مجمع الزوائد ومنبع الفوائد

حسن بیان کرتے ہیں : سیدنا قیس بن عاصم منقری رضی اللہ عنہ نے مجھے یہ بات بتائی ہے : میں ، نبی اکرم صلی اللہ علیہ وسلم کی خدمت میں حاضر ہوا ، جب آپ نے مجھے ملاحظہ کیا ، تو میں نے آپ کو یہ ارشاد فرماتے ہوئے سنا : ” یہ اونٹ والوں کا سردار ہے ۔ “
یہ روایت امام طبرانی اور امام بزار نے نقل کی ہے ، امام طبرانی کی سند میں ایک راوی زیاد بن ابوزیاد جصاص ہے ، ابن حبان نے اسے ثقہ قرار دیا ہے ، وہ کہتے ہیں : یہ غلطی کر جاتا ہے ، جمہور نے اسے ضعیف کہا: ہے ، امام بزار کی سند میں ایک راوی قاسم بن مطیب ہے اور وہ متروک ہے ۔

سیدنا قیس بن عاصم رضی اللہ عنہ بیان کرتے ہیں : وہ نبی اکرم صلی اللہ علیہ وسلم کی خدمت میں حاضر ہوئے ، نبی اکرم صلی اللہ علیہ وسلم نے انہیں یہ حکم دیا کہ وہ پانی اور بیری کے پتوں کے ذریعے غسل کریں ، پھر نماز کھڑی ہوئی ، تو وہ سیدنا ابوبکر رضی اللہ عنہ اور سیدنا عمر رضی اللہ عنہ کے درمیان آ کر کھڑے ہو گئے ، جب نماز مکمل ہوئی ، تو نبی اکرم صلی اللہ علیہ وسلم نے ارشاد فرمایا : قیس بن عاصم نے مجھ سے تین کلمات کے بارے میں دریافت کیا ہے ، اُن کلمات کے بارے میں اور کسی نے دریافت نہیں کیا ، البتہ ابوبکر کا معاملہ مختلف ہے ۔
( علامہ ہیثمی فرماتے ہیں : ) میں یہ کہتا ہوں : ان کے غسل کرنے کے واقعہ کو امام ابوداؤد اور دیگر حضرات نے روایت کیا ہے ۔
یہ روایت امام طبرانی نے نقل کی ہے ، اس کی سند میں ایک راوی یحیی حمانی ہے اور وہ ضعیف ہے ۔