مجمع الزوائد ومنبع الفوائد

سیدنا سہل بن سعد ساعدی رضی اللہ عنہ بیان کرتے ہیں : سیدنا جبرائیل علیہ السلام نبی اکرم صلی اللہ علیہ وسلم کے پاس آئے اور بولے : اے سیدنا محمد ( صلی اللہ علیہ وسلم ) ! آپ جتنا چاہیں زندہ رہیں ، لیکن آپ نے مرنا ہے ، آپ جو چاہیں عمل کر لیں ، آپ کو اس کا بدلہ دیا جائے گا ، آپ جس سے چاہیں محبت رکھیں آپ کو اس سے جدا ہونا ہو گا اور آپ یہ بات جان لیں کہ مؤمن کا شرف اس کی رات کی نفل نماز میں ہے ، اور اس کی عزت ، لوگوں سے اس کی بے نیازی میں ہے ۔ “
یہ روایت امام طبرانی نے معجم اوسط میں نقل کی ہے اور اس کی سند حسن ہے ۔

سیدنا علی بن ابوطالب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جبرائیل نے مجھ سے کہا: آپ جس سے چاہیں محبت رکھیں ، آپ نے اس سے جدا ہونا ہو گا ، آپ جو چاہیں عمل کریں ، آپ نے اس کا ( یعنی اس کے بدلے کا ) سامنا کرنا ہو گا اور آپ جتنا چاہیں زندہ رہیں ، آپ کو مرنا ہو گا ۔ “ نبی اکرم صلی اللہ علیہ وسلم ارشاد فرماتے ہیں : خطاب کرتے ہوئے ، جبرائیل نے مجھے مختصر بات کہی ۔
یہ روایت امام طبرانی نے معجم صغیر اور معجم اوسط میں نقل کی ہے اور اس کی سند میں راویوں کی ایک جماعت ایسی ہے جن سے میں واقف نہیں ہوں ۔