مجمع الزوائد ومنبع الفوائد

ابوعبید بیان کرتے ہیں : سیدنا عمران بن حصین رضی اللہ عنہ کا تعلق بنو خزاعہ کی شاخ بنو غاضرہ سے تھا ۔
یہ روایت امام طبرانی نے نقل کی ہے ۔

واقدی بیان کرتے ہیں : یہ سیدنا عمران رضی اللہ عنہ بن حصین بن عبید بن خلف بن عبید بن عبدنہم بن حذافہ بن حممہ بن غاضره بن حبشیہ بن کعب بن عمرو بن خزاعہ ہیں ۔
یہ روایت امام طبرانی نے نقل کی ہے ۔

امام طبرانی بیان کرتے ہیں : عبیداللہ بن محمد نے ہمیں یہ بات بیان کی ہے : سیدنا عمران رضی اللہ عنہ کی کنیت ” ابونجیح “ تھی ، وہ بہت پہلے اسلام قبول کر چکے تھے ، ان کے والد نے بھی اسلام قبول کیا تھا ، انہوں نے نبی اکرم صلی اللہ علیہ وسلم کے ہمراہ کئی غزوات میں حصہ لیا ہے ، یہ مسلسل اپنے علاقے میں رہائش پذیر رہے اور مدینہ منورہ بہت زیادہ آ کر ٹھہرتے تھے ، یہاں تک کہ جب نبی اکرم صلی اللہ علیہ وسلم کا وصال ہو گیا تو یہ بصرہ آ کر ٹھہر گئے اور انتقال کرنے تک یہ وہیں مقیم رہے ، اور وہیں اُن کا انتقال ہوا ، ان کی اولاد بھی ہوئی تھی ۔ ان کی اولاد میں سے خالد بن طلیق بن محمد بن عمران بن حصین ، بصرہ کے قاضی بھی بنے تھے ۔ ایک قول کے مطابق ، ان کے والد سیدنا حصین رضی اللہ عنہ کا مسلمان ہونے کے عالم میں انتقال ہوا تھا ، اور یہ بات بھی منقول ہے کہ وہ مشرک ہونے کے عالم میں فوت ہوئے تھے ، تاہم زیادہ مستند روایت یہ ہے کہ انہوں نے اسلام قبول کیا تھا ۔
یہ روایت امام طبرانی نے نقل کی ہے ۔

بلال بن یساف بیان کرتے ہیں : میں بصرہ میں آیا ، میں مسجد میں داخل ہوا تو وہاں ایک بزرگ موجود تھے جن کے سر اور داڑھی کے بال سفید تھے ، وہ ایک ستون کے ساتھ ٹیک لگا کے بیٹھے ہوئے تھے ، ان کے اردگرد لوگوں کا حلقہ تھا اور وہ ان لوگوں کے ساتھ بات چیت کر رہے تھے ، میں نے دریافت کیا : یہ کون صاحب ہیں ؟ تو لوگوں نے بتایا : یہ سیدنا عمران بن حصین رضی اللہ عنہ ہیں ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

محمد بن سیرین بیان کرتے ہیں : نبی اکرم صلی اللہ علیہ وسلم کے اصحاب میں سے کوئی فرد ( بصرہ میں ) ایسا نہیں آیا ، جسے ہم سیدنا عمران بن حصین رضی اللہ عنہ پر فضیلت دیں ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سفیان بیان کرتے ہیں : بصرہ میں سیدنا عمران بن حصین رضی اللہ عنہ جیسا کوئی فرد نہیں آیا ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ، البتہ امام أحمد نے سفیان ثوری نامی راوی سے سماع نہیں کیا ہے اور اگر سفیان سے مراد سفیان بن عیینہ ہو ، تو ان سے امام أحمد نے سماع کیا ہے ۔

ابواسود دؤلی بیان کرتے ہیں : میں بصرہ آیا وہاں سیدنا ابونجید عمران بن حصین رضی اللہ عنہ موجود تھے ، سیدنا عمر بن خطاب رضی اللہ عنہ نے انہیں اہل بصرہ کی تعلیم و تربیت کے لئے بھیجا تھا ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

حکم بن اعرج بیان کرتے ہیں : سیدنا عمران بن حصین رضی اللہ عنہ فرماتے ہیں : جب سے میں نے دائیں ہاتھ کے ذریعے نبی اکرم صلی اللہ علیہ وسلم کی بیعت کی ہے ، اُس کے بعد میں نے دائیں ہاتھ کے ذریعے کبھی اپنی شرمگاہ کو نہیں چھوا ہے ۔
یہ روایت امام طبرانی نے نقل کی ہے اس کی سند میں ایک راوی عمر بن سہل مازنی ہے ابن حبان نے اسے ثقہ قرار دیا ہے وہ کہتے ہیں یہ بعض اوقات دوسروں کے برخلاف نقل کرتا ہے عقیلی نے اسے ضعیف قرار دیا ہے اس روایت کے بقیہ رجال صحیح کے رجال ہیں ۔

عطاء بن ابومیمونہ ، جو سیدنا عمران بن حصین رضی اللہ عنہ کے غلام ہیں ، وہ بیان کرتے ہیں : سیدنا عمران بن حصین رضی اللہ عنہ کا ایک بھائی زمانہ جاہلیت میں قتل ہوا تھا ، تو انہوں نے اس کے بدلے میں ستر افراد کو قتل کیا تھا ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف ابراہیم بن عطاء نامی راوی کا معاملہ مختلف ہے اور وہ ثقہ ہے ۔

ہارون بن عبدالله حمال بیان کرتے ہیں : سیدنا عمران بن حصین رضی اللہ عنہ کا انتقال 52 ہجری میں ہوا تھا ۔
یہ روایت امام طبرانی نے نقل کی ہے ۔