مجمع الزوائد ومنبع الفوائد

نوفل بن مساحق بیان کرتے ہیں ایک مرتبہ سیدنا عثمان بن حنیف رضی اللہ عنہ سیدنا عمر بن خطاب رضی اللہ عنہ کے ساتھ بات چیت کر رہے تھے ، وہ سیدنا عمر رضی اللہ عنہ کے مقرر کردہ سرکاری اہلکار تھے ان کی کسی بات پر سیدنا عمر رضی اللہ عنہ کو غصہ آ گیا سیدنا عمر رضی اللہ عنہ نے زمین سے مٹھی بھر کنکریاں اُٹھائیں اور وہ ان کو ماریں تو ان میں سے ایک پتھر سیدنا عثمان رضی اللہ عنہ کی پیشانی پر لگا اور وہاں سے خون نکل آیا اور نکل کر ان کی داڑھی پر بہہ گیا سیدنا عمر رضی اللہ عنہ کو اس پر ندامت ہوئی ، انہوں نے کہا: تم اپنی داڑھی سے خون پونچھ لو ! تو سیدنا عثمان بن حنیف رضی اللہ عنہ نے کہا: اے امیر المؤمنین ! یہ چیز آپ کو پریشانی کا شکار نہ کرے ، اللہ کی قسم ! آپ نے مجھے جن لوگوں کے امور کا نگران بنایا تھا ، میں نے ان کے ساتھ اس سے زیادہ سختی کی تھی ، جتنی آپ نے میرے ساتھ کی ہے ۔ راوی کہتے ہیں : تو سیدنا عمر رضی اللہ عنہ کو ان کی یہ بات پسند آئی اور ان کی بھلائی میں اضافہ ہو گیا ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف نوفل بن مساحق کا معاملہ مختلف ہے اور وہ ثقہ ہے ۔