مجمع الزوائد ومنبع الفوائد

امام طبرانی بیان کرتے ہیں : یہ سیدنا عبداللہ بن قیس ، ابوموسی اشعری رضی اللہ عنہ ہیں ، جو آل عتبہ بن عبدشمس کے حلیف تھے ، یہ مکہ میں مسلمان ہوئے تھے ، پھر انہوں نے حبشہ کی سرزمین کی طرف ہجرت کی تھی ، یہاں تک کہ یہ خیبر کے زمانے میں آئے تھے ، یہ بات بیان کی گئی ہے : سیدنا ابوموسیٰ رضی اللہ عنہ کا انتقال 50 ہجری میں ہوا تھا اور انہیں کوفہ سے دو میل کے فاصلے پر موجود جگہ ” توتہ “ کے مقام پر دفن کیا گیا تھا ۔

شباب عصفری بیان کرتے ہیں : سیدنا ابوموسیٰ اشعری رضی اللہ عنہ کوفہ کے گورنر بنے تھے ، وہاں ان کے اہل خانہ تھے اور گھر تھا جو جامع مسجد کے پاس تھا ، سیدنا ابوموسیٰ رضی اللہ عنہ کا انتقال 51 ہجری میں ہوا تھا ۔ ان کے نسب کے بارے میں انہوں نے یہ کہا: ہے : یہ سیدنا ابوموسیٰ عبداللہ بن قیس اشعری رضی اللہ عنہ ہیں ، یہ عبداللہ بن قیس بن حسن بن حرب بن عامر بن تمیم بن بكر بن عامر بن عدی بن وائل بن ناجیہ بن جماہر بن اشعر بن أدد بن عريب بن يشجب بن زید بن کہلان بن سنان بن يشجب بن یغوث بن قحطان ہیں ۔
یہ روایت امام طبرانی نے نقل کی ہے ۔

قیس بن ربیع بن ابوموسیٰ بیان کرتے ہیں : سیدنا ابوموسیٰ اشعری رضی اللہ عنہ کا انتقال 52 ہجری میں ہوا تھا ۔
یہ روایت امام طبرانی نے نقل کی ہے اور اس کی سند میں ایک راوی واقدی ہے اور وہ ضعیف ہے ۔

سعید بن عبدالعزیز بیان کرتے ہیں : سیدنا ابوموسیٰ اشعری رضی اللہ عنہ خیبر سے نبی اکرم صلی اللہ علیہ وسلم کے پاس تشریف لائے ، تو نبی اکرم صلی اللہ علیہ وسلم نے کشتی میں آنے والے ہر بڑے چھوٹے شخص کو دعا دی ، سیدنا ابوعامر رضی اللہ عنہ کہتے ہیں : ” میں کشتی والوں میں سب سے بڑا تھا اور میرا بیٹا سب سے چھوٹا تھا ۔ سعید بیان کرتے ہیں : اس کشتی میں سیدنا ابوعامر رضی اللہ عنہ تھے ، سیدنا ابومالک رضی اللہ عنہ تھے ، سیدنا ابوموسیٰ رضی اللہ عنہ تھے ، سیدنا کعب بن عاصم رضی اللہ عنہ تھے ، یہ لوگ ” ابواء “ کے مقام پر آئے تھے ۔
یہ روایت امام طبرانی نے نقل کی ہے ، یہ سند کے اعتبار سے منقطع ہے اور اس کی سند حسن ہے ۔

ابن اسحاق بیان کرتے ہیں : سیدنا ابوموسیٰ اشعری رضی اللہ عنہ ، ان افراد میں سے ایک ہیں ، جنہوں نے حبشہ کی سرزمین کی طرف ہجرت کی تھی ، یہ وہاں مقیم رہے ، یہاں تک کہ نبی اکرم صلی اللہ علیہ وسلم نے سیدنا عمرو بن امیہ رضی اللہ عنہ کو نجاشی کی طرف بھیجا ، تو نجاشی نے ان لوگوں کو دو کشتیوں میں بھیجا ، تو یہ حدیبیہ کے بعد غزوہ خیبر کے قریب نبی اکرم صلی اللہ علیہ وسلم کے پاس آئے تھے ۔
یہ روایت امام طبرانی نے نقل کی ہے اور یہ سند کے اعتبار سے منقطع ہے ابن اسحاق تک اس کے رجال ثقہ ہیں ۔

ابن بریدہ نے اپنے والد کا یہ بیان نقل کیا ہے : سیدنا بریدہ رضی اللہ عنہ رات کے وقت نکلے ، اُن کی ملاقات نبی اکرم صلی اللہ علیہ وسلم سے ہوئی ، نبی اکرم صلی اللہ علیہ وسلم نے ان کا ہاتھ پکڑا اور انہیں ساتھ لے کر مسجد میں داخل ہوئے ، تو وہاں ایک صاحب کے تلاوت کرنے کی آواز آ رہی تھی ، نبی اکرم صلی اللہ علیہ وسلم نے دریافت کیا : کیا تم اس کے بارے میں یہ رائے رکھتے ہو کہ یہ دکھاوا کر رہا ہے ؟ تو سیدنا بریدہ رضی اللہ عنہ خاموش رہے ، پھر اس شخص نے دعا کرنا شروع کی اور یہ کہا: ” اے اللہ ! میں تجھ سے سوال کرتا ہوں اس واسطے سے کہ میں یہ گواہی دیتا ہوں ، بے شک تو وہ اللہ ہے کہ تیرے علاوہ اور کوئی معبود نہیں ہے ، تو ایک ہے ، تو بے نیاز ہے ، تو وہ ہے کہ کسی کو اس نے جنم نہیں دیا ہے اور نہ ہی اُس کو جنم دیا گیا اور اس کا کوئی ہمسر نہیں ہے ۔ “ تو نبی اکرم صلی اللہ علیہ وسلم نے فرمایا : اس ذات کی قسم ! جس کے دست قدرت میں میری جان ہے ( راوی کو شک ہے شاید یہ الفاظ ہیں : ) اس ذات کی قسم ! جس کے دست قدرت میں محمد کی جان ہے ، اس نے اللہ تعالیٰ سے اُس کے اسم اعظم کے وسیلے سے دعا کی ہے کہ جب اُس اسم اعظم کے وسیلے سے مانگا جائے ، تو اللہ تعالیٰ عطا کرتا ہے ، اور جب دعا کی جائے تو اللہ تعالیٰ قبول کرتا ہے ۔ راوی کہتے ہیں : جب اگلی رات آئی ، تو سیدنا بریدہ رضی اللہ عنہ عشاء کے بعد نکلے ، نبی اکرم صلی اللہ علیہ وسلم کی ان سے ملاقات ہوئی ، نبی اکرم صلی اللہ علیہ وسلم نے ان کا ہاتھ پکڑا اور انہیں مسجد میں لے گئے ، تو وہاں ایک شخص کے تلاوت کرنے کی آواز آ رہی تھی ، نبی اکرم صلی اللہ علیہ وسلم نے فرمایا : کیا تم اس کے بارے میں یہ رائے رکھتے ہو کہ یہ دکھاوا کر رہا ہے ؟ سیدنا بریدہ رضی اللہ عنہ نے عرض کی : یا رسول اللہ ! کیا آپ یہ کہتے ہیں کہ یہ دکھاوا کرنے والا ہے ؟ نبی اکرم صلی اللہ علیہ وسلم نے فرمایا : جی نہیں ! بلکہ یہ فرمانبردار مومن ہے ، جی نہیں ! بلکہ یہ فرمانبردار مومن ہے ، راوی کہتے ہیں : تو وہ سیدنا ابوموسیٰ اشعری رضی اللہ عنہ تھے ، جو تلاوت کر رہے تھے اور مسجد کے کونے سے اُن کی آواز آ رہی تھی ، نبی اکرم صلی اللہ علیہ وسلم نے ارشاد فرمایا : ” اشعری کو ( راوی کو شک ہے ، شاید یہ الفاظ ہیں : ) عبداللہ بن قیس کو سیدنا داؤد علیہ السلام کی سی خوش الحانی عطا کی گئی ہے ۔ “ میں نے عرض کی : یا رسول اللہ ! کیا میں انہیں بتاؤں نہیں ؟ نبی اکرم صلی اللہ علیہ وسلم نے فرمایا : جی ہاں ! تم اسے بتاؤ ، میں نے انہیں بتایا ، تو سیدنا ابوموسیٰ اشعری رضی اللہ عنہ نے فرمایا : تم میرے دوست ہو ، تم نے نبی اکرم صلی اللہ علیہ وسلم کے حوالے سے ایک بات مجھے بتائی ہے ۔
یہ روایت امام أحمد نے نقل کی ہے ” صحیح “ میں اس میں سے یہ الفاظ منقول ہیں : ” بے شک عبداللہ بن قیس کو آل داؤد کی خوش الحانی میں سے حصہ عطا کیا گیا ہے ۔ “ اور یہاں یہ الفاظ ہیں : ” سیدنا داؤد علیہ السلام کی خوش الحانی میں سے حصہ عطا کیا گیا ہے ۔ امام أحمد کے رجال صحیح کے رجال ہیں ۔

سیدنا محجن بن ادرع رضی اللہ عنہ بیان کرتے ہیں : نبی اکرم صلی اللہ علیہ وسلم نے میرا ہاتھ پکڑا یہاں تک کہ آپ اُحد پہاڑ پر چڑھ گئے پھر آپ نے مدینہ منورہ کی طرف دیکھا اور فرمایا : اس کی ماں کی بربادی ہے ، یہ ایک بستی ہے ، جس کے رہنے والے اسے چھوڑ جائیں گے ، جبکہ یہ آباد ہو چکی ہو گی ، دجال اس کے پاس آئے گا ، تو وہ اس کے ہر راستے پر فرشتے کو تلوار سونتے ہوئے پائے گا ، پھر نبی اکرم صلی اللہ علیہ وسلم وہاں سے اُترے آپ مسجد میں آ گئے ، وہاں ایک شخص کھڑا ہوا نماز ادا کر رہا تھا اور تلاوت کر رہا تھا ، نبی اکرم صلی اللہ علیہ وسلم نے فرمایا : عبداللہ بن قیس کے بارے میں تمہارا کیا خیال ہے ؟ یہ ایک نیک بردبار شخص ہے ، میں نے عرض کی : یا رسول اللہ ! کیا میں انہیں خوشخبری نہ دوں ؟ نبی اکرم صلی اللہ علیہ وسلم نے فرمایا : تم اس سے بچو کہ تم اسے یہ بات سنا کر اسے ہلاکت کا شکار کر دو ۔ راوی کہتے ہیں : پھر وہ چلے گئے ، یہاں تک کہ ہم لوگ مسجد میں آ گئے ، ہم نے سیدنا بریدہ اسلمی رضی اللہ عنہ کو مسجد کے دروازے پر پایا ، مسجد میں ایک شخص تھا ، جو طویل نماز ادا کر رہا تھا ، سیدنا بریدہ رضی اللہ عنہ کے مزاج میں مزاح کا عنصر تھا ، انہوں نے فرمایا : اے محجن ! کیا تم اس طرح نماز نہیں ادا کرو گے جس طرح سکیہ نماز ادا کر رہا ہے ؟ تو انہوں نے کوئی جواب نہیں دیا اور واپس چلے گئے ، جب وہ اپنے گھر آئے تو انہوں نے کہا: ہمارے دین میں سب سے بہتر وہ ہے جو زیادہ آسان ہو ، تمہارے دین میں سب سے زیادہ بہتر وہ ہے جو زیادہ آسان ہو ، تمہارے دین میں سب سے زیادہ بہتر وہ ہے جو زیادہ آسان ہو ، تمہارے دین میں سب سے زیادہ بہتر وہ ہے جو زیادہ آسان ہو ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف رجاء بن ابورجاء کا معاملہ مختلف ہے اور ابن حبان نے اسے ثقہ قرار دیا ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ابوموسیٰ کو سیدنا داؤد علیہ السلام کی خوش الحانی میں سے حصہ دیا گیا ہے ۔ “
( علامہ ہیثمی فرماتے ہیں : ) میں یہ کہتا ہوں :
یہ روایت امام ابن ماجہ نے نقل کی ہے ، تاہم انہوں نے یہ الفاظ نقل کئے ہیں : ” آل داؤد کی خوش الحانی میں سے ۔ ۔ ۔ ۔ ۔ ۔ ۔ “ ۔ اور یہاں یہ الفاظ ہیں : ” سیدنا داؤد علیہ السلام کی خوش الحانی میں سے ۔ ۔ ۔ ۔ ۔ ۔ ۔ “ ۔
یہ روایت امام أحمد نے نقل کی ہے اور اس کے رجال صحیح کے رجال ہیں ، صرف محمد بن عمرو کا معاملہ مختلف ہے اور وہ حسن الحدیث ہے ۔

سیدنا سلمہ بن قیس رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر سیدنا ابوموسیٰ اشعری رضی اللہ عنہ کے پاس سے ہوا ، وہ تلاوت کر رہے تھے ، تو نبی اکرم صلی اللہ علیہ وسلم نے ارشاد فرمایا : ” اسے آل داؤد کی خوش الحانی میں سے حصہ دیا گیا ہے ۔ “
یہ روایت امام طبرانی نے نقل کی ہے اور اس کی سند عمدہ ہے ۔

سیدنا ابوموسیٰ اشعری رضی اللہ عنہ بیان کرتے ہیں : ایک مرتبہ رات کے وقت نبی اکرم صلی اللہ علیہ وسلم سیدنا ابوموسیٰ اشعری رضی اللہ عنہ کے پاس سے گزرے سیدنا ابوموسیٰ رضی اللہ عنہ اس وقت تلاوت کر رہے تھے ، نبی اکرم صلی اللہ علیہ وسلم کے ساتھ سیدہ عائشہ رضی اللہ عنہا بھی تھیں ، یہ دونوں کھڑے ہو کر ان کی قرأت غور سے سننے لگے اور پھر یہ دونوں تشریف لے گئے ، اگلے دن جب صبح سیدنا ابوموسیٰ اشعری رضی اللہ عنہ کی ملاقات نبی اکرم صلی اللہ علیہ وسلم سے ہوئی ، تو نبی اکرم صلی اللہ علیہ وسلم نے ان سے فرمایا : اے ابوموسیٰ ! گزشتہ رات میں تمہارے پاس سے گزرا تھا ، میرے ساتھ عائشہ تھی ، تم اس وقت اپنے گھر میں تلاوت کر رہے تھے ، تو ہم کھڑے ہو کر تمہاری تلاوت غور سے سنتے رہے تھے ، سیدنا ابوموسیٰ رضی اللہ عنہ نے عرض کی : اے اللہ کے نبی ! اگر مجھے آپ کی موجودگی کا علم ہوتا ، تو میں آپ کی خاطر اسے اور بنا سنوار کر ( تلاوت ) کرتا ۔
( علامہ ہیثمی فرماتے ہیں ) میں یہ کہتا ہوں : ” صحیح“ میں اس روایت کا ایک حصہ مذکور ہے ۔
یہ روایت امام طبرانی نے نقل کی ہے اور اس کے رجال صحیح کی شرط کے مطابق ہیں ، صرف خالد بن نافع اشعری کا معاملہ مختلف ہے ابن حبان نے اسے ثقہ قرار دیا ہے اور ایک جماعت نے اسے ضعیف کہا: ہے ۔

سیدنا انس رضی اللہ عنہ بیان کرتے ہیں : سیدنا ابوموسیٰ اشعری رضی اللہ عنہ اپنے گھر میں بیٹھے تھے ، لوگ ان کے پاس اکٹھے ہوئے ، انہوں نے ان لوگوں کے سامنے قرآن پڑھنا شروع کیا ، راوی کہتے ہیں : ایک شخص نبی اکرم صلی اللہ علیہ وسلم کے پاس آیا اور بولا: یا رسول اللہ ! کیا آپ کو سیدنا ابوموسیٰ رضی اللہ عنہ پر حیرانگی نہیں ہو رہی ؟ وہ اپنے گھر میں بیٹھے ہیں ، لوگ ان کے پاس اکٹھے ہوئے ہیں اور وہ ان لوگوں کے سامنے قرآن پڑھ رہے ہیں ، تو نبی اکرم صلی اللہ علیہ وسلم نے ارشاد فرمایا : کیا تم یہ استطاعت رکھتے ہو ؟ کہ تم مجھے کسی ایسی جگہ پر بٹھا دو جہاں اُن میں سے کوئی مجھے نہ دیکھ سکے ، اس شخص نے کہا: ٹھیک ہے ، پھر نبی اکرم صلی اللہ علیہ وسلم تشریف لے گئے ، اس شخص نے آپ کو ایک ایسی جگہ بٹھا دیا ، جہاں اُن میں سے کوئی آپ کو نہیں دیکھ سکتا تھا ، نبی اکرم صلی اللہ علیہ وسلم سیدنا ابوموسیٰ رضی اللہ عنہ کی قرأت سنتے رہے ، راوی بیان کرتے ہیں : پھر نبی اکرم صلی اللہ علیہ وسلم نے ارشاد فرمایا : ” یہ آل داؤد کی خوش الحانی کی طرح تلاوت کر رہا ہے ۔ “
یہ روایت امام ابویعلیٰ نے نقل کی ہے اور اس کی سند حسن ہے ۔

سیدنا براء رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا ابوموسیٰ اشعری رضی اللہ عنہ کو تلاوت کرتے ہوئے سنا تو آپ صلی اللہ علیہ وسلم نے ارشاد فرمایا : ” اس شخص کی آواز آل داؤد کی خوش الحانی میں سے ایک ہے ۔ “
یہ روایت امام ابویعلیٰ نے نقل کی ہے اور اس کے رجال کی توثیق کی گئی ہے اور ان میں اختلاف پایا جاتا ہے ۔

عبدالرحمن بن کعب بن مالک بیان کرتے ہیں : نبی اکرم صلی اللہ علیہ وسلم نے سیدنا ابوموسیٰ اشعری رضی اللہ عنہ سے ارشاد فرمایا : آپ نے انہیں تلاوت کرتے ہوئے سنا تھا ، پھر آپ صلی اللہ علیہ وسلم نے فرمایا : ” تمہارے بھائی کو آل داؤد کی خوش الحانی میں سے حصہ عطا کیا گیا ہے ۔ “
یہ روایت امام طبرانی نے ” مرسل “ روایت کے طور پر نقل کی ہے اور اس کے رجال صحیح کے رجال ہیں ۔

امام شعبی بیان کرتے ہیں : سیدنا عمر رضی اللہ عنہ نے اپنی وصیت میں یہ لکھا تھا : ” میرے مقرر کردہ کسی بھی اہلکار کو ایک سال سے زیادہ اپنے عہدے پر نہ رہنے دینا اور اشعری کو چار سال تک اس کے عہدے پر برقرار رکھنا “ ۔
یہ روایت امام أحمد نے حسن سند کے ساتھ نقل کی ہے ، البتہ امام شعبی نے سیدنا عمر رضی اللہ عنہ سے سماع نہیں کیا ہے ۔