مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص کے پاس اتنا مال نہ ہو کہ وہ اس کو صدقہ کر سکے ، اُسے مومن مردوں اور مومن خواتین کے لئے دعائے مغفرت کرنی چاہیے ، کیونکہ یہ بھی صدقہ ہے ۔ “
یہ روایت امام طبرانی نے معجم اوسط میں نقل کی ہے اور اس کی سند میں ایسے راوی ہیں ، جن سے میں واقف نہیں ہوں ۔

سیدنا عبادہ بن صامت رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص مومن مردوں اور مومن خواتین کے لئے دعائے مغفرت کرتا ہے ، اللہ تعالیٰ ہر ایک مومن مرد اور مومن عورت کے بدلے میں ، اُس شخص کے لیے ایک نیکی نوٹ کرتا ہے ۔ “
یہ روایت امام طبرانی نے نقل کی ہے اور اس کی سند عمدہ ہے ۔

سیدہ ام سلمہ رضی اللہ عنہا بیان کرتی ہیں نبی اکرم صلی اللہ علیہ وسلم نے ارشاد فرمایا : ” جو شخص روزانہ یہ پڑھتا ہے : ” اے اللہ ! تو میری اور مومن مردوں کی اور مومن خواتین کی مغفرت کر دے ۔ “ ( نبی اکرم صلی اللہ علیہ وسلم فرماتے ہیں : ) تو ہر ایک مومن کی طرف سے ، اُس شخص کو تحفے کے طور پر ایک نیکی دی جاتی ہے ۔ “
یہ روایت امام طبرانی نے نقل کی ہے ، اس کی سند میں ایک راوی ابوامیہ بن یعلیٰ ہے اور وہ ضعیف ہے ۔

سیدنا ابودرداء رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص روزانہ 27 مرتبہ ( راوی کو شک ہے ، یا شاید یہ الفاظ ہیں : ) 25 مرتبہ ( ان دونوں میں سے کوئی ایک عدد ہے ، جو شخص روزانہ اتنی مرتبہ ) مومن مردوں اور مومن خواتین کے لئے دعائے مغفرت کرتا ہے ، تو وہ ان لوگوں میں شامل ہو جاتا ہے ، جن کی دعا مستجاب ہوتی ہے ، اور جن کی وجہ سے اہل زمین کو رزق دیا جاتا ہے ۔ “
یہ روایت امام طبرانی نے نقل کی ہے ، اس کی سند میں ایک راوی عثمان بن ابوعاتکہ ہے ، اس روایت میں اس نے یہ کہا: ہے : مجھے سیدہ ام درداء رضی اللہ عنہا کے حوالے سے یہ حدیث بیان کی گئی ہے ، عثمان نامی اس راوی کو ایک سے زیادہ افراد نے ثقہ قرار دیا ہے ، اور جمہور نے اسے ضعیف کہا: ہے ، اس روایت کی سند میں جو دیگر راوی ذکر کیے گئے ہیں وہ ثقہ ہیں ۔