! تو مجھے راحت دیدے ( یعنی اس سے نجات دیدے ) خواہ جہنم کی طرف بھیج دے ۔ “

ایک ” موقوف “ روایت میں یہ الفاظ ہیں : ” بے شک کافر ۔ ۔ ۔ ۔ ۔ ۔ “ ۔ یہ دونوں روایات طبرانی نے کبیر میں دو اسناد کے ساتھ نقل کی ہیں انہوں نے اس کو اوسط میں بھی نقل کیا ہے ۔

ان دونوں کی ایک روایت میں یہ الفاظ ہیں : انہوں نے فرمایا : ” قیامت کے دن کافر سے حساب لیا جائے گا ، یہاں تک کہ پسینہ اسے لگام ڈال دے گا ۔ “

” اوسط “ کی ایک روایت میں یہ الفاظ ہیں : ” اس دن کی شدت کی وجہ سے کافر کو پسینے کی لگام ڈال دی جائے گی ، یہاں تک کہ وہ یہ کہے گا : ۔ ۔ ۔ ۔ ۔ ۔ “ ۔ کبیر کے رجال صحیح کے رجال ہیں اور اوسط کے رجال میں ایک راوی محمد بن اسحاق ہے اور وہ ثقہ ہے لیکن وہ مدلس ہے ۔
یہ روایت امام ابویعلیٰ نے مرفوع روایت کے طور پر کبیر کی روایت کی مانند نقل کی ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میدان محشر میں کس شخص کو اتنا پسینہ آئے گا کہ وہ یہ کہے گا : اے میرے پروردگار ! تیرا مجھے جہنم کی طرف بھیج دینا ، میرے لئے اس سے زیادہ ہلکا ہو گا ، جس صورتحال کا میں سامنا کر رہا ہوں حالانکہ وہ شخص یہ بات جانتا ہو گا کہ جہنم کا عذاب کتنا شدید ہو گا ۔ “
یہ روایت امام بزار نے نقل کی ہے اس کی سند میں ایک راوی فضل بن عیسیٰ رقاشی ہے اور وہ انتہائی ضعیف ہے ۔