مجمع الزوائد ومنبع الفوائد

عبداللہ بن وہب بیان کرتے ہیں : ( علامہ ہیثمی فرماتے ہیں : ) میں یہ کہتا ہوں : یہ درست لفظ ” عبداللہ بن موہب “ ہے ، وہ بیان کرتے ہیں : ” ایک مرتبہ سیدنا عثمان رضی اللہ عنہ نے سیدنا عبداللہ بن عمر رضی اللہ عنہما سے کہا: آپ قاضی کا عہدہ سنبھال لیں ، تو سیدنا عبداللہ بن عمر رضی اللہ عنہما نے کہا: اے امیر المؤمنین ! کیا آپ مجھے معاف نہیں رکھیں گے ؟ سیدنا عثمان رضی اللہ عنہ نے کہا: آپ جائیں اور لوگوں کے درمیان قاضی کے طور پر فیصلے دیں ، سیدنا عبداللہ رضی اللہ عنہ نے کہا: امیر المؤمنین ! کیا آپ مجھے معاف نہیں رکھیں گے ؟ سیدنا عثمان رضی اللہ عنہ نے کہا: میں آپ کو یہ تاکید کرتا ہوں کہ آپ جائیں اور فیصلے کریں ، سیدنا عبداللہ رضی اللہ عنہ نے کہا: آپ جلدی نہ کریں ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اللہ تعالیٰ کی پناہ مانگتا ہے ، وہ زبردست پناہ حاصل کر لیتا ہے ۔ “ سیدنا عثمان رضی اللہ عنہ نے کہا: ٹھیک ہے ، تو سیدنا عبداللہ رضی اللہ عنہ نے کہا: پھر میں اس بات سے اللہ کی پناہ مانگتا ہوں کہ میں قاضی بن جاؤں ، سیدنا عثمان رضی اللہ عنہ نے دریافت کیا : آپ کے لئے کیا چیز رکاوٹ ہے ؟ جبکہ آپ کے والد قاضی کے طور پر فیصلے دیا کرتے تھے ، سیدنا عبداللہ رضی اللہ عنہ نے جواب دیا : کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص قاضی ہو اور لوگوں کے درمیان ظلم کے مطابق فیصلہ دے ، تو وہ اہل جہنم میں سے ہو گا ، اور جو شخص قاضی ہو اور جاہل ہونے کے طور پر فیصلہ دے ، تو وہ اہل جہنم میں سے ہو گا ، اور جو قاضی ہو اور عالم بھی ہو ، اور حق کے مطابق ( راوی کو شک ہے ، یا شاید یہ الفاظ ہیں : ) عدل کے مطابق فیصلہ دے ، تو وہ یہ درخواست کرے گا کہ اُسے برابری کی بنیاد پر چھوڑ دیا جائے ۔ “
( علامہ ہیثمی فرماتے ہیں : ) میں یہ کہتا ہوں : امام ترمذی نے اس روایت کا ایک حصہ نقل کیا ہے ۔
یہ روایت امام ابویعلیٰ نے کبیر میں نقل کی ہے اور اس کے رجال ” ثقہ “ ہیں ، البتہ عبداللہ بن موہب کا معاملہ مختلف ہے ، میں نے اس کے سیدنا عثمان رضی اللہ عنہ سے سماع کے بارے میں کوئی روایت نہیں پائی ہے ۔