مجمع الزوائد ومنبع الفوائد

حکم بن میناء بیان کرتے ہیں : نبی اکرم صلی اللہ علیہ وسلم نے سیدنا عمر رضی اللہ عنہ سے فرمایا : یہاں قریش کے افراد کو میرے لئے اکٹھا کرو ، سیدنا عمر رضی اللہ عنہ نے ان لوگوں کو اکٹھا کیا ، پھر انہوں نے عرض کی : یا رسول اللہ ! کیا آپ ان کے پاس تشریف لے جائیں گے ؟ یا وہ لوگ اندر آ جائیں ؟ نبی اکرم صلی اللہ علیہ وسلم نے فرمایا : بلکہ میں ان کے پاس جاؤں گا ، پھر آپ باہر تشریف لائے آپ نے ارشاد فرمایا : اے قریش کے گروہ ! کیا تمہارے درمیان کوئی ایسا فرد ہے ، جو تمہارے علاوہ ہو ؟ انہوں نے عرض کی : جی نہیں ! البتہ ہمارا ایک بھانجا ہے ، نبی اکرم صلی اللہ علیہ وسلم نے فرمایا : قوم کا بھانجا ، اُن کا ایک فرد ہوتا ہے ، پھر نبی اکرم صلی اللہ علیہ وسلم نے ارشاد فرمایا : ” اے قریش کے گروہ ! تم لوگ یہ بات جان لو ! لوگوں میں سے ، نبی کے سب سے زیادہ قریب ، پرہیزگار لوگ ہیں ، تو تم لوگ اس بات کا جائزہ لو ! کہ کہیں ایسا نہ ہو کہ قیامت کے دن لوگ اعمال لے کے آئیں اور تم لوگ دنیا لے کر آؤ ، جسے تم نے اٹھایا ہوا ہو ، اور میں تم سے منہ پھیر لوں ، پھر نبی اکرم صلی اللہ علیہ وسلم نے یہ آیت تلاوت کی : ” لوگوں میں سے ، ابراہیم کے سب سے زیادہ قریب وہ ہیں ، جنہوں نے اس کی پیروی کی ، اور یہ نبی ہیں اور ایمان والے ہیں ، اور اللہ تعالیٰ ایمان والوں کا مددگار ہے ۔ “
یہ روایت امام ابویعلیٰ نے ” مرسل “ روایت کے طور پر نقل کی ہے ، اس کی سند میں ایک راوی ابوالحویرث ہے ، جسے ابن حبان اور دیگر حضرات نے ثقہ قرار دیا ہے اور ایک سے زیادہ افراد نے اسے ضعیف کہا: ہے ، اس روایت کے بقیہ رجال صحیح کے رجال ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : آپ صلی اللہ علیہ وسلم نے ارشاد فرمایا : ” اے اولاد قصی ! اے اولاد ہاشم ! اے اولاد عبد مناف ! ” میں ڈرانے والا ہوں ، اور موت برباد کر دینے والی ہے ، اور قیامت طے شدہ ہے ۔ “
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ، صرف ضمام بن اسماعیل کا معاملہ مختلف ہے اور وہ ثقہ ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے ابن آدم ! تم یوں عمل کرو ، جیسے تمہیں دیکھا جا رہا ہے ، اور تم اپنا شمار مرحومین کے ساتھ کرو ، اور مظلوم کی بددعا سے بچ کے رہنا ! “ ۔

یہ روایت امام أحمد نے نقل کی ہے ، اس کی سند میں ایک راوی ایسا ہے جس کا نام بیان نہیں کیا گیا ہے ، اس روایت کے بقیہ رجال صحیح کے رجال ہیں ، صرف علی بن زید کا معاملہ مختلف ہے اور اس کی توثیق کی گئی ہے ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں تمہاری طرف اللہ تعالیٰ کا رسول ہوں ، تم لوگ یہ بات جان لو ! کہ لوٹ کر اللہ تعالیٰ کی طرف جانا ہے ، اور پھر جنت یا جہنم کی طرف جانا ہو گا ، وہ ایک ایسی اقامت ہے جہاں سے منتقل نہیں ہوا جائے گا ، ایسا ہمیشہ رہنا ہے ، جہاں موت نہیں ہو گی ، جہاں جسم نہیں مریں گے ۔ “
یہ روایت امام بزار نے نقل کی ہے ، اس کے رجال کی توثیق کی گئی ہے ، البتہ سابط نامی راوی نے سیدنا معاذ رضی اللہ عنہ کا زمانہ نہیں پایا ہے ، تاہم انہوں نے سابط کے بیٹے کے حوالے سے یہ بات نقل کی ہے ، وہ بیان کرتے ہیں : سیدنا معاذ بن جبل رضی اللہ عنہ ہمارے درمیان کھڑے ہوئے ۔ ۔ ۔ ۔ ۔ ۔ ۔ ۔

سیدنا عبداللہ بن عباس رضی اللہ عنہ روایت کرتے ہیں : نبی اکرم علی صلی اللہ علیہ وسلم نے ارشاد فرمایا : ” آج دوڑ میں حصہ لینے کا دن ہے اور کل نتیجہ کا دن ہو گا ، اور انجام جنت یا جہنم ہو گی ، وہ شخص ہلاکت کا شکار ہو گا ، جو جہنم میں داخل ہو گا ، میں سبقت لے جانے والا ہوں ، ابوبکر اس کے بعد والا ہے ، عمر اس کے بعد والا ہے ، اور دوسرے لوگ درجہ بدرجہ ہمارے پیچھے ہیں ۔ “
یہ روایت امام طبرانی نے معجم اوسط میں نقل کی ہے اور معجم کبیر میں اس کی مانند نقل کی ہے ، اس کی سند میں ایک راوی اصرم بن حوشب ہے اور وہ متروک ہے ، معجم اوسط کی سند میں ایک راوی ولید بن فضل عنزی ہے اور وہ انتہائی ضعیف ہے ۔