مجمع الزوائد ومنبع الفوائد

ہارون بن عبدالله حمال بیان کرتے ہیں : یہ سیدنا ابوشریح خزاعی کعب بن عمرو رضی اللہ عنہ ہیں ، ایک قول کے مطابق ان کا نام خویلد بن عمرو ہے اور ایک قول کے مطابق عمرو بن خویلد ہے ۔

سعید مقبری بیان کرتے ہیں : سیدنا ابوشریح رضی اللہ عنہ نے فرمایا : جو شخص مجھے یہ دیکھے کہ میں اپنے سسرالی عزیز کے ساتھ لڑائی کر رہا ہوں ، خواہ وہ میرا سسر بنتا ہو ، یا میں اس کا سسر بنتا ہوؤں ، تو اس وقت میں پاگل ہو گیا ہوؤں گا ، تم میرے سر میں داغ لگانا اور جو شخص ابوشریح کی بکری کا بچہ یا دودھ فروخت ہوتے ہوئے دیکھے ، تو وہ اسے لے سکتا ہے اور جو شخص مجھے دیکھے کہ میں کسی اینٹ کی وجہ سے اپنے پڑوسی کے ساتھ جھگڑا کر رہا ہوں تو میں پاگل ہو گیا ہوؤں گا ، تم میرے سر میں داغ لگانا ۔
راوی کہتے ہیں : اُن کے ایک پڑوسی نے ، جن کا نام عرفجہ تھا ، ان کو آزمایا اور ان کے گھر میں سے دس ہاتھ کا حصہ لے لیا ، تو لوگوں نے ان سے کہا: اے ابوشریح ! اس نے آپ کے گھر میں سے دس ہاتھ کا حصہ لے لیا ہے ، تو انہوں نے فرمایا : وہ زیادہ بہتر جانتا ہے ، بعد میں اُن کے پڑوسی نے وہ جگہ ان کو واپس کر دی اور ان کے حق کی طرف رجوع کر لیا ۔
یہ روایت امام طبرانی نے نقل کی ہے اور اس کی سند حسن ہے ۔

یحیی بن بکیر بیان کرتے ہیں : سیدنا ابوشریح رضی اللہ عنہ کا انتقال ہو گیا ، ان کا نام خویلد تھا ان کا انتقال 68 ہجری میں ہوا ، ان کی وفات کے بارے میں اختلاف پایا جاتا ہے ۔
یہ روایت امام طبرانی نے نقل کی ہے اور اس کی سند منقطع ہے ۔

محمد بن عبداللہ بن نمیر بیان کرتے ہیں : سیدنا ابوشریح خزاعی کعب بن عمرو رضی اللہ عنہ کا انتقال 58 ہجری میں ہوا تھا ۔
یہ روایت امام طبرانی نے نقل کی ہے اور اس کی سند منقطع ہے ۔