مجمع الزوائد ومنبع الفوائد

یزید بن الہاد نے اسماعیل بن عبداللہ بن جعفر کا یہ بیان نقل کیا ہے : مجھ تک
یہ روایت پہنچی ہے : نبی اکرم صلی اللہ علیہ وسلم نے ارشاد فرمایا ہے : ” جو انسان کسی محفل میں موجود ہو اور پھر وہ وہاں سے اُٹھتے وقت یہ پڑھ لے :
«سُبْحَانَكَ اللَّهُمَّ وَبِحَمْدِكَ ، لَا إِلَهَ إِلَّا أَنْتَ ، أَسْتَغْفِرُكَ وَأَتُوبُ إِلَيْكَ»
” تو ہر عیب سے پاک ہے ، اے اللہ ! اور ہر طرح کی حمد تیرے لئے مخصوص ہے ، تیرے علاوہ اور کوئی معبود نہیں ہے ، میں تجھ سے مغفرت طلب کرتا ہوں اور تیری بارگاہ میں توبہ کرتا ہوں ۔ “ ( نبی اکرم صلی اللہ علیہ وسلم فرماتے ہیں : ) تو اس شخص نے اس محفل میں ، جو ( کوتاہی کی ہو گی ) اُس کی مغفرت ہو جائے گی ۔ “
( راوی کہتے ہیں : ) میں نے یہ حدیث یزید بن خصیفہ کو بیان کی ، تو انہوں نے بتایا : سیدنا سائب بن یزید رضی اللہ عنہ نے نبی اکرم صلی اللہ علیہ وسلم کے حوالے سے اس کی مانند حدیث مجھے بیان کی ہے ۔
یہ روایت امام أحمد اور امام طبرانی نے نقل کی ہے ، اور ان دونوں کے رجال ” صحیح “ کے رجال ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” محفل کا کفارہ یہ ہے : کہ آدمی یہ پڑھ لے :
«سُبْحَانَكَ اللَّهُمَّ وَبِحَمْدِكَ ، أَسْتَغْفِرُكَ وَأَتُوبُ إِلَيْكَ»
” تو ہر عیب سے پاک ہے ، اے اللہ ! اور حمد تیرے لیے مخصوص ہے ، میں تجھ سے مغفرت طلب کرتا ہوں اور تیری بارگاہ میں توبہ کرتا ہوں ۔ “
یہ روایت امام بزار نے اور امام طبرانی نے اوسط میں نقل کی ہے ، اور اس کی سند میں ایک راوی عثمان بن مطر ہے اور وہ ضعیف ہے ۔

سیدنا رافع بن خدیج رضی اللہ عنہ بیان کرتے ہیں : نبی اکرم صلی اللہ علیہ وسلم محفل سے اُس وقت تک نہیں اُٹھتے تھے جب تک آپ یہ نہیں پڑھ لیتے تھے : «سُبْحَانَكَ اللَّهُمَّ وَبِحَمْدِكَ ، أَسْتَغْفِرُكَ وَأَتُوبُ إِلَيْكَ»
” تو ہر عیب سے پاک ہے ، اے اللہ ! اور حمد تیرے لیے مخصوص ہے ، میں تجھ سے مغفرت طلب کرتا ہوں اور تیری بارگاہ میں توبہ کرتا ہوں ۔ “
پھر آپ صلی اللہ علیہ وسلم یہ فرماتے تھے : یہ اُس چیز کا کفارہ ہوتا ہے جو محفل میں ہوتا ہے ۔
یہ روایت امام طبرانی نے تینوں کتابوں میں نقل کی ہے ، اور اس کے رجال ” ثقہ “ ہیں ۔

سیدنا عبداللہ بن مسعود رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” محفل کا کفارہ یہ ہے : کہ آدمی اُٹھنے کے بعد یہ پڑھ لے :
«سُبْحَانَكَ اللَّهُمَّ وَبِحَمْدِكَ ، لَا إِلَهَ إِلَّا أَنْتَ ، أَسْتَغْفِرُكَ وَأَتُوبُ إِلَيْكَ»
” تو ہر عیب سے پاک ہے ، اے اللہ ! اور حمد تیرے لیے مخصوص ہے ، تیرے علاوہ اور کوئی معبود نہیں ہے ، میں تجھ سے مغفرت طلب کرتا ہوں اور تیری بارگاہ میں توبہ کرتا ہوں ۔ “
یہ روایت امام طبرانی نے معجم اوسط اور معجم کبیر میں نقل کی ہے ، تاہم معجم کبیر میں یہ الفاظ نہیں ہیں : ” اُٹھنے کے بعد “ ان دونوں روایات کی سند میں ایک راوی عطاء بن سائب ہے ، اور وہ اختلاط کا شکار ہو گیا تھا ۔

سیدنا زبیر بن عوام رضی اللہ عنہ بیان کرتے ہیں : ہم نے عرض کی : یا رسول اللہ ! جب ہم آپ کے پاس سے اُٹھتے ہیں ، تو ہم زمانہ جاہلیت کی باتیں کرنا شروع کر دیتے ہیں ، تو نبی اکرم صلی اللہ علیہ وسلم نے ارشاد فرمایا : جب تم اس طرح کی محافل میں بیٹھو ، جن میں تمہیں اپنی ذات کے حوالے سے اندیشہ ہو ( کہ کہیں تم سے کوئی غلط بات سرزد نہ ہو گئی ہو ) تو تم اُٹھتے وقت یہ پڑھ لیا کرو :
«سُبْحَانَكَ اللَّهُمَّ وَبِحَمْدِكَ ، نَشْهَدُ أَنْ لَا إِلَهَ إِلَّا أَنْتَ ، نَسْتَغْفِرُكَ وَنَتُوبُ إِلَيْكَ» ” تو ہر عیب سے پاک ہے ، اے اللہ ! اور حمد تیرے لیے مخصوص ہے ، ہم اس بات کی گواہی دیتے ہیں کہ تیرے علاوہ اور کوئی معبود نہیں ہے ، ہم تجھ سے مغفرت طلب کرتے ہیں اور ہم تیری بارگاہ میں توبہ کرتے ہیں ۔ “
نبی اکرم صلی اللہ علیہ وسلم فرماتے ہیں : تو تم نے اس محفل میں جو غلطی کی ہو گی وہ ختم ہو جائے گی ۔
یہ روایت امام طبرانی نے معجم صغیر اور معجم اوسط میں نقل کی ہے ، اور اس کی سند میں ایک راوی ایسا ہے جس سے میں واقف نہیں ہوں ۔

سیدنا جبیر بن مطعم رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” محفل کا کفارہ یہ ہے کہ آدمی اُس وقت تک نہ اُٹھے ، جب تک وہ یہ نہ پڑھ لے :
«سُبْحَانَكَ اللَّهُمَّ وَبِحَمْدِكَ ، لَا إِلَهَ إِلَّا أَنْتَ ، تُبْ عَلَيَّ وَاغْفِرْ لِي»
” تو ہر عیب سے پاک ہے ، اے اللہ ! اور حمد تیرے لیے مخصوص ہے ، تیرے علاوہ اور کوئی معبود نہیں ہے ، تو میری توبہ قبول فرما لے اور میری مغفرت کر دے ۔ “
نبی اکرم صلی اللہ علیہ وسلم فرماتے ہیں : آدمی کو یہ کلمات تین مرتبہ پڑھنے چاہیے ، اگر اس محفل کے دوران کوئی لغزش ہو گئی ہو ، تو یہ اس کا کفارہ بن جائیں گے ، اور اگر وہ محفل ذکر کی ہو گی ، تو یہ اس ( ذکر پر ) پر مہر بن جائیں گے ۔
یہ روایت امام طبرانی نے نقل کی ہے ، اس کی سند میں ایک راوی خالد بن یزید عمری ہے اور وہ ضعیف ہے ۔

سیدنا جبیر بن مطعم رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص یہ پڑھے :
«سُبْحَانَ اللَّهِ وَبِحَمْدِهِ ، سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لَا إِلَهَ إِلَّا أَنْتَ ، أَسْتَغْفِرُكَ وَأَتُوبُ إِلَيْكَ»
” میں اللہ تعالیٰ کی پاکی بیان کرتا ہوں ، اور ہر طرح کی حمد اللہ تعالیٰ کے لیے مخصوص ہے ، تو ہر عیب سے پاک ہے ، اے اللہ ! اور حمد تیرے لیے مخصوص ہے ، میں اس بات کی گواہی دیتا ہوں کہ تیرے علاوہ اور کوئی معبود نہیں ہے ، میں تجھ سے مغفرت طلب کرتا ہوں اور تیری بارگاہ میں توبہ کرتا ہوں ۔ “
نبی اکرم صلی اللہ علیہ وسلم یہ فرماتے ہیں : اگر آدمی ذکر کی محفل میں ان کلمات کو پڑھ لے گا ، تو یہ کلمات مہر ہوں گے ، جو اس ذکر پر لگ جائے گی ، اور جو شخص لغویات کی محفل میں انہیں پڑھ لے گا ، تو یہ اس کے لئے کفارہ بن جائیں گے ۔ “
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” محفل کا کفارہ یہ ہے :
«سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لَا إِلَهَ إِلَّا أَنْتَ ، أَسْتَغْفِرُكَ وَأَتُوبُ إِلَيْكَ» ” تو ہر عیب سے پاک ہے ، اے اللہ ! اور حمد تیرے لیے مخصوص ہے ، میں اس بات کی گواہی دیتا ہوں کہ تیرے علاوہ اور کوئی معبود نہیں ہے ، میں تجھ سے مغفرت طلب کرتا ہوں اور تیری بارگاہ میں توبہ کرتا ہوں ۔ “
یہ روایت امام طبرانی نے نقل کی ہے ، اس کی سند میں ایک راوی محمد بن جامع بن عطار ہے ، جسے ابن حبان نے ثقہ قرار دیا ہے ، اور ایک جماعت نے اسے ضعیف کہا: ہے ، اس روایت کے بقیہ رجال ” صحیح “ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم جب سر اٹھا کر گھر کی چھت کی طرف دیکھتے تھے ، تو یہ پڑھتے تھے :
«سُبْحَانَكَ اللَّهُمَّ وَبِحَمْدِكَ ، أَسْتَغْفِرُكَ وَأَتُوبُ إِلَيْكَ»
” تو ہر عیب سے پاک ہے ، اے اللہ ! اور حمد تیرے لیے مخصوص ہے ، میں تجھ سے مغفرت طلب کرتا ہوں اور تیری بارگاہ میں توبہ کرتا ہوں ۔ “
سیدہ عائشہ رضی اللہ عنہا بیان کرتی ہیں : میں نے نبی اکرم صلی اللہ علیہ وسلم سے ان کلمات کے بارے میں دریافت کیا ، تو آپ صلی اللہ علیہ وسلم نے فرمایا : مجھے ان کے بارے میں حکم دیا گیا ہے ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی ایسا ہے ، جس سے میں واقف نہیں ہوں ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم وصال سے پہلے ، کثرت کے ساتھ یہ پڑھا کرتے تھے :
« سُبْحَانَكَ اللَّهُمَّ وَبِحَمْدِكَ ، أَسْتَغْفِرُكَ وَأَتُوبُ إِلَيْكَ»
” تو ہر عیب سے پاک ہے ، اے اللہ ! اور حمد تیرے لیے مخصوص ہے ، میں تجھ سے مغفرت طلب کرتا ہوں ، اور تیری بارگاہ میں توبہ کرتا ہوں ۔ “
نبی اکرم صلی اللہ علیہ وسلم نے فرمایا : مجھے یہ حکم دیا گیا ہے ، پھر آپ نے یہ سورت تلاوت کی :
﴿إِذَا جَاءَ نَصْرُ اللَّهِ وَالْفَتْحُ﴾ [النصر : 1]
” جب اللہ کی مدد اور فتح آ گئی ۔ ۔ ۔ ۔ ۔ ۔ “ ۔
یہ روایت امام طبرانی نے معجم اوسط میں نقل کی ہے اور اس کے رجال ” صحیح “ کے رجال ہیں ، باقی اللہ بہتر جانتا ہے ۔