مجمع الزوائد ومنبع الفوائد

سیدنا جریر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ابلیس اس بات سے مایوس ہو چکا ہے کہ عرب کی سرزمین پر اس کی عبادت کی جائے ۔ “
یہ روایت امام طبرانی نے نقل کی ہے اس کی سند میں ایک راوی حصین بن عمر احمسی ہے ، جس کو عجلی نے ثقہ قرار دیا ہے اور جمہور نے اسے ضعیف کہا: ہے ، اس روایت کے بقیہ رجال ” صحیح “ کے رجال ہیں ۔

سیدنا ابودرداء رضی اللہ عنہ اور سیدنا عبادہ بن صامت رضی اللہ عنہ بیان کرتے ہیں : نبی اکرم صلی اللہ علیہ وسلم نے ہم سے فرمایا : ” شیطان اس بات سے مایوس ہو چکا ہے کہ جزیرہ عرب میں اُس کی عبادت کی جائے ۔ “
( علامہ ہیثمی فرماتے ہیں : ) میں یہ کہتا ہوں : اس کے بعد انہوں نے پوری حدیث ذکر کی ہے ۔
یہ روایت امام طبرانی نے نقل کی ہے اور اس کی سند حسن ہے ۔

سیدنا معاویہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” حجاز کے دس گھر ، شام میں بیس گھروں سے زیادہ باقی رہنے والے ہیں ۔ “
یہ روایت امام طبرانی نے نقل کی ہے اور اس کی سند میں ایسے راوی ہیں ، جن سے میں واقف نہیں ہوں ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دلوں کی سختی اور مزاج کی تیزی ، اہل مشرق میں ہے اور ایمان یمنی ہے اور سکینت اہل حجاز میں ہے ۔ “
( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اہل حجاز کے تذکرے کے اختصار کے ساتھ منقول ہے ۔
یہ روایت امام بزار نے نقل کی ہے اس کی سند میں ایک راوی ابن ابوزناد ہے ، اس کے بارے میں اختلاف پایا جاتا ہے ، اس روایت کے بقیہ رجال ” صحیح “ کے رجال ہیں ۔

سیدنا عبدالملک بن عباد بن جعفر رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قیامت کے دن میں اپنی اُمت کے جن لوگوں کی سب سے پہلے شفاعت کروں گا وہ اہل مدینہ اہل مکہ اور اہل طائف ہیں ۔ “
یہ روایت امام بزار نے ، امام طبرانی نے معجم کبیر اور معجم اوسط میں نقل کی ہے اور اس کی سند میں ایسے راوی ہیں ، جن سے میں واقف نہیں ہوں ۔ اس سے پہلے کتاب الجہاد میں
یہ روایت گزر چکی ہے کہ جزیرہ عرب سے کافروں کو نکال دیا جائے گا ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” شیطان اس بات سے مایوس ہو چکا ہے کہ جزیرہ عرب میں اُس کی عبادت کی جائے ، لیکن وہ چھوٹی چھوٹی چیزوں سے بھی راضی ہو جائے گا ۔ “
یہ روایت امام بزار نے نقل کی ہے اور اس کی سند حسن ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” شیطان اس بات سے مایوس ہو چکا ہے کہ تمہاری اس سرزمین میں اس کی عبادت کی جائے لیکن وہ تمہاری طرف سے چھوٹی چیزوں سے بھی راضی ہو جائے گا ۔ “
یہ روایت امام بزار نے نقل کی ہے اور اس کے رجال ” صحیح “ کے رجال ہیں ۔

سیدنا عباس بن عبدالمطلب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تحقیق اللہ تعالیٰ نے اس جزیرے کو شرک سے لاتعلق کر دیا ہے تاوقتیکہ ستارے انہیں گمراہ نہ کریں ۔ “
یہ روایت امام بزار نے نقل کی ہے ، امام ابویعلیٰ نے اس کی مانند نقل کی ہے اور امام طبرانی نے اوسط میں نقل کی ہے ، امام ابویعلیٰ کے رجال ” ثقہ “ ہیں ۔

سیده خولہ بنت حکیم رضی اللہ عنہا بیان کرتی ہیں : نبی اکرم صلی اللہ علیہ وسلم باہر تشریف لائے ، آپ نے اپنے دونوں نواسوں کو گود میں اُٹھایا ہوا تھا آپ صلی اللہ علیہ وسلم نے یہ فرمایا : ” اللہ کی قسم ! تم ( یعنی انسان کی اولاد ) بزدل اور کمزور بنا دیتے ہو ، البتہ یہ ہے کہ تم اللہ تعالیٰ کی عطا کئے ہوئے پھول ہو ، اور بے شک آخری روندنا ، جو اللہ تعالی روندے گا وہ ” وج “ کے مقام پر ہو گا ۔ “ ( علامہ ہیثمی فرماتے ہیں : ) میں یہ کہتا ہوں :
یہ روایت امام ترمذی نے نقل کی ہے لیکن انہوں نے اس روایت میں ” وج “ کا ذکر نہیں کیا ہے ۔
یہ روایت امام أحمد اور امام طبرانی نے نقل کی ہے تاہم انہوں نے یہ الفاظ نقل کئے ہیں : وہ آخری روندنا ہو گا ، جو تمام جہانوں کا پروردگار اس کو روند دے گا ۔ “ سفیان نامی راوی کہتے ہیں : نبی اکرم صلی اللہ علیہ وسلم نے جو آخری غزوہ کیا تھا وہ غزوہ طائف تھا ، شاعر نے کہا: ہے : ” میں تم لوگوں کو یوں روند دوں گا ، جس طرح کوئی زخمی روندتا ہے ۔ “ اس روایت کے رجال ثقہ ہیں ، البتہ میرے علم کے مطابق عمر بن عبدالعزیز نامی راوی نے سیدہ خولہ رضی اللہ عنہا سے سماع نہیں کیا ہے ۔

سیدنا یعلی بن مرہ رضی اللہ عنہ بیان کرتے ہیں : ایک مرتبہ سیدنا امام حسن رضی اللہ عنہ اور سیدنا امام حسین رضی اللہ عنہ ( جو اس وقت بچے تھے ) وہ دونوں دوڑتے ہوئے نبی اکرم صلی اللہ علیہ وسلم کی طرف آئے ، تو نبی اکرم صلی اللہ علیہ وسلم نے اُن دونوں کو اپنے ساتھ لپٹا لیا اور یہ ارشاد فرمایا : ” اولاد ( آدمی کو ) کنجوس اور بزدل بنا دیتی ہے اور آخری روندنا ، جو اللہ تعالی روندے گا وہ ” وج “ کے مقام پر ہو گا ۔ “
( علامہ ہیثمی فرماتے ہیں : ) میں یہ کہتا ہوں : یہ روایت امام ابن ماجہ نے نقل کی ہے لیکن انہوں نے ” وج “ کا ذکر نہیں کیا ہے ۔
یہ روایت امام أحمد اور امام طبرانی نے نقل کی ہے ، تاہم انہوں نے یہ الفاظ نقل کئے ہیں : ” وہ آخری روندنا ، جو تمام جہانوں کا پروردگار روندے گا ۔ ۔ ۔ ۔ ۔ ۔ “ ۔ ان دونوں روایات کے رجال ” ثقہ “ ہیں ۔