مجمع الزوائد ومنبع الفوائد

سیدنا جریر رضی اللہ عنہ بیان کرتے ہیں جب میں مدینہ منورہ کے قریب پہنچا ، تو میں نے اپنی سواری کو باندھ دیا ، پھر میں نے اپنا تھیلا کھولا اور اپنا عمدہ لباس پہنا ، پھر میں ( مسجد میں ) داخل ہوا ، تو اس وقت نبی اکرم صلی اللہ علیہ وسلم خطبہ ارشاد فرما رہے تھے ، لوگ غور سے میری طرف دیکھنے لگے ، میں نے اپنے ساتھ بیٹھے شخص سے دریافت کیا : اے اللہ کے بندے ! کیا اللہ کے رسول صلی اللہ علیہ وسلم نے میرا ذکر کیا ہے ؟ اس نے بتایا : جی ہاں ! ابھی تھوڑی دیر پہلے عمدہ طریقے سے آپ کا ذکر کیا ہے ، راوی بیان کرتے ہیں : نبی اکرم صلی اللہ علیہ وسلم خطبہ دے رہے تھے ، آپ نے خطبے کے دوران ارشاد فرمایا : ” اس دروازے سے تمہارے سامنے ( راوی کو شک ہے ، شاید یہ الفاظ ہیں : ) اس راستے سے تمہارے سامنے ایک ایسا شخص آئے گا ، جو یمن کے لوگوں میں سب سے بہتر ہو گا ، یاد رکھنا ! اُس کے چہرے پر فرشتے کے ہاتھ پھیرنے کا اثر ہو گا ۔ “ سیدنا جریر رضی اللہ عنہ بیان کرتے ہیں : تو میں نے اس بات پر اللہ تعالیٰ کی حمد بیان کی کہ اس نے مجھے یہ چیز عطا کی ہے ۔
یہ روایت امام أحمد نے اور امام طبرانی نے معجم کبیر اور معجم اوسط میں اختصار کے ساتھ ، ان دونوں کے حوالے سے نقل کی ہے ، امام أحمد کے رجال صحیح کے رجال ہیں ، صرف مغیرہ بن شبل کا معاملہ مختلف ہے اور وہ ثقہ ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تمہارے سامنے یمن کا بہترین فرد آئے گا ، جس پر فرشتے کے ہاتھ پھیرنے کا اثر ہو گا ۔ “ راوی بیان کرتے ہیں : تو سیدنا جریر بن عبداللہ رضی اللہ عنہ سامنے آئے ۔
یہ روایت امام طبرانی نے نقل کی ہے اس کی سند میں ایک راوی محمد بن سائب کلبی ہے اور وہ ضعیف ہے ۔

سیدنا عبداللہ بن ضمرہ رضی اللہ عنہ بیان کرتے ہیں : ایک دن میں نبی اکرم صلی اللہ علیہ وسلم کے پاس صحابہ کرام کی ایک جماعت کے ہمراہ بیٹھا ہوا تھا ، ان میں سے زیادہ تر لوگوں کا تعلق یمن سے تھا ، نبی اکرم صلی اللہ علیہ وسلم نے ان لوگوں سے ارشاد فرمایا : تمہارے سامنے اس گھاٹی سے یمن کا بہترین فرد آئے گا ، تو تمام لوگ یہ توقع رکھنے لگے کہ شاید اس کے گھرانے کا کوئی فرد آ جائے ، تو اسی دوران گھاٹی سے سیدنا جریر بن عبداللہ رضی اللہ عنہ سامنے آئے ، وہ آگے آئے ، یہاں تک کہ انہوں نے نبی اکرم صلی اللہ علیہ وسلم اور آپ کے اصحاب کو سلام کیا ، ان سب لوگوں نے سلام کا جواب دیا پھر نبی اکرم صلی اللہ علیہ وسلم نے اپنی چادر کو بچھایا اور ان سے فرمایا : اے جریر ! اس پر بیٹھ جاؤ ، تو وہ ان لوگوں کے ساتھ کچھ دیر بیٹھے رہے ، پھر وہ اُٹھے اور واپس چلے گئے ، نبی اکرم صلی اللہ علیہ وسلم کے اصحاب نے عرض کی : ہم نے جریر کے لئے آپ کی طرف سے ایک ایسی صورت حال دیکھی ہے ، جو ہم نے کسی کے لئے نہیں دیکھی ، تو نبی اکرم صلی اللہ علیہ وسلم نے ارشاد فرمایا : ” جی ہاں ! یہ اپنی قوم کا معزز فرد ہے اور جب تمہارے پاس کسی قوم کا کوئی معزز فرد آئے ، تو تم اُس کی عزت افزائی کرو ۔ “
یہ روایت امام طبرانی اور امام بزار نے نقل کی ہے ، اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا براء بن عازب رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” اس راستے سے تمہارے سامنے یمن کا بہترین فرد آئے گا ، اس کے چہرے پر فرشتے کے ہاتھ پھیرنے کا اثر ہو گا ۔ “ راوی بیان کرتے ہیں : حاضرین میں سے ہر فرد یہ آرزو کرنے لگا کہ آنے والا شخص اس کے خاندان سے تعلق رکھتا ہو ، اسی دوران ایک سوار ان کے پاس آیا جب وہ نبی اکرم صلی اللہ علیہ وسلم کے پاس پہنچا تو وہ اپنی سواری سے اترا اور وہ نبی اکرم صلی اللہ علیہ وسلم کے پاس آیا ، نبی اکرم صلی اللہ علیہ وسلم نے اس کا ہاتھ پکڑ کے اس کے ساتھ مصافحہ کیا ، اس سے بیعت لی ، نبی اکرم صلی اللہ علیہ وسلم نے دریافت کیا : تم کون ہو ؟ اس نے بتایا : میں جریر بن عبداللہ بجلی ہوں ، نبی اکرم صلی اللہ علیہ وسلم نے اسے اپنے پہلو میں بٹھا لیا ، پھر آپ نے اپنا دست مبارک ان کے سر ، ان کے چہرے اور ان کے سینے اور ان کے پیٹ پر پھیرا ، یہاں تک کہ سیدنا جریر رضی اللہ عنہ شرم کی وجہ سے آگے کی طرف جھک گئے ، انہیں یہ لگا کہ شاید نبی اکرم صلی اللہ علیہ وسلم تہبند کے نیچے اپنا ہاتھ داخل کریں گے ، نبی اکرم صلی اللہ علیہ وسلم اس دوران ان کے لئے اور ان کی اولاد کے لئے برکت کی دعا کرتے رہے ، پھر نبی اکرم صلی اللہ علیہ وسلم نے ان کے سر اور پشت پر ہاتھ پھیرا اور ان کے لئے دعا کی ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی جریر بن ایوب بجلی ہے اور وہ متروک ہے ۔

سیدنا جریر رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، میں نے عرض کی : یا رسول اللہ ! میں ہجرت پر آپ کی بیعت کروں گا ، تو نبی اکرم صلی اللہ علیہ وسلم نے مجھ سے بیعت لی اور مجھ پر یہ شرط لی کہ ہر مسلمان کی خیرخواہی بھی کرنی ہے ، تو میں نے اس بات پر بھی آپ کی بیعت کر لی ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس میں یہ بات مذکور ہے کہ نبی اکرم صلی اللہ علیہ وسلم نے مجھ پر یہ شرط عائد کی کہ ہر مسلمان کی خیرخواہی کرنی ہے ۔
یہ روایت امام طبرانی نے مختلف طرق کے حوالے سے نقل کی ہے ، جن میں سے بعض کے رجال صحیح کے رجال ہیں ۔

سیدنا علی بن ابوطالب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جریر ، ہم اہل بیت میں سے ہے ، جیسے باطن کے لئے ظاہر ہوتا ہے ( یا پیٹ کے لئے پشت ہوتی ہے ) ۔ “ یہ بات آپ صلی اللہ علیہ وسلم نے تین مرتبہ ارشاد فرمائی ۔
یہ روایت امام طبرانی نے نقل کی ہے اور ابوبکر بن حفص نامی راوی نے سیدنا علی رضی اللہ عنہ کا زمانہ نہیں پایا ہے ، سلیمان بن ابراہیم بن جریر نامی راوی کو ثقہ قرار دیتے ہوئے میں نے کسی کو نہیں پایا ہے ، اس روایت کے بقیہ رجال ثقہ ہیں ۔

سیدنا جریر رضی اللہ عنہ بیان کرتے ہیں : جب وفود نبی اکرم صلی اللہ علیہ وسلم کی خدمت میں حاضر ہوتے تھے تو آپ صلی اللہ علیہ وسلم مجھے بلاتے تھے اور میرے حوالے سے ، آپ صلی اللہ علیہ وسلم اُن کے سامنے فخر کا اظہار کرتے تھے ۔
یہ روایت امام طبرانی نے نقل کی ہے ، اس کی سند میں ایک راوی خالد بن عمرو اموی ہے اور وہ متروک ہے ، ابن حبان نے اسے ثقہ قرار دیا ہے ۔

سیدنا جریر بن عبداللہ رضی اللہ عنہ کے صاحبزادے بیان کرتے ہیں : سیدنا جریر بن عبداللہ رضی اللہ عنہ کے جوتے کا سائز ایک ” ذراع “ تھا ۔
یہ روایت عبداللہ نے نقل کی ہے اور سیدنا جریر رضی اللہ عنہ کے صاحبزادے سے میں واقف نہیں ہوں اور اس روایت کے بقیہ رجال صحیح کے رجال ہیں ۔

سلیم ابوہذیل بیان کرتے ہیں : میں سیدنا جریر بن عبداللہ رضی اللہ عنہ کے دروازے پر دربان تھا ، وہ نکلے ، اپنے خچر پر سوار ہوئے اور انہوں نے اپنے غلام کو اپنے پیچھے سوار کروا لیا ۔
یہ روایت امام طبرانی نے نقل کی ہے سلیم نامی راوی اور محمد بن منصور کلبی نامی راوی ، ان دونوں سے میں واقف نہیں ہوں ، اس روایت کے بقیہ رجال ثقہ ہیں ۔