مجمع الزوائد ومنبع الفوائد

سیدنا عبدالرحمن بن عوف رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” شیطان یہ کہتا ہے : مالدار شخص تین میں سے کسی ایک چیز کے حوالے سے مجھ سے محفوظ نہیں رہتا ، میں صبح و شام وہ چیزیں اس کے پاس لے کے جاتا ہوں ، وہ مال کو ناجائز طریقے سے حاصل کرتا ہے ، اسے ناحق طور پر خرچ کرتا ہے ، اور میں مال کو اس کے نزدیک محبوب کر دیتا ہوں ، تو وہ اس مال کا حق ادا نہیں کرتا ۔ “
یہ روایت امام طبرانی نے نقل کی ہے اور اس کی سند حسن ہے ۔

سیدنا عبداللہ بن عباس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” شیطان اپنے سب سے زیادہ مضبوط اور سب سے زیادہ قوی ساتھی کو اس شخص کی طرف بھیجتا ہے ، جو اپنے مال کے حوالے سے بھلائی کا کام کرتا ہے ۔ “
یہ روایت امام طبرانی نے نقل کی ہے ، اس کی سند میں ایک راوی عبدالحکیم بن منصور ہے اور وہ متروک ہے ۔

سیدنا ابومالک اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تمہارا دشمن وہ نہیں ہے کہ جسے اگر تم قتل کر دو ، تو یہ چیز تمہارے لئے نور بن جائے ، یا اگر وہ تمہیں قتل کر دے ، تو تم جنت میں داخل ہو جاؤ ، بلکہ تمہاری سب سے بڑی دشمن ، تمہاری اولاد ہے جو تمہاری پشت سے نکلی ہے ، اور تمہارا سب سے بڑا دشمن تمہارا مال ہے ، جس کے تم مالک ہو ۔ “
یہ روایت امام طبرانی نے نقل کی ہے ، اس کی سند میں ایک راوی محمد بن اسماعیل بن عیاش ہے اور وہ ضعیف ہے ۔

سیدنا ابوموسیٰ اشعری رضی اللہ عنہ روایت کرتے ہیں : نبی اکرم صلی اللہ علیہ وسلم ہم نے ارشاد فرمایا : ” یہ دینار اور درہم ، ان دونوں نے تم سے پہلے لوگوں کو ہلاکت کا شکار کر دیا ، اور ان دونوں کے بارے میں میری یہ رائے ہے کہ یہ تمہیں بھی ہلاکت کا شکار کر دیں گے ۔ “
یہ روایت امام طبرانی نے معجم کبیر اور معجم اوسط میں نقل کی ہے اور اس کی سند حسن ہے ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے سیدنا عبداللہ بن مسعود رضی اللہ عنہ کی نقل کردہ حدیث کتاب الزکوة میں گزر چکی ہے جو اسی نوعیت کی ہے ۔

سیدنا عوف بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم اپنے اصحاب کے درمیان کھڑے ہوئے ، آپ صلی اللہ علیہ وسلم نے ارشاد فرمایا : ” کیا تمہیں غربت کا اندیشہ ہے ( راوی کو شک ہے ، یا شاید یہ لفظ ہے : ” حاجتمندی کا اندیشہ ہے ) ، یا تمہیں دنیا کے حوالے سے پریشانی ہے ؟ اللہ تعالیٰ تمہارے لیے فارس اور روم کو فتح کر دے گا اور تم پر دنیا کو اُنڈیل دیا جائے گا ، یہاں تک کہ اگر اس کے بعد تم بھٹکے ، تو وہی ( یعنی دنیا ) تمہیں بھٹکائے گی ۔ “
یہ روایت امام طبرانی نے نقل کی ہے امام بزار نے اس کی مانند روایت نقل کی ہے اور اس کے رجال کی توثیق کی گئی ہے ، البتہ بقیہ نامی راوی مدلس ہے اگرچہ وہ ثقہ ہے ۔

سیدنا سعد بن ابی وقاص رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے تم لوگوں کے بارے میں تنگدستی کے فتنے کے مقابلے میں ، خوشحالی کے فتنے کے بارے میں زیادہ خوف ہے تمہیں تنگ دستی کی آزمائش کا شکار کیا گیا ، تو تم نے صبر سے کام لیا اور دنیا سرسبز و میٹھی ہے ۔ “
یہ روایت امام ابویعلیٰ اور امام بزار نے نقل کی ہے ، اس کی سند میں ایک ایسا فرد ہے ، جس کا نام بیان نہیں کیا گیا ہے ، اس کے بقیہ رجال صحیح کے رجال ہیں ۔