مجمع الزوائد ومنبع الفوائد

سیدنا عبدالرحمن بن سمرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے عبدالرحمن ! دنیا میٹھی ، سرسبز ہے اور اللہ تعالیٰ نے تمہیں اس میں اپنا نائب بنایا ہے ، تاکہ اس چیز کو ظاہر کر دے کہ تم کیسا عمل کرتے ہو ؟ خبردار ! دنیا سے بچ کے رہنا اور عورتوں سے بچ کے رہنا ۔ “
یہ روایت امام طبرانی نے نقل کی ہے ، اس کی سند میں ایک راوی صالح بن شعیب قسملی ہے اس کی اسانید میں سے ، ایک کے بقیہ رجال کی توثیق کی گئی ہے ۔

سیدنا زید بن ثابت رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک یہ مال سرسبز ، میٹھا ہے ۔ “
یہ روایت امام طبرانی نے نقل کی ہے اور اس کی سند حسن ہے ۔

سیدنا عبداللہ بن عمرو رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” دنیا میٹھی سرسبز ہے ، جو شخص کے حق کے ہمراہ اسے حاصل کرے گا اس شخص کے لیے اس میں برکت رکھی جائے گی ، اور نفسانی خواہشات کے کئی طلبگار ایسے ہوتے ہیں ، قیامت کے دن انہیں صرف آگ ملے گی ۔ “
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا انس رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : آپ صلی اللہ علیہ وسلم نے اپنے اصحاب سے فرمایا : ” بیشک دنیا میٹھی ، سرسبز ہے ، اور اللہ تعالیٰ اس میں تمہیں نائب بنائے گا ، تاکہ اس بات کو ظاہر کرے کہ تم کیسا عمل کرتے ہو ؟ خبردار ! تم عورتوں سے بچ کے رہنا ، اور تم دنیا سے بچ کے رہنا !“ ۔
یہ روایت امام بزار نے نقل کی ہے ، اس کی سند میں ایک راوی مبارک بن سحیم ہے اور وہ متروک ہے ۔

سیدنا ابوبکرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے خطبہ دیتے ہوئے ، اللہ تعالیٰ کی حمد و ثنا بیان کی اور پھر یہ ارشاد فرمایا : ” بیشک دنیا میٹھی ، سرسبز ہے ، اور اللہ تعالیٰ تمہیں اس میں نائب بنائے گا ، تاکہ اس بات کو ظاہر کر دے کہ تم کیسے عمل کرتے ہو ؟ تو تم دنیا سے بچ کے رہنا ! تم عورتوں سے بچ کے رہنا ! خبردار ! قیامت کے دن ، ہر عہد شکن کے لئے اس کی سرین کے پاس مخصوص جھنڈا ہو گا ۔ “
یہ روایت امام طبرانی نے نقل کی ہے ، اس کی سند میں ایک راوی عمرو بن عبید ہے اور وہ متروک ہے ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” بے شک دنیا میٹھی سرسبز ہے ، جو شخص اس کے حق کے ہمراہ اسے حاصل کرے گا ، اس شخص کے لیے اس میں برکت رکھی جائے گی ، اور جو شخص ناحق طور پر اسے حاصل کرے گا ، اس کی مثال ایسے شخص کی مانند ہے ، جو کھاتا ہے ( اور سیر نہیں ہوتا ہے ) اللہ تعالیٰ کے مال اور اس کے رسول صلی اللہ علیہ وسلم کے مال کے بارے میں ، ناحق امید رکھنے والوں کے لئے قیامت کے دن جہنم کے عذاب کی بربادی ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی اسماعیل بن مسلم مکی ہے اور وہ ضعیف ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” بیشک دنیا میٹھی ، سرسبز ہے ، جس شخص کو ہم اس میں سے اپنی رضامندی کے بغیر کچھ دیں گے ، تو اس شخص کے لیے اس میں برکت نہیں ہو گی ۔ “
یہ روایت امام بزار نے نقل کی ہے اور اس کے رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک یہ مال سرسبز ، میٹھا ہے ، جو شخص اس کو لے گا ( یحیی نامی راوی نے یہ بات بیان کی ہے : میرے استاد نے اس کے آگے کچھ الفاظ نقل کئے تھے ، لیکن مجھے سمجھ نہیں آئی کہ وہ کیا تھے ؟ ) تو شخص کے لئے اس میں برکت رکھی جائے گی ، اور اللہ تعالیٰ کے مال ، اُس کے رسول صلی اللہ علیہ وسلم کے مال کے بارے میں ، کچھ لوگ ناحق امید رکھتے ہیں ، انہیں قیامت کے دن آگ نصیب ہو گی ۔ “ اس روایت کی سند حسن ہے ۔

سیدہ میمونہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” بیشک دنیا میٹھی ، سرسبز ہے ، جو شخص اس کے بارے میں پرہیزگاری اختیار کرے گا اور اس کو ٹھیک رکھے گا ( شاید اصل متن میں کچھ الفاظ نقل نہیں ہوئے ) خبردار ! اس کی مثال ایسے کھانے والے کی مانند ہے ، جو سیر نہیں ہوتا ہے ، لوگوں کے درمیان اتنی دوری ہوتی ہے ، جتنی دو ستاروں کے درمیان دوری ہوتی ہے ، جن دونوں میں سے ایک مشرق میں طلوع ہوتا ہے اور دوسرا مغرب میں غروب ہوتا ہے ۔ “
یہ روایت امام ابویعلیٰ نے نقل کی ہے اور امام طبرانی نے بہت زیادہ اختصار کے ساتھ نقل کی ہے ، اس کی سند میں ایک راوی مثنی بن صباح ہے اور وہ ضعیف ہے ۔

سیدہ عمرہ بنت حارث رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” بیشک دنیا میٹھی ، سرسبز ہے ، جو شخص اس کے حق کے ہمراہ اسے حاصل کرے گا ، اللہ تعالیٰ اس کے لیے اس میں برکت رکھے گا اور اللہ تعالیٰ اور اس کے رسول صلی اللہ علیہ وسلم کے مال کے بارے میں ، کچھ ناحق طلبگار ہیں ، جنہیں قیامت کے دن جہنم نصیب ہو گی ، جب وہ لوگ اس کی بارگاہ میں حاضر ہوں گے ۔ “
یہ روایت امام طبرانی نے نقل کی ہے اور اس کی سند حسن ہے ۔