مجمع الزوائد ومنبع الفوائد

سیدنا حذیفہ رضی اللہ عنہ بیان کرتے ہیں : ہم نبی اکرم صلی اللہ علیہ وسلم کے ساتھ ایک جنازے میں شریک تھے آپ نے ارشاد فرمایا : کیا میں تمہیں اللہ کے بدترین بندوں کے بارے میں نہ بتاؤں ؟ ہر بدمزاج اور متکبر شخص ۔ کیا میں تمہیں اللہ کے بہترین بندوں کے بارے میں نہ بتاؤں ؟ ہر کمزور اور کم تر حیثیت کا مالک شخص ، جس کا لباس عام سا ہوتا ہے ، اس کی پرواہ نہیں کی جاتی ، لیکن ( اس کا حال یہ ہوتا ہے ) اگر وہ اللہ کے نام پر قسم اٹھا لے ، تو اللہ تعالیٰ اسے پوری کروا دے ۔
یہ روایت امام أحمد نے نقل کی ہے ، اس کی سند میں ایک راوی محمد بن جابر ہے ، جس کے ضعیف ہونے کے باوجود اس کی توثیق کی گئی ہے ، اس روایت کے بقیہ رجال صحیح کے رجال ہیں ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” کیا میں تمہیں اہل جہنم اور اہل جنت کے بارے میں نہ بتاؤں ؟ جہاں تک اہل جنت کا تعلق ہے تو ہر کمزور اور کم تر حیثیت کا مالک شخص ، جس کا لباس عام سا ہو ( اور اس کا حال یہ ہوتا ہے ) اگر وہ اللہ کے نام پر قسم اٹھا لے ، تو اللہ تعالی اسے پوری کروا دے جہاں تک اہل جہنم کا تعلق ہے ، تو ہر موٹا تازہ شخص ( جو مال کو ) بہت زیادہ جمع کرنے والا ہو ( اور اللہ کی راہ میں وہ مال ) نہ دینے والا ہو ، جس کے خادم ہوں ۔ “
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے اور اس کی نقل کردہ حدیث مضبوط ہوتی ہے ۔

سیدنا انس رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بکھرے ہوئے بالوں والے ، عام سے لباس والے ، جنہیں لوگوں کے دروازوں سے پرے کر دیا جاتا ہو ، ان میں کئی ایسے ہوتے ہیں کہ اگر وہ اللہ کے نام پر قسم اٹھا لے ، تو اللہ تعالیٰ اسے پوری کروا دے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی عبداللہ بن موسیٰ تیمی ہے ، جس کی توثیق کی گئی ہے اس روایت کے بقیہ رجال صحیح کے رجال ہیں ۔

سیدنا عبداللہ بن مسعود رضی اللہ عنہ مرفوع حدیث کے طور پر یہ بات نقل کرتے ہیں : ( نبی اکرم صلی اللہ علیہ وسلم نے ارشاد فرمایا ہے : ) ” عام سے لباس والا فرد ، جس کی پرواہ نہ کی جاتی ہو ، ایسا بھی ہو سکتا ہے کہ اگر وہ اللہ کے نام پر قسم اٹھا لے ، تو اللہ تعالیٰ اسے پوری کروا دے ۔ “
یہ روایت امام بزار نے نقل کی ہے اور اس کے رجال صحیح کے رجال ہیں ، صرف جاریہ بن ھرم کا معاملہ مختلف ہے اور اس کے ضعیف ہونے کے باوجود ابن حبان نے اس کی توثیق کی ہے ۔

سیدنا ثوبان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت میں ایسے لوگ بھی ہوں گے کہ اگر ان میں سے کوئی شخص کسی کے پاس جا کر اس سے ایک دینار مانگے ، تو دوسرا شخص اسے نہیں دے گا ، اگر وہ اس سے ایک درہم مانگ لے ، تو دوسرا شخص اسے نہیں دے گا ، اگر وہ اس سے ایک سکہ مانگ لے تو دوسرا شخص اسے نہیں دے گا ، لیکن اگر وہ اللہ تعالٰی سے جنت مانگے ، تو اللہ تعالیٰ وہ اسے عطا کر دے گا ، وہ عام سے لباس والا فرد ہو گا جس کی پرواہ نہیں کی جاتی ہو گی ، لیکن اگر وہ اللہ کے نام پر قسم اٹھا لے ، تو اللہ تعالیٰ اسے پوری کروا دے ۔ “
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دینار کا بندہ برباد ہو جائے ، درہم کا بندہ برباد ہو جائے ، چادر کا بندہ برباد ہو جائے کہ اگر اس کو کچھ دے دیا جائے تو وہ راضی ہو جاتا ہے اور اگر نہ دیا جائے تو وہ ناراض ہو جاتا ہے ، وہ برباد ہو جائے اور اوندھا ہو جائے اور اگر اسے کانٹا چبھے تو وہ نہ نکلے ، اور اس بندے کے لئے مبارکباد ہے جو اللہ کی راہ میں جانے کے لیے اپنے گھوڑے کی لگام پکڑتا ہے ، اس کے سر کے بال بکھرے ہوئے ہوتے ہیں ، اس کے پاؤں غبار آلود ہوتے ہیں ، اگر اس نے پہرہ دینا ہو تو پہرہ دیتا ہے ( اس کی ظاہری دنیاوی حالت یہ ہوتی ہے ) اگر وہ سفارش کرے تو اس کی سفارش قبول نہیں ہوتی ، اگر وہ اندر آنے کی اجازت مانگے تو اسے اجازت نہیں دی جاتی ۔ “ ( علامہ ہیثمی فرماتے ہیں : ) میں یہ کہتا ہوں :
یہ روایت امام بخاری رحمہ اللہ نے نقل کی ہے تاہم انہوں نے یہ الفاظ نقل نہیں کئے ہیں : ” اس بندے کے لئے مبارکباد ہے ۔ ۔ ۔ ۔ ۔ ۔ “ ۔ یہاں سے لے کر آخر تک کے الفاظ انہوں نے نقل نہیں کئے ہیں ، انہوں نے اس کو تعلیق کے طور پر نقل کیا ہے ۔ یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کیا میں تمہیں اہل جنت کے بارے میں نہ بتاؤں ؟ ہم نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے ارشاد فرمایا : ہر کمزور شخص جو کم تر حیثیت کا مالک ہو ، جس کا لباس عام سا ہو ، جس کی پرواہ نہ کی جاتی ہو ، لیکن اگر وہ اللہ کے نام پر قسم اٹھا لے تو اللہ تعالیٰ اسے پوری کروا دے ، کیا میں تمہیں اہل جہنم کے بارے میں نہ بتاؤں ؟ ہم نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے ارشاد فرمایا : ہر ” جظ “ - ” جعظ “ ۔ ” متکبر ۔ “ راوی بیان کرتے ہیں : میں نے عرض کی : یا رسول اللہ ! ” جظ “ سے مراد کیا ہے ؟ آپ نے ارشاد فرمایا : جو بھاری بھرکم ہو ، میں نے دریافت کیا : ” جعظ “ سے مراد کیا ہے ؟ آپ نے فرمایا : جو خود کو بڑا سمجھتا ہو ۔
یہ روایت امام طبرانی نے معجم اوسط میں ، اپنے استاد عبداللہ بن محمد بن سعید بن ابومریم کے حوالے سے نقل کی ہے اور وہ ضعیف ہے ۔

سیدنا سراقہ بن مالک بن جعشم رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اے سراقہ ! کیا میں تمہیں اہل جنت اور اہل جہنم کے بارے میں نہ بتاؤں ؟ میں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے ارشاد فرمایا : جہاں تک اہل جہنم کا تعلق ہے ، تو ہر خودپسند ، بدتمیز متکبر شخص ( جہنمی ہو گا ) جہاں تک اہل جنت کا تعلق ہے ، تو کمزور اور مغلوب لوگ ( جنتی ہوں گے ) “ ۔
یہ روایت طبرانی نے معجم کبیر اور معجم اوسط میں نقل کی ہے اور اس کی سند حسن ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کیا میں تمہیں اہل جنت کے بارے میں بتاؤں ؟ میں نے عرض کی : جی ہاں ! نبی اکرم صلی اللہ علیہ وسلم نے ارشاد فرمایا : کمزور اور مغلوب لوگ “
یہ روایت طبرانی نے نقل کی ہے اور اس کے رجال کی توثیق کی گئی ہے ۔

سیدنا ابودرداء رضی اللہ عنہ بیان کرتے ہیں : نبی اکرم صلی اللہ علیہ وسلم نے فرمایا : ” اے ابودرداء ! کیا میں تمہیں اہل جہنم کے بارے میں نہ بتاؤں ؟ میں نے عرض کی : جی ہاں ! یا رسول اللہ ! آپ نے فرمایا : ہر بدمزاج ، خودپسند متکبر شخص ( جو مال کو جمع کرنے والا ہو ( اور اللہ کی راہ میں ) دینے والا نہ ہو ، کیا میں تمہیں اہل جنت کے بارے میں نہ بتاؤں ؟ ہر غریب آدمی کہ اگر وہ اللہ کے نام پر قسم اٹھا لے ، تو اللہ تعالی اسے پوری کروا دے ۔ “
یہ روایت امام طبرانی نے نقل کی ہے ، اس کی سند میں ایک راوی خارجہ بن مصعب ہے اور وہ متروک ہے ۔

سیدنا زید بن ثابت رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کیا میں تمہیں اہل جنت کے بارے میں نہ بتاؤں ؟ لوگوں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے ارشاد فرمایا : ہر کمزور ، کم تر حیثیت کا مالک شخص کہ اگر وہ اللہ کے نام پر قسم اٹھا لے ، تو اللہ تعالیٰ اسے پوری کروا دے ، کیا میں تمہیں اہل جہنم کے بارے میں نہ بتاؤں ؟ ہر بدتمیز ، برائی کی طرف تیزی سے جانے والا شخص ۔ “
یہ روایت امام طبرانی نے نقل کی ہے اور اس کی سند حسن ہے ۔

سیدنا ابوذر غفاری رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھ سے فرمایا : ” تم اس بات کا جائزہ لو ! کہ مسجد میں سب سے زیادہ نمایاں حیثیت کا فرد کون ہے ؟ ( یعنی جو مالدار لگ رہا ہو ) میں نے جائزہ لیا ، تو وہاں ایک شخص موجود تھا ، جس نے حلہ پہنا ہوا تھا ، میں نے عرض کی : یہ ہے ، نبی اکرم صلی اللہ علیہ وسلم نے مجھ سے فرمایا : تم اس بات کا جائزہ لو کہ مسجد میں سب سے کم تر حیثیت کا فرد کون ہے ؟ ( یعنی جو سب سے زیادہ غریب لگ رہا ہو ) میں نے جائزہ لیا تو وہاں ایک شخص تھا جس کا لباس پھٹا پرانا تھا ، میں نے عرض کی : یہ ہے ، راوی بیان کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن یہ ( غریب ) اللہ تعالیٰ کی بارگاہ میں اُس ( امیر ) جیسے ، اتنے لوگوں سے بہتر ہو گا جو زمین کو بھر دیں ۔
یہ روایت امام أحمد نے امام بزار نے اور امام طبرانی نے معجم اوسط میں مختلف اسانید کے ساتھ نقل کی ہے ، امام أحمد کے رجال اور امام بزار اور امام طبرانی کی مختلف اسانید میں سے ایک کے رجال صحیح کے رجال ہیں ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” اللہ تعالیٰ کی مخلوق میں اس کے کچھ مخصوص بندے ہیں ، جنہیں وہ عافیت کی زندگی دیتا ہے اور جب وہ انہیں موت دیتا ہے ، تو ہے ، جنت کی طرف لے جاتا ہے ، یہ وہ لوگ ہیں کہ جن کے پاس سے تاریک رات کے ٹکڑوں کی مانند فتنے گزرتے ہیں ، لیکن یہ لوگ ان فتنوں میں عافیت کے ساتھ رہتے ہیں ۔ “
یہ روایت امام طبرانی نے معجم کبیر اور مجم اوسط میں نقل کی ہے ، اس کی سند میں ایک راوی مسلم بن عبداللہ حمصی ہے اور میں اس سے واقف نہیں ہوں ، امام ذہبی نے اسے مجہول قرار دیا ہے ، اس روایت کے بقیہ رجال کی توثیق کی گئی ہے ۔

سیدنا ابوہریرہ رضی اللہ عنہ مرفوع حدیث کے طور پر یہ بات نقل کرتے ہیں : ( نبی اکرم صلی اللہ علیہ وسلم نے ارشاد فرمایا ہے : ) “” “” کیا میں تمہیں اہل جنت کے بارے میں نہ بتاؤں ؟ کمزور اور مظلوم لوگ ( جنتی ہوں گے ) کیا میں تمہیں اہل جہنم کے بارے میں نہ بتاؤں ؟ ہر بدمزاج شخص ( یا زیادہ کھانے والا موٹا شخص جہنمی ہو گا ) کیا میں تمہیں تمہارے بہترین لوگوں کے بارے میں نہ بتاؤں ؟ جن کے اخلاق اچھے ہوں ، کیا میں تمہیں ، تمہارے بدترین لوگوں کے بارے میں نہ بتاؤں ؟ وہ لوگ جو مصنوعی طریقے سے منہ بنا کر تکبر آمیز انداز میں کلام کرتے ہیں ۔ “ یہ روایت امام بزار نے نقل کی ہے ہمارے علم کے مطابق
یہ روایت سیدنا ابوہریرہ رضی اللہ عنہ کے حوالے سے صرف اسی سند کے ساتھ منقول ہے ، اس کی سند میں ایک راوی براء بن یزید ہے ، اگر تو یہ براء بن عبداللہ بن یزید ہے ، تو پھر یہ ضعیف ہے ، اور اگر یہ براء بن یزید ہمدانی ہے تو پھر ابن حبان نے اسے ثقہ قرار دیا ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” سیدنا موسیٰ علیہ السلام کا گزر ایک شخص کے پاس سے ہوا جو اضطراب کا شکار تھا ، سیدنا موسیٰ علیہ السلام کھڑے ہو گئے اور اللہ تعالی سے یہ دعا کرنے لگے کہ وہ اسے عافیت عطا کر دے ، ان سے کہا: گیا : اے موسیٰ ! یہ وہ فرد نہیں ہے جسے ابلیس کی طرف سے کوئی خبط لاحق ہو گیا ہو ، بلکہ اس نے اپنے آپ کو میرے لئے بھوکا رکھا ہے تو اب اس کا یہ حال ہے ، جو تم دیکھ رہے ہو ، میں روزانہ کئی مرتبہ اس کی طرف دیکھتا ہوں اور اس کی فرمانبرداری پر خوش ہوتا ہوں ، تم اسے کہو : کہ یہ تمہارے لئے دعا کرے ، کیونکہ میری بارگاہ کی طرف سے اسے روزانہ ایک مخصوص دعا کا حق حاصل ہے ۔ “
یہ روایت امام طبرانی نے نقل کی ہے اور اس کے رجال کی توثیق کی گئی ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر مدینہ منورہ کی کسی گلی سے ہوا ، وہاں آپ نے ایک سیاہ فام شخص کی لاش دیکھی جسے راستے میں ڈال دیا گیا تھا ، آپ نے دریافت کیا : اس کا تعلق کن لوگوں سے ہے ؟ پھر آپ نے دریافت کیا : یہ کن کا غلام ہے ؟ لوگوں نے بتایا : آل فلاں کا ہے ، نبی اکرم صلی اللہ علیہ وسلم نے دریافت کیا : کیا تم لوگوں نے اسے نماز پڑھتے ہوئے دیکھا ہے ؟ انہوں نے جواب دیا : ہم بعض اوقات اسے نماز پڑھتے ہوئے دیکھتے تھے اور بعض اوقات نہیں بھی دیکھتے تھے ، نبی اکرم صلی اللہ علیہ وسلم نے فرمایا : تم لوگ اُٹھو ! اُسے غسل دو ! اُسے کفن دو ! وہ لوگ اُٹھے انہوں نے اسے غسل دیا انہوں نے اسے کفن دیا ، پھر نبی اکرم صلی اللہ علیہ وسلم کھڑے ہوئے آپ نے اس کی نماز جنازہ پڑھائی ، جب آپ نے تکبیر کہی ، تو آپ نے کہا: سبحان اللہ ! سبحان اللہ ! جب نبی اکرم صلی اللہ علیہ وسلم نے نماز مکمل کر لی ، تو آپ کے اصحاب نے آپ کی خدمت میں عرض کی : یا رسول اللہ ! ہم نے آپ کو سنا کہ جب آپ نے تکبیر کہی ، تو آپ نے فرمایا : سبحان الله ! سبحان اللہ ! آپ نے سبحان اللہ ! سبحان اللہ کیوں کہا: ؟ نبی اکرم صلی اللہ علیہ وسلم نے فرمایا : اس کی نماز جنازہ میں اتنے زیادہ فرشتے شریک ہوئے کہ قریب تھا کہ وہ میرے اور اس کے درمیان آ جاتے ۔
یہ روایت امام طبرانی نے معجم اوسط میں نقل کی ہے اور اس کی سند عمدہ ہے ۔