مجمع الزوائد ومنبع الفوائد

سیدنا عبدالرحمن بن عابس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب کوئی شخص کسی جگہ پر پڑاؤ کرے تو وہ یہ پڑھے :
«أَعُوذُ بِكَلِمَاتِ اللَّهِ التَّامَّاتِ مِنْ شَرِّ مَا خَلَقَ» ” میں اللہ تعالیٰ کے مکمل کلمات کی پناہ مانگتا ہوں ، اُس چیز کے شر سے جو اُس نے پیدا کی ہے ۔ “
( نبی اکرم صلی اللہ علیہ وسلم فرماتے ہیں : ) تو وہ اُس پڑاؤ کے دوران کوئی ایسی چیز نہیں دیکھے گا جو اسے بری لگے ، جب تک وہ وہاں سے کوچ نہیں کر جاتا ۔
ابی نامی راوی کہتے ہیں : خواب میں میری ملاقات سیدنا عبدالرحمن بن عابس رضی اللہ عنہ سے ہوئی ، میں نے دریافت کیا : کیا اللہ کے رسول نے آپ کو یہ حدیث بیان کی ہے ، انہوں نے جواب دیا : جی ہاں !
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ۔

سیدہ خولہ بنت حکیم رضی اللہ عنہا بیان کرتی ہیں نبی اکرم صلی اللہ علیہ وسلم نے ارشاد فرمایا : ” جو شخص کسی جگہ پر پڑاؤ کر کے یہ پڑھ لے : أَعُوذُ بِكَلِمَاتِ اللَّهِ التَّامَّاتِ مِنْ شَرِّ مَا خَلَقَ ” میں اللہ تعالیٰ کے مکمل کلمات کی پناہ مانگتا ہوں ، اُس چیز کے شر سے جو اس نے پیدا کی ہے ۔ “ ( نبی اکرم صلی اللہ علیہ وسلم فرماتے ہیں : ) تو اُس پڑاؤ کے دوران اُسے کوئی چیز نقصان نہیں پہنچائے گی ، یہاں تک کہ وہ اس جگہ سے روانہ ہو جائے ۔
یہ روایت امام أحمد اور امام طبرانی میں نقل کی ہے ، اس کی سند میں ایک راوی ربیع بن مالک ہے اور وہ ضعیف ہے ۔

سیدنا عبد الله بن بسر رضی اللہ عنہ اس بیان کرتے ہیں : میں ” حمص “ سے نکلا ، رات ایک ایسی جگہ پر آئی جو بے آب و گیاہ جگہ تھی ، وہاں زمین کی ( ان دیکھی ) مخلوق میرے پاس آ گئی ، تو میں نے سورہ اعراف کی یہ آیت تلاوت کی :
﴿ إِنَّ رَبَّكُمُ اللَّهُ الَّذِي خَلَقَ السَّمَاوَاتِ وَالْأَرْضَ ﴾ [الأعراف : 54]
” بیشک تمہارا پروردگار ، وہ اللہ ہے ، جس نے آسمانوں اور زمین کو پیدا کیا ہے ۔ ۔ ۔ ۔ ۔ ۔ “ ۔
یہ میں نے آیت کے آخر تک ، یعنی مکمل آیت تلاوت کی ۔
( راوی کہتے ہیں : ) تو اس مخلوق میں سے ایک نے دوسروں سے کہا: اب تم صبح تک اس کی دیکھ بھال کرنا ، راوی کہتے ہیں : جب صبح ہوئی تو میں اپنی سواری پر سوار ہوا ( یعنی اور وہاں سے روانہ ہو گیا ) ۔
یہ روایت امام طبرانی نے نقل کی ہے ، اس کی سند میں ایک راوی مسیب بن واضح ہے ، جسے ایک سے زیادہ افراد نے ثقہ قرار دیا ہے ، اور ایک جماعت نے اسے ضعیف کہا: ہے ، اس روایت کے بقیہ رجال ” صحیح “ کے رجال ہیں ۔

قتادہ بیان کرتے ہیں ، میں نے سیدنا انس بن مالک رضی اللہ عنہ کو یہ فرماتے ہوئے سنا ہے : ” جب ہم کسی جگہ پڑاؤ کرتے تھے تو ہم تسبیح پڑھتے رہتے تھے ، یہاں تک کہ پالان کھول لئے جاتے تھے ۔ “ شعبہ کہتے ہیں : یہاں تسبیح سے مراد زبان کے ذریعے تسبیح پڑھنا ہے ۔
یہ روایت امام طبرانی نے معجم اوسط میں نقل کی ہے اور اس کی سند عمدہ ہے ۔