مجمع الزوائد ومنبع الفوائد

سیدنا انس رضی اللہ عنہ بیان کرتے ہیں : جب تیز ہوا چلتی تھی ، تو نبی اکرم صلی اللہ علیہ وسلم یہ پڑھا کرتے تھے :« اللَّهُمَّ إِنِّي أَسْأَلُكَ مِنْ خَيْرِ مَا أُمِرَتْ بِهِ ، وَأَعُوذُ بِكَ مِنْ شَرِّ مَا أُمِرَتْ بِهِ» ” اے اللہ ! اس ہوا کو ، جس چیز کے بارے میں حکم دیا گیا ہے ، میں اُس کی بھلائی کا تجھ سے سوال کرتا ہوں ، اور اسے جس چیز کا حکم دیا گیا ہے ، اُس کے شر سے میں تیری پناہ مانگتا ہوں ۔ “

ایک روایت میں یہ الفاظ ہیں : ” جب نبی اکرم صلی اللہ علیہ وسلم ہوا ( شاید یہاں آندھی یا تیز ہوا مراد ہے ) کو دیکھتے تھے تو پریشان ہو جاتے تھے ۔ “
یہ روایت امام ابویعلیٰ نے مختلف اسانید کے ساتھ نقل کی ہے ، جن میں سے ایک کے رجال ” صحیح “ کے رجال ہیں ۔

سیدنا عثمان بن ابوالعاص رضی اللہ عنہ بیان کرتے ہیں : جب ” شمال “ نامی ہوا تیز چلتی تھی ، تو نبی اکرم صلی اللہ علیہ وسلم یہ پڑھتے تھے :
«اللَّهُمَّ إِنِّي أَعُوذُ بِكَ مِنْ شَرِّ مَا أُرْسِلَ فِيهَا» ” اے اللہ ! میں اُس چیز کے شر سے تیری پناہ مانگتا ہوں ، جو اس میں بھیجی گئی ہے ۔ “

یہ روایت امام بزار نے نقل کی ہے ، اس کی سند میں ایک راوی عبدالرحمن بن اسحاق ابوشیبہ ہے اور وہ ضعیف ہے ۔

سیدنا سلمہ بن اکوع رضی اللہ عنہ بیان کرتے ہیں : جب تیز ہوا چلتی تھی ، تو نبی اکرم صلی اللہ علیہ وسلم یہ دعا کرتے تھے :
«اللَّهُمَّ لَقْحًا لَا عَقِيمًا» ” اے اللہ ! یہ آباد کرنے والی ہو ، برباد کرنے والی نہ ہو ۔ “

یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال ” صحیح “ کے رجال ہیں ، صرف مغیرہ بن عبدالرحمن کا معاملہ مختلف ہے اور وہ ثقہ ہے ۔

سیدنا عثمان بن ابوالعاص رضی اللہ عنہ بیان کرتے ہیں : جب ” شمال “ نامی ہوا تیز چلتی تھی ، تو نبی اکرم صلی اللہ علیہ وسلم یہ پڑھا کرتے تھے :
«اللَّهُمَّ إِنِّي أَعُوذُ بِكَ مِنْ شَرِّ مَا أُرْسِلَتْ بِهِ»
” اے اللہ ! جس کے ہمراہ اسے بھیجا گیا ہے ، میں اُس کے شر سے تیری پناہ مانگتا ہوں ۔ “
یہ روایت امام طبرانی نے نقل کی ہے ، اس کی سند میں ایک راوی عبدالرحمن بن اسحاق ابوشیبہ ہے اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : جب تیز ہوا چلتی تھی ، تو نبی اکرم صلی اللہ علیہ وسلم اپنا رخ اس کی طرف کر لیتے تھے ، آپ گھٹنوں کے بل کھڑے ہو جاتے اور دونوں ہاتھ پھیلا کر یہ دعا کرتے تھے :
«اللَّهُمَّ إِنِّي أَسْأَلُكَ مِنْ خَيْرِ هَذِهِ الرِّيحِ ، وَخَيْرِ مَا أُرْسِلَتْ بِهِ ، وَأَعُوذُ بِكَ مِنْ شَرِّهَا ، وَشَرِّ مَا أُرْسِلَتْ بِهِ ، اللَّهُمَّ اجْعَلْهَا رَحْمَةً ، وَلَا تَجْعَلْهَا عَذَابًا ، اللَّهُمَّ اجْعَلْهَا رِيَاحًا ، وَلَا تَجْعَلْهَا رِيحًا»
” اے اللہ ! میں اس ہوا کی بھلائی کا تجھ سے سوال کرتا ہوں اور اُس چیز کی بھلائی کا جو اس کے ہمراہ بھیجی گئی ہے ، اور میں اس کے شر سے تیری پناہ مانگتا ہوں ، اور اُس چیز کے شر سے بھی جو اس کے ہمراہ بھیجی گئی ہے ، اے اللہ ! تو اسے رحمت بنا دے ، تو اسے عذاب نہ بنانا ، اے اللہ ! تو اسے ” ریاح “ ( یعنی آرام کا باعث ) بنا دے تو اسے ” ریح “ ( یعنی تباہی کا ذریعہ ) نہ بنانا ۔ “
یہ روایت امام طبرانی نے نقل کی ہے ، اس کی سند میں ایک راوی حسین بن قیس رحبی ، ابوعلی واسطی ہے ، جس کا لقب ” حنش “ ہے ، اور وہ متروک ہے ، حصین بن نمیر نے اسے ثقہ قرار دیا ہے ، اس روایت کے بقیہ رجال ” صحیح “ کے رجال ہیں ۔