مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آسمان کے دروازوں میں سے ایک دروازے سے ایک فرشتہ یہ کہتا ہے : کون شخص آج قرض دے گا ؟ کہ کل اسے جزا دی جائے ، اور دوسرے دروازے سے ایک فرشتہ یہ کہتا ہے : اے اللہ ! خرچ کرنے والے کو اس کی جگہ مزید عطا فرما ، اور خرچ نہ کرنے والے کے مال کو ضائع کر دے ! “ ۔
یہ روایت امام طبرانی نے معجم اوسط میں دو اسناد کے ساتھ نقل کی ہے ان دونوں میں سے ایک سند میں ایک راوی مقدام بن داؤد ہے اور وہ ضعیف ہے ، ابن دقیق العید کہتے ہیں : اس کی توثیق کی گئی ہے ۔

ابوبختری نے سیدنا علی رضی اللہ عنہ کے حوالے سے
یہ روایت نقل کی ہے : وہ بیان کرتے ہیں : ” ایک مرتبہ سیدنا عمر رضی اللہ عنہ نے لوگوں سے کہا: اس مال میں سے جو مال بچ گیا ہے ، اس کے بارے میں تم لوگوں کی کیا رائے ہے ؟ لوگوں نے کہا: اے امیر المؤمنین ! ہماری وجہ سے آپ اپنے اہل خانہ کو ، اپنی زمین کو ، اپنی تجارت کو وقت نہیں دے پاتے ہیں ، تو یہ مال آپ کو ملنا چاہیے ، سیدنا علی رضی اللہ عنہ کہتے ہیں : سیدنا عمر رضی اللہ عنہ نے مجھ سے دریافت کیا : آپ کیا کہتے ہیں ؟ میں نے جواب دیا : لوگوں نے آپ کو مشورہ دے تو دیا ہے ، سیدنا عمر رضی اللہ عنہ نے مجھ سے فرمایا : آپ بھی کچھ کہیں ! تو میں نے کہا: آپ اپنے یقین کو گمان کیوں بناتے ہیں ؟ سیدنا عمر رضی اللہ عنہ نے کہا: آپ اپنی بات کی وضاحت کریں ، میں نے کہا: ٹھیک ہے ، اللہ کی قسم ! میں اپنی بات واضح کر دیتا ہوں ، کیا آپ کو یہ بات یاد ہے ؟ جب نبی اکرم صلی اللہ علیہ وسلم نے آپ کو زکوۃ وصول کرنے کے لیے بھیجا تھا ، تو آپ سیدنا عباس بن عبدالمطلب رضی اللہ عنہ کے پاس آئے تھے ، انہوں نے اپنی زکوۃ آپ کو نہیں دی تھی ، اور آپ دونوں کے درمیان تکرار ہو گئی تھی ، آپ نے مجھ سے یہ کہا: تھا : تم میرے ساتھ نبی اکرم صلی اللہ علیہ وسلم کے پاس چلو ! جب ہم آئے ، تو ہم نے نبی اکرم صلی اللہ علیہ وسلم کو پریشان پایا ، تو ہم واپس آ گئے ، اگلے دن ہم نبی اکرم صلی اللہ علیہ وسلم کی خدمت میں حاضر ہوئے ، تو ہم نے آپ کو پایا کہ آپ کا مزاج خوشگوار ہے ، آپ نے نبی اکرم صلی اللہ علیہ وسلم کو سیدنا عباس رضی اللہ عنہ کے طرز عمل کے بارے میں بتایا ، تو نبی اکرم صلی اللہ علیہ وسلم نے آپ سے فرمایا : کیا تم یہ بات نہیں جانتے ہو ؟ کہ آدمی کا چچا ، اُس کے باپ کی جگہ ہوتا ہے ، پھر ہم نے نبی اکرم صلی اللہ علیہ وسلم کے سامنے یہ بات ذکر کی کہ گزشتہ دن نبی اکرم صلی اللہ علیہ وسلم پریشان تھے ، اور آج کے دن نبی اکرم صلی اللہ علیہ وسلم کا مزاج خوشگوار تھا ، تو نبی اکرم صلی اللہ علیہ وسلم نے فرمایا : گزشتہ دن جب تم دونوں میرے پاس آئے تھے ، اُس وقت میرے پاس صدقہ کے مال میں سے دو دینار بچ گئے تھے ، تو ان دونوں کی وجہ سے میں پریشان تھا ، جو تم دونوں نے دیکھا تھا ، اور آج جب تم دونوں میرے پاس آئے ہو ، تو میں ان دونوں کو خرچ کر چکا ہوں ، اسی لئے تم میرے مزاج کو خوشگوار دیکھ رہے ہو ۔ اس پر سیدنا عمر رضی اللہ عنہ نے ( سیدنا علی رضی اللہ عنہ سے ) یہ کہا: آپ نے ٹھیک کہا: ہے ، اللہ کی قسم ! اور میں پہلے اور بعد میں ، آپ کا شکریہ ادا کرتا ہوں ۔
یہ روایت امام أحمد نے نقل کی ہے اور اس کے رجال صحیح کے رجال ہیں ، البتہ بختری نامی راوی نے ، نہ تو سیدنا علی رضی اللہ عنہ سے سماع کیا ہے اور نہ سیدنا عمر رضی اللہ عنہ سے سماع کیا ہے ، تو
یہ روایت مرسل اور مستند ہے ۔ امام ابویعلیٰ نے بھی اسے اسی طرح نقل کیا ہے ، تاہم انہوں نے یہ الفاظ زائد نقل کیے ہیں : ” میں نے کہا: آپ کیوں اپنے یقین کو گمان اور اپنے علم کو جہالت بناتے ہیں ؟ تو انہوں نے کہا: یا تو تم اپنی بات کی وضاحت کرو ، ورنہ میں تمہیں سزا دوں گا ۔ ( بعد میں ) انہوں نے یہ کہا: میں پہلے اور بعد میں تمہارا شکریہ ادا کرتا ہوں ، تو میں نے کہا: اے امیر المؤمنین ! آپ نے سزا کا ذکر جلدی کیوں کیا ؟ اور شکریہ کو مؤخر کیوں کیا ؟ امام بزار نے بھی
یہ روایت اسی طرح نقل کی ہے ، تاہم انہوں نے یہ الفاظ نقل کئے ہیں : ( نبی اکرم صلی اللہ علیہ وسلم نے فرمایا ) ” جب تم دونوں میرے پاس آئے تھے ، تو میرے پاس کچھ دینار موجود تھے ، جنہیں میں نے تقسیم کر دیا تھا اور ان میں سے سات بچ گئے تھے ۔ “

سیدہ ام سلمہ رضی اللہ عنہا بیان کرتی ہیں : ” نبی اکرم صلی اللہ علیہ وسلم میرے ہاں تشریف لائے ، آپ کا چہرہ مبارک متغیر تھا ، میں سمجھی کہ شاید وہ کسی تکلیف کی وجہ سے ہے ، میں نے عرض کی : یا رسول اللہ ! کیا وجہ ہے ؟ کہ آپ کا چہرہ متغیر ہے ؟ آپ صلی اللہ علیہ وسلم نے ارشاد فرمایا : ان سات دیناروں کی وجہ سے ایسا ہے ، جو گزشتہ شام ہمارے پاس لائے گئے تھے ، اور شام گزر گئی اور وہ بستر کے کونے میں موجود ہیں ۔ “

ایک روایت میں یہ الفاظ ہیں : ” شام ہو گئی ہے اور ہم نے انہیں خرچ نہیں کیا ہے ۔ “
یہ روایت امام أحمد اور امام ابویعلیٰ نے نقل کی ہے اور ان دونوں کے رجال صحیح کے رجال ہیں ۔

سیدنا طلحہ بن عبیداللہ رضی اللہ عنہ بیان کرتے ہیں : سیدنا عمر رضی اللہ عنہ کے پاس کچھ مال لایا گیا ، وہ انہوں نے مسلمانوں کے درمیان تقسیم کیا ، اس مال میں سے کچھ بچ گیا ، انہوں نے اس بچے ہوئے مال کے بارے میں مشورہ لیا ، تو لوگوں نے کہا: اگر آپ اسے کسی ممکنہ ضروری صورتحال کے لئے سنبھال کے رکھیں ، تو یہ مناسب ہو گا ، راوی بیان کرتے ہیں : سیدنا علی رضی اللہ عنہ اس دوران خاموش رہے انہوں نے کوئی بات نہیں کی ، سیدنا عمر رضی اللہ عنہ بولے : اے ابوالحسن ! کیا وجہ ہے ؟ آپ نے کوئی بات نہیں کی ؟ سیدنا علی رضی اللہ عنہ نے کہا: لوگوں نے بتا تو دیا ہے ، سیدنا عمر رضی اللہ عنہ نے فرمایا : آپ بھی مجھے کچھ کہیں ، تو سیدنا علی رضی اللہ عنہ نے کہا: بے شک اللہ تعالیٰ اس مال کی تقسیم سے فارغ ہو چکا ہے ، پھر انہوں نے وہ حدیث ذکر کی ، جو بحرین کے مال کے بارے میں ہے ، جب وہ مال نبی اکرم صلی اللہ علیہ وسلم کے پاس آیا تھا اور نبی اکرم صلی اللہ علیہ وسلم اور اس مال کی تقسیم کے درمیان ، رات رکاوٹ بن گئی تھی ، نبی اکرم صلی اللہ علیہ وسلم نے تمام نمازیں مسجد میں ادا کی تھیں ، اور میں نے نبی اکرم صلی اللہ علیہ وسلم کے چہرے میں ( یعنی اس مال کے حوالے سے ) پریشانی دیکھی تھی ، یہاں تک کہ آپ اس کے حوالے سے فارغ ہو گئے ( یعنی جب آپ فارغ ہو گئے تو آپ کی پریشانی ختم ہوئی ) ۔ اس پر سیدنا عمر رضی اللہ عنہ نے کہا: اب تو یہ لازم ہے کہ آپ ہی اس مال کو تقسیم کریں ، تو سیدنا علی رضی اللہ عنہ نے وہ مال تقسیم کیا ۔ راوی کہتے ہیں : اُس میں سے میرے حصے میں آٹھ سو درہم آئے تھے ۔
یہ روایت امام بزار نے نقل کی ہے ، اس کی سند میں ایک راوی حجاج بن ارطاۃ ہے اور وہ مدلس ہے ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مجھے یہ بات پسند نہیں ہے کہ میرے پاس اُحد پہاڑ سونے کا ہو کر موجود ہو ، اور پھر تیسرے دن کی صبح ، اُس میں سے کچھ بھی میرے پاس موجود ہو ، سوائے اُس کے ، جس کو میں نے قرض کی ادائیگی کے لیے سنبھال کے رکھا ہو ۔ “
یہ روایت امام بزار نے نقل کی ہے ، اس کی سند میں ایک راوی عطیہ ہے جسے ایک سے زیادہ افراد نے ضعیف قرار دیا ہے ۔

سیدنا سمرہ بن جندب رضی اللہ عنہ بیان کرتے ہیں : نبی اکرم صلی اللہ علیہ وسلم فرماتے ہیں : ” مجھے یہ پسند نہیں ہے کہ میرے پاس اُحد پہاڑ ، سارے کا سارا سونے کا ہو کر موجود ہو ۔ “
یہ روایت امام بزار نے ایسی سند کے ساتھ نقل کی ہے ، جس میں ایک راوی یوسف بن خالد سمتی ہے اور وہ ضعیف ہے ۔

سیدنا عبداللہ بن عباس رضی اللہ عنہ بیان کرتے ہیں : سیدنا ابوذر غفاری رضی اللہ عنہ نے مجھ سے فرمایا : ” اے میرے بھتیجے ! میں نبی اکرم صلی اللہ علیہ وسلم کے ساتھ تھا ، میں نے آپ صلی اللہ علیہ وسلم کا ہاتھ تھاما ہوا تھا ، آپ صلی اللہ علیہ وسلم نے مجھ سے فرمایا : اے ابوذر ! مجھے یہ بات پسند نہیں ہے کہ اُحد پہاڑ میرے لیے سونے اور چاندی کا ہو جائے ، اور میں اُسے اللہ کی راہ میں خرچ کرتا رہوں ، یہاں تک کہ جس دن میرا انتقال ہو ، تو میں نے اس میں سے ایک قیراط چھوڑ دیا ہو ، میں نے عرض کی : یا رسول اللہ ! ( ایک قیراط ، یا ) ایک قنطار ؟ نبی اکرم صلی اللہ علیہ وسلم نے فرمایا : اے ابوذر ! میں تھوڑے کی طرف جا رہا ہوں اور تم زیادہ کی طرف جا رہے ہو ، میں آخرت چاہتا ہوں اور تم دنیا چاہتے ہو ( میں نے کہا: ہے : ) ایک قیراط ، پھر نبی اکرم صلی اللہ علیہ وسلم نے تین مرتبہ میرے سامنے اُسے دہرایا ۔
یہ روایت امام بزار نے اور امام طبرانی نے معجم اوسط میں اس کی مانند نقل کی ہے تاہم انہوں نے اس کے آغاز میں یہ الفاظ نقل کئے ہیں : ” نبی اکرم صلی اللہ علیہ وسلم نے دریافت کیا : یہ کون سا پہاڑ ہے ؟ اے ابوذر ! یہ کون سا پہاڑ ہے ؟ میں نے جواب دیا : احد ہے ، نبی اکرم صلی اللہ علیہ وسلم نے ارشاد فرمایا : اُس ذات کی قسم ! جس کے دست قدرت میں میری جان ہے ، مجھے یہ بات پسند نہیں ہے کہ میرے پاس سونے کے ٹکڑے ہوں ۔ ۔ ۔ ۔ ۔ ۔ اس کے بعد راوی نے حسب سابق حدیث ذکر کی ہے ۔ امام بزار کی سند حسن ہے ۔

سیدنا ابوذر غفاری رضی اللہ عنہ بیان کرتے ہیں : وہ سیدنا عثمان غنی رضی اللہ عنہ کے پاس آئے ، سیدنا عثمان رضی اللہ عنہ نے اندر آنے کی اجازت دی اُن کے ہاتھ میں عصا موجود تھا ، سیدنا عثمان رضی اللہ عنہ نے فرمایا : اے کعب ! سیدنا عبدالرحمن رضی اللہ عنہ کا انتقال ہو گیا ہے ، انہوں نے مال چھوڑا ہے ، تو تم اس کے بارے میں کیا رائے دیتے ہو ؟ تو کعب نے جواب دیا : اگر انہوں نے اس مال کے بارے میں اللہ تعالیٰ کے حق کو ادا کر دیا تھا تو پھر ان پر کوئی حرج نہیں ہے ، سیدنا ابوذر غفاری رضی اللہ عنہ نے اپنا عصا اٹھایا اور وہ کعب کو مارا اور بولے : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مجھے یہ بات پسند نہیں ہے کہ یہ پہاڑ میرے لیے سونے کا ہو جائے اور میں اُسے خرچ کرتا رہوں اور مجھ سے وہ لیا جاتا رہے اور پھر میں اس میں سے اپنے پیچھے چھ اوقیہ چھوڑ دوں ۔ “ ( پھر سیدنا ابوذر غفاری رضی اللہ عنہ نے فرمایا : ) اے سیدنا عثمان ! میں آپ کو اللہ کا واسطہ دے کر دریافت کرتا ہوں ، کیا آپ نے نبی اکرم صلی اللہ علیہ وسلم کی زبانی یہ بات سنی ہے ؟ یہ بات انہوں نے تین مرتبہ دریافت کی ، تو سیدنا عثمان رضی اللہ عنہ نے جواب دیا : جی ہاں !

یہ روایت امام أحمد نے نقل کی ہے اس کی سند میں ایک راوی ابن لہیعہ ہے ، جس کو ایک سے زیادہ افراد نے ضعیف قرار دیا ہے ،

یہ روایت امام ابویعلیٰ نے کبیر میں نقل کی ہے اور انہوں نے یہ الفاظ نقل کیے ہیں : ” کعب نے کہا: میں نے ” تورات“ میں وہ بات پائی ہے ، جو آپ لوگوں کو بیان کی ہے اور اللہ تعالیٰ نے ارشاد فرمایا ہے : ” اللہ تعالیٰ جو چاہتا ہے وہ مٹا دیتا ہے ۔ ۔ ۔ ۔ ۔ ۔ ۔ “ یہ آیت کے آخر تک ہے ۔ تو انہوں نے کہا: اللہ تعالیٰ نے اسے مٹا دیا ہے اور میں اللہ تعالیٰ سے مغفرت طلب کرتا ہوں ۔

سیدنا ابوذر غفاری رضی اللہ عنہ بیان کرتے ہیں : وہ سیدنا عثمان غنی رضی اللہ عنہ کے پاس آئے ، سیدنا عثمان رضی اللہ عنہ نے اندر آنے کی اجازت دی اُن کے ہاتھ میں عصا موجود تھا ، سیدنا عثمان رضی اللہ عنہ نے فرمایا : اے کعب ! سیدنا عبدالرحمن رضی اللہ عنہ کا انتقال ہو گیا ہے ، انہوں نے مال چھوڑا ہے ، تو تم اس کے بارے میں کیا رائے دیتے ہو ؟ تو کعب نے جواب دیا : اگر انہوں نے اس مال کے بارے میں اللہ تعالیٰ کے حق کو ادا کر دیا تھا تو پھر ان پر کوئی حرج نہیں ہے ، سیدنا ابوذر غفاری رضی اللہ عنہ نے اپنا عصا اٹھایا اور وہ کعب کو مارا اور بولے : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مجھے یہ بات پسند نہیں ہے کہ یہ پہاڑ میرے لیے سونے کا ہو جائے اور میں اُسے خرچ کرتا رہوں اور مجھ سے وہ لیا جاتا رہے اور پھر میں اس میں سے اپنے پیچھے چھ اوقیہ چھوڑ دوں ۔ “ ( پھر سیدنا ابوذر غفاری رضی اللہ عنہ نے فرمایا : ) اے سیدنا عثمان ! میں آپ کو اللہ کا واسطہ دے کر دریافت کرتا ہوں ، کیا آپ نے نبی اکرم صلی اللہ علیہ وسلم کی زبانی یہ بات سنی ہے ؟ یہ بات انہوں نے تین مرتبہ دریافت کی ، تو سیدنا عثمان رضی اللہ عنہ نے جواب دیا : جی ہاں !

یہ روایت امام أحمد نے نقل کی ہے اس کی سند میں ایک راوی ابن لہیعہ ہے ، جس کو ایک سے زیادہ افراد نے ضعیف قرار دیا ہے ،

یہ روایت امام ابویعلیٰ نے کبیر میں نقل کی ہے اور انہوں نے یہ الفاظ نقل کیے ہیں : ” کعب نے کہا: میں نے ” تورات“ میں وہ بات پائی ہے ، جو آپ لوگوں کو بیان کی ہے اور اللہ تعالیٰ نے ارشاد فرمایا ہے : ” اللہ تعالیٰ جو چاہتا ہے وہ مٹا دیتا ہے ۔ ۔ ۔ ۔ ۔ ۔ ۔ “ یہ آیت کے آخر تک ہے ۔ تو انہوں نے کہا: اللہ تعالیٰ نے اسے مٹا دیا ہے اور میں اللہ تعالیٰ سے مغفرت طلب کرتا ہوں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے مجھے یہ ہدایت کی کہ میں وہ سونا صدقہ کر دوں ، جو ان کے پاس موجود تھا ، یہ نبی اکرم صلی اللہ علیہ وسلم کی بیماری کے دوران کی بات ہے ، جب نبی اکرم صلی اللہ علیہ وسلم کی طبیعت بہتر ہوئی ، تو آپ نے دریافت کیا : تم نے کیا کیا ؟ میں نے عرض کی : آپ کی طبیعت کی وجہ سے میں مصروف رہی ، نبی اکرم صلی اللہ علیہ وسلم نے فرمایا : تو اُسے لاؤ ! ( یہاں ابوحازم نامی راوی کو شک ہے ) وہ سات یا شاید نو دینار تھے ، جب سیدہ عائشہ رضی اللہ عنہا انہیں لے کر آئیں ، تو نبی اکرم صلی اللہ علیہ وسلم نے ارشاد فرمایا : ” محمد ( صلی اللہ علیہ وسلم ) کا کیا گمان ہو گا ، اگر وہ اللہ تعالیٰ کی بارگاہ میں ایسی حالت میں حاضر ہوتا ، کہ یہ اس کے پاس ہوتے ، اور محمد ( صلی اللہ علیہ وسلم ) کی طرف سے کس نے اس کی نفی کرنی تھی ( یعنی علت پیش کرنی تھی ) کہ اگر وہ اللہ تعالیٰ کی بارگاہ میں حاضر ہوتا اور یہ اس کے پاس ہوتے ۔ “

ایک روایت میں یہ الفاظ ہیں : ” وہ پانچ سے لے کر سات تک تھے “ ( راوی کو شک ہے ، یا شاید یہ الفاظ ہیں : ) ” آٹھ سے لے کر نو تک تھے ، جنہیں خرچ کرنا تھا ۔ “ یہ تمام روایات امام أحمد نے مختلف اسانید کے ساتھ نقل کی ہیں اور ان میں سے ایک کے رجال صحیح کے رجال ہیں ۔

عبداللہ بن صامت بیان کرتے ہیں : میں سیدنا ابوذر غفاری رضی اللہ عنہ کے ساتھ تھا ، انہیں تنخواہ ملی ، اُن کے ساتھ ان کی کنیز تھی ، اس کنیز نے ادائیگیاں کرنی شروع کر دیں ، تو سات باقی بچ گئے ، سیدنا ابوذر غفاری رضی اللہ عنہ نے اس کنیز کو یہ ہدایت کی : کہ وہ ان کے ذریعہ سکے خریدے ، راوی کہتے ہیں : میں نے کہا: اگر آپ انہیں کسی پیش آنے والی ضرورت کے لئے یا کسی آنے والے مہمان کے لیے سنبھال کے رکھ لیں ، تو یہ مناسب ہو گا ، سیدنا ابوذر غفاری رضی اللہ عنہ نے فرمایا : میرے خلیل علیہ السلام ( یعنی نبی اکرم صلی اللہ علیہ وسلم ) نے مجھے یہ تلقین کی تھی ، جس شخص کو سونا یا چاندی ملتا ہے ، تو وہ اپنے متعلقہ فرد کے لئے انگارہ ہوتا ہے ، جب تک وہ شخص اُسے اللہ کی راہ میں تقسیم نہیں کر دیتا ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم کے پاس جو سب سے زیادہ رقم آئی وہ ایک تھیلی تھی جس میں آٹھ سو درہم تھے ۔

یہ روایت امام أحمد نے نقل کی ہے اور اس کے رجال صحیح کے رجال ہیں ، صرف موسیٰ بن زبیر کا معاملہ مختلف ہے اور وہ ثقہ ہے ۔

سیدنا علی رضی اللہ عنہ بیان کرتے ہیں : اہل صفہ سے تعلق رکھنے والے ایک شخص کا انتقال ہو گیا ، اس نے دو دینار ( راوی کو شک ہے ، یا شاید یہ الفاظ ہیں : ) دو درہم چھوڑے ، تو نبی اکرم صلی اللہ علیہ وسلم نے ارشاد فرمایا : یہ داغ لگانے والے دو ہیں ، تم لوگ اپنے ساتھی کی نماز جنازہ پڑھ لو ۔
یہ روایت امام أحمد نے اور ان کے صاحبزادے عبداللہ نے نقل کی ہے اور انہوں نے یہ الفاظ نقل کیے ہیں : ” دینار یا شاید درہم ۔ “ امام بزار نے بھی اسے اسی طرح نقل کیا ہے ، اس کی سند میں ایک راوی عتیبہ ضریر ہے اور وہ مجہول ہے ، اس روایت کے بقیہ رجال کی توثیق کی گئی ہے ۔

سیدنا عبداللہ بن مسعود رضی اللہ عنہ بیان کرتے ہیں : اہل صفہ سے تعلق رکھنے والے ایک شخص کا انتقال ہو گیا ، لوگوں نے اس کے کپڑے میں دو دینار پائے ، انہوں نے اس بات کا ذکر نبی اکرم صلی اللہ علیہ وسلم سے کیا ، تو نبی اکرم صلی اللہ علیہ وسلم نے ارشاد فرمایا : یہ داغ لگانے والی دو چیزیں ہیں ، تم لوگ اپنے ساتھی کی نماز جنازہ ادا کر لو !
یہ روایت امام أحمد ، امام ابویعلیٰ اور امام بزار نے نقل کی ہے اس کی سند میں ایک راوی عاصم بن بہدلہ ہے جسے ایک سے زیادہ افراد نے ثقہ قرار دیا ہے ، اس روایت کے بقیہ رجال صحیح کے رجال ہیں ۔

ان صحابی کے حوالے سے
یہ روایت بھی منقول ہے : وہ بیان کرتے ہیں : ایک سیاہ فام غلام آ کر نبی اکرم صلی اللہ علیہ وسلم سے ملا ، اس کا انتقال ہو گیا ، نبی اکرم صلی اللہ علیہ وسلم کو اس کے بارے میں بتایا گیا ، تو آپ نے فرمایا : تم لوگ اس بات کا جائزہ لو ! کہ کیا اس نے کوئی چیز چھوڑی ہے ؟ لوگوں نے بتایا : دو دینار ہیں ، نبی اکرم صلی اللہ علیہ وسلم نے فرمایا : یہ داغ لگانے والی دو چیزیں ہیں ۔
یہ روایت امام أحمد اور امام ابویعلیٰ نے نقل کی ہے اور ان دونوں کے رجال صحیح کے رجال ہیں ، صرف عاصم بن بہدلہ کا معاملہ مختلف ہے اور اس کی توثیق کی گئی ہے ۔

سیدنا سلمہ بن اکوع رضی اللہ عنہ بیان کرتے ہیں : میں نبی اکرم صلی اللہ علیہ وسلم کے پاس بیٹھا ہوا تھا ، اسی دوران ایک جنازہ لایا گیا ، پھر ایک اور جنازہ لایا گیا ، نبی اکرم صلی اللہ علیہ وسلم نے دریافت کیا : اس نے کوئی قرض چھوڑا ہے ؟ ( یعنی ایسا قرض جو ادا کرنا اس کے ذمہ ہو ؟ ) لوگوں نے جواب دیا : جی نہیں ! نبی اکرم صلی اللہ علیہ وسلم نے دریافت کیا : اس نے کوئی چیز چھوڑی ہے ؟ لوگوں نے جواب دیا : جی ہاں ! تین دینار ہیں ، نبی اکرم صلی اللہ علیہ وسلم نے اپنی انگلیوں کے ذریعے اشارہ کر کے فرمایا کہ یہ داغ لگانے والی تین چیزیں ہیں ۔
یہ روایت امام أحمد نے ایک طویل حدیث میں نقل کی ہے اور اس کے رجال صحیح کے رجال ہیں ۔

سیدنا جابر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص ایک دینار چھوڑے ، تو یہ داغ لگانے والی ایک چیز ہے ۔ “ اس روایت کی سند میں ایک راوی ابن لہیعہ ہے اور اس سے پہلے والی حدیث اس کو مضبوط کرتی ہے ، جس کے مختلف طرق گزر چکے ہیں ، اس کے بقیہ رجال صحیح کے رجال ہیں ۔

سیدنا ابوامامہ حمصی رضی اللہ عنہ بیان کرتے ہیں : اہل صفہ سے تعلق رکھنے والے ایک شخص کا انتقال ہو گیا ۔ اس کے تہبند میں سے ایک دینار ملا ، تو نبی اکرم صلی اللہ علیہ وسلم نے ارشاد فرمایا : یہ داغ لگانے والی ایک چیز ہے ۔ راوی بیان کرتے ہیں : پھر ایک اور شخص کا انتقال ہو گیا ۔ اس کے تہبند میں سے دو دینار ملے ، تو نبی اکرم صلی اللہ علیہ وسلم نے ارشاد فرمایا : یہ داغ لگانے والی دو چیزیں ہیں ۔

اُن کی نقل کردہ ایک روایت میں یہ الفاظ ہیں : جس شخص کا انتقال ہوا تھا ، اور اس نے ایک دینار یا شاید دو دینار چھوڑے تھے ، اس کے بارے میں نبی اکرم صلی اللہ علیہ وسلم نے یہ فرمایا تھا : یہ داغ لگانے والی ایک چیز ( راوی کو شک ہے ، یا شاید یہ الفاظ ہیں : ) دو چیزیں ہیں ۔ یہ تمام روایات امام أحمد نے مختلف اسانید کے ساتھ نقل کی ہیں ، جن میں سے بعض کے رجال صحیح کے رجال ہیں ، صرف شہر بن حوشب کا معاملہ مختلف ہے اور اس کی توثیق کی گئی ہے ۔

سیدنا ابوہریرہ رضی اللہ عنہ بیان کرتے ہیں : ایک دیہاتی نے ، نبی اکرم صلی اللہ علیہ وسلم کے ساتھ غزوہ خیبر میں شرکت کی ، اس کے حصے میں دو دینار آئے ، دیہاتی نے وہ لے کر انہیں اپنی عبا میں رکھ کر انہیں اوپر سے سی دیا اور اس کو موڑ دیا ، پھر اس دیہاتی کا انتقال ہو گیا ، پھر وہ دونوں دینار مل گئے ، اس کا تذکرہ نبی اکرم صلی اللہ علیہ وسلم سے کیا گیا ، تو آپ نے ارشاد فرمایا : یہ داغ لگانے والی دو چیزیں ہیں ۔
یہ روایت امام أحمد نے نقل کی ہے اس کی سند میں ایک راوی ابن لہیعہ ہے ،

یہ روایت مضبوط ہو جاتی ہے ، اس روایت کے بقیہ رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک شخص کی نماز جنازہ پڑھائی ، اُس شخص نے دو یا شاید تین دینار چھوڑے تھے ، نبی اکرم صلی اللہ علیہ وسلم نے ارشاد فرمایا : یہ داغ لگانے والی دو ( راوی کو شک ہے ، یا شاید یہ الفاظ ہیں : ) تین چیزیں ہیں ۔ یہ روایت امام أحمد نے نقل کی ہے اور اس کے رجال صحیح کے رجال ہیں ،
یہ روایت امام بزار نے حسن سند کے ساتھ نقل کی ہے ۔

سیدنا ابوہریرہ رضی اللہ عنہ بیان کرتے ہیں : ایک مرتبہ ہم نبی اکرم صلی اللہ علیہ وسلم کے پاس موجود تھے ، اسی دوران کوئی شخص آیا اور آپ کو یہ بتایا گیا کہ فلاں شخص کا انتقال ہو گیا ہے اور اس نے دو دینار ( راوی کو شک ہے ، یا شاید یہ الفاظ ہیں : ) دو درہم چھوڑے ہیں ، نبی اکرم صلی اللہ علیہ وسلم نے فرمایا : داغ لگانے والی دو چیزیں ۔
یہ روایت امام أحمد نے نقل کی ہے ، اس کی سند میں ایک راوی شریک بن عبداللہ نخعی ہے ، جسے ایک سے زیادہ افراد نے ثقہ قرار دیا ہے اس روایت کے بقیہ رجال صحیح کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں : اس مضمون سے متعلق کچھ روایات کتاب الزکوۃ کے آخر میں ، نفلی صدقہ کے متعلق باب میں گزر چکی ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کو تین پرندے تحفے کے طور پر دیے گئے ، آپ نے ایک پرندہ اپنی خادمہ کو کھانے کے لئے دے دیا ، اگلے دن وہ خادمہ اس پرندے کا گوشت لے کر آئی ، تو نبی اکرم صلی اللہ علیہ وسلم نے اس سے فرمایا : کیا میں نے تمہیں اس سے منع نہیں کیا تھا ؟ کہ تم نے کل کے لیے کوئی چیز نہیں رکھنی ہے ، اللہ تعالیٰ ہر آنے والی کل کا رزق عطا کر دے گا ۔
یہ روایت امام ابویعلیٰ نے نقل کی ہے اور اس کے رجال ثقہ ہیں ۔

سیدنا بلال رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم گھر تشریف لائے ، میرے پاس کچھ کھجوریں تھیں ، نبی اکرم صلی اللہ علیہ وسلم نے دریافت کیا : یہ کہاں سے آئی ہیں ؟ میں نے عرض کی : یہ ہم نے رات کے کھانے کے لئے سنبھال کے رکھی تھیں ، نبی اکرم صلی اللہ علیہ وسلم نے فرمایا : کیا تمہیں یہ خوف نہیں ہوا کہ تم اس کی وجہ سے جہنم میں بخار ( یعنی تپش ) کو دیکھ لو گے ۔

ایک روایت میں یہ الفاظ ہیں : نبی اکرم صلی اللہ علیہ وسلم نے ارشاد فرمایا : اے بلال ! ہمیں کھانے کے لیے کھجوریں دو ، تو انہوں نے کچھ مٹھیاں آپ کو دیں ، نبی اکرم صلی اللہ علیہ وسلم نے فرمایا : اے بلال ! ہمیں مزید دو ! سیدنا بلال رضی اللہ عنہ کہتے ہیں : میں نے تین مرتبہ آپ کو مزید دیں ، پھر میں نے عرض کی : اب صرف وہ چیز باقی رہ گئی ہے ، جو میں نے نبی اکرم صلی اللہ علیہ وسلم کے لیے سنبھال کے رکھی ہے ، تو نبی اکرم صلی اللہ علیہ وسلم نے ارشاد فرمایا : ” اے بلال ! تم خرچ کرو ، اور عرش والی ذات کی طرف سے کسی کمی کا اندیشہ نہ رکھو ۔ “
یہ روایت امام طبرانی نے نقل کی ہے اور امام بزار نے اس کو اختصار کے ساتھ نقل کیا ہے ، تاہم انہوں نے یہ الفاظ نقل کئے ہیں : ” اُن کے پاس مال کا ڈھیر تھا ۔ “ امام طبرانی کی پہلی روایت میں اور امام بزار کی سند میں ایک راوی محمد بن حسن بن زبالہ ہے اور دوسری روایت میں ایک راوی طلحہ بن زید قرشی ہے اور یہ دونوں ضعیف ہیں ، امام بزار کہتے ہیں : اس میں درست یہ ہے کہ مسروق سے یہ روایت منقول ہے : نبی اکرم صلی اللہ علیہ وسلم سیدنا بلال رضی اللہ عنہ کے پاس تشریف لائے ۔ ۔ ۔ ۔ ۔ ۔ ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم سیدنا بلال رضی اللہ عنہ کے پاس تشریف لائے ، ان کے پاس کھجوروں کا ڈھیر موجود تھا ، نبی اکرم صلی اللہ علیہ وسلم نے دریافت کیا : اے بلال ! یہ کہاں سے آئی ہیں ؟ انہوں نے عرض کی : یہ میں نے آپ کے مہمانوں کے لیے تیار رکھی ہیں ، نبی اکرم صلی اللہ علیہ وسلم نے فرمایا : کیا تمہیں اس بات کا اندیشہ نہیں ہوا ؟ کہ اس کی وجہ سے جہنم میں دھواں ہو سکتا ہے ؟ اے بلال ! تم خرچ کرو ، اور عرش والی ذات کی طرف سے کسی کمی کا اندیشہ نہ رکھو !
یہ روایت امام بزار اور امام طبرانی نے نقل کی ہے اور ان دونوں کی سند حسن ہے ، البتہ امام طبرانی نے اپنی روایت میں یہ الفاظ نقل کئے ہیں : ” کیا تمہیں اس سے ڈر نہیں لگا کہ کہ یہ تمہارے لئے بخار ( یعنی تپش ) بن جائے ۔ “

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم سیدنا بلال رضی اللہ عنہ کے پاس تشریف لائے ، اس وقت ان کے پاس کھجوروں کا ڈھیر موجود تھا ، نبی اکرم صلی اللہ علیہ وسلم نے دریافت کیا : یہ کہاں سے آئی ہیں ؟ انہوں نے عرض کی : یہ میں نے سنبھال کے رکھی ہیں ، نبی اکرم صلی اللہ علیہ وسلم نے فرمایا : کیا تمہیں اس بات سے ڈر نہیں لگتا ؟ کہ تم اس کی وجہ سے جہنم کی آگ میں بخار ( یعنی تپش ) دیکھو ، تم عرش والی ذات کی طرف سے کمی کا اندیشہ نہ رکھو ۔
یہ روایت امام بزار ، امام ابویعلیٰ نے ، امام طبرانی نے معجم کبیر اور معجم اوسط میں نقل کی ہے اور اس کی سند حسن ہے ۔

سیدنا عمر بن خطاب رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کے پاس آیا ( اس نے آپ سے کچھ مانگا ) تو نبی اکرم صلی اللہ علیہ وسلم نے ارشاد فرمایا : میرے پاس ابھی دینے کے لئے کچھ نہیں ہے ، تم قرض لے لو ، جب ہمارے پاس کچھ آئے گا ، تو ہم تمہیں ادائیگی کر دیں گے ، سیدنا عمر رضی اللہ عنہ نے عرض کی : اللہ تعالیٰ نے آپ کو اس کا پابند نہیں کیا ہے ، آپ کے پاس اگر ہو تو عطا کر دیں ، اور جب آپ کے پاس نہ ہو ، تو آپ تکلف سے کام نہ لیں ، راوی بیان کرتے ہیں : سیدنا عمر رضی اللہ عنہ کی بات نبی اکرم صلی اللہ علیہ وسلم کو پسند نہیں آئی اور اس کا اندازہ آپ کے چہرہ مبارک سے ہو گیا ، تو ایک صاحب نے عرض کی : یا رسول اللہ ! میرے ماں باپ آپ پر قربان ہوں ، آپ عطا کرتے رہیں اور عرش والی ذات کی طرف سے کسی کمی کا اندیشہ نہ رکھیں ، راوی بیان کرتے ہیں : تو نبی اکرم صلی اللہ علیہ وسلم مسکرا دیے اور آپ نے ارشاد فرمایا : ” مجھے اسی بات کا حکم دیا گیا ہے ۔ “
یہ روایت امام بزار نے نقل کی ہے اس کی سند میں ایک راوی اسحاق بن ابراہیم حنینی ہے جسے جمہور نے ضعیف قرار دیا ہے اور ابن حبان نے اسے ثقہ کہا: ہے وہ کہتے ہیں : یہ غلطی کر جاتا ہے ۔

سیدنا عبداللہ بن عباس رضی اللہ عنہما بیان کرتے ہیں : سیدنا عمر بن خطاب رضی اللہ عنہ جب بھی نماز ادا کر لیتے تھے تو لوگوں کے لئے بیٹھ جاتے تھے ، جس کو اُن سے کوئی کام ہوتا تھا ، اس کے ساتھ وہ بات چیت کر لیتے تھے ، ورنہ اُٹھ جاتے تھے ، ایک دن میں ان کے دروازے پر آیا ، میں نے کہا: پر یرفا ! وہ ( خادم ) نکل کر باہر آیا ، دروازے پر سیدنا عثمان رضی اللہ عنہ بھی موجود تھے ، پھر یرفا باہر آیا اور اس نے کہا: اے ابن عفان ! آپ اُٹھ جائیں ، اے ابن عباس ! آپ اُٹھ جائیں ( یعنی آپ دونوں اندر تشریف لے آئیں ) ہم سیدنا عمر رضی اللہ عنہ کی خدمت میں حاضر ہوئے ، ان کے پاس مال کا ڈھیر موجود تھا ، سیدنا عمر رضی اللہ عنہ نے فرمایا : میں نے اہل مدینہ کا جائزہ لیا ، تو میں نے یہ دیکھا کہ تم دونوں کے خاندان کے ( تمہارے زیر کفالت افراد ) زیادہ ہیں ، تو تم دونوں یہ مال لے لو اور اسے تقسیم کر لو ! اگر اس میں سے بیچ گیا ، تو وہ تم دونوں واپس کر دینا ، میں نے کہا: اگر یہ کم ہوا تو آپ ہمیں مزید دیں گے ؟ سیدنا عمر رضی اللہ عنہ نے فرمایا : پرانا کھردرا مشکیزہ ، میں یہ بات جانتا ہوں کہ سیدنا محمد صلی اللہ علیہ وسلم اور اُن کے اہل خانہ تھوڑی سی مقدار کھایا کرتے تھے ، میں نے کہا: جی ہاں ! اللہ کی قسم ! اگر اللہ تعالیٰ نے اتنی فتوحات سیدنا محمد صلی اللہ علیہ وسلم کو عطا کی ہوتیں ، تو انہوں نے اس بارے میں اس سے مختلف طرز عمل اختیار کرنا تھا جو آپ نے اختیار کیا ہے ، سیدنا عمر رضی اللہ عنہ غصے میں آ گئے اور ان کا جسم لرزنے لگا ، انہوں نے فرمایا : نبی اکرم صلی اللہ علیہ وسلم نے کیا کرنا تھا ؟ میں نے کہا: آپ صلی اللہ علیہ وسلم نے خود بھی کھانا تھا اور ہمیں بھی کھلانا تھا ، تو سیدنا عمر رضی اللہ عنہ کا غصہ ختم ہو گیا ۔
یہ روایت امام بزار نے نقل کی ہے اور اس کی سند عمدہ ہے ۔

حسن بیان کرتے ہیں : سیدنا قیس بن عاصم رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے تو آپ نے ارشاد فرمایا : یہ دیہاتی علاقوں کا سردار ہے ، میں نے عرض کی : یا رسول اللہ ! اس مال کا کیا ہو گا ؟ جس کے بارے میں مجھ پر کوئی ضرر ہو ، جس کا واسطہ مہمان یا عیال سے ہو ، خواہ وہ کتنے ہی زیادہ کیوں نہ ہوں ، نبی اکرم صلی اللہ علیہ وسلم نے ارشاد فرمایا : اچھا مال چالیس ( دینار یا درہم ہیں اور اگر وہ زیادہ ہو جائے ، تو ساٹھ ہو جائیں لیکن دو سو والوں کے لئے بربادی ہے ، یہ بات آپ صلی اللہ علیہ وسلم نے تین مرتبہ ارشاد فرمائی ( اور پھر یہ فرمایا : ) البتہ اس شخص کا معاملہ مختلف ہے ، جو تنگی اور خوشحالی ( ہر حال ) میں خرچ کرتا ہے ، اپنی سواری استعمال کے لئے دیتا ہے ، نر جانور کو جفتی کے لئے دیتا ہے ، صحت مند جانور کو قربان کرتا ہے اور اس کا دودھ عطیہ کے طور پر دیتا ہے اور قانع اور فقیر کو کھلاتا ہے ۔ راوی بیان کرتے ہیں : میں نے عرض کی : یا رسول اللہ ! یہ اخلاق کتنے معزز اور کتنے عمدہ ہیں ؟ نبی اکرم صلی اللہ علیہ وسلم نے ارشاد فرمایا : تم عطیہ کیسے دیتے ہو ؟ میں نے عرض کی : میں ہر سال ایک سو ( جانور ) عطیہ کے طور پر دیتا ہوں ، نبی اکرم صلی اللہ علیہ وسلم نے دریافت کیا : تم عارضی طور پر سواری کے استعمال کے لیے جانور کیسے دیتے ہو ؟ میں نے جواب دیا : میں دودھ دینے والا جوان جانور ، یا عمر رسیدہ اونٹنی نہیں دیتا ہوں ، نبی اکرم صلی اللہ علیہ وسلم نے دریافت کیا : جفتی کے لیے جانور کیسے دیتے ہو ؟ میں نے جواب دیا : میرے اونٹ جاتے ہیں لوگ بھی جاتے ہیں ، جو شخص جس اونٹ کا چاہتا ہے ، سر پکڑ کر اسے لے جاتا ہے ، نبی اکرم صلی اللہ علیہ وسلم ہم نے دریافت کیا : تمہارا مال تمہارے نزدیک زیادہ محبوب ہے ؟ یا تمہارے موالی کا مال ( تمہارے نزدیک زیادہ محبوب ہے ؟ ) میں نے جواب دیا : جی نہیں ! بلکہ میرا مال ( میرے نزدیک زیادہ محبوب ہے ) نبی اکرم صلی اللہ علیہ وسلم نے ارشاد فرمایا : ” تمہارے مال میں سے ، تمہارا حصہ وہ ہے جسے تم کھا کر فنا کر دو ، یا پہن کر پرانا کر دو یا ( اللہ کی راہ میں ) دے کر آگے بھیج دو ۔ “ راوی بیان کرتے ہیں : میں نے دریافت کیا : یا رسول اللہ ! کیا اس طرح ؟ نبی اکرم صلی اللہ علیہ وسلم نے ارشاد فرمایا : جی ہاں ! تو انہوں نے عرض کی : اللہ کی قسم ! اگر میں زندہ رہ گیا تو میں ان کی تعداد میں ضرور کمی کروں گا ( یعنی اپنے مال کو اللہ کی راہ میں ضرور خرچ کروں گا ) ۔ یہ روایت امام بزار نے ” مرسل “ روایت کے طور پر نقل کی ہے انہوں نے اسے متصل روایت کے طور پر بھی نقل کیا ہے ، لیکن بہت زیادہ اختصار کے ساتھ نقل کیا ہے اور
یہ روایت ان کے مناقب سے متعلق باب میں مذکور ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اسلام کو کوئی بھی چیز اس طرح نہیں مٹاتی ہے جس طرح ( اسلام کو ) بخل مٹاتا ہے ۔ “
یہ روایت امام ابویعلیٰ نے اور امام طبرانی نے معجم اوسط میں نقل کی ہے ، اس کی سند میں ایک راوی عمرو بن حصین ہے اور اس کے ضعیف ہونے پر اتفاق ہے ۔

سیدنا ابوالقین رضی اللہ عنہ کے بارے میں یہ بات منقول ہے : ایک مرتبہ وہ نبی اکرم صلی اللہ علیہ وسلم کے پاس سے گزرے ، ان کے پاس کچھ کھجوریں تھیں ، اُن کے چچا اُٹھ کر ان کی طرف گئے ان کے چچا کا ارادہ یہ تھا کہ اُن سے مٹھی بھر کھجوریں لے کر نبی اکرم صلی اللہ علیہ وسلم کے آگے رکھ دیں گے ، لیکن ان صاحب نے کھجوروں کو سمیٹ لیا ، تو نبی اکرم صلی اللہ علیہ وسلم نے ارشاد فرمایا : اے اللہ ! اس کے بخل میں اضافہ فرما ! راوی بیان کرتے ہیں : تو وہ سب سے زیادہ بخیل شخص تھے ۔
یہ روایت امام بزار نے دو اسناد کے ساتھ نقل کی ہے اور ان دونوں میں سے ایک متصل ہے اور یہ اس کا متن ہے ۔ دوسری روایت سعید بن جمہان کے حوالے سے منقول ہے : ” اُن کے آقا سیدنا ابوالقین رضی اللہ عنہ نبی اکرم صلی اللہ علیہ وسلم کے پاس سے گزرے ۔ ۔ ۔ ۔ ۔ ۔ “ ۔
یہ روایت امام طبرانی نے نقل کی ہے تاہم انہوں نے یہ الفاظ نقل کئے ہیں : ” نبی اکرم صلی اللہ علیہ وسلم نے اُن کی طرف ہاتھ بڑھایا تاکہ ان سے مٹھی بھر کھجوریں لے کر وہ اپنے اصحاب کے آگے رکھ دیں ۔ “ ” مرسل “ روایت کے رجال اور ” مسند “ روایت کے رجال صحیح کے رجال ہیں ، صرف سعید بن جمہان کا معاملہ مختلف ہے اور ایک سے زیادہ افراد نے اسے ثقہ قرار دیا ہے ویسے اس کے بارے میں اختلاف پایا جاتا ہے ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے نفلی صدقہ سے متعلق کتاب میں ، سخاوت اور کنجوسی کے بارے میں احادیث گزر چکی ہیں ۔

نافع بیان کرتے ہیں : سیدنا عبداللہ بن عمر رضی اللہ عنہما نے ایک شخص کو یہ کہتے ہوئے سنا : کنجوس آدمی ظالم سے زیادہ معذور ( یعنی قابل معافی ) ہوتا ہے ، تو سیدنا عبداللہ بن عمر رضی الہ عنہما نے فرمایا : تم نے غلط کہا: ہے میں نے اللہ کے رسول صلی اللہ علیہ وسلم کو یہ ارشاد فرماتے ہوئے سنا ہے : ” کنجوس جنت میں داخل نہیں ہو گا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی یحیی بن مسلمہ قعنبی ہے اور وہ ضعیف ہے ۔