مجمع الزوائد ومنبع الفوائد

سیدہ ام سلمہ رضی اللہ عنہا بیان کرتی ہیں : وصال کے قریب نبی اکرم صلی اللہ علیہ وسلم نے ارشاد فرمایا : ” مصر کے قبطیوں کے بارے میں اللہ سے ڈرتے رہنا ، اللہ سے ڈرتے رہنا ، عنقریب تم ان لوگوں پر غالب آ جاؤ گے اور وہ لوگ تمہاری تعداد میں اضافے کا باعث بنیں گے اور اللہ کی راہ میں تمہارے مددگار بن جائیں گے ۔ “
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ۔

سیدنا کعب بن مالک رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جب مصر فتح ہو جائے تو تم قبطیوں کے بارے میں بھلائی کی تلقین کو قبول کرو ! کیونکہ ان کے ساتھ خون اور رحم کا رشتہ ہے ۔ “

ایک روایت میں یہ الفاظ ہیں : ” ان کے لیے ذمہ ہو گا ۔ “ نبی اکرم صلی اللہ علیہ وسلم کی مراد یہ تھی کہ سیدنا اسماعیل علیہ السلام کی والدہ کا تعلق اُن سے ہے ۔
یہ روایت امام طبرانی نے دو اسناد کے ساتھ نقل کی ہے ان دونوں میں سے ایک کے رجال ” صحیح “ کے رجال ہیں ۔

ابوہانی حمید بن ہانی بیان کرتے ہیں : انہوں نے سیدنا ابوعبدالرحمن خولی رضی اللہ عنہ ، جن کا نام عبداللہ بن یزید ہے ، اور سیدنا عمرو بن حریث رضی اللہ عنہ اور ان دونوں کے علاوہ دیگر افراد کو یہ بیان کرتے ہوئے سنا ہے : نبی اکرم صلی اللہ علیہ وسلم نے ارشاد فرمایا ہے : ” عنقریب تم ایسے لوگوں کے پاس جاؤ گے جن کے سر گھنگریالے بالوں والے ہوں گے ، تم ان کے بارے میں بھلائی کی تلقین قبول کرو ! کیونکہ وہ تمہارے لیے اللہ کے اذن کے تحت قوت بن جائیں گے اور تمہیں دشمن تک پہنچانے کا ذریعہ بن جائیں گے ۔ “ نبی اکرم صلی اللہ علیہ وسلم کی مراد مصر کے قبطی تھے ۔
یہ روایت امام ابویعلیٰ نے نقل کی ہے اور اس کے رجال ” صحیح“ کے رجال ہیں ۔

سیدنا رباح لخمی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک مصر عنقریب فتح ہو جائے گا ، تم وہاں سے بھلائی حاصل کرنا ، لیکن تم اسے رہائش گاہ نہ بنا لینا کیونکہ اس کی طرف اُن لوگوں کو لے کر جایا جائے گا ، جن کی عمریں کم ہوں گی ۔ “
یہ روایت امام طبرانی نے معجم کبیر میں نقل کی ہے ، اس کی سند میں ایک راوی مطہر بن ہیثم ہے ابوسعید بن یونس کہتے ہیں : وہ متروک الحدیث ہے ۔