مجمع الزوائد ومنبع الفوائد

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” زمین کے جس بھی حصے پر ، نماز یا ذکر کی صورت میں ، اللہ کا ذکر کیا جاتا ہے ، تو اُس حصے سے لے کر ، ساتویں زمین تک ، اس حوالے سے بشارت حاصل کرتا ہے ، اور اپنے اردگرد موجود حصوں کے سامنے فخر کا اظہار کرتا ہے ، اور جب کوئی بندہ کسی بے آب و گیاہ جگہ پر کھڑا ہو کر نماز ادا کرنے لگتا ہے ، تو زمین اُس کے لیے آراستہ ہو جاتی ہے ۔ “
یہ روایت امام ابویعلیٰ نے نقل کی ہے ، اس کی سند میں ایک راوی موسیٰ بن عبیدہ ربذی ہے اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” زمین کے جس بھی حصے میں نماز کی شکل میں اللہ تعالیٰ کا ذکر کیا جاتا ہے تو وہ حصہ اپنے اردگرد کے حصوں پر فخر کا اظہار کرتا ہے اور وہاں سے لے کر ساتویں زمین تک ، اللہ تعالیٰ کے ذکر کے حوالے سے خوشخبری حاصل کرتا ہے ۔ “
یہ روایت امام طبرانی نے نقل کی ہے اس کی سند میں ایک راوی أحمد بن بکر بالسی ہے اور وہ انتہائی ضعیف ہے ۔

سیدنا عبداللہ بن مسعود رضی اللہ عنہ فرماتے ہیں : ” ایک پہاڑ دوسرے پہاڑ کا نام لے کر اسے بلند آواز میں مخاطب کر کے یہ کہتا ہے : اے فلاں ! کیا آج تم پر سے کوئی ایسا فرد گزرا ہے جس نے اللہ تعالیٰ کا ذکر کیا ہو ؟ تو اگر دوسرا پہاڑ جواب دے : جی ہاں ! تو وہ خوشخبری حاصل کرتا ہے ۔ “ عون نامی راوی کہتے ہیں : وہ بری چیزیں سن لیں گے اور بھلائی کی چیزیں نہیں سنیں گے ؟ وہ بھلائی کی چیزیں تو زیادہ بہتر طور پر سنتے ہیں ، پھر انہوں نے یہ آیت تلاوت کی : ” اور وہ ( یعنی کفار ) یہ کہتے ہیں : رحمن کی اولاد ہے ، تحقیق تم نے بڑی غلط بات کہی ہے ، قریب ہے کہ ( تمہاری ) اس بات کی وجہ سے آسمان پھٹ جائیں یا زمین شق ہو جائے اور پہاڑ ( ٹکڑے ہو کر ) گر جائیں ، اس بات پر کہ انہوں نے رحمن کے لیے اولاد مانی ہے ، حالانکہ رحمن کی یہ شان نہیں ہے کہ اس کی اولاد ہو ۔ “
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے مساجد اور زمین کے ان حصوں کی فضیلت کے بارے میں روایات گزر چکی ہیں ، جن میں اللہ تعالیٰ کا ذکر کیا جاتا ہے ۔