مجمع الزوائد ومنبع الفوائد

امام طبرانی بیان کرتے ہیں : یہ سیدنا خالد بن ولید رضی اللہ عنہ ہیں ، ان کی کنیت ابوسلیمان ہے ، ان کا ( نام و نسب یہ ہے : ) سیدنا خالد بن ولید رضی اللہ عنہ بن مغیرہ بن عبداللہ بن عمر بن مخزوم بن يقظہ بن مرہ بن کعب بن لؤی بن غالب بن فہر بن مالک ، ان کی والده لبابہ بنت حارث بن حزن بن بجیر بن ہزم بن رویبہ بن عبداللہ بن ہلال بن عامر بن صعصعہ ہیں ، نبی اکرم صلی اللہ علیہ وسلم نے انہیں ” اللہ کی تلوار “ کا نام ( یا لقب ) دیا تھا ۔

سیدنا وحشی بن حرب رضی اللہ عنہ بیان کرتے ہیں : سیدنا ابوبکر رضی اللہ عنہ نے مرتدین کے خلاف جنگ کرنے کے لئے سیدنا خالد بن ولید رضی اللہ عنہ کو امیر مقرر کیا اور یہ بات بیان کی کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اللہ کا بہترین بندہ اور اپنے خاندان کا بہترین فرد خالد بن ولید ہے ، جو اللہ کی تلواروں میں سے ایک تلوار ہے ، جسے اللہ تعالیٰ نے کافروں اور منافقین کے خلاف میان سے نکالا ہوا ہے ۔ “
یہ روایت امام أحمد نے نقل کی ہے اور امام طبرانی نے اس کی مانند نقل کی ہے اور ان دونوں روایات کے رجال ثقہ ہیں ۔

عبدالملک بن عمیر بیان کرتے ہیں : سیدنا عمر رضی اللہ عنہما نے سیدنا ابوعبیدہ رضی اللہ عنہ کو شام کا گورنر مقرر کیا تھا ، انہوں نے سیدنا خالد بن ولید رضی اللہ عنہ کو معزول کر دیا تھا ۔ راوی کہتے ہیں : تو سیدنا خالد بن ولید رضی اللہ عنہ نے یہ کہا: تمہارا امیر اس فرد کو مقرر کیا گیا ہے ، جو اس امت کا امین ہے ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اس امت کا امین ابوعبیدہ بن جراح ہے ۔ “ تو سیدنا ابوعبیدہ رضی اللہ عنہ نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” خالد ، اللہ کی تلواروں میں سے ایک تلوار اور اپنے خاندان کا بہترین فرد ہے ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ، البتہ عبدالملک بن عمیر نے نہ تو سیدنا ابوعبیدہ رضی اللہ عنہ کا زمانہ پایا ہے اور نہ ہی سیدنا عمر رضی اللہ عنہ کا زمانہ پایا ہے ۔

ناشرہ بن سمی یزنی بیان کرتے ہیں : میں نے ” جابیہ “ کے دن سیدنا عمر بن خطاب رضی اللہ عنہ کو جمعہ کے دن خطبہ دیتے ہوئے ، یہ ارشاد فرماتے ہوئے سنا : خالد بن ولید کو معزول کرنے کے حوالے سے ، میں تمہارے سامنے عذر بیان کرنا چاہتا ہوں ، میں نے اسے یہ ہدایت کی تھی کہ وہ یہ مال کمزور مہاجرین کے لئے سنبھال کے رکھے ، اور اس نے یہ مال طاقتور لوگوں ، مشرف والے لوگوں اور عمدہ کلام کرنے والے لوگوں کو دے دیا ، تو میں نے اسے معزول کر دیا اور ابوعبیدہ بن جراح کو والی مقرر کر دیا ۔ اس پر ابوعمرو بن حفص بن مغیرہ نے کہا: اے عمر بن خطاب ! اللہ کی قسم ! یہ کوئی عذر نہیں ہے ، آپ نے ایک ایسے عامل کو اس کے عہدے سے الگ کیا ہے جسے اللہ کے رسول صلی اللہ علیہ وسلم نے عامل مقرر کیا تھا ، اور آپ نے ایک ایسی تلوار کو میان میں ڈال دیا ہے ، جسے اللہ کے رسول صلی اللہ علیہ وسلم نے میان میں سے نکالا تھا ، اور آپ نے ایک ایسے جھنڈے کو نیچے کر دیا ہے ، جسے اللہ کے رسول صلی اللہ علیہ وسلم نے نصب کیا تھا ، آپ نے رشتے داری کے حقوق کو پامال کیا ہے اور اپنے چچازاد سے حسد کیا ہے ، تو سیدنا عمر بن خطاب رضی اللہ عنہ نے فرمایا : تمہاری اس کے ساتھ رشتہ داری ہے ، تمہاری عمر بھی کم ہے اور تم اپنے چچازاد کی طرف داری کر رہے ہو ۔
یہ روایت امام أحمد نے نقل کی ہے اور امام طبرانی نے اس کی مانند نقل کی ہے اور ان دونوں کے رجال ثقہ ہیں ۔

سیدنا عبداللہ بن ابواوفیٰ رضی اللہ عنہ بیان کرتے ہیں : سیدنا عبدالرحمن بن عوف رضی اللہ عنہ نے نبی اکرم صلی اللہ علیہ وسلم کے سامنے سیدنا خالد بن ولید رضی اللہ عنہ کی شکایت کی تو نبی اکرم صلی اللہ علیہ وسلم نے فرمایا : اے خالد ! تم ایسے شخص کو اذیت نہ پہنچاؤ ، جو غزوہ بدر میں شرکت کر چکا ہے ، اگر تم اُحد پہاڑ جتنا سونا خیرات کرو ، تو تم پھر بھی اس کے عمل تک نہیں پہنچ سکتے ، سیدنا خالد رضی اللہ عنہ نے کہا: وہ لوگ مجھ پر تنقید کرتے ہیں ، تو میں انہیں جواب دیتا ہوں ، نبی اکرم صلی اللہ علیہ وسلم نے فرمایا : تم لوگ خالد کو اذیت نہ پہنچاؤ ، کیونکہ وہ اللہ تعالیٰ کی تلواروں میں سے ایک تلوار ہے جسے اللہ تعالیٰ نے کفار پر سونت کر رکھا ہوا ہے ۔
یہ روایت امام طبرانی نے معجم صغیر میں نقل کی ہے اور معجم کبیر میں اختصار کے ساتھ نقل کی ہے ، امام بزار نے اس کی مانند روایت نقل کی ہے طبرانی کے رجال ثقہ ہیں ۔

قیس بن ابوحازم بیان کرتے ہیں : مجھے یہ بات بتائی گئی ہے : نبی اکرم صلی اللہ علیہ وسلم نے ارشاد فرمایا : ” تم لوگ خالد کو برا نہ کہو ، کیونکہ وہ اللہ کی تلواروں میں سے ایک تلوار ہے ، جسے اللہ تعالیٰ نے کفار پر سونتا ہوا ہے ۔ “
یہ روایت امام ابویعلیٰ نے نقل کی ہے ، انہوں نے صحابی کا نام بیان نہیں کیا ہے اور اس کے رجال صحیح کے رجال ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے منبر پر غزوہ موتہ میں شہید ہونے والوں کی شہادت کی اطلاع دی اور پھر یہ ارشاد فرمایا : پھر جھنڈا اللہ کی تلواروں میں سے ایک تلوار نے پکڑ لیا ۔ ۔ ۔ ۔ ۔ ۔ “ ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا عبداللہ بن جعفر رضی اللہ عنہ بیان کرتے ہیں : جب نبی اکرم صلی اللہ علیہ وسلم نے جنگ موتہ میں شہید ہونے والوں کے بارے میں اطلاع دی تو آپ صلی اللہ علیہ وسلم نے فرمایا : ” پھر جھنڈا اللہ کی تلواروں میں سے ایک تلوار خالد بن ولید نے لیا ، اور اللہ تعالیٰ نے اس کے ہاتھ پر فتح نصیب کی ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف عبداللہ بن أحمد بن حنبل کا معاملہ مختلف ہے اور وہ امام ، ثبت ہے ۔

جعفر بن عبداللہ بن حکم بیان کرتے ہیں : سیدنا خالد بن ولید رضی اللہ عنہ کی ٹوپی جنگ یرموک کے دن گم ہو گئی ، انہوں نے فرمایا : تم لوگ اسے تلاش کرو ، لوگوں کو وہ نہیں ملی ، تو انہوں نے فرمایا : تم لوگ اسے تلاش کرو ، لوگوں نے تلاش کیا تو انہیں وہ مل گئی ، وہ ایک پرانی سی ٹوپی تھی ، سیدنا خالد بن ولید رضی اللہ عنہ نے بتایا کہ جب نبی اکرم صلی اللہ علیہ وسلم نے عمرہ کے موقع پر اپنا سر مونڈوایا تھا ، تو لوگ آپ کے اطراف کے بال لینے کے لئے لپکے تھے ، اور میں ان لوگوں سے سبقت لے گیا اور آپ کی پیشانی کے بال حاصل کر لیے اور وہ اس ٹوپی میں رکھ دیے ، تو میں جس بھی جنگ میں شریک ہوتا ہوں ، تو یہ ٹوپی میرے پاس ہو تو مجھے کامیابی نصیب ہوتی ہے ۔
یہ روایت امام طبرانی نے نقل کی ہے اور امام ابویعلیٰ نے اس کی مانند نقل کی ہے اور ان دونوں کے رجال صحیح کے رجال ہیں ، جعفر نامی راوی نے صحابہ کرام کی ایک جماعت سے سماع کیا ہے ، لیکن مجھے یہ نہیں معلوم کہ اس نے سیدنا خالد رضی اللہ عنہ سے سماع کیا ہے یا نہیں کیا ہے ؟

سیدنا عمرو بن العاص رضی اللہ عنہ بیان کرتے ہیں : جب سے ہم نے اسلام قبول کر لیا ، تو جنگ کے معاملات میں ، نبی اکرم صلی اللہ علیہ وسلم نے کسی کو میرے اور خالد بن ولید کے برابر نہیں سمجھا ۔
یہ روایت امام طبرانی نے معجم اوسط اور معجم کبیر میں نقل کی ہے اور اس کے رجال ثقہ ہیں ۔

ابوالسفر بیان کرتے ہیں : سیدنا خالد بن ولید رضی اللہ عنہ حیرہ کے مقام پر بنومرازبہ کے امیر کے پاس گئے ، لوگوں نے ان سے کہا: آپ اس بات سے احتیاط کیجئے گا کہ کہیں عجمی لوگ آپ کو زہر نہ پلا دیں ، انہوں نے فرمایا : تم لوگ میرے پاس وہ لے کر آؤ ، پھر انہوں نے اپنے ہاتھ میں اس پیالے کو پکڑا اور اسے پی لیا ، انہوں نے بسم اللہ پڑھی تھی ، تو انہیں کوئی نقصان نہیں ہوا ۔
یہ روایت امام ابویعلیٰ نے نقل کی ہے اور امام طبرانی نے اس کی مانند نقل کی ہے ، امام طبرانی کی دو اسناد میں سے ایک کے رجال صحیح کے رجال ہیں اور
یہ روایت متصل ہے اور ان دونوں کے رجال ثقہ ہیں ، البتہ ابوالسفر اور ابوبردہ بن ابوموسیٰ نامی راویوں نے سیدنا خالد رضی اللہ عنہ سے سماع نہیں کیا ہے ، باقی اللہ بہتر جانتا ہے ۔

قیس بن ابوحازم بیان کرتے ہیں : سیدنا خالد بن ولید رضی اللہ عنہ نے فرمایا : ” جس رات میں ، میرے گھر میں دلہن لائی جائے ، جس عورت سے میں محبت کرتا ہوں ، اور پھر مجھے یہ بھی خوشخبری دی جائے کہ اس عورت سے میرے ہاں بیٹا ہو گا ، وہ رات میرے نزدیک اُس رات سے زیادہ پسندیدہ نہیں ہو گی ، جو سخت رات ہو اور اس میں مہاجرین کی کوئی جنگی مہم ہو اور اگلے دن صبح دشمن پر حملہ کرنا ہو ۔ “
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔

قیس بن ابوحازم بیان کرتے ہیں : سیدنا خالد بن ولید رضی اللہ عنہ نے فرمایا : اللہ کی راہ میں جہاد کرنے نے مجھے زیادہ قرأت کرنے سے روکے رکھا ہے ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔

ابووائل بیان کرتے ہیں : سیدنا خالد بن ولید رضی اللہ عنہ کی وفات کا وقت قریب آیا ، تو انہوں نے فرمایا : میں نے شہید ہونے کی کوشش کی ، لیکن وہ مجھے نصیب نہیں ہوئی ، اب یہی ہے کہ میں اپنے بستر پر مر جاؤں گا اور میرے عمل میں کوئی ایسا عمل نہیں ہے ، جو لا الہ الا اللہ سے زیادہ قابل وثوق ہو ، میں نے اس کے ذریعے ڈھال بنائی ہوئی ہے ۔ پھر انہوں نے فرمایا : جب میں مر جاؤں گا ، تو تم میرے ہتھیار اور گھوڑے کو لے کر ، اسے اللہ کی راہ میں دیدینا ۔
یہ روایت امام طبرانی نے نقل کی ہے اور اس کی سند حسن ہے ۔

یونس بن ابواسحاق بیان کرتے ہیں : لوگ سیدنا خالد بن ولید رضی اللہ عنہ کی عیادت کرنے کے لئے ان کے پاس آئے ، تو کسی نے کہا: یہ سبقت لے جانے والے لوگوں میں سے ایک ہیں ، تو انہوں نے فرمایا : جی ہاں ! اللہ کی قسم ! میں اس حوالے سے مدد چاہوں گا ۔
یہ روایت امام طبرانی نے نقل کی ہے اور اس کی سند منقطع ہے اور اس کے رجال ثقہ ہیں ۔

محمد بن عبداللہ بن نمیر بیان کرتے ہیں : سیدنا خالد بن ولید رضی اللہ عنہ کا انتقال ” حمص “ کے مقام پر 21 ہجری میں ہوا تھا ۔
یہ روایت امام طبرانی نے نقل کی ہے ۔