مجمع الزوائد ومنبع الفوائد

شریح بن عبید بیان کرتے ہیں : سیدنا علی رضی اللہ عنہ کے سامنے اہل شام کا ذکر کیا گیا ، سیدنا علی رضی اللہ عنہ اس وقت عراق میں تھے ، لوگوں نے کہا: اے امیر المؤمنین ! آپ ان پر لعنت کیجئے ، تو سیدنا علی رضی اللہ عنہ نے ارشاد فرمایا : جی نہیں ! میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ابدال شام میں ہوں گے ، وہ چالیس افراد ہوں گے ، جب ان میں سے کوئی ایک فرد انتقال کر جائے گا ، تو اللہ تعالیٰ اس کی جگہ دوسرے فرد کو لے آئے گا ، اُن کی وجہ سے بارش نازل ہو گی ، اُن کے وسیلے سے دشمن کے خلاف مدد مانگی جائے گی اور اُن کی وجہ سے اہل شام سے عذاب کو پھیر دیا جائے گا ۔ “
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ، صرف شریح بن عبید کا معاملہ مختلف ہے اور وہ ثقہ ہیں انہوں نے سیدنا مقداد رضی اللہ عنہ سے سماع کیا ہے اور سیدنا مقداد رضی اللہ عنہ کا انتقال سیدنا علی رضی اللہ عنہ سے پہلے ہو گیا تھا ۔

سیدنا عبادہ بن صامت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ابدال اس امت میں ہوں گے ، وہ تیس افراد ہوں گے ، وہ سیدنا خلیل الرحمن علیہ السلام کی مانند ہوں گے ، جب ان میں سے کوئی فرد فوت ہو جائے گا تو اللہ تعالیٰ اس کی جگہ دوسرا فرد لے آئے گا ۔ “
یہ روایت امام أحمد نے نقل کی ہے اور اس کے رجال ” صحیح “ کے رجال ہیں صرف عبدالواحد بن قیس کا معاملہ مختلف ہے اسے عجلی اور ابوزرعہ نے ثقہ قرار دیا ہے ، اور ان دونوں کے علاوہ لوگوں نے اسے ضعیف کہا: ہے ۔

سیدنا عبادہ بن صامت رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت میں مسلسل 30 افراد ایسے رہیں گے جن کی وجہ سے زمین قائم رہے گی اور اُن کے وسیلے سے بارش نازل کی جائے گی اور ان کے وسیلے سے مدد کی جائے گی ۔ “ قتادہ کہتے ہیں : مجھے یہ امید ہے کہ حسن اُن لوگوں میں سے ایک ہیں ۔
یہ روایت امام طبرانی نے عمرو بزار کے حوالے سے عنبسہ خواص سے نقل کی ہے اور میں ان دونوں سے واقف نہیں ہوں ، اس روایت کے بقیہ رجال ” صحیح “ کے رجال ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” زمین ایسے 40 افراد سے خالی نہیں ہو گی ، جو سیدنا خلیل الرحمن علیہ السلام کی مانند ہوں گے ، ان کی وجہ سے تم لوگوں کو سیراب کیا جائے گا ان کی وجہ سے تمہاری مدد کی جائے گی ، جب ان میں سے کوئی ایک فرد فوت ہو گا ، تو اللہ تعالیٰ اس کی جگہ دوسرا لے آئے گا ۔ “ سعید نامی راوی کہتے ہیں : میں نے قتادہ کو یہ کہتے ہوئے سنا ہے : ہمیں اس بارے میں کوئی شک نہیں ہے کہ حسن ان لوگوں میں سے ایک ہیں ۔
یہ روایت امام طبرانی نے معجم اوسط میں نقل کی ہے اور اس کی سند حسن ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت میں ہر وقت چالیس ایسے افراد ہمیشہ رہیں گے جن کے دل سیدنا ابراہیم علیہ السلام کے دل کی مانند ہوں گے ، اللہ تعالیٰ اُن کی وجہ سے اہل زمین سے ( عذاب وغیرہ کو ) پرے کرے گا ، انہیں ابدال کہا: جائے گا ۔ “ نبی اکرم صلی اللہ علیہ وسلم نے ارشاد فرمایا : وہ لوگ نماز یا روزہ یا صدقہ کی وجہ سے اس مقام تک نہیں پہنچیں گے ، لوگوں نے عرض کی : یا رسول اللہ ! پھر وہ کسی وجہ سے اس مقام تک پہنچیں گے ؟ نبی اکرم صلی اللہ علیہ وسلم نے ارشاد فرمایا : ” سخاوت کی وجہ سے اور مسلمانوں کی خیرخواہی کی وجہ سے ( وہ اس مقام تک پہنچیں گے ) ۔ “
یہ روایت امام طبرانی نے نقل کی ہے ، انہوں نے اسے ثابت بن عیاش احدب کے حوالے سے ابورجاء کلبی سے نقل کیا ہے اور میں ان دونوں سے واقف نہیں ہوں ، اس روایت کے بقیہ رجال صحیح کے رجال ہیں ۔

شہر بن حوشب بیان کرتے ہیں : جب مصر فتح ہوا اور لوگوں نے اہل شام کو قیدی بنا لیا ، تو سیدنا عوف بن مالک رضی اللہ عنہ نے اپنی ٹوپی میں سے اپنا سر باہر نکالا اور پھر یہ فرمایا : اے اہل مصر ! تم اہل شام کو برا نہ کہو ! کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ان میں ” ابدال “ ہوتے ہیں ، ان کی وجہ سے تمہاری مدد کی جاتی ہے ، اور ان کی وجہ سے تمہیں رزق دیا جاتا ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی عمرو بن واقد ہے جسے جمہور ائمہ نے ضعیف قرار دیا ہے ، محمد بن مبارک صوری نے اسے ثقہ کہا: ہے ، اس میں ایک راوی شہر ہے جس کے بارے میں اختلاف پایا جاتا ہے اس روایت کے بقیہ رجال ” ثقہ “ ہیں ۔