مجمع الزوائد ومنبع الفوائد

ابوحسبہ مسلم بن اکیس ، جو عبداللہ بن عامر کے غلام ہیں ، انہوں نے سیدنا ابوعبیدہ بن جراح رضی اللہ عنہ کے بارے میں یہ بات نقل کی ہے : ایک شخص نے یہ بات بتائی ہے : وہ ایک مرتبہ سیدنا ابوعبیدہ رضی اللہ عنہ کے پاس آیا تو انہیں روتے ہوئے پایا ، اس نے دریافت کیا : اے سیدنا ابوعبیدہ ! آپ کیوں رو رہے ہیں ؟ سیدنا ابوعبیدہ رضی اللہ عنہ نے جواب دیا : ہم اس بات پر رو رہے ہیں کہ ایک دن نبی اکرم صلی اللہ علیہ وسلم نے یہ بات ذکر کی کہ اللہ تعالیٰ کیسے مسلمانوں کو فتح نصیب کرے گا اور انہیں مال فے عطا کرے گا ، یہاں تک کہ نبی اکرم صلی اللہ علیہ وسلم نے شام کا ذکر کرتے ہوئے یہ ارشاد فرمایا : ” اے ابوعبیدہ ! اگر تمہاری عمر طویل ہوئی ، تو تمہارے لئے تین خدمت گزار کافی ہوں گے ، ایک وہ خادم ، جو تمہاری خدمت کرے ، ایک وہ خادم ، جو تمہارے ساتھ سفر پر جائے اور ایک وہ خادم ، جو تمہارے اہل خانہ کی خدمت کرے اور ان کی دیکھ بھال کرے ، اور تمہارے لیے تین جانور کافی ہوں گے ، ایک جانور تمہاری سواری کے لیے ، ایک جانور تمہارے سامان کے لئے اور ایک جانور تمہارے غلام کے لئے ۔ “ ( پھر سیدنا ابوعبیدہ بن جراح رضی اللہ عنہ نے فرمایا : ) اور اب میں اپنے گھر کو دیکھ رہا ہوں کہ غلاموں سے بھرا ہوا ہے ، اور میں اپنے اصطبل کو دیکھ رہا ہوں کہ وہ جانوروں اور گھوڑوں سے بھرا ہوا ہے ، تو اس کے بعد میں کس طرح نبی اکرم صلی اللہ علیہ وسلم سے ملوں گا ؟ جب کہ نبی اکرم صلی اللہ علیہ وسلم نے ہمیں یہ تلقین کی تھی : ” تم میں سے میرے نزدیک سب سے زیادہ محبوب اور میرے سب سے زیادہ قریب وہ شخص ہو گا ، جو اس حال میں رہے گا جس حال میں ، وہ مجھ سے جدا ہوا تھا ۔ “
یہ روایت امام أحمد نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ، اس روایت کے بقیہ رجال ثقہ ہیں ۔

یحیی بن جعدہ بیان کرتے ہیں : نبی اکرم صلی اللہ علیہ وسلم کے کچھ اصحاب ، سیدنا خباب رضی اللہ عنہ کی عیادت کرنے کے لئے گئے ، أن حضرات نے کہا: اے ابوعبداللہ ! آپ کو مبارک ہو ، آپ سیدنا محمد صلی اللہ علیہ وسلم کے پاس حوض ( کوثر ) پر جائیں گے ، تو سیدنا خباب رضی اللہ عنہ نے فرمایا : اس کے ہوتے ہوئے کیسے ہو سکتا ہے ؟ انہوں نے گھر کے اوپر والے اور نیچے والے حصے کی طرف اشارہ کر کے یہ بات کہی ، جبکہ نبی اکرم صلی اللہ علیہ وسلم نے یہ ارشاد فرمایا ہے : ” تم میں سے کسی ایک کے لئے ، دنیا میں سے اتنی چیز کفایت کرتی ہے ، جتنا کسی سوار ( یعنی مسافر ) کا زاد سفر ہوتا ہے ۔ “
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ، صرف یحیی بن جعدہ کا معاملہ مختلف ہے اور وہ ثقہ ہے ۔

سیدنا انس رضی اللہ عنہ بیان کرتے ہیں : میں سیدنا سلمان رضی اللہ عنہ کی خدمت میں حاضر ہوا ، میں نے ان کے گھر کو دیکھا کہ وہاں سامان کم تھا ، میں نے ان سے اس بارے میں دریافت کیا ، تو انہوں نے فرمایا : نبی اکرم صلی اللہ علیہ وسلم نے مجھے یہ تلقین کی تھی : ” دنیا میں ، تمہارا ساز و سامان ، سوار ( یعنی مسافر ) کے زاد سفر کی مانند ہونا چاہیے ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف حسن بن یحیی بن جعد کا معاملہ مختلف ہے اور وہ ثقہ ہے ۔

سیدنا ثوبان رضی اللہ عنہ بیان کرتے ہیں : میں نے عرض کی : یا رسول اللہ ! دنیا میں سے کتنی چیز میرے لئے کافی ہے ؟ نبی اکرم صلی اللہ علیہ وسلم نے ارشاد فرمایا : ” جو تمہاری بھوک کو ختم کر دے ، تمہاری شرمگاہ کو ڈھانپ دے اور اگر تمہیں گھر مل جائے ، جو تم پر سایہ کرے ، تو اچھا ہے اور اگر تمہیں سواری بھی مل جائے ، تو کیا کہنے ۔ “
یہ روایت امام طبرانی معجم اوسط میں نقل کی ہے ، اس کی سند میں ایک راوی حسن بن عمارہ ہے اور وہ متروک ہے ۔

علی بن بذیمہ بیان کرتے ہیں : سیدنا سلمان رضی اللہ عنہ کا سامان فروخت کیا گیا ، تو اس کی قیمت 14 درہم تھی ۔
یہ روایت امام طبرانی نے نقل کی ہے اس کی سند عمدہ ہے البتہ یہ ہے کہ علی بن بذیمہ نے سیدنا سلمان رضی اللہ عنہ کا زمانہ نہیں پایا ہے ۔