مجمع الزوائد ومنبع الفوائد

ایک صحابی بیان کرتے ہیں : نبی اکرم صلی اللہ علیہ وسلم نے اپنے اصحاب سے فرمایا : ” تم میں سے کچھ لوگ ایسے ہیں ، جنہیں میں کچھ نہیں دیتا ہوں ، میں انہیں ان کے ایمان کے سپرد کر دیتا ہوں ، اُن لوگوں میں سے ایک فرات بن حیان ہے ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ، البتہ حارثہ بن مضرب کا معاملہ مختلف ہے اور وہ ثقہ ہے ۔

سیدنا علی بن ابوطالب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میں ، کچھ لوگوں کو ( مال دولت وغیرہ ) دیتا ہوں ، اس طرح میں اُن کی تالیف قلب کرتا ہوں اور کچھ لوگوں کو اس کے سپرد کر دیتا ہوں جو ( ایمان ) اُن کے پاس ہے ( راوی کو شک ہے ، شاید یہ الفاظ ہیں : ) اُس کے سپرد کر دیتا ہوں ، جو اللہ تعالیٰ نے ان کے دلوں میں ( ایمان ) رکھا ہے اور ان لوگوں میں سے ایک فرات بن حیان ہے ۔ “
یہ روایت امام بزار نے نقل کی ہے اس کی سند میں ایک راوی ضرار بن صرد ہے اور وہ ضعیف ہے ۔