مجمع الزوائد ومنبع الفوائد

سیدنا سہل بن سعد رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو منبر پر ، یا اُس کے علاوہ دعا کرتے ہوئے ، کبھی دونوں ہاتھ اوپر کیے ہوئے نہیں دیکھا ، آپ صلی اللہ علیہ وسلم یہ دعا کرتے ہوئے دونوں ہاتھ کندھوں کے مدمقابل رکھتے تھے اور انگلیوں کے ذریعے اشارہ کرتے تھے ۔
یہ روایت امام أحمد نے نقل کی ہے ، اس کی سند میں ایک راوی عبدالرحمن بن اسحاق زرقی مدنی ہے ، جسے ابن حبان نے ثقہ قرار دیا ہے ، امام مالک اور جمہور ائمہ نے اسے ضعیف کہا: ہے ، اس روایت کے بقیہ رجال ” ثقہ “ ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر سیدنا سعد رضی اللہ عنہ کے پاس سے ہوا ، جو دعا کرتے ہوئے دو انگلیوں سے اشارہ کر رہے تھے ، تو نبی اکرم صلی اللہ علیہ وسلم نے ارشاد فرمایا : اے سعد ! ایک کے ذریعے کرو !
یہ روایت امام أحمد نے نقل کی ہے ، انہوں نے اس کے تابعی کا نام بیان نہیں کیا ہے ، اس روایت کے بقیہ رجال ” صحیح “ کے رجال ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک شخص کو ملاحظہ کیا ، جو دونوں انگلیوں کے ذریعے دعا کر رہا تھا ، تو آپ صلی اللہ علیہ وسلم نے اُسے ایسا کرنے سے منع کیا اور فرمایا : ان دونوں میں سے ایک کے ذریعے دعا کرو ! دائیں والی کے ذریعے کرو !
یہ روایت امام ابویعلیٰ نے نقل کی ہے اور اس کے رجال ” صحیح “ کے رجال ہیں ۔

یہ روایت امام طبرانی نے معجم اوسط میں نقل کی ہے اور ان کے الفاظ یہ ہیں : ” نبی اکرم صلی اللہ علیہ وسلم نے ایک شخص کو دیکھا جو دو انگلیوں کے ذریعے اشارہ کر رہا تھا ، تو آپ نے فرمایا : ایک کے ذریعے کرو ! ایک کے ذریعے کرو ! “ ۔
اس روایت کے رجال ” ثقہ “ ہیں ۔

سیدنا عبداللہ بن عمر رضی اللہ عنہما کے بارے میں یہ بات منقول ہے : انہوں نے ایک شخص کو دو انگلیوں کے ذریعے اشارہ کرتے ہوئے دیکھا ، تو اس کی دونوں میں سے ایک انگلی کو بند کر دیا اور فرمایا : بے شک اللہ تعالیٰ ” ایک “ معبود ہے ۔
یہ روایت امام طبرانی نے ” موقوف “ روایت کے طور پر نقل کی ہے اور اس کے رجال ” صحیح “ کے رجال ہیں ۔

سیدنا عبداللہ بن عمر رضی اللہ عنہما فرماتے ہیں : تمہارا اپنے ہاتھوں کو بلند کرنا بدعت ہے ، نبی اکرم صلی اللہ علیہ وسلم اس سے زیادہ نہیں کرتے تھے ، راوی کہتے ہیں : اُن کی مراد یہ ہے کہ سینے سے اوپر نہیں لے جاتے تھے ۔
یہ روایت امام أحمد نے نقل کی ہے ، اس کی سند میں ایک راوی بشر بن حرب ہے اور وہ ضعیف ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم عرفہ میں وقوف کیے ہوئے تھے اور آپ اس طرح دعا کر رہے تھے ، انہوں نے اپنے دونوں ہاتھ بلند کئے اور دونوں ہاتھ اپنے ” ثندوہ “ ۔ ( اس کا مطلب سینہ بھی ہوتا ہے اور ناک کا کنارہ بھی ہوتا ہے ، اور جسم کا اگلا حصہ بھی ہوتا ہے ، شاید یہاں مراد سینہ ہے ) ۔ کے مدمقابل رکھے ، اور ہتھیلیاں زمین کی طرف رکھیں ۔

ایک روایت میں یہ الفاظ ہیں : ” انہوں نے ہتھیلیوں کا اوپری حصہ ، چہرے کی سمت میں رکھا ، اور دونوں ہاتھ ” ثندوہ “ ( شاید یہاں مراد سینہ ہے ) سے بلند کیے ، لیکن وہ کندھوں سے نیچے تھے ۔ “

ایک روایت میں یہ الفاظ ہیں : ” نبی اکرم صلی اللہ علیہ وسلم عرفہ میں اس طرح دعا کر رہے تھے ۔ “ ( راوی کہتے ہیں : ) یعنی ہتھیلی کی پشت کے ذریعے ۔

ایک روایت میں یہ الفاظ ہیں : عثمان نامی راوی نے یہ کر کے دکھایا ، حماد نامی راوی نے دونوں ہاتھ بلند کیے تھے اور ان کی دونوں ہتھیلیاں زمین کی طرف تھیں ۔ یہ تمام روایات امام أحمد نے نقل کی ہیں ، ان کی سند میں ایک راوی بشر بن حرب ہے اور وہ ضعیف ہے ۔

سیدنا خلاد بن سائب انصاری رضی اللہ عنہ بیان کرتے ہیں : ” نبی اکرم صلی اللہ علیہ وسلم جب کچھ مانگتے تھے ، تو اپنی ہتھیلی اپنی طرف رکھتے تھے اور جب کسی چیز سے پناہ مانگتے تھے ، تو ہاتھ کا بیرونی حصہ ، اپنی طرف رکھتے تھے ۔ “
یہ روایت امام أحمد نے ” مرسل “ روایت کے طور پر نقل کی ہے ، اور اس کی سند حسن ہے ۔

سیدنا عبداللہ بن عباس رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو عرفہ میں دعا کرتے ہوئے دیکھا ، آپ صلی اللہ علیہ وسلم کے دونوں ہاتھ آپ کے سینے کی طرف تھے ، جیسے کوئی مسکین کھانا مانگتا ہے ۔
یہ روایت امام طبرانی نے اوسط میں نقل کی ہے ، اس کی سند میں ایک راوی حسین بن عبداللہ بن عبیداللہ ہے اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم دعا کرتے ہوئے دونوں ہاتھ اتنے بلند کرتے تھے کہ آپ کے اُن کو بلند کرتے ہوئے ، اہتمام کرنے کی وجہ سے ، مجھے بے چینی ہوتی تھی ۔
یہ روایت امام أحمد نے تین اسانید کے ساتھ نقل کی ہے ، اور ان سب کے رجال ” صحیح “ کے رجال ہیں ۔

سیدنا ابوبرزہ اسلمی رضی اللہ عنہ بیان کرتے ہیں : نبی اکرم صلی اللہ علیہ وسلم دعا کے دوران دونوں ہاتھ اتنے بلند کرتے تھے کہ آپ کی بغلوں کی سفیدی نظر آ جاتی تھی ۔
یہ روایت امام ابویعلیٰ نے نقل کی ہے اور سیدنا ابوبرزہ رضی اللہ عنہ کا شاگرد ابوہلال ، میں اُس سے واقف نہیں ہوں ، اس روایت کی سند میں ایک راوی یزید بن ابوزیاد ہے ، جس کے بارے میں اختلاف پایا جاتا ہے ، اس روایت کے بقیہ رجال ” ثقہ “ ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم دعا میں دونوں ہاتھ اتنے بلند کرتے تھے کہ آپ کی بغلوں کی سفیدی دکھائی دے جاتی تھی ۔
یہ روایت امام بزار نے اپنے استاد محمد بن یزید کے حوالے سے نقل کی ہے ، اور میں اس سے واقف نہیں ہوں ، اس روایت کے بقیہ رجال ” ثقہ “ ہیں ۔

سیدنا انس بن مالک رضی اللہ عنہ بیان کرتے ہیں : عرفہ میں دعا کرتے ہوئے ، نبی اکرم صلی اللہ علیہ وسلم نے دونوں ہاتھ بلند کئے ، تو نبی اکرم صلی اللہ علیہ وسلم کے اصحاب نے کہا: یہ اللہ تعالیٰ کی بارگاہ میں عاجزی کا اظہار ہے ، اسی دوران اونٹنی نے آواز نکالی ، تو آپ نے دونوں میں سے ایک ہاتھ کو کھولا اور اس کے ذریعے اونٹنی کو پکڑا ، اور آپ نے اس دوران دوسرا ہاتھ اُٹھایا ہوا تھا ۔
یہ روایت امام بزار نے نقل کی ہے اور امام طبرانی نے اس کی مانند نقل کی ہے ، تاہم اس میں یہ الفاظ ہیں : نبی اکرم صلی اللہ علیہ وسلم نے دونوں ہاتھ بلند کئے ہوئے تھے ، اونٹنی کی لگام گر گئی ، تو نبی اکرم صلی اللہ علیہ وسلم نے اسے پکڑ لیا اور دونوں ہاتھ بلند کر لیے ، انہوں نے یہ الفاظ زائد نقل کیے ہیں : ” یہ عاجزی اور گریہ و زاری کی وجہ سے تھا ۔ “ امام بزار کے رجال ” صحیح “ کے رجال ہیں ، صرف أحمد بن یحیی صوفی کا معاملہ مختلف ہے ، اور وہ ثقہ ہے ، تاہم اعمش نے سیدنا انس رضی اللہ عنہ سے سماع نہیں کیا ہے ۔

سیدنا یزید بن عامر رضی اللہ عنہ بیان کرتے ہیں : نبی اکرم صلی اللہ علیہ وسلم کچھ افراد کے ہمراہ روانہ ہوئے ، یہاں تک کہ آپ ” مریطا “ سے پہلے ” قرن “ کے پاس آ کر ٹھہر گئے ، آپ نے دونوں ہاتھ بلند کئے ہوئے تھے ، آپ کا رخ قبلہ کی طرف تھا اور آپ دعا کر رہے تھے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبید بن سعید ابوخریف سوائی ہے ، اور میں اس سے واقف نہیں ہوں ، اس روایت کے بقیہ رجال ” ثقہ “ ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک تمہارا پروردگار حیا والا ہے ، مہربان ہے ، وہ اس بات سے حیا کرتا ہے کہ بندہ اپنے دونوں ہاتھ اٹھائے اور وہ ( پروردگار ) اُن دونوں کو نامراد واپس کر دے کہ اُن دونوں میں کوئی بھلائی نہ ہو ( نبی اکرم صلی اللہ علیہ وسلم نے فرمایا : ) تو جب تم میں سے کوئی ایک شخص دونوں ہاتھ اٹھائے تو اسے یہ کہنا چاہیے :
«يَا حَيُّ يَا قَيُّومُ ، لَا إِلَهَ إِلَّا أَنْتَ ، يَا أَرْحَمَ الرَّاحِمِينَ» ” اے زندہ اور بذات خود قائم ذات ! تیرے علاوہ اور کوئی معبود نہیں ہے ، صرف تو معبود ہے ، اے سب سے زیادہ رحم کرنے والے !“
یہ کلمات تین مرتبہ پڑھے ، پھر جب وہ دونوں ہاتھ یعنی دعا کے بعد نیچے کرے ، تو اس بھلائی کو اپنے چہرے پر ڈال لے ( یعنی دعا کے بعد دونوں ہاتھ چہرے پر پھیر لے ) ۔
یہ روایت امام طبرانی نے نقل کی ہے ، اس کی سند میں ایک راوی جارود بن یزید ہے اور وہ متروک ہے ۔

سیدنا سلمان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب بھی کچھ لوگ اللہ تعالیٰ کی بارگاہ میں ہاتھ اُٹھا کر اس سے کوئی چیز مانگتے ہیں ، تو اللہ تعالیٰ کے ذمہ یہ حق ہے کہ وہ اُن کے ہاتھوں میں وہ چیز ڈال دے ، جو انہوں نے مانگی ہے ۔ “ ( علامہ ہیثمی فرماتے ہیں : ) میں یہ کہتا ہوں : ان صحابی کے حوالے سے ” سنن “ میں ایک حدیث مذکور ہے جو اس روایت کے علاوہ ہے ۔
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ۔

سیدنا خالد بن ولید رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کی خدمت میں گھر کے تنگ ہونے کی شکایت کی ، تو نبی اکرم صلی اللہ علیہ وسلم نے ارشاد فرمایا : ” تم اپنے دونوں ہاتھ آسمان کی طرف بلند کر کے اللہ تعالیٰ سے گنجائش مانگو ۔ “
یہ روایت امام طبرانی نے دو اسناد کے ساتھ نقل کی ہے ، اور ان دونوں میں سے ایک حسن ہے ۔

خلاد بن سائب اپنے والد کے حوالے سے یہ بات نقل کرتے ہیں : نبی اکرم صلی اللہ علیہ وسلم جب دعا کرتے تھے تو دونوں ہتھیلیاں چہرے کی طرف بلند کر لیتے تھے ۔
یہ روایت امام طبرانی نے نقل کی ہے ، اس کی سند میں ایک راوی حفص بن ہاشم بن عتبہ ہے اور وہ مجہول ہے ۔

سیدنا جریر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا آپ عرفہ میں وقوف کیے ہوئے تھے اور آپ نے اپنی چادر بغل میں سے گزاری ہوئی تھی ، آپ نے دونوں ہاتھ بلند کئے ہوئے تھے ، لیکن وہ آپ کے سر سے اوپر نہیں جا رہے تھے اور آپ کے عضلات کانپ رہے تھے ۔
یہ روایت امام طبرانی نے نقل کی ہے ، اس کی سند میں ایک راوی محمد بن عبیداللہ عرزمی ہے اور وہ ضعیف ہے ۔

محمد بن ابویحیی بیان کرتے ہیں : میں نے سیدنا عبداللہ بن زبیر رضی اللہ عنہما کو دیکھا ، انہوں نے ایک شخص کو دونوں ہاتھ بلند کر کے دعا کرتے ہوئے دیکھا ، وہ نماز سے فارغ ہونے سے پہلے ایسا کر رہا تھا ، جب وہ نماز سے فارغ ہوا ، تو سیدنا عبداللہ بن زبیر رضی اللہ عنہما نے فرمایا : نبی اکرم صلی اللہ علیہ وسلم دونوں ہاتھوں کو اُس وقت تک بلند نہیں کرتے تھے ، جب تک آپ نماز سے فارغ نہیں ہو جاتے تھے ۔
یہ روایت امام طبرانی نے نقل کی ہے ، انہوں نے ان کے حالات نقل کرتے ہوئے یہ کہا: ہے : محمد بن ابویحیی اسلمی نے سیدنا عبداللہ بن زبیر رضی اللہ عنہما سے روایات نقل کی ہیں ، اس روایت کے رجال ” ثقہ “ ہیں ۔

سیدنا ابوبکره رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اپنی ہتھیلیوں کے ذریعے ، اللہ تعالیٰ سے دعا مانگو ! اُن کی پشت کے ذریعے اُس سے نہ مانگو ( یعنی دعا کرتے ہوئے ہتھیلی اوپر کی طرف رکھو ، ہتھیلی کی پشت اوپر کی طرف نہ رکھو ) ۔ “
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ، صرف عمار بن خالد واسطی کا معاملہ مختلف ہے اور وہ ثقہ ہے ۔