مجمع الزوائد ومنبع الفوائد

حمرہ بن عبدکلال بیان کرتے ہیں : سیدنا عمر رضی اللہ عنہ شام کی طرف ، اپنے پہلے سفر کے موقع پر ، شام جانے کے لیے روانہ ہوئے ، جب وہ شام کے قریب پہنچے تو انہیں اور ان کے ساتھیوں کو یہ اطلاع ملی کہ شام میں طاعون پھیل چکا ہے ، ان کے ساتھیوں نے ان سے کہا: آپ واپس چلیں اور شام میں داخل نہ ہوں ، اگر آپ شام گئے اور وہاں طاعون ہوا ، تو پھر ہم نہیں سمجھتے کہ آپ وہاں سے واپس آ پائیں گے ، تو سیدنا عمر رضی اللہ عنہ مدینہ منورہ کی طرف واپس مڑ گئے ، اس رات انہوں نے رات کے آخری حصہ میں پڑاؤ کیا ، میں اس وقت ان کے سب سے زیادہ قریب تھا ، جب وہ اُٹھے تو میں بھی ان کے پیچھے اُٹھا ، میں نے انہیں یہ کہتے ہوئے سنا : کہ جب میں شام کے قریب پہنچ چکا تھا تو ان لوگوں نے مجھے وہاں سے واپس کروا دیا ، کیونکہ وہاں طاعون موجود ہے ، خبردار ! وہاں سے میرا واپس لوٹ جانا ، میری موت کے وقت میں تاخیر نہیں کرے گا ، اور نہ ہی میرا وہاں چلے جانا ، موت کے مخصوص وقت کو جلدی کر دے تا ، خبردار ! میں مدینہ منورہ واپس جانے کے بعد ، ضروری کاموں سے فارغ ہونے کے بعد پھر سفر کروں گا ، اور شام جا کے ٹھہروں گا ، اور پھر میں ” حمص “ میں داخل ہوؤں گا ، کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اللہ تعالیٰ ( قیامت کے دن ) وہاں سے ستر ہزار ایسے افراد کو اُٹھائے گا ، جن سے نہ حساب لیا جائے گا اور نہ انہیں کوئی عذاب ہو گا ، وہ لوگ وہاں کی نرم مٹی میں موجود زیتون ( کے درختوں ) اور اس کی دیواروں کے درمیان سے اُٹھائے جائیں گے ۔ “
یہ روایت امام أحمد نے نقل کی ہے ، اس کی سند میں ایک راوی ابوبکر بن ابومریم ہے اور وہ ضعیف ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عسقلان ، دو دلہنوں میں سے ایک ہے ، وہاں سے قیامت کے دن ستر ہزار ایسے لوگوں کو اٹھایا جائے گا ، جن سے حساب نہیں لیا جائے گا ، اور وہاں سے 50 ہزار شہداء کو اٹھایا جائے گا ، جو وفد کی شکل میں اللہ تعالیٰ کی بارگاہ میں جائیں گے ، اور ان شہداء کی صفیں ہوں گی جن کے سر کٹے ہوئے ہوں گے اور ان کے ہاتھوں میں موجود ہوں گے ، اُن کی رگوں سے خون بہہ رہا ہو گا اور وہ یہ کہیں گے : اے ہمارے پروردگار ! تو ہمیں وہ چیز عطا کر دے جس کا تو نے اپنے رسولوں کے ذریعے ہمارے ساتھ وعدہ کیا تھا ، بے شک تو وعدے کی خلاف ورزی نہیں کرتا ہے ۔ تو پروردگار یہ فرمائے گا : میرے بندوں نے سچ کہا: ہے ، انہیں ” نہر بیضہ “ میں غسل دو ! وہ لوگ جب اُس سے نکلیں گے ، تو صاف ستھرے چمکدار ہوں گے اور پھر وہ جنت میں جہاں چاہیں گے وہاں ٹھہر جائیں گے ۔ “
یہ روایت امام أحمد نے نقل کی ہے ، اس کی سند میں ایک راوی ابوعقال ہلال بن زید بن یسار ہے ، ابن حبان نے اسے ثقہ قرار دیا ہے اور جمہور نے اسے ضعیف کہا: ہے اس روایت کے بقیہ رجال ” ثقہ “ ہیں ۔ اسماعیل بن عیاش نامی راوی کے بارے میں اختلاف پایا جاتا ہے ۔

سیدنا عمر بن خطاب رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو سنا ، ایک دن آپ صلی اللہ علیہ وسلم نے ” اہل مقبرہ “ کا ذکر کیا ، راوی بیان کرتے ہیں : نبی اکرم صلی اللہ علیہ وسلم نے ان لوگوں کے لیے دعائے رحمت کی اور ان کے لیے بکثرت دعائے رحمت کی ، راوی بیان کرتے ہیں : نبی اکرم صلی اللہ علیہ وسلم سے ان کے بارے میں دریافت کیا گیا : تو نبی اکرم صلی اللہ علیہ وسلم نے ارشاد فرمایا : ” اہل مقبرہ ، عسقلان کے شہداء ہیں ، قیامت کے دن انہیں یوں اہتمام کے ساتھ جنت کی طرف لے جایا جائے گا ، جس طرح دلہن کو اس کے شوہر کی طرف لے جایا جاتا ہے ۔ “
یہ روایت امام ابویعلیٰ نے نقل کی ہے اس کی سند میں ایک راوی بشیر بن میمون ہے ، اور وہ متروک ہے ۔

سیدنا عبداللہ بن مالک بن بحینہ رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم اپنے اصحاب کے درمیان تشریف فرما تھے ، اسی دوران آپ صلی اللہ علیہ وسلم نے ارشاد فرمایا : اللہ تعالیٰ اُن مقبرہ والوں پر رحمت نازل کرے ، یہ کلمات آپ صلی اللہ علیہ وسلم نے تین مرتبہ ارشاد فرمائے ، راوی کہتے ہیں : ہمیں اندازہ نہیں ہو پایا کہ نبی اکرم صلی اللہ علیہ وسلم نے کون سے قبرستان کو مراد لیا ہے ؟ نبی اکرم صلی اللہ علیہ وسلم نے اُن کے حوالے سے کوئی نام ذکر نہیں کیا تھا ۔ راوی بیان کرتے ہیں : پھر نبی اکرم صلی اللہ علیہ وسلم کے ایک صحابی نبی اکرم صلی اللہ علیہ وسلم کی ایک زوجہ محترمہ کی خدمت میں حاضر ہوئے ، عطاف نامی راوی کہتے ہیں : مجھے یہ بات بتائی گئی ہے کہ وہ زوجہ محترمہ سیدہ عائشہ صدیقہ رضی اللہ عنہا تھیں ، اُن صحابی نے سیدہ عائشہ رضی اللہ عنہا سے کہا: نبی اکرم صلی اللہ علیہ وسلم نے کسی قبرستان والوں کا ذکر کر کے اُن کے لیے دعائے رحمت کی ہے ، لیکن ہمیں یہ نہیں بتایا کہ وہ کون سا قبرستان ہے ؟ جب نبی اکرم صلی اللہ علیہ وسلم سیدہ عائشہ رضی اللہ عنہا کے ہاں تشریف لائے تو سیدہ عائشہ رضی اللہ عنہا نے نبی اکرم صلی اللہ علیہ وسلم سے اُس قبرستان کے بارے میں دریافت کیا : نبی اکرم صلی اللہ علیہ وسلم نے فرمایا : عسقلان کے قبرستان کے لوگوں ( یعنی وہاں کے بارے میں ، میں نے وہ دعا کی تھی ) ۔
یہ روایت امام ابویعلیٰ اور امام بزار نے نقل کی ہے ، ان کے الفاظ یہ ہیں : نبی اکرم صلی اللہ علیہ وسلم نے عسقلان کے قبرستان والوں کے لئے دعائے مغفرت کی اور اُن کے لیے دعائے رحمت کی ۔ “ امام ابویعلیٰ کی سند میں ایک راوی علی بن عبداللہ بن مالک بن بحینہ ہے اور امام بزار کی سند میں راوی کا نام مالک بن عبداللہ بن بحینہ ہے اور میں ان دونوں سے واقف نہیں ہوں ، اس روایت کے بقیہ رجال ” ثقہ “ ہیں ۔ اس کے بعض راویوں کے بارے میں معمولی سا اختلاف پایا جاتا ہے ۔

سیدنا عبداللہ بن عباس رضی اللہ عنہما بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے عرض کی : یا رسول اللہ ! میں اللہ کی راہ میں جنگ میں حصہ لینا چاہتا ہوں ، نبی اکرم صلی اللہ علیہ وسلم نے فرمایا : ” تم پر شام جانا لازم ہے ، کیونکہ اللہ تعالیٰ نے شام اور اہل شام کے بارے میں مجھے ضمانت دی ہے ، اور تم شام میں ” عسقلان “ میں رہنا ، کیونکہ جب میری امت میں ( فتنوں کی ) چکی گھومے گی ، تو وہاں کے رہنے والے لوگ خیر اور عافیت میں ہوں گے ۔ “
یہ روایت امام طبرانی نے معجم کبیر میں نقل کی ہے ، اور معجم اوسط میں اس کی مانند نقل کی ہے ، تاہم انہوں نے یہ الفاظ نقل کئے ہیں : ” جب میری امت کی چکی گھومے گی تو وہاں کے رہنے والے لوگ خوشحالی اور عافیت میں ہوں گے ۔ “ اس روایت کی سند میں ایک راوی یحیی بن سلیمان مدنی ہے ، اور وہ ضعیف ہے ۔

سیدنا ابوامامہ باہلی رضی اللہ عنہ بیان کرتے ہیں : ایک مرتبہ ہم نبی اکرم صلی اللہ علیہ وسلم کے پاس بیٹھے ہوئے تھے ، لوگوں نے شام کا اور وہاں موجود رومیوں کا ذکر کیا تو نبی اکرم صلی اللہ علیہ وسلم نے ارشاد فرمایا : ” عنقریب تم لوگ شام پر غالب آ جاؤ گے اور تم وہاں کے سمندر میں موجود ایک قلعے میں پہنچو گے ، جس کا نام ” انفۃ “ ہو گا قیامت کے دن ، وہاں سے بارہ ہزار شہیدوں کو اُٹھایا جائے گا ۔ “
یہ روایت امام طبرانی نے نقل کی ہے ، اور اس کی سند میں ایسا راوی ہے ، جس سے میں واقف نہیں ہوں ۔

سیدنا شرحبیل جعفی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جس کے لیے زندگی گزارنا مشکل ہو رہا ہو ، اسے عمان چلے جانا چاہیے ۔ “
یہ روایت امام طبرانی نے نقل کی ہے ، اور اس کی سند میں ایسے راوی ہیں ، جن سے میں واقف نہیں ہوں ۔