مجمع الزوائد ومنبع الفوائد

(اس باب کے تحت حدیث موجود نہیں ہے)

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” تم سے پہلے کی امتوں کے مقابلے میں تمہاری مدت یوں ہے جیسے عصر کی نماز سے لے کر سورج غروب ہونے تک کا درمیانی وقت ہوتا ہے ۔ “
یہ روایت امام طبرانی نے تینوں کتابوں میں نقل کی ہے تاہم انہوں نے معجم کبیر میں یہ الفاظ نقل کئے ہیں : راوی بیان کرتے ہیں : ہم لوگ نبی اکرم صلی اللہ علیہ وسلم کے پاس بیٹھے ہوئے تھے اور سورج اُس وقت عصر کے بعد قیقعان ( نامی پہاڑ ) پر تھا ، نبی اکرم صلی اللہ علیہ وسلم نے ارشاد فرمایا : ” پہلے گزرے ہوئے لوگوں کی عمروں کے مقابلے میں ، تمہاری عمریں یوں ہیں ، جس طرح گزرے ہوئے دن کے مقابلے میں باقی رہ جانے والا دن ہے ۔ “ معجم صغیر اور معجم اوسط کے رجال صحیح کے رجال ہیں اور کبیر کی دو اسناد میں سے ایک سند میں ایک راوی شریک ہے جس کی توثیق کی گئی ہے اس روایت کے بقیہ رجال صحیح کے رجال ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک دن اپنے اصحاب کو خطبہ دیا ، اس وقت سورج غروب ہونے کے قریب تھا اور تھوڑا سا وقت باقی رہ گیا تھا ، نبی اکرم صلی اللہ علیہ وسلم نے ارشاد فرمایا : ” اُس ذات کی قسم ! جس کے دست قدرت میں میری جان ہے ، گزرے ہوئے کے مقابلے میں دنیا میں سے صرف اتنا حصہ باقی رہ گیا ہے جیسے گزرے ہوئے دن کے مقابلے میں تمہارا یہ دن باقی رہ گیا ہے ۔ “ راوی کہتے ہیں : ہمیں تھوڑا سا سورج نظر آ رہا تھا ۔
یہ روایت امام بزار نے خلف بن موسیٰ کے حوالے سے اس کے والد سے نقل کی ہے اور ان دونوں کی توثیق کی گئی ہے اس روایت کے بقیہ رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : آپ صلی اللہ علیہ وسلم نے سورج کی طرف دیکھا جو کھجور کی شاخوں کے اوپر نظر آ رہا تھا اور غروب ہونے کے قریب تھا ، آپ صلی اللہ علیہ وسلم نے فرمایا : ” گزرے ہوئے حصے کے مقابلے میں دنیا اتنی باقی رہ گئی ہے جتنا تمہارا یہ دن گزرے ہوئے حصے کے مقابلے میں باقی رہ گیا ہے ۔ “
یہ روایت امام بزار نے نقل کی ہے اس کی سند میں ایک راوی ہشام بن عبدالرحمن ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔