مجمع الزوائد ومنبع الفوائد

سیدنا ابی بن کعب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” انسان کے کھانے کو دنیا کے لئے مثال بنایا گیا ہے ، انسان اسے کتنا عمدہ اور مزیدار بناتا ہے اور تم یہ جائزہ لو کہ وہ آخر میں کیا بن جاتا ہے ؟ “ ۔
یہ روایت عبداللہ اور طبرانی نے نقل کی ہے اور ان دونوں کے رجال صحیح کے رجال ہیں ، صرف عتی کا معاملہ مختلف ہے اور وہ ثقہ ہے ۔

سیدنا ضحاک بن سفیان رضی اللہ عنہ بیان کرتے ہیں : نبی اکرم صلی اللہ علیہ وسلم نے اُن سے فرمایا : ” اے ضحاک ! تمہاری خوراک کیا ہے ؟ انہوں نے عرض کی : یا رسول اللہ ! گوشت اور دودھ ، نبی اکرم صلی اللہ علیہ وسلم نے دریافت کیا : پھر وہ کیا بن جاتا ہے ؟ انہوں نے عرض کی : وہی جو آپ جانتے ہیں ، نبی اکرم صلی اللہ علیہ وسلم نے فرمایا : ” ابن آدم میں سے جو کچھ نکلتا ہے ۔ اللہ تعالی نے اُسے دنیا کے لئے مثال کے طور پر بیان کیا ہے ( یا مثال بنایا ہے ) ۔ “
یہ روایت امام أحمد اور امام طبرانی نے نقل کی ہے اور طبرانی کے رجال صحیح کے رجال ہیں ، صرف علی بن زید بن جدعان کا معاملہ مختلف ہے ، ویسے اس کی توثیق کی گئی ہے ۔

سیدنا سلمان فارسی رضی اللہ عنہ بیان کرتے ہیں : کچھ لوگ نبی اکرم صلی اللہ علیہ وسلم کی خدمت میں حاضر ہوئے ، نبی اکرم صلی اللہ علیہ وسلم نے ان سے دریافت کیا : کیا تم لوگ کھانا کھاتے ہو ؟ انہوں نے عرض کی : جی ہاں ! نبی اکرم صلی اللہ علیہ وسلم نے دریافت کیا : کیا تم لوگ پیتے ہو ؟ انہوں نے عرض کی : جی ہاں ! نبی اکرم صلی اللہ علیہ وسلم نے دریافت کیا : تم لوگ اس کو بھونتے ہو ؟ انہوں نے عرض کی : جی ہاں ! نبی اکرم صلی اللہ علیہ وسلم نے دریافت کیا : پھر تم اس کو ٹھنڈا کرتے ہو ؟ انہوں نے عرض کی : جی ہاں ! نبی اکرم صلی اللہ علیہ وسلم نے فرمایا : ” ان دونوں کا جو انجام ہے ، وہ دنیا کے انجام کی مانند ہے ، تم میں سے کوئی ایک شخص اُٹھ اُٹھ کر اپنے گھر کے پیچھے جاتا ہے اور اس کی بدبو سے بچنے کے لئے اپنی ناک بند کر لیتا ہے ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ۔