مجمع الزوائد ومنبع الفوائد

سیدنا ابودرداء رضی اللہ عنہ بیان کرتے ہیں : میں نے اللہ کے رسول سیدنا ابوالقاسم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اللہ تعالیٰ نے یہ ارشاد فرمایا : اے عیسیٰ ! میں تمہارے بعد ایک امت بھیجوں گا اگر انہیں وہ چیز نصیب ہو گی جسے وہ پسند کرتے ہوں ، تو وہ اس بات پر حمد کریں گے اور شکر کریں گے اور اگر انہیں وہ صورتحال لاحق ہو جسے وہ ناپسند کرتے ہوں تو وہ اس بارے میں ثواب کی امید رکھیں گے اور صبر سے کام لیں گے ، حالانکہ ان میں حلم اور علم نہیں ہو گا ، سیدنا عیسیٰ علیہ السلام نے عرض کی : اے میرے پروردگار ! انہیں یہ چیز کیسے نصیب ہو گی ؟ جبکہ نہ حلم ہو گا اور نہ علم ہو گا ؟ اللہ تعالیٰ نے فرمایا : میں اپنے حلم اور اپنے علم میں سے اُنہیں عطا کروں گا ۔ “
یہ روایت امام أحمد اور امام بزار نے ، امام طبرانی نے معجم کبیر اور معجم اوسط میں نقل کی ہے ، امام أحمد کے رجال صحیح کے رجال ہیں صرف حسن بن سوار اور ابوحلبس یزید بن میسرہ کا معاملہ مختلف ہے اور یہ دونوں بھی ثقہ ہیں ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میں انبیاء کرام میں سے تم لوگوں کا حصہ ہوں اور تم لوگ اُمتوں میں سے میرا حصہ ہو ۔ “
یہ روایت امام بزار نے نقل کی ہے اور اس کے رجال ” صحیح “ کے رجال ہیں صرف ابوحبیبہ طائی کا معاملہ مختلف ہے ، امام ترمذی نے اس کی نقل کردہ ایک حدیث کو صحیح قرار دیا ہے ، اور ابن حبان میں اس کا ذکر کتاب الثقات میں کیا ہے ۔

سیدنا عمار بن یاسر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت کی مثال بارش کی مانند ہے ، یہ پتہ نہیں چلتا کہ اُس کا ابتدائی حصہ زیادہ بہتر ہے ؟ یا آخری حصہ ؟ “” “” ۔
یہ روایت امام أحمد ، امام بزار اور امام طبرانی نے نقل کی ہے ، امام بزار کے رجال ” صحیح “ کے رجال ہیں ، صرف حسن بن قزعہ اور عبید بن سلیمان اغر کا معاملہ مختلف ہے ، اور یہ دونوں ثقہ ہیں ، عبید کے بارے میں ایسا اختلاف پایا جاتا ہے ، جو نقصان دہ نہیں ہے ۔

سیدنا عمار رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت کی مثال بارش کی مانند ہے ، اللہ تعالیٰ نے اس کے ابتدائی حصے میں بھی بھلائی رکھی ہے ، اور اس کے آخری حصے میں بھی بھلائی رکھی ہے ۔ “
یہ روایت امام طبرانی نے نقل کی ہے ، اس کی سند میں ایک راوی موسیٰ بن عبیدہ ربذی ہے اور وہ ضعیف ہے ۔

سیدنا عمران بن حصین رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت کی مثال بارش کی مانند ہے ، یہ پتا نہیں چلتا کہ اس کا ابتدائی حصہ زیادہ بہتر ہے ؟ یا آخری حصہ ؟ “ ۔
یہ روایت امام بزار نے اور امام طبرانی نے معجم اوسط میں نقل کی ہے ، امام بزار کی سند حسن ہے ، وہ کہتے ہیں : نبی اکرم صلی اللہ علیہ وسلم کے حوالے سے اس سے زیادہ عمدہ سند کے ساتھ روایت نقل نہیں کی گئی ۔

سیدنا عبداللہ بن عمر رضی اللہ عنہما ، نبی اکرم صلی اللہ علیہ وسلم کا یہ فرمان نقل کرتے ہیں : ” میری امت کی مثال بارش کی مانند ہے ، یہ پتا نہیں چلتا کہ اس کا ابتدائی حصہ زیادہ بہتر ہے یا آخری حصہ ؟ “ ۔
یہ روایت امام طبرانی نے نقل کی ہے ، اس کی سند میں ایک راوی عبید بن میمون ہے اور وہ متروک ہے ۔

سیدنا عبداللہ بن عمرو نبی اکرم صلی اللہ علیہ وسلم کا یہ فرمان نقل کرتے ہیں : ” میری امت کی مثال بارش کی مانند ہے ، یہ پتا نہیں چلتا کہ اس کا ابتدائی حصہ زیادہ بہتر ہے ؟ یا آخری حصہ ؟ “ ۔
یہ روایت امام طبرانی نے نقل کی ہے ، اس کی سند میں ایک راوی عبدالرحمن بن زیاد بن انعم ہے اور وہ ضعیف ہے ۔

سیدنا حذیفہ رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم کافی دیر تک تشریف نہیں لائے ، یہاں تک کہ جب ہم نے یہ گمان کیا کہ اب آپ صلی اللہ علیہ وسلم تشریف نہیں لائیں گے ، تو آپ صلی اللہ علیہ وسلم تشریف لے آئے اور آپ صلی اللہ علیہ وسلم نے سجدہ کیا ، یہاں تک کہ ہم نے یہ گمان کیا کہ شاید اس سجدے میں آپ کی جان قبض ہو گئی ہے ، جب آپ صلی اللہ علیہ وسلم نے سر اٹھایا تو آپ صلی اللہ علیہ وسلم نے ارشاد فرمایا :
” میرے پروردگار نے میری امت کے بارے میں مجھ سے مشورہ لیا کہ میں اُن کے ساتھ کیا کروں ؟ تو میں نے عرض کی : اے میرے پروردگار ! تو جو چاہے کرے ، وہ تیری مخلوق ہیں اور تیرے بندے ہیں ، پروردگار نے دوسری مرتبہ مجھ سے مشورہ لیا تو میں نے یہی بات عرض کی ، پروردگار نے فرمایا : اے محمد ! تمہاری امت کے بارے میں ہم تمہیں غمگین نہیں کریں گے ۔ “
( نبی اکرم صلی اللہ علیہ وسلم نے فرمایا ) ” پروردگار نے مجھے یہ بتایا : میری امت میں سب سے پہلے جنت میں داخل ہونے والی ستر ہزار افراد ہوں گے جن میں سے ہر ایک ہزار کے ہمراہ ، مزید ستر ہزار ہوں گے ، اور ان سے کوئی حساب نہیں لیا جائے گا ۔ “
پھر اُس ( پروردگار ) نے مجھے پیغام بھیجا اور فرمایا :
” تم دعا مانگو ! وہ قبول ہو گی ، تو مانگو ! تمہیں دیا جائے گا ، تو میں نے اس کے قاصد سے کہا: کیا میں جو مانگوں گا ؟ میرا پروردگار مجھے وہ دے گا ؟ قاصد نے کہا: اس نے مجھے آپ کی طرف اسی لیے بھیجا ہے تاکہ وہ آپ کو وہ چیز دے ( یعنی جو آپ مانگیں گے ) نبی اکرم صلی اللہ علیہ وسلم نے فرمایا : تو میں یہ بات فخر کے اظہار کے لئے نہیں کہہ رہا ، میرے پروردگار نے یہ چیز مجھے عطا کی : کہ اس نے میرے گزشتہ اور آئندہ ذنب کی مغفرت کر دی ، اور اب میں زندہ اور صحیح ہونے کے طور پر چلتا ہوں ، اور اس نے مجھے یہ چیز عطا کی کہ میری اُمت بھوک کا شکار نہیں ہو گی ، اور وہ مغلوب نہیں ہو گی ، اور اس نے مجھے کوثر عطا کی ، یہ جنت کی نہر ہے ، جو بہتی ہوئی میرے حوض میں آتی ہے ۔
اور اس نے مجھے غلبہ مدد اور رعب عطا کیا ، جو میری اُمت کے آگے ایک مہینے کی مسافت تک ہو گا ، اور اس نے مجھے یہ چیز عطا کی کہ میں انبیاء کرام میں سے ، جنت میں سب سے پہلے داخل ہوؤں گا اور اس میں میرے لئے اور میری اُمت کے لیے مال غنیمت کو پاکیزہ ( یعنی حلال ) قرار دیا اور اس نے ہمارے لیے بہت سی ایسی چیزوں کو حلال قرار دیا ، جن کے حوالے سے اُس نے ہم سے پہلے لوگوں پر سختی کی تھی ، اور اس نے ہم پر حرج کو لازم قرار نہیں دیا ۔ “
یہ روایت امام أحمد نے نقل کی ہے اور اس کی سند حسن ہے ۔

سیدنا حذیفہ بن اسید رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” گزشتہ رات میرے سامنے اس حجرے میں میری اُمت کو پیش کیا گیا ، یہاں تک کہ میں اُن میں سے ہر ایک شخص کو اس سے زیادہ بہتر طور پر پہچان گیا ، جتنا تم میں سے کوئی ایک اپنے ساتھی کو پہچانتا ہے ، حاضرین میں سے ایک صاحب بولے : یا رسول اللہ ! یہ تو آپ کے سامنے وہ لوگ پیش کیے گئے جو اُن میں سے پیدا ہو چکے ہیں ، تو ان کے بارے میں آپ کی کیا رائے ہے ؟ جو ابھی پیدا نہیں ہوئے ہیں ، نبی اکرم صلی اللہ علیہ وسلم نے فرمایا : اُن کی شکلیں میرے سامنے پیش کی گئیں ، اس ذات کی قسم ! جس کے دست قدرت میں میری جان ہے ، میں ان میں سے کسی شخص کو اُس سے زیادہ بہتر طور پر پہچان گیا ، جتنا کوئی شخص اپنے ساتھی کو پہچانتا ہے ۔ “
یہ روایت امام طبرانی نے نقل کی ہے ، اس کی سند میں ایک راوی زیاد بن منذر ہے اور وہ کذاب ہے ۔

سیدنا حذیفہ رضی اللہ عنہ بیان کرتے ہیں : نبی اکرم صلی اللہ علیہ وسلم کے سامنے آپ کی اُمت کو پیش کیا گیا ، میں آپ کے پیچھے کھڑا ہوا تھا ، جب آپ فارغ ہوئے اور میری طرف متوجہ ہوئے تو آپ صلی اللہ علیہ وسلم نے فرمایا : تم یہاں تھے ؟ کیا تم نے سنا ؟ میں نے عرض کی : جی ہاں !
یہ روایت امام بزار نے نقل کی ہے ، اس کی سند میں ایک راوی زکریا بن یحیی ہے اور وہ متروک ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” زمین میں میری امت کی تعداد کنکریوں کی تعداد ۔ ( راوی کو شک ہے ، یا شاید یہ الفاظ ہیں : ) ۔ بارش کے قطروں کی تعداد سے زیادہ ہو گی ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سوید بن ابراہیم ابوحاتم ہے اور وہ ضعیف ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” ہر امت کا کچھ حصہ جہنم میں جائے گا اور کچھ حصہ جنت میں جائے گا ، البتہ میری امت کا معاملہ مختلف ہے ، وہ سب جنت میں جائیں گے ۔ “
یہ روایت امام طبرانی نے معجم صغیر اور معجم اوسط میں نقل کی ہے ، اس کی سند میں ایک راوی أحمد بن محمد بن حجاج بن رشدین ہے ، اور وہ ضعیف ہے ۔

سیدنا انس بن مالک رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میری امت ، امت مرحومہ ہے ، ان پر فضل کیا جائے گا ، وہ اپنے گناہوں کے ہمراہ اپنی قبروں میں داخل ہوں گے ، اور جب وہ اپنی قبروں سے نکلیں گے تو ان پر کوئی گناہ نہیں ہو گا ، اہل ایمان کے ، ان کے لیے دعائے مغفرت کی وجہ سے ، اُن کے گناہوں کو ختم کر دیا جائے گا ۔ “
یہ روایت امام طبرانی نے معجم اوسط میں اپنے استاد أحمد بن طاہر بن حرملہ کے حوالے سے نقل کی ہے ، اور وہ کذاب ہے ۔

سیدنا عمر بن خطاب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جنت انبیاء کرام کے لیے اُس وقت تک حرام ہے جب تک ” میں “ اُس میں داخل نہیں ہو جاتا اور دوسری امتوں کے لیے ، اُس وقت تک حرام ہے ، جب تک میری امت اُس میں داخل نہیں ہو جاتی ۔ “
یہ روایت امام طبرانی نے معجم اوسط میں نقل کی ہے ۔ اس کی سند ہیں ایک راوی صدقہ بن عبداللہ سمین ہے ، جسے ابوحاتم اور دیگر حضرات نے ثقہ قرار دیا ہے ، اور ایک جماعت نے اسے ضعیف کہا: ہے اس روایت کی سند حسن ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جنت تمام امتوں کے لیے حرام ہے ، جب تک ” میں “ اور میری امت یکے بعد دیگرے اُس میں داخل نہیں ہو جاتے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی خارجہ بن مصعب ہے اور وہ متروک ہے ۔

سیدنا عبداللہ بن عبدیمانی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اگر میں قسم اٹھا لوں تو میں سچا ہوؤں گا کہ میری اُمت سے پہلے کوئی جنت میں داخل نہیں ہو گا ۔ “
یہ روایت امام طبرانی نے نقل کی ہے ۔ اس کی سند میں ایک راوی بقیہ ہے اور وہ ثقہ ہے لیکن وہ مدلس ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے اپنی امت کے لئے دعا کرتے ہوئے کہا: ” اے اللہ ! تو ان کے دلوں کو اپنی فرمانبرداری کی طرف لے آ ! اور اُن کے بعد والوں کو اپنی رحمت کے ذریعے گھیر لے ۔ “
یہ روایت امام طبرانی نے نقل کی ہے اور اس کی سند میں ایک راوی ابوشیبہ ہے اور وہ ضعیف ہے ۔

سیدنا سمرہ بن جندب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں :
” امتوں میں سے ایک امت کے لئے یہ مثال بیان کی گئی ہے کہ اُن کی مثال ایسے مزدوروں کی مانند ہے ، جنہیں کوئی شخص مزدور رکھتا ہے کہ وہ مزدور سارا دن اس کے لئے کام کریں گے اور وہ ان مزدوروں کو ایک ایک قیراط دے گا ، پھر وہ مزدور کام کرنا شروع کرتے ہیں یہاں تک کہ جب دوپہر ہوتی ہے تو وہ تھک جاتے ہیں ، وہ اس شخص سے کہتے ہیں تم ہمارے ساتھ حساب کر لو ! وہ ان کے ساتھ حساب کرتا ہے تو ان مزدوروں کے حصے میں نصف قیراط آتا ہے ، وہ شخص یہ کہتا ہے : کون رات تک میرے لیے کام کرے گا اسے ایک ایک قیراط دیا جائے گا ، تو کچھ دوسرے لوگ اس کے ساتھ سودا طے کر لیتے ہیں اور کام کرتے رہتے ہیں ، یہاں تک کہ جب عصر کی نماز کے قریب کا وقت ہوتا ہے تو وہ تھک جاتے ہیں اور یہ کہتے ہیں : تم ہمارے ساتھ حساب کر لو وہ ان کے ساتھ حساب کرتا ہے ، تو ان لوگوں کو نصف ، نصف قیراط ملتا ہے ۔
وہ شخص یہ چاہتا ہے کہ رات ہونے سے پہلے اُس کا کام پورا ہو جائے ، تو وہ ایک قوم کو مزدور رکھتا ہے ، اس شرط پر کہ وہ باقی رہ جانے والا کام اُسے رات تک مکمل کر دیں اور انہیں دو دو قیراط ملیں گے ، نبی اکرم صلی اللہ علیہ وسلم نے فرمایا : مجھے امید ہے ، اگر اللہ نے چاہا تو تم لوگ دو دو قیراط وصول کرنے والے ہوؤ گے ( یعنی تم لوگ عمل تھوڑا کرو گے اور اللہ تعالیٰ کی بارگاہ سے تمہیں زیادہ اجر و ثواب حاصل ہو گا ) ۔ “
یہ روایت امام طبرانی نے نقل کی ہے اور اس کی سند میں ایسے راوی ہیں ، جن سے میں واقف نہیں ہوں ۔

سیدنا ابومالک اشعری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم اُمت مرحومہ ہو ، جس کو معاف کیا گیا ہے ، تو تم لوگ ٹھیک رہو اور معاملے کی طاقت کو پکڑو ۔ “
یہ روایت امام طبرانی نے نقل کی ہے اس کی سند میں ایک راوی عبدالوہاب بن لاحق ہے اور وہ کذاب ہے ۔

سلیمان بن داؤد خولانی بیان کرتے ہیں : میں نے عمر بن عبدالعزیز کو ابوبردہ سے یہ کہتے ہوئے سنا : آپ ہمیں کوئی ایسی حدیث بیان کیجئے ! جس میں آپ کے اور آپ کے والد کے درمیان کوئی اور واسطہ نہ ہو ، تو ابوبردہ نے بتایا : میں نے اپنے والد ( یعنی سیدنا ابوموسی اشعری رضی اللہ عنہ ) کو یہ بیان کرتے ہوئے سنا ہے : وہ کہتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میری امت پاک ، برکت والی اور رحم یافتہ ہے ، قیامت کے دن ان پر عذاب نہیں ہو گا ، اُن کا عذاب دنیا میں اُن کے درمیان فتنوں کے ذریعے ہو گا ۔ “
یہ روایت امام طبرانی نے دو اسناد کے حوالے سے نقل کی ہے ، ان میں سے ایک میں ایک شخص قاسم ہے جو حمص کا رہنے والا ہے اور میں اس سے واقف نہیں ہوں ، اس روایت کے رجال ” صحیح “ کے رجال ہیں ، صرف عمرو بن قیس سکونی کا معاملہ مختلف ہے اور وہ ثقہ ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” چال چلن اور طور طریقوں کے حوالے سے تم بنی اسرائیل کے ساتھ سب سے زیادہ مشابہت رکھنے والی امت ہو ۔ “
یہ روایت امام بزار نے نقل کی ہے ، اس کی سند میں ایک راوی لیث بن ابوسلیم ہے اور وہ مدلس ہے ، اس روایت کے بقیہ رجال ” صحیح “ کے رجال ہیں ۔

سیدنا ابوموسی رضی اللہ عنہ بیان کرتے ہیں : قیامت کے دن جب اللہ تعالیٰ مخلوقات کو جمع کرے گا ، تو سیدنا محمد صلی اللہ علیہ وسلم کی امت کو سجدہ کرنے کی اجازت دے گا ، تو وہ لوگ اس کی بارگاہ میں طویل سجدہ کریں گے ، پھر ان سے کہا: جائے گا : تم لوگ اپنے سر اٹھاؤ ! کیونکہ ہم نے تمہاری تعداد جتنے لوگوں کو جہنم سے تمہارا فدیہ قرار دیدیا ہے ۔
یہ روایت امام طبرانی نے نقل کی ہے ، اس کی سند میں ایک راوی عبدالاعلیٰ بن ابوالمساور ہے اور وہ متروک ہے ۔

سیدنا ابوموسی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اہل جنت کی ایک سو بیس صفیں ہوں گی اور اُن میں سے میری امت کی 80 صفیں ہوں گی ۔ “
یہ روایت امام طبرانی نے نقل کی ہے اس کی سند میں ایک راوی قاسم بن غصن ہے اور وہ ضعیف ہے ۔ میں یہ کہتا ہوں : اس بارے میں بقیہ احادیث ، جنت کی صفت سے متعلق باب میں آگے آئیں گی ، جن میں اس امت سے تعلق رکھنے والے بکثرت افراد کے جنت میں داخل ہونے کا ذکر ہو گا ، اگر اللہ نے چاہا ۔