مجمع الزوائد ومنبع الفوائد

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص «سبحان الله وبحمده» پڑھ لیتا ہے ، اُس کے لیے جنت میں کھجور کا ایک درخت لگا دیا جاتا ہے ۔ “

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس کو رات کے وقت عبادت کرنا مشکل لگتا ہو ، یا مال خرچ کرنے کے حوالے سے وہ بخل کا شکار ہو ، یا دشمن کے ساتھ لڑائی کرنے کے حوالے سے بزدلی کا شکار ہو ، اسے کثرت کے ساتھ «سُبْحَانَ اللَّهِ وَ بِحَمْدِه» پڑھنا چاہیے کیونکہ ایسا کرنا اللہ تعالیٰ کے نزدیک اس سے زیادہ محبوب ہو گا کہ آدمی سونے کا پہاڑ اللہ کی راہ میں خرچ کر دے ۔ “
یہ روایت امام طبرانی نے نقل کی ہے ، اس کی سند میں ایک راوی سلیمان بن أحمد واسطی ہے جسے عبدان نے ثقہ قرار دیا ہے اور جمہور نے اسے ضعیف کہا: ہے ، اس روایت کے بقیہ رجال پر توثیق غالب ہے ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم میں سے کوئی بھی شخص روزانہ اللہ تعالیٰ کے لیے دو ہزار نیکیاں کرنا نہ چھوڑے ، جب صبح ہو تو وہ ایک سو مرتبہ «سبحانَ اللهِ وَ بِحَمْدِه» پڑھے ، تو یہ دو ہزار نیکیاں ہوں گی ، اللہ کی قسم ! اللہ نے چاہا تو وہ شخص اُس دن میں اتنے گناہ نہیں کر پائے گا اور اس کے علاوہ وہ جو نیکی کرے گا ، وہ مزید ہو گی ۔ “
یہ روایت امام طبرانی نے نقل کی ہے ، اس کی سند میں ایک راوی ابوبکر بن ابومریم ہے اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : «سُبْحَانَ اللَّهِ وَبِحَمْدِهِ ، سُبْحَانَ اللهِ الْعَظِيمِ ، اَسْتَغْفِرُ اللَّهَ وَأَتُوْبُ إِلَيْه»
” اللہ تعالیٰ کی ذات ہر عیب سے پاک ہے ، اسی کی حمد ہے ، اللہ تعالیٰ کی ذات ہر عیب سے پاک ہے جو عظمت والی ہے ، میں اللہ تعالیٰ سے مغفرت طلب کرتا ہوں اور اس کی بارگاہ میں توبہ کرتا ہوں ۔ “
نبی اکرم صلی اللہ علیہ وسلم نے فرمایا : ” جو شخص ان کلمات کو پڑھ لے گا ، تو یہ کلمات اُسی طرح نوٹ کر لئے جائیں گے ، جس طرح اُس نے پڑھے ہیں ، پھر انہیں عرش کے ساتھ لٹکا دیا جائے گا اور انہیں پڑھنے والے شخص کا کوئی بھی گناہ اُن کلمات کو مٹا نہیں سکے گا ، یہاں تک کہ وہ شخص جب قیامت کے دن اللہ تعالیٰ کی بارگاہ میں حاضر ہو گا ، تو اُن کلمات پر مہر لگی ہوئی ہو گی ، اسی طرح جیسے اس نے وہ کلمات پڑھے تھے ۔ “
یہ روایت امام بزار نے نقل کی ہے ، اس کی سند میں ایک راوی یحیی بن عمرو بن مالک نکری بصری ہے ، اور وہ ضعیف ہے ، امام دارقطنی رحمہ اللہ کہتے ہیں : یہ کم درجے کا صالح ہے ، اس کا اعتبار کیا جائے گا ، اس روایت کے بقیہ رجال ” ثقہ “ ہیں ۔