مجمع الزوائد ومنبع الفوائد

سیده عائشہ رضی اللہ عنہا بیان کرتی ہیں : اُن کے ذمہ سیدنا اسماعیل علیہ السلام کی اولاد میں سے کسی کو آزاد کرنا لازم تھا ، ایک مرتبہ خولان قبیلے کے کچھ قیدی آئے ، سیدہ عائشہ رضی اللہ عنہا نے ان میں سے کسی کو آزاد کرنے کا ارادہ کیا ، تو نبی اکرم صلی اللہ علیہ وسلم نے انہیں منع کر دیا ، پھر مضر قبیلے سے تعلق رکھنے والے ، بنو عنبر سے تعلق رکھنے والے کچھ قیدی آئے ، تو نبی اکرم صلی اللہ علیہ وسلم نے سیدہ عائشہ رضی اللہ عنہا کو یہ ہدایت کی کہ وہ اُن میں سے کسی کو آزاد کر دیں ۔
یہ روایت امام أحمد نے نقل کی ہے ، امام بزار نے اس کی مانند نقل کی ہے ، امام أحمد کے رجال ” صحیح “ کے رجال ہیں ۔

سیدنا عبداللہ بن مسعود رضی اللہ عنہ بیان کرتے ہیں : سیدہ عائشہ رضی اللہ عنہا کے ذمہ سیدنا اسماعیل علیہ السلام کی اولاد میں سے کسی غلام کو آزاد کرنا لازم تھا ” بلعنبر “ قبیلے کے کچھ قیدی آئے ، نبی اکرم صلی اللہ علیہ وسلم نے انہیں حکم دیا کہ وہ ان میں سے کسی کو آزاد کر دیں ، نبی اکرم صلی اللہ علیہ وسلم نے ارشاد فرمایا :
” جس کے ذمہ سیدنا اسماعیل علیہ السلام کی اولاد میں سے کسی کو آزاد کرنا لازم ہو وہ حمیر میں سے کسی کو آزاد نہ کرے ۔ “
علی بن عابس کہتے ہیں : میں نے اسماعیل بن ابوخالد سے دریافت کیا : جمیر کون تھے ؟ تو انہوں نے بتایا : وہ سیدنا اسماعیل علیہ السلام سے بڑے تھے ۔
یہ روایت امام طبرانی نے نقل کی ہے ، امام بزار نے اختصار کے ساتھ ان صحابی کے حوالے سے نقل کی ہے اور ان دونوں روایات کی سند میں ایک راوی علی بن عابس کوفی ہے اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : سیدہ عائشہ رضی اللہ عنہا کے ذمہ سیدنا اسماعیل علیہ السلام کی اولاد میں سے غلام آزاد کرنا لازم تھا ، بنو عنبر سے تعلق رکھنے والے کچھ قیدی آئے ، تو نبی اکرم صلی اللہ علیہ وسلم نے سیدہ عائشہ رضی اللہ عنہا کو یہ ہدایت کی کہ وہ ان میں سے کسی کو آزاد کر دیں ۔ راوی کہتے ہیں : یا شاید اسی مفہوم کے الفاظ ہیں ،
یہ روایت امام بزار نے اپنے استاد أحمد بن عبداللہ بن ابوسفر کے حوالے سے نقل کی ہے ، اور وہ ثقہ ہے ، اس روایت کے رجال ” صحیح “ کے رجال ہیں ۔

سیدنا زبیب بن ثعلبہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جس شخص کے ذمہ سیدنا اسماعیل علیہ السلام کی اولاد میں سے کسی غلام کو آزاد کرنا لازم ہو ، اسے بنو عنبر میں سے کسی کو آزاد کر دینا چاہیے ۔ “
یہ روایت امام طبرانی نے نقل کی ہے ، اس کی سند میں ایک راوی عبداللہ بن زبیب ہے ، جیسا کہ اصل میں مذکور ہے ، لیکن وہ اصل میں عبداللہ مکبر ہے ، جیسا کہ ابن ابوحاتم نے اس کا ذکر کیا ہے ، اور ابن حبان نے اس کا تذکرہ ثقہ تابعین میں کیا ہے ، اس روایت کے بقیہ رجال ” ثقہ “ ہیں ۔

ذؤیب بیان کرتے ہیں : سیدہ عائشہ رضی اللہ عنہا نے عرض کی : یا رسول اللہ ! میں سیدنا اسماعیل علیہ السلام کی اولاد میں سے کسی کو آزاد کرنا چاہتی ہوں ، تو نبی اکرم صلی اللہ علیہ وسلم نے ان سے فرمایا : تم انتظار کرو ! کل جب ہمارے پاس عنبر قبیلے کا مال فے آئے گا ( یعنی پھر تم ایسا کر لینا ) راوی بیان کرتے ہیں : پھر عنبر قبیلے کا مال فے آیا ، نبی اکرم صلی اللہ علیہ وسلم نے سیدہ عائشہ رضی اللہ عنہا سے فرمایا : تم ان میں سے چار افراد وصول کر لو ، جو صبیح و ملیح ہیں ، ان میں سے کسی فرد کو سنبھال کے نہیں رکھا جائے گا ۔
عطاء کہتے ہیں : تو سیدہ عائشہ رضی اللہ عنہا نے میرے دادا ” ردیح “ کو میرے چچازاد ” سمرہ “ کو میرے ایک اور چچازاد ” زخیا “ کو اور میرے ماموں ” زبیب “ کو حاصل کر لیا ، پھر نبی اکرم صلی اللہ علیہ وسلم نے اپنا دست مبارک اُٹھایا ، آپ صلی اللہ علیہ وسلم نے وہ دست مبارک ان لوگوں کے سر پر پھیرا اور اُن کو برکت کی دعاء دی اور ارشاد فرمایا :
” اے عائشہ ! یہ سیدنا اسماعیل علیہ السلام کی اولاد سے تعلق رکھنے والے وہ لوگ ہیں ، جنہیں کثرت کے ساتھ آزاد کیا جائے گا ۔ “
یہ روایت امام طبرانی نے معجم کبیر اور معجم اوسط میں نقل کی ہے ، تاہم اس میں انہوں نے یہ الفاظ نقل کئے ہیں :
” تم چار ایسے افراد حاصل کر لو جو صبیح لڑکے ہوں ۔ ۔ ۔ ۔ ۔ ۔ “ ۔
اس روایت کی سند میں راویوں کی ایک ایسی جماعت ہے ، جن سے میں واقف نہیں ہوں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے بنو تمیم کا ذکر کرتے ہوئے یہ ارشاد فرمایا : ” ان کے سر بڑے ہوتے ہیں ، یہ ثابت قدم ہوتے ہیں ، آخری زمانے میں یہ حق کے مددگار ہوں گے اور دجال کے خلاف سب سے زیادہ سخت قوم ہوں گے ۔ “
یہ روایت امام بزار نے سلام کے حوالے سے ، منصور بن زاذان سے نقل کی ہے اور انہوں نے یہ کہا: ہے : سلام نامی اس راوی کے بارے میں میرا یہ خیال ہے کہ یہ سلام مدائنی ہے اور وہ حدیث میں کمزور ہے ۔

سیدنا ابوہریرہ رضی اللہ عنہ بیان کرتے ہیں : بعض اوقات نبی اکرم صلی اللہ علیہ وسلم میرے کندھے پر ہاتھ مار کر یہ ارشاد فرماتے تھے : ” تم لوگ بنو تمیم سے محبت رکھو ! “ ۔
یہ روایت امام بزار نے نقل کی ہے ، وہ کہتے ہیں :
یہ روایت نبی اکرم صلی اللہ علیہ وسلم سے صرف اس سند کے حوالے سے منقول ہے ، اس سند میں ایک راوی عبیدہ بن عبدالرحمن ہے جس کا ذکر ابن ابوحاتم نے کیا ہے ، کسی نے اس پر جرح نہیں کی ہے اور اس روایت کے بقیہ رجال ” ثقہ “ ہیں ۔

سیدنا ابوامامہ رضی اللہ عنہ بیان کرتے ہیں : ایک مرتبہ ہم نبی اکرم صلی اللہ علیہ وسلم کے ساتھ سفر کر رہے تھے ، ہمارا گزر 100 اونٹوں کے لگ بھگ کے پاس سے ہوا ، نبی اکرم صلی اللہ علیہ وسلم نے دریافت کیا : یہ کن کے ہیں ؟ لوگوں نے بتایا : بنو عنبر کے ہیں ، نبی اکرم صلی اللہ علیہ وسلم نے فرمایا : ” وہ لوگ ہماری قوم ہیں ۔ “
یہ روایت امام طبرانی نے اپنے استاد مقدام بن داؤد کے حوالے سے نقل کی ہے اور وہ ضعیف ہے ، ابن دقیق العید کہتے ہیں : اس کی توثیق کی گئی ہے ، اس روایت کے رجال ” ثقہ “ ہیں ۔

عکرمہ بن خالد بیان کرتے ہیں : ایک مرتبہ ایک شخص نے ان کی موجودگی میں بنو تمیم کو برا بھلا کہا: ، تو عکرمہ نے اپنے ہاتھ میں کنکریاں اُٹھا لیں ، تاکہ وہ اس شخص کو ماریں ، پھر عکرمہ نے بتایا کہ نبی اکرم صلی اللہ علیہ وسلم کے اصحاب سے تعلق رکھنے والے ایک صاحب نے مجھے یہ حدیث بیان کی ہے : ” ایک مرتبہ نبی اکرم صلی اللہ علیہ وسلم کے سامنے تمیم قبیلہ کا ذکر کیا گیا تو ایک شخص نے یہ کہا: بنو تمیم کا یہ قبیلہ اس معاملے میں تاخیر سے کام لے رہا ہے ، تو نبی اکرم صلی اللہ علیہ وسلم نے مزینہ کی طرف دیکھا اور فرمایا : وہ قوم تاخیر کرنے والی نہیں ہو گی ، جن میں یہ لوگ شامل ہوں ۔ راوی کہتے ہیں : ایک مرتبہ ایک شخص نے یہ کہا: بنو تمیم کے لوگ صدقہ لانے میں تاخیر کر رہے ہیں ، اسی دوران بنو تمیم کے سرخ اور سیاہ اونٹ آ گئے ، نبی اکرم صلی اللہ علیہ وسلم نے ارشاد فرمایا : یہ میری قوم کے جانور ہیں ۔ ایک دن ایک شخص نے نبی اکرم صلی اللہ علیہ وسلم کے پاس بنو تمیم پر تنقید کی ، نبی اکرم صلی اللہ علیہ وسلم نے ارشاد فرمایا : تم بنو تمیم کے بارے میں صرف بھلائی کی بات کہو ، کیونکہ دجال کے خلاف اُن کے نیزے سب سے زیادہ لمبے ہوں گے ۔
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ۔